Кунлардан бир куни бир подшоҳ касал бўлиб қолибди. Уни даволаш учун бутун дунёдан табибларни чақиришибди, лекин ҳеч бири подшоҳни даволай олмабди. Шунда улар маслаҳат қилиб бир қарорга келишибди. Агар бахтли одамни топиб, унинг кўйлаги подшоҳга кийдирилса, у тузалади. Бахтли одамни топиш учун дунёнинг ҳамма томонига чопарлар жўнатилибди. Лекин ҳеч ким "Мен бахтлиман", деган одамни топа олмабди. Кимдир бой, лекин касал, яна кимдир соғ, аммо камбағал, бошқаси бой, соғ, бироқ оиласи нотинч – хуллас, ҳамма нимадандир нолир эди.

Бир куни тунда подшоҳнинг ўғли шаҳар кўчаларини айланиб юрса, бир ҳовлидан кимнингдир гапини эшитиб қолибди. У: "Яхши ишладим, пулимни олдим, қорним тўйди, энди маза қилиб ухлайман. Мендан бахтли одам йўқ", дебди. Подшоҳнинг ўғли севиниб кетиб, тезда хизматкорларини жўнатибди. Катта пул эвазига ўша одамнинг кўйлагини олиб келишни тайинлабди. Хизматкорлар ҳовлига кириб шаҳзоданинг буйруғини бажармоқчи бўлишибди, лекин қарашса, ҳалиги "бахтлиман" деган одам шунчалар қашшоқ эканки, ҳатто эгнида кўйлаги ҳам йўқ экан.

Эй инсон, билгинки, бахт келувчи ва кетувчи нарсадир. Одам ўзини бир муддат бахтли ҳисоблаши учун бой бўлиши шарт эмас, балки бор нарсасига шукр қилса кифоя.     

Акбаршоҳ Расулов

2016 йилнинг 18 январь куни Фарғона вилояти имом-хатиблари ва имом-ноибларининг 2016 йил якунига бағишланган умумий йиғилиши бўлиб ўтди. Унда вилоят ҳокими ўринбосари Қамариддин Имомов, Ўзбекистон мусулмонлари идораси Масжидлар бўлими мудири Муҳаммадназар Қаюмов,  иштирок этди.

Ўзбекистон мусулмонлари идорасининг Фарғона вилоятидаги вакили Турсунали Эрбўтаев вакиллик ходимлари ва имом-хатибларнинг 2016 йилги фаолияти бўйича умумий ҳисобот берди.

Йиғилишда ўтган давр мобайнида амалга оширилган ишлар ва йўл қўйилган камчиликлар танқидий кўриб чиқилди.  Жумладан, 2016 йилда иш фаолияти, маънавий-маърифий тадбирлар ва оммавий ахборот воситаларидаги чиқишлар бўйича камчилик ва сусткашликка йўл қўйган ходимларга нисбатан бирма-бир қаттиқ танбеҳ берилиб, келгусида ўз вазифасини суиистеъмол қилган ходимларга қаттиқ  интизомий чора кўриш ва ҳатто вазифасидан озод этилиш тўғрисида огоҳлантирилди.

Имом-хатибларга ОАВларда  ёшларнинг ҳар хил зарарли оқимлар таъсирига тушиб қолишини олдини олишга қаратилган  мақолаларни  газета,  журнал ва интернет сайтларида мунтазам ёритиб бориш, китобхонликни ошириш шу билан бирга вакиллик тасарруфидаги барча масжидларда ободонлаштириш ишларини олиб бориш, намозхонлар учун қулай шароитлар яратиш ҳамда ёнғин хавфсизлиги чораларини кучайтириш бўйича зарурий кўрсатмалар бериб ўтилди.

Йиғилишда келгусида  бажарилиши лозим бўлган ишлар юзасидан тадбирлар режаси белгилаб олинди.

Йиғилиш якунида 2016 йилда самарали меҳнат қилган, диний соҳада намунали хизмат қилган, шунингдек, “Ҳидоят” журнали ва “Ислом нури” газетасига обуна бўлишда фаоллик кўрсатган фидоий имом-хатиблар “Мақтов ёрлиғи” ва эсдалик совғалари билан тақдирландилар.

