muslim.uz
Online: Қуръон мусобақаси (Facebook)
-
ONLINE
ЖИЗЗАХ ШАҲРИ.
ЎМИ Матбуот хизмати
Қуръон мусобақаси Жиззах ва Сирдарёда давом этади
Бугун, 16 январь куни Қуръон мусобақасининг ҳудудий босқичлари Жиззах вилоятида давом этади. Сирдарё вилоятида эса мусобақанинг дастлабки ҳудудий босқичига оқ фотиҳа берилади.
Жиззах вилоятидаги мусобақанинг ҳудудий босқичи Жиззах шаҳридаги мусиқали драма театрида давом этмоқда. Сирдарё вилоятида эса мусобақанинг дастлабки ҳудудий босқичи Гулистон шаҳридаги “Осиё” кошонасида бошланади.
Бизни кузатишда давом этинг, ушбу икки вилоятдаги ҳудудий босқич жараёнларини жонли хабарларда ёритиб борамиз.
Ўзбекистон мусулмонлари идораси Матбуот хизмати
Эътироф: Қуръон мусобақаси юртдошларимиз нигоҳида
Кеча диёримизда бошланган Қуръони карим мусобақаси барча юртдошларимиз томонидан кўтаринки руҳ, хурсандчилик билан қарши олинди. Жиззах вилоятининг Зомин туманида бўлиб ўтган кечаги Қуръон байрамини кузатиб борган ҳамюртларимиз қалбларининг тубидаги самимий дил изҳорларини қуйидагича ифода этдилар.
Ғиёсиддин Ҳабибуллоҳ номли фойдаланувчи “Аллоҳ рози бўлсин Президентимиздан. Илоҳим Президентимизнинг бутун аждодларининг руҳларини шод қилсин. Авваламбор ўзларини ва барча яқинларини Аллоҳ паноҳида асрасин. Авлодларидан ҳам олиму фузалолар чиқсин. Омин”, деб ўз фикрларини баён қилган.
Умму Сайфуллоҳ исмли мухлис “Ассалому алайкум. Бу улуғ ишларни бош ташаббускори муҳтарам Президентимиз соғ-омон бўлсинлар! Доимо бундай савоб ишларда бошу қош бўлсинлар!” дея ўз фикрларини қолдирган.
Абдувалижон Ҳаким “Алҳамдулиллаҳ ҳали мусулмон умматига солиҳ ва солиҳа фарзандлар етиштириб берадиган қорияларимиз кўп экан” деган илиқ сўзларни битган.
“Аллоҳ рози бўлсин, хурсандлигимнинг чек-чегараси йўқ” дея ўз хурсандчилигини намоён этган Амина Мамадалиева номли фойдаланувчи.
Ёқибжон Низомивич “Ассалому алайкум аҳли мўмин ва мўмина қорилар. Мана биз Корея давлатидан туриб кўриб турибмиз, Аллоҳга ҳамдлар бўлсин. Дуодамиз ҳаммаларингга ажр савоб, илмларимизни зиёда қилсин, омин” дея фикрини якунлаган.
Нурилло Сайдуллаев номли фойдаланувчи 80 ёшдаги оналари “Юртбошимизни умрлари узоқ бўлсин, дунё тургунча турсинлар” деб дуо қилаётганликларини айтиб ўтганлар.
Улуғбек Ойбекович бошқа давлатдагилар кўрса ҳавас қилгудек Қуръон мусобақаси бўлаётганини айтиб ўтган: “Ташкил қилган Президентимизга мингдан-минг раҳмат. Аллоҳ рози бўлсин!”, дея фикрларига якун ясаган.
“Алҳамдулиллаҳ ўзбек аёл қизлари ҳам ўз ибратлари билан юртимизни обрўсини кўтарадиган кунлар ҳам келди. Аллоҳим давомли қилсин” дея фикр қолдирган Муслима Даврон номли мухлиса.
Онлай эфирларга қолдирилган 6 мингдан ортиқ изоҳларда ижтимоий тармоқ фойдаланувчилари мусобақанинг дастлабки босқичи ҳақида ўзларининг илиқ ва ижобий фикрларини билдириб ўтганлар. Фойдаланувчилар ташкилий масалалар бўйича ўз тавсия ва таклифларини билдириб ўтганлар.
