muslim.uz
Яхшилигимиз ўзимизга қайтади
Хайру саховат, ўзига раво кўрилган яхшиликни бошқа мўминларга ҳам раво кўриш мусулмонга хос фазилатдир. Аллоҳ таоло Қуръони каримда шундай марҳамат қилади: “Аллоҳ сенга эҳсон қилгани каби сен ҳам ҳам (Аллоҳнинг бандаларига) инфоқ-эҳсон қил!” (Қасос сураси 77-оят)
Ҳаётда санаб адоғига етиб бўлмайдиган неъматлардан баҳраманд бўлиб юрганимиз Аллоҳ таолонинг бизга меҳрибонлиги, марҳаматидандир. Шу боис имкониятимиз даражасида эҳсон қилишга буюрилганмиз.
Тўғриси, биз хайру саховатни, инфоқ-эҳсонни жуда тор маънода тушунамиз. Бирор нарсани кимгадир ҳадя қилишни ёхуд дастурхон ёзиб, тўрт-беш кишига таом беришнигина хайру эҳсон дейишга ўрганганмиз.
Ҳолбуки, бу ишлар эҳсоннинг энг кичик кўринишидир. Эҳсоннинг маъноси жуда кенг. У барча яхши амалларни қамраб олади. Ким бировга яхшилик қилса, аслида ўзига яхшилик қилган бўлади. “Агар (шундан кейин) чиройли амаллар қилсангизлар, ўзларингизга яхшилик қилган бўлурсизлар”. Оятнинг давомида бировнинг ёмонлик қилиши, бадхулқ, бахил бўлиши ҳам аслида ўша инсоннинг ўзига қилган ёмонлиги бўлиши айтилган. “Агар ёмон, гуноҳ амаллар қилсангизлар ҳам, ўзлариниз учундир” (Исро сураси 7-оят).
Аллоҳ таоло биз мусулмонларни динимизга, жамиятимизга фойда келтирадиган ҳар бир ишда ҳамкорлик қилишга буюради. Эҳсон билан тақвонинг ёнма-ён қўйилиши бежиз эмас. Аллоҳдан қўрқиб, яхшиликка уюшган кишилар жамоаси зарарлардан омонда бўлади. Ўрталарида меҳр-оқибат кучаяди. Уларнинг ҳаракатларини Аллоҳ файзли-баракали қилади.
Сўнги пайтларда ижтимоий тармоқлар орқали хайру саховат кўрсатамиз, оч, юпунларга ёрдам қўлини чўзамиз деб юрган кишилар ҳам, хайрия ташкилотлари, уюшмалари ҳам талайгина. Аммо уларнинг ҳаммаси ҳам беғараз эмас. Жумладан ҳозирги кунда ўзларини саховатпеша қилиб кўрсатиб инсонларнинг ишончига кириб фирибгарлик орқали даромад топаётганлар ҳам кўплаб учраб турмоқда. Энг ачинарлиси бундай шахслар ўзларича бир бемор ёки ётим учун деб турли акцияларни ўтказиб пул топиш ҳолатлари кўпайиб бормоқда.
Хайру саховат туфайли инсон бу ўткинчи дунёда туриб, охиратга заҳира йиғиши, жаннатда тайёрлаб қўйилган неъматлардан насибадор бўлиши мумкин. Расулуллоҳ соллаллоҳу алайҳи ва саллам марҳамат қиладилар: “Ким хайру саховат қилиб, кийимга муҳтож бир кишини кийинтириб, хурсанд қилса, Аллоҳ саховатли инсонни жаннат кийимлари билан кийинтиради. Ким егуликка муҳтож, оч кишини тўйдирса, таомлантирса, жаннатдаги таомлардан сероб бўлади”.
Икки дунёси обод бўлишини орзу қилган мусулмон Қуръони каримнинг бундай мазмундаги оятини ҳамиша ёдида тутиши лозим:
“(Эй мўминлар,) то сизлар суйган нарсаларингаздан инфоқ-эҳсон қилиб бермагунингизча ҳаргиз яхшиликка (жаннатга) етмагайсиз. Ҳар қандай нарсани инфоқ қилсангиз, албатта Аллоҳ уни билур” (Оли Имрон сураси, 92-оят).
Нурулло Маҳкамов,
Чуст туман “Саид Насимхон тўра” жоме
масжиди имом-ноиби
Муҳаррам ойи бошида Каъбапўш алмаштирилди
Ҳижрий 1446 йил Муҳаррам ойининг биринчи ойи ҳижрий янги санаси кириши муносабати билан 7 июль куни эрта тонгда Каъбапўш янгисига алмаштирилди.
“Кисва” алмаштириш анъанавий равишда ой тақвимига кўра ҳар бир янги йилнинг бошида амалга оширилади. Саудия Aрабистони ахборот ваколати хабарига кўра, янги Каъбапўшнинг оғирлиги тахминан 1350 килограмм, баландлиги 14 метр бўлиб, 4 қисмдан иборат бўлиб, у Каъба эшигини қоплайди.
Каъбапўшни тайёрлаш учун 1000 килограммга яқин хом ипак, шунингдек, 120 килограмм тилла ип ва 100 килограмм кумуш ип ҳам ишлатилган. Каъба пардаси 16 қисм ва 7 пастки қисмдан иборат.
Бу парда 17 та маржондан иборат бўлиб, устига “Я Роҳман Я Роҳийм” ва “Aлҳамдулиллаҳ, Роббил аъламийн”, “Я Ҳай, Я Қайюм” ва “Aллоҳ Aкбар” каби ёзувлар битилган бўлиб, унинг тўрт томонида тўртта лавҳа ҳам бор. Ихлос сураси ёзилган Каъбанинг бошқа томонида бешта безак деталлари Каъбанинг трубасини, қора тошини ва Яманий устунини безатади, унинг тепасида эса Рукн ал-Яманий бурчагида Каъба эшигининг ташқи қопламасининг юқори қисмида сариқ рангли кашта занжир осилиб туради.
