2 февраль куни Ўзбекистон мусулмонлари идорасида Ўзбекистондаги Ислом цивилизацияси маркази директори Шоазим Миноваров Эрон Ислом Республикасининг Ўзбекистондаги Фавқулодда ва Мухтор Элчиси Баҳман Оғозорий Дўрмоний билан учрашди.
Шоазим Миноваров элчи жанобларини ташриф билан қутлаб, Ўзбекистон ва Эрон давлатлари ўртасидаги ҳамкорлик муносабатлари тараққий этиб бораётганини, икки мамлакат ва халқларнинг маданиятлари ва анъаналаридаги умумий томонларни таъкидлади. Ўзбекистон Республикаси Президентининг ташаббуси билан ташкил этилаётган Ўзбекистондаги Ислом цивилизацияси марказининг мақсадлари ва вазифалари тўғрисида меҳмонга ахборот берди. Жумладан, асосий кўзланган мақсад ислом динининг асл моҳияти тинчлик, илмга даъват қилиш ва бунёдкорлик эканини жамият аъзолари ва хорижликларга етказиш экани қайд қилинди. Маҳобатли бинода жойлашадиган Ислом цивилизацияси марказида Ислом академияси, илмий кутубхона, музей ва қўлёзмалар фонди ташкил этилиши баён этилди. Мезбон, шунингдек, зиёрат туризмини ташкил этиш бўйича ишлар жадал кетаётгани ва бу борада Ўзбекистон делегацияси тажриба алмашиш учун турли давлатларда бўлиб қайтганини айтиб, Эрон давлатидан ҳам сайёҳларни жалб этиш ҳар икки томон учун ҳам фойдали бўлишини таъкидлади.
Ўзининг жавоб сўзида элчи Баҳман Оғозорий жаноблари Ўзбекистон Раҳбарининг ташаббусини маъқуллади ва Ислом цивилизацияси маркази фаолиятини ташкил этишда Эрон томони ёрдамга тайёр эканини, Эронда сақланаётган қўлёзмалар ва нодир ёдгорликлар, Эроннинг қўлёзмалар ва музейлар фаолияти соҳаларидаги тажрибаси билан ўзбекистонлик мутахассисларни таништиришга, шунингдек, бинога безак бериш жараёни бошланганида Исфаҳондан кошин ва ўймакорлик соҳаларида уста-мутахассисларни юборишга тайёр эканини маълум қилди.
Эрон элчиси сўзида давом этиб, ўзбекистонлик мутахассислар делегациясини Эроннинг Теҳрон, қадимий Исфахон ва Шероз шаҳарларидаги қўлёзмалар билан шуғулланувчи марказлар ва кутубхоналарнинг ишлари билан танишишга, улар билан ҳамкорлик шартномалари тузишга даъват этди. Юбориладиган делегациялар аъзолари учун Эрон томони барча шароитларни яратиб беришга тайёрлигини таъкидлади.
Учрашув дўстона ва самимий руҳда ўтди.

Ўзбекистон мусулмонлари идораси Матбуот хизмати.

Бир муаллиф хонасида ўтирар эди. Қўлига қаламини олдида ёза бошлади.

“Ўтган йили ўт пуфагимни олиб ташлаш жарроҳлик амалиётини бошимдан ўтказдим. Шундан кейин бир неча ой тўшакка михланиб қолдим. Ёшим олтмишдан ўтибди. Нашриётдаги ўттиз йилдан бери қилиб келаётган муҳим ишим ҳам ўлда–жўлда қолиб кетди. Отам вафот этди. Ўғлим автоҳалокатга учрагани сабабли бир неча ой дарсларга иштирок этмай, ўқишидан қолиб кетди...”

У саҳифанинг ниҳоясида: “Эҳ, бу йил нақадар ёмон йил бўлди”, дея якунлади.

Шу пайт унинг аёли хонага кириб келди. Эрининг ҳаёли тарқоқ, паришон ҳолда кўрди. Курсига ўтирганча чуқур ҳаёл саҳросида кезиб юрган муаллиф аёлини кирганини ҳам сезмади. Аёлнинг кўзи эри ёзган кечинмаларга тушди. Унга ҳеч нарса демай аста хонани тарк этди. Бир неча дақиқадан кейин қўлида бошқа вароқни тутганча унинг ёнига қайтди. Ва эри ёзган вароқ олдига асталик билан қўйди. Эр хотинининг қоғозини қўлига олдида ўқий бошлади.

“Азизим! Ўтган йили, узоқ йиллар ўт пуфаги туфайли чекаётган аламли оғриқдан буткул шифо топдингиз. Олтмиш ёшга тўлдингиз ва сиз ҳозир тамомила соғ– саломатсиз. Яна сиз билан муҳим китоблар бўйича шартнома, битимлар тузилгач, барча учун манфаатли китобларни ёзишга киришасиз. Отангиз узоқ умр кўрди. Бирор кишига оғирлиги тушмасдан минг ойнинг юзини кўрди. Ўғлингиз автоҳалокатдан қутилиб қолди. Ҳеч қандай жисмоний камчиликсиз, майиб бўлмай соғайиб кетди...

Аёл ўзининг ибораларини ушбу сўзлар билан якунлади.

“Эҳ, нақадар ажойиб йил! Қийинчилик устидан бахтли ҳаёт ғолиб бўлган йил... Ҳар қандай ҳолда Аллоҳга ҳамд бўлсин!

Биз доим, етиша олмаган ва эга бўлмаган нарсаларга назар соламиз. Шу сабаб, ўзимиздаги ғам–ташвишлар билан овора бўлиб Аллоҳга шукур қилишни унутамиз.

Доимо биздан тортиб олинган нарсаларга қараймиз. Шу сабаб, бизга берилган неъматлар учун Аллоҳга ҳамд айтишни унутамиз. Аллоҳ таоло бундай марҳамат қилади: «Албатта Раббингиз оламларга нисбатан фазллидир. Лекин уларнинг аксарияти шукр қилмайдилар» (Намл сураси, 73-оят).

 Аллоҳ таоло сени бахтиёр этиш учун, сени қийинчилик ва оғир машаққатларга рўбарў қилади. Сени мукофотлаш учун сени айрим нарсалардан тақиқлайди. Сени кулдириш учун ғоҳида кўз ёш тўкдиради. Сени энг афзал мақомга қўйиш учун, гоҳида сени баъзи нарсалардан маҳрум қилади. Сени яхши кўргани учун баъзи қийинчиликлар билан синаб кўради.

Авазхўжа БАХРОМОВ 

Тошкент тумани “Холмуҳаммад ота” жоме масжиди имом-хатиби

ЎМИ Матбуот хизмати