muslim.uz
H&M “Аллоҳ” сўзига ўхшаш нақш туширилган пайпоқларни сотувдан олди
Швециянинг энг йирик компанияларидан бири ҳисобланган H&M мусулмонлардан келиб тушган кўп сонли шикоятлар асосида болалар пайпоқларини дўкон расталаридан қайтариб олмоқда.
Эътиборли харидорлар бу пайпоқлардаги нақшлар араб тилидаги “Аллоҳ” сўзига ўхшашани айтиб, шикоят қилишган. Бу ҳақда Британиянинг “Daily Mirror” газетасига асосланиб “kun.uz” хабар берди.
Манбада келтирилишича, пайпоқларда Lego конструкторидан ясалган, қўлида қурилиш асбобини ушлаб турган қурувчи тасвирланган. Унинг учидан эса “шубҳали” нақш кўриниб турибди.
H&M компанияси расмий вакили Петр Бушингернинг таъкидланишича, бу мутлақо тасодиф. “Пайпоқлардаги сурат араб тилидаги “Аллоҳ” сўзига ўхшаши мутлақо тасодиф, - дейди у. - Бироқ мижозларимизнинг шикоятлари сабаб бу товарни сотувдан олишга қарор қилдик”.
Таъкидлаш жоизки, бу швед компаниясининг сўнгги вақтларда дуч келаётган биринчи можароси эмас. Шу ойнинг бошида “Жунглидаги энг зўр маймун” ("Coolest Monkey In The Jungle") ёзуви туширилган свитер кийган қора танли боланинг реклама сурати жуда кўп баҳс-мунозараларга сабаб бўлганди. Африкалик келиб чиқишга эга аксарият кишилар мазкур контекстда маймуннинг тилга олинишини ирқчилик кўриниши дея баҳолашди. Охир-оқибат компания ушбу реклама плакатидан воз кечди ва жамоатчиликдан узр сўради.
ЎМИ Матбуот хизмати
Муфтий Усмонхон Алимов Россия муфтийлар кенгаши раисига мактуб йўллади
Россия Федерацияси мусулмонлари диний идораси, Россия муфтийлар кенгаши раиси, Россия Федерацияси Президенти ҳузуридаги
Диний бирлашмалар билан алоқалар Кенгаши аъзоси,
муфтий шайх Равил Гайнутдин жаноблари!
Муҳтарам муфтий ҳазратлари,
Ўзбекистон Ислом академияси давлат рўйхатидан ўтиб, гувоҳнома олиши муносабати билан Россия Федерацияси мусулмонлари диний идораси ва Россия муфтийлар кенгаши номидан йўллаган табригингиздан кўнглимиз тоғдек кўтарилди. Мамлакатимиздаги ушбу улкан янгиликни Россия мусулмонлари қўллаб-қувватлагани мўмин-мусулмонларимиз қувончини янада оширди.
Сизнинг Ўзбекистон Ислом академияси ташкил этилиши муносабати билан йўллаган илиқ сўзларингиз оммавий ахборот воситалари орқали халқимизга етказилганда ҳамма бирдек мамнун бўлди. Айниқса, Имом Бухорий, Имом Термизий даврида бўлгани каби бугун муҳтарам Президентимиз Шавкат Мирзиёев қўллаб-қувватлови билан юртимизда исломий олий таълимнинг шонли анъаналари қайта тикланаётгани ҳақидаги фикрларингиз барчамизни жуда ҳам шодлантириб юборди.
Самимий тилакларингизда, Ислом академиясининг динимиз манфаати йўлида муваффақиятли фаолият олиб боришини билдирганингиз учун ташаккур. Биз ҳам ўз навбатида Ислом академияси ишини ривожлантириш, касбий ва илмий салоҳиятни оширишда Сизнинг вакилларингизни кўришдан бахтиёр бўлишимизни изҳор қиламиз.
Ўзбекистон мусулмонлари идораси ва мўмин-мусулмонлар номидан Сиз жаноби олийларига, жамоангизга мана шундай хурсандчилик кунларда чин қалбдан бирга-бирга эканингиз учун самимий миннатдорлик билдирамиз.
Биродаримга энг эзгу тилаклар ва юксак эҳтиром ила,
Ўзбекистон мусулмонлари
идораси раиси, муфтий Усмонхон АЛИМОВ
ЎМИ Матбуот хизмати
Самарқанд шаҳрида Ислом Каримов мақбараси очилди
Мамлакатимизнинг Биринчи Президенти, буюк давлат ва сиёсат арбоби Ислом Каримов ўз васиятига кўра, Самарқанд шаҳридаги Ҳазрати Хизр мажмуаси ёнида дафн этилган эди.