Маълумот учун, мусобақанинг дастлабки босқичи “муслим.уз” саҳифасида 54 мингдан ортиқ мухлислар томонидан кўрилган. Умумий қамров эса 265 минг нафарни ташкил этган.
Ўзбекистон мусулмонлари идораси матбуот хизмати
Муносабат: Илоҳий каломга ошно қалблар
Аллоҳ таоло Қуръони каримда: “Қуръонни биз нозил қилганмиз ва уни ўзимиз асровчимиз”, деб марҳамат қилган.
Пайғамбар алайҳиссалом ҳам муборак ҳадисларида: “Сизларга икки нарсани қолдирдим. Агар уларни маҳкам тутсангиз, ҳеч адашмайсиз. Булар Аллоҳнинг Китоби ва менинг суннатимдир”, деганлар.
Термизий бобомиз ривоят қилган яна бир ҳадиси шарифда Расулуллоҳ соллаллоҳу алайҳи васаллам Қуръони каримни тавсифлаб шундай деганлар: “Аллоҳнинг китобида сизлардан олдингиларнинг, сизларнинг ва сизлардан кейингиларнинг хабари бор. У аниқдир, ҳазил эмас. Ким уни тарк этса Аллоҳ уни раҳматидан узоқ қилади. Ким ундан бошқа нарсадан ҳидоят талаб қилса, Аллоҳ уни хор қилади. У Аллоҳнинг мустаҳкам арқони. У доно зотнинг зикри. У тўғри йўлга бошловчи. Унга эргашганлар ҳақиқатдан юз ўгирмайди. Тиллар уни тиловат қилиш билан чарчамас. Уламолар уни қанча ўқиса-да тўймайдилар. Қанча қайтарсанг-да у эскириб қолмайди. Унинг мўъжизалари тугамас. Ҳатто жинлар ҳам уни эшитиб қойил қолишди. Ким у билан гапирса рост гапирибди. Ким унга амал қилса савоб олади. Ким у билан ҳукм чиқарса адолатли ҳукм чиқаради. Ким унга чақирса тўғри йўлга ҳидоят қилинибди”.
Демак, бу иккисига суяниб яшаган одам ҳар икки оламда комил ва барҳаётдир.
Яратганга шукрлар айтамизки, бизга истиқлол неъматини берди. Унут бўлаёзган қадриятларимиз тикланди, ўзлигимизни англай бошладик. Ота-боболаримизнинг қадамжолари обод бўлмоқда, ўлмас меросларини ўрганиш йўлга қўйилди. Аллоҳ таоло бизни одил раҳбар билан сийлади. У кишининг раҳнамоликларида мисли кўрилмаган ўзгаришлар рўй бераётгани қувонарли ҳол, албатта. Ана шундай ташаббуслардан бири илоҳий каломни халқимиз орасида янада жонлантириш борасида олиб борилаётган “Қуръон мусобақаси – 2018” йил кўрик танловидир.
Тўғриси, юртимизнинг ҳар бир гўшасида илоҳий каломга бўлган завқу шавқни кўриб қувонасан киши. Алҳамдулиллаҳ, жонажон ватанимизда илоҳий каломга ошно қалблар кўп экан. Қисқа муддат бўлса-да, мусобақа иштирокчиларини рўйхатга олиш даврида уларнинг юзидаги нур, кўзидаги зиёни кўриб туриб, ич-ичимиздан меҳр туйдик.
Мана, Раббимизнинг марҳамати ила мусобақа бошланиб кетди. Айниқса, мусобақанинг очилиш маросимида халқимизнинг булбул қорилари Қуръони каримни тиловат қилишди. Юраклар титради, кўзлар ёшланди...
Биз бутун оламга кимларнинг авлоди эканимизни кўрсатадиган давр келди, азизлар. Кейинги йилларда Қуръони карим билан бир қаторда, ҳадис ва фиқҳ каби илмлар бўйича ҳам қатор мусобақалар ўтказилишини умид қилиб қоламиз. Имкониятни қўлдан бой берманг. Ўқинг, интилинг, ватанга садоқатли, аждодларга муносиб ворис бўлинг.