Ўзбекистон мусулмонлари идораси

Масжидлар бўлими

Шу йилнинг 23–24 февраль кунлари Баҳрайн пойтахти Манама шаҳридаги Араб кўрфази номли университет Германия, Таиланд, Канада, Ирландия, Ҳиндистон, Саудия Арабистони, Бирлашган Араб Амирликлари, Қатар ва Судандан ташриф буюрадиган етук шифокорлар иштирокида I халқаро болалар тиббиёти конференциясини ўтказишга мезбонлик қилади.       

Конференция раҳбари, Араб кўрфази университетида болалар тиббиёти профессори Доктор Абдулазиз ал-Амин конференциянинг мавзуси “Болалар тиббиётининг халқаро гавҳари” деб номланиб, унда болалар касаллиги тарқалиши ва хатарларининг олдини олиш, мазкур касалликларни даволашнинг замонавий янгича услублари, оламдаги бир қанча минтақаларга тарқалиб, унда яшаётган болаларнинг соғлиғига салбий таъсир ўтказаётган юқумли касалликларни даволаш бўйича мутахассисларнинг таклифларини ўрганишга доир  масалалар муҳокама этилишини таъкидлади. 

Шунингдек, конференцияда янги туғилган чақалоқлар соғлиғига эътибор қаратиш, болаларни овқатлантириш, уларда овқат ҳазм қилиш фаолиятини яхшилаш борасида амалга оширилаётган янги илмий тажрибалардаги ўзгаришлар, болаларда нафас олиш қийинлашуви ва юрак касалликларини даволашга боғлиқ бўлган масалалар юзасидан ҳам ўзаро фикрлар алмашилади. 

                                                                               И.АҲМЕДОВ таржимаси

Мансур Сайфуддин Қаловун Алфий – Мисрдаги Баҳрийлар сулоласидан чиққан мамлук султони. 1279–1290 йиллар орасида ҳукмронлик қилган. Қаловун арзон қуллар бозоридан сотиб олинган оддий йигит бўлган. У ҳарбий санъатни мукаммал эгаллаб, ўзига бахтиёр келажак тайёрлади ва Миср султони даражасига кўтарилди.

Ҳукмдор қурдирган масжид жуда ҳам улкан бўлиб, масжид ҳудудида мадраса, музей ва карвонсарой мавжуддир. Ансамбл 1284 йилларда Сурия анъаналари бўйича султон Қаловун томонидан қурдирилган. Бу ансамбл аввалги Фотимийлар саройи ўрнида барпо қилинган.

 Машҳур араб сайёҳи ва тарихчиси, "барча мусулмон мамлакатларини кезиб чиққан сўнгги энг буюк сайёҳ" дея таъриф этилган Ибн Баттута (1304–1368) ўзининг машҳур “Туҳфат ан-нуззор фи ғароиб ал-амсор ва ажоиб ал-асфор” ("Ғаройиб шаҳарлар ва ажойиб сафарлар ҳақида назар соҳибларига туҳфа") асарида Мансур Сайфуддин Қаловун ҳақида қуйидаги хотираларини баён этган:  "Мен Мисрга кирган пайтимда унинг султони подшоҳ Носир Абул-Фатҳ Муҳаммад ибн Малик ал-Мансур Сайфуддин Қаловун ас-Солиҳий эди. Қаловун “Алфий” (минглик) деб аталар эди. Чунки подшоҳ Солиҳ уни минг тиллага сотиб олган бўлиб, асли қипчоқлардан эди.

 Подшоҳ Носир олижаноб хулқ, буюк фазилатлар соҳибидир. Икки Ҳарам ходими бўлишга сазоворлигининг ўзи унга етарли шарафдир. Шунингдек, ҳар йили таъминоти тугаган, заиф ҳожиларга йўл озуқаларини ортиш, Миср ва Шомнинг оғир йўлларида ортда қолган ва юролмай қолганларга миниши учун туялар бергани ҳам мақтовга сазовордир. У Қоҳира ташқарисидаги Сирбоқусда муҳташам бир хонақоҳ барпо этган. Бироқ мавлоно, амирул-мўминин, носируддин, фақир-мискинлар паноҳи Байдо (Касабланка) шаҳри (Аллоҳ уни сақласин) ташқарисида қурган хонақоҳ мустаҳкамлиги, гўзал қурилиши, машриқ аҳлининг қўлидан келмайдиган даражадаги ганжин нақшлари билан бутун ер юзида бемислдир".

Раҳимберди РАҲМОНОВ,

Тошкент шаҳридаги

"Хўжа Аламбардор" жоме масжиди

имом-хатиби тайёрлади.