Президенти Шавкат Мирзиёев ташаббуси билан бу ерда Биринчи Президентимизнинг давлатимиз ва халқимиз олдидаги буюк хизматларига муносиб улуғвор мақбара мажмуа бунёд этилди.
Мажмуанинг очилиш маросимида Ўзбекистон Республикаси Президенти Шавкат Мирзиёев иштирок этди ва нутқ сўзлади. Бу ҳақда Президент Матбуот хизмати хабар берди.
Давлатимиз раҳбари Самарқандга ташрифлари давомида мажмуа қурилишининг бориши билан бир неча бор танишди. Ушбу масканни юртимизнинг энг қутлуғ қадамжоларидан бирига айлантириш, зиёратчилар учун ҳар томонлама қулай шароитлар яратиш борасида улкан ишлар амалга оширилди.
Шавкат Мирзиёев Ислом Каримов мақбарасини зиёрат қилиб, Биринчи Президентимиз хотирасига ҳурмат бажо келтирди. Қуръон тиловат қилинди.
Тадбир иштирокчилари, мамлакатимизнинг барча жойларидан келган юртдошлаимиз мақбарани зиёрат қилиб, гуллар қўйдилар.
Президент Шавкат Мирзиёев Ислом Каримов ҳайкали пойига ҳам гул қўйди.
Шу куни Форумлар мажмуасида элга эҳсон оши тортилди.
ЎМИ Матбуот хизмати
Ўта ҳаяжонли онларни ўтказиб юборманг
Азиз Қуръон мухлислари, қорилар мусобақаси бошланганига ҳам мана 15 кун бўлди. Ушбу мусобақа барчамизга чин маънодаги қувончу шодликларни олиб келди. Қориларнинг ҳузурбахш тиловатлари одамлар қалбига нур бўлиб кирди, дардманд кўнгилларга шифо, ўксик қалбларга таскин бўлди. Мана шундай кунлардан чексиз мамнун бўлган ҳамюртларимиз қўлларини дуога кўтариб, яратган Парвардигорга ҳамду санолар айтишмоқда, бу ишларга ташаббускор бўлган Давлатимиз раҳбари, барча мутасаддилар ҳаққига дуолар қилишмоқда.
Шу кунга қадар қилган ишларимизни сарҳисоб этадиган бўлсак, республикамизнинг 8 та ҳудудида – Жиззах (122 нафар), Сирдарё (89 нафар), Самарқанд (486 нафар), Бухоро (155 нафар), Навоий (106 нафар), Хоразм (111 нафар), Сурхондарё (215 нафар) вилоятлари ва Қорақалпоғистон Республикасида (112 нафар) мусобақанинг ҳудудий босқичлари кўтаринки руҳда бўлиб ўтди.
Ҳар бир ҳудуддан 18-25 ва 26-40 икки ёш тоифасидаги қатнашувчи эркаклар ва аёллар икки йўналишда, яъни “Ҳифз” (тўлиқ ёд олган) ва “Тиловат” (қисман ёд олган) бўйича ўз маҳоратларини синовдан ўтказишди.
Жойларда мусобақанинг шаҳар ва туман босқичлари шу йил 15 январдан бошланган эди. Шу кунгача 1396 нафар, шундан 736 эркак, 390 аёл иштирокчи мусобақада қатнашди. Улардан 129 нафари вилоят босқичига йўлланма олди.
Мазкур 8 та ҳудудда мусобақа якунлангандан кейин, ҳакамлар ҳайъати ва ташкилий гуруҳ икки кунлик танаффусга чиқди. Улар эртадан кейин 1 февраль куни яна мусобақаларни ўтказишга киришадилар.
Энди мусобақа энг шиддатли тусга кирмоқда. Чунки қорилар ватани бўлган водий вилоятларида мусобақаларга оқ фотиҳа берилади. Шу йилнинг 1-4 февраль кунлари Андижон вилоятидаги 1182 нафар иштирокчи шаҳар ва туман босқичларида қатнашадилар. Қолган вилоятларда ҳам навбатма-навбат мусобақалар 15 февралга қадар давом этади.
Иштирокчилар бўйича рақамларни қиёслайдиган бўлсак, водий вилоятларидаги биргина Андижонда қорилар сони шу кунга қадар 8 та ҳудуддаги қорилар сонига яқин келади. Бу кўрсаткич ҳақиқатан Андижон қорилар етиштириб чиқарадиган замин эканини яна бир бор исбот қилмоқда.