Эркин ҚУДРАТОВ,
Мир Араб ўрта махсус ислом билим юрти мударриси
Қуръон байрами Зоминдан бошланди
Ўзбекистон халқи ўзгача интиқлик билан кутган катта шодиёна бугун Зомин тумани “Маърифатли” масжидида бошланди. Эрта тонгдан Жиззах вилоятининг узоқ-яқин туманларидан, Самарқанду Сирдарёдан одамлар – эркагу аёл, ёшу қари Қуръони каримга сомеъ бўлишни ният қилиб гуррос-гуррос келаверишди. Боришга имкон топа олмаган юртдошларимиз онлайн тарзда кузатиб боришди. Мусобақани кузатаркан, ўзларининг хурсандчиликларини “Фейсбук” тармоғи орқали изҳор қилиб ҳам туришди. Бир-биридан гўзал овозда тиловат қилаётган қориларимизни тинглаётган томошабинлардан бири завқи ичига сиғмасдан “қалбим жўшиб кетяпти”, деб ёзганда кўпчиликнинг кўнглидан ўтиб турган самимиятни ифода этди.
Ҳақиқий илму қироат беллашуви очилгач, Ўзбекистон мусулмонлари идораси раиси, муфтий Усмонхон Алимов ҳазратларининг мусобақа иштирокчиларига табриги етказилди. Жумладан, унда: “Бугун барчамиз Аллоҳнинг буюк неъмати – Ўз Каломини ёд олиш шарафига эга бўлган ўғил-қизларимизнинг чиройли савтлари ва Қуръон ўқишдаги маҳоратларидан баҳраманд бўлиб, иншааллоҳ, завқланамиз. Дарҳақиқат, мусулмон киши учун Раббисининг каломини ўқиш ёки уни тинглашдан-да роҳатбахш нарса бўлмайди”, деб алоҳида қайд этилган.
Дарҳақиқат, дунёда байрамлар, хурсандчиликлар, шодиёналару тантаналар кўп. Аммо уларнинг барчаси бир тарафу бу байрамнинг шукуҳи бир тараф бўлди. Шундай бўлиши табиийдир. Илло, муфтий ҳазратлари табригида айтилганидек, Қуръони карим инсонларни тўғри йўлга бошлайдиган, ақл юргизиб, тафаккур қилиб ўқилса, ҳидоятга чорлайдиган муқаддас китобдир. Инсон Қуръони карим оятларини ёд олгани сари руҳи енгиллашиб, зеҳни ўткир бўлиб бораверади.
Бугун айнан шундай бўлди: мўътабар Китобни ўқиганлар, тинглаганларнинг ҳақиқатан, руҳи енгил тортиб, қалбларида титроқ турди; кўзлари ёшга тўлиб, шундай ажойиб кунларга, ана шундай файзли, тароватли мусобақаларни ўтказадиган кунларга етказгани учун Парвардигори оламга шукронлар айтиб, мусобақа ташаббускори бўлган Президентимизнинг, бу ишларга бош бўлган муфтий ҳазратларининг, ташкилотчи бўлган олиму уламоларнинг ҳақларига чин кўнгилдан дуолар қилдилар.
Бу шундай фазилатли мусобақа бўлдики, шу масканда ҳозир бўлганлар, уларнинг яқинлари, дуо умидида ётган азизлари, хусусан, ушбу манзил-маконда мангуга қўним топган табаррук инсонларнинг ҳам руҳлари шод бўлди.
Бир сўз билан айтганда, Зоминнинг еру осмони бугун нурга тўлди, бу ерда Аллоҳ таолонинг фаришталари ҳам ҳозиру нозир бўлиб қориларимиз билан тиловат қилдилар, дуоларга қўл очдилар, иншоаллоҳ.
Байрам тадбирига айланган – Қуръон мусобақаси шу тартибда бошқа вилоятларимизда ҳам давом этади. Биз сиз билан яна тўрт ой давомида Қуръони каримнинг файзу баракасидан мана шундай баҳра олиб, завқланамиз, иншоаллоҳ. Она-Ватанимиз илоҳий нурга чулғанади, одамларимизнинг қалби нурга тўлади, юзи зиёга бурканади, юртимизга барака киради.
Илоҳо, меҳрибон Раббимиз ана шу саъй-ҳаракатларимизни сабаб қилиб юртимиздаги тинчлик ва хотиржамлик неъматини бардавом қилсин. Ёшларимизга ҳар доим Қуръон мусобақаларида, илму ижод, маърифат ва маънавият беллашувларида мусобақалашишни насиб айласин.
Ўзбекистон мусулмонлари идораси Матбуот хизмати