Мана шулардан хулоса қилиш мумкинки, 1 февраль куни ушбу вилоятда бошланадиган қорилар мусобақаси бутунлай бошқача рақобат, ўзагача кайфият ва шиддат билан ўтади, иншоаллоҳ. Айни пайтларда мусобақага тайёргарлик ишлари авжида.
Шундай экан азизлар, Қуръон мусобақасининг энг юқори нуқталаридаги ўта ҳаяжонли онларни ўтказиб юбормай, бизни кузатишда давом этинг.
Ўзбекистон мусулмонлари идораси Матбуот хизмати
«Девбанд кутубхонаси китобларининг ҳаммасини ёдлаб олганман»
«Мен 137000 китоб ўқидим. Фаразан, агар Девбанд кутубхонасини кимдир ёқиб, кул қилиб юборса ҳам заррача парво қилмайман. Чунки у ердаги китобларнинг ҳаммасини ёдлаб олганман».
Анваршоҳ Кашмирий
Буюк аллома
Муҳаммад Анваршоҳ Кашмирий 1875 йил 26 ноябрь (1292 ҳижрий йил 27 шаввол) шанба куни эрталаб Ҳиндистонинг Кашмир шаҳридаги Водвон қишлоғида дунёга келди. Отаси Суҳровардия тариқатидаги шайх, катта олимлардан эди. Онаси ҳам ўта ибодатли, солиҳа аёл эди.
Аллома 15 ёшларида Қуръон ўқишни бошлаб, тез орада Қуръонни ёд олди. Икки йил ичида оталари қўл остида бир неча форсий тилда ёзилган рисолаларни ўқиб чиқди. Сўнг форс тилида битилган насрий ва назмий китоблар, баён ва ахлоқ – одобга тегишли китобларни ўқиб-ўрганди.
Анваршоҳ бошқа болалар ўйин-кулги билан ўтказадиган ёшлик даврини илму маърифатни ҳосил қилишга қаратганлар. У зот жумага ўтар кечадан ташқари ҳеч ҳам тунлари ухламасди, балки тунларини китоб мутолааси билан бедор ўтказарди. Бордию мудроқ босса, ўтирган ҳолда ухларди.
Илм талабидаги сафарлари
Анваршох ёшлик давриданоқ илму маърифатда етук олим бўлди. Кейинчалик бу зот Ҳиндистоннинг энг гуллаган, ёрқин жойи – «Девбанд дорул улум (университет)»ига борди. Анваршоҳ бу илм масканида шундай шахслар билан суҳбатда бўлдики, улар умумий билимлар соҳиби бўлишдан ташқари ўзларида орифлик, авлиёлик сифатларини жамлаганди. Шунингдек, улар ўткир фикрли, ўта сезгирликларидан ташқари ширинсухан, меҳрибон, виқор, суннат ва тақво, зуҳду парҳезгорлик соҳиби эдилар. Уларга Шайх Муҳаммад Девбандий бошчилик қиларди. Кашмирий бу улуғ устоздан ўзи интиқ бўлган ҳикматларни топди ва унинг зоҳирий ва ботиний илмлари булоғидан қониб-қониб ичди. Девбандда Анваршоҳ яна бир аллома, муҳаддис Муҳаммад Исъҳоқ Маданийга шогирд тутинди. Ушбу икки буюк устозларидан ҳадиси шариф китобларини ўтказиб олди.
Алломанинг ҳадис ривоят қилиш илмида ўта чуқур билим эгаси бўлгани ҳамда ақлли одамларни ҳайратга соладиган даражада тезда ёдлаб олиш қобилиятлари бўлгани Аллоҳ таолонинг у зотга берган катта инъоми эди. Агар бирор китоб ўқиса ундаги маълумотлар 25 йилгача хотирасидан чиқмасди.
Анваршоҳ кучли ёдлаш қобилияти борлиги билан бир қаторда китобларни мутолаа қилишда ҳам ўта тезкор бўлган. Таълим беришга киришган вақтининг ўзида ҳар куни Мисрда чоп этилган ”Муснаду Аҳмад” китобидан 200 бет мутолаа қилар ва уларни таҳлил қиларди. Мана шундай жидду жаҳдни у зотнинг ҳанафий мазҳабидаги далиллар, ҳадисларни ўрганишида ҳам кўриш мумкин. Умрининг охирида Исонинг ерга тушишлари борасидаги ҳадисларни жамлаш мақсадида яна бир карра ўқиган китобларини қайта ўқиб чиққан[1].
Алломанинг илғор шогирдларидан бири Саййид Муҳаммад Юсуф Баннурий айтади: “Шайхимиз ҳадис китобларига ёзилган шарҳ китобларидан икки юздан ошиғини ўқиб чиққан».
1896 (Ҳижрий 1313) йили ёш бўлишига қарамай Девбанд университетини битиргач Анваршоҳга «Абдурроб мактаби»да дарс бериш топширилди. Сўнг Деҳли пойтахтида мактаб очди ва унга «Аминийя мактаби»деб ном қўйди.
Кейинчалик, 2 ҳарамга муштоқлиги ошиб, 1906 (1323 ҳижрий) йили у ерларга сафар қилиб боради ва Маккада бир неча ойларни тавоф ва қаттиқ маҳзунлик, йиғи билан ўтказади. Кейин Мадинаи мунавварага бориб, бир муддат туриб илмга чанқоғини қондирди. Шунингдек Мадина кутубхоналарида тафсир ва ҳадис фанларига тегишли энг муҳим, энг ноёб асарларни мутолаа қилишга берилиб кетади.
Анваршоҳўз юртига қалби илму маърифатга тўлиб тошган ҳолда қайтди. Анваршоҳ сафардан қайтиши билан Девбанддаги устозлари ҳадисдан ўз ўринларига дарсларга киритишди ва Анваршоҳ толиби илмларга «Сунани Термизий», ”Саҳиҳи Бухорий”лардан дарс берди. Кўп ўтмай бу зот Девбандда ҳам, Ҳинд ўлкасида ҳам ҳадис илмининг энг катта устозига айланди. Аллома бу ерда ҳадис илмидан 13 йил давомида таълим берди. Аллоҳ таоло у зотнинг дарслари ила кўпчилик одамларга манфаат етказди, унинг қўл остида кўплаб фозил инсонлар етишиб чиқиб ҳадисдан дарс бериш ва илмни ёйиш билан шуғулланди[2]. Анваршоҳ Кашмирий «Саҳиҳи Бухорий»га «Файзул Борий» деган шарҳ ёзиб машҳур бўлиб кетган вақтларида дунёнинг энг машҳур уламолари (улар орасида Миср муфтийси Рашид Ризо ҳам бор эди) 300 нафар араб олимлари билан Деҳлидаги Шоҳ Жаҳон масжидига Анваршоҳ Кашмирийни зиёрат қилгани келган эканлар. 300 нафар олим билан сўрашиб чиққанларидан сўнг ҳазрат деворга суяниб, йиғлаган эканлар. Шунда Рашид Ризо йиғи сабабини сўраганда, у зот:
— Бир пайтлар мен шу ерда гадойлик қилардим. Бир неча марта калтак ҳам еганман. Бир пайтлар менга нон бермаган бу гўшада илм сабабидан бугун дунёнинг энг забардаст олимлари қўлимни ўпди[3]…
Вафоти
Аллома доимий таълим бериш ва китоб мутолааласи билан банд бўларди. Китоб ўқиш учун берилиб кетган, ундан бошқа ишда лаззат топмасди. Бу ишлари билан нафақат юртдошлари, балки бошқа юртлардан илм оламан, хусусан, ҳадис ва фиқҳни ўрганаман деганларга жуда катта манфаат етказдилар. Ҳаётининг охирида у зотни мулойимлик, ҳалимлик чулғаб олди. Дарс бериш, мавъиза чоғида йиғи тутарди. Ўзи ҳам йиғлар, бошқаларни ҳам йиғлатарди. Анваршоҳ Кашмирий 1933 (ҳижрий 1352) йили 28 май (сафар ойидан бир кун ўтгач) вафот этди. Жаноза намозига жуда ҳам кўп олиму фузалолар, толиби илмлар ва муҳиблару дўстлари қатнашди. Аллома уйи яқинидаги ҳайит намозлари ўқиладиган намозгоҳ ёнида дафн этилди.
Аллома ўзидан учта фарзанд қолдирди: Муҳаммад Азҳаршоҳ, Муҳаммад Акбаршоҳ, Муҳаммад Анзаршоҳ. Буларнинг барчаси фазилатлар эгаси, илму маърифат соҳиби бўлишган. Анваршоҳ вафот этган вақтда унинг отаси тирик бўлиб, унинг ёши 120 дан ошган эди. Аллоҳ таоло барчаларини ўз раҳматига олсин.
ТИИ 4 курс талабаси
Низомиддинов Ҳошимжон
ЎМИ Матбуот хизмати