Таъкидлаш жоизки, Каъбапўшни тайёрлаш учун махсус Малик Aбдулазиз мажмуасида 200 га яқин ходим меҳнат қилади. Бу мажмуада бўяш, автоматик тўқиш, қўлда тўқиш, матбаа, тазҳиб, тикувчилик ва парда йиғиш бўлимлари бўлиб, унда дунёдаги энг катта 16 метр узунликдаги, компьютерда ишлайдиган тикув машинаси мавжуд.
Ўзбекистон мусулмонлари идораси Матбуот хизмати
Мазҳабга эргашиш вожиб
Сарлавҳадан маълум бўлганидек, сиз ва бизга бир мазҳабга эргашиш вожиб. Мазҳабни ушламаслик охири динсизликка олиб боради. Гапимниг тасдиқи ўлароқ Рамазон Бутий раҳимаҳуллоҳи алайҳ “Мазҳабсизлик динсизликка кўприкдир” китобида “Биз бу каби ҳолатга тушган жуда кўп инсонларни кўрдик. Ўзларича бир нечта ҳадисни маъносини билиб олиб: “Мен ўзим Қуръон ва ҳадисдан ҳукм оламан, мен мазҳабга эргашмайман, мен ҳадисга амал қиламан”,-деб, бориб бориб беқарор инсонларга айланишди. Бир иш борасида ўзининг фойдасига нима далил келса ўшани ушлаб олаверади. Ҳатто энг чеккадаги заиф қавлларни ҳам ушлаб, нафси хоҳлаган нарсани қилиб кетадиган бўлиб қолишди. Алкаш бўлиб кетганлари қанча. Ашраф Али Таҳонавий раҳматуллоҳи алайҳ ўзларининг “Малфузот” китобларида Ҳиндистонда мазҳабсизликни тарғиб қилган бир муҳаддисни “Мен 25 йиллик тажрибам асосида шуни билдимки, ҳозирги даврда бирор мазҳабни тутмаслик охир оқибат динсизликка олиб борар экан” деган гапларини иқтибос келтирган.
Дин душманлари бу умматни тўғридан-тўғри диндан олиб чиқиб кетишни уддасини қилолмагач, охири мазҳабсизлик ғояларини тарғиботини бошлашди. Бунинг учун баъзи саноқли масалалардагина ўз мазҳабидан четга чиққан ҳанбалий мазҳабидаги Ибн Таймия раҳматуллоҳи алайҳни асос қилиб олишди. У киши ҳанбалий мазҳабида бўлиб, бир юз олтитагина ақоид ва ибодатга тегишли баъзи масалаларда мазҳабдан ташқарига чиққанлар. Бошқа ҳаммасида ҳанбалий мазҳабини маҳкам ушлаганлар. Лекин У киши ҳам ўзларидан аввалги уламоларни кофирга чиқарган эмаслар. Ҳатто Боязид Бистомий, Абдулқодир Жилоний каби тасаввуф машойихларини ҳам мақтов билан зикр қилганлар. Мазҳабдан чиққан ўринларда уммат уламоларининг қаттиқ раддияларига учраганлар. Демак, хатоларининг асосий сабаби- улар мазҳаб асосчилари қанақа мартабадаги зотлар эканини билмаслигидадир. Алҳамдулиллаҳ! Бизнинг диёрнинг аксар қисми ҳанафийлардан ташкил топган. Имом Шаъроний раҳимаҳуллоҳ шофеьий мазҳабида бўлсалар ҳам: “Ҳанафий мазҳабини текшириб чиқдим ва саҳиҳ ҳадисларга бино қилинган ҳолатда топдим”.
Мазҳаб имомларимиздан ҳам, бу мазҳабни бизга етказган буюк мужтаҳид алломаларимиздан ҳам Аллоҳ рози бўлсин!
AJDODLARGA MUNOSIB AVLOD BO'LAYLIK!
G'IYOSIDDIN TOJIMIRZAYEV,
UCHQO'RG'ON TUMANI "BAYTUL MUQADDAS" jome masjidi imom xatibi
“Ислом фиқҳи асослари” китоби нашрдан чиқди
Ўзбекистон мусулмонлари идораси раисининг биринчи ўринбосари Ҳомиджон домла Ишматбековнинг “Ислом фиқҳи асослари” номли китоби нашрдан чиқди.
Мазкур китобда ислом фиқҳининг пайдо бўлиш тарихи ва илдизлари ҳақида баён этилган. Ислом шариатининг ўзига хос хусусиятлари ҳақидаги ушбу китобнинг ёзилишидан мақсад динимиз воқеий дин экани ва барча замону маконларга ҳам мувофиқ келишини илмий асослашдан иборатдир.
Ҳижрий иккинчи ва учинчи асрларга келиб мужтаҳид уламолар томонидан Ислом шариати аҳкомларини ўзида ифодаловчи мазҳабларга асос солинди. Жумладан, Кўфада Имом Абу Ҳанифа, Мадинада Имом Молик, Ҳижозда Имом Шофеъий ва Бағдодда Имом Аҳмад раҳимаҳумуллоҳ ўзларидан аввалги зотларнинг таълими асосида кейинги авлодга шариат аҳкомларига амал қилишнинг йўл-йўриқларини кўрсатиб бердилар.
Уларнинг илмий асосга эга усуллари ва жорий қилган қоидалари ҳозиргача ўз аҳамиятини йўқотмай келаётгани мавжуд мазҳабларнинг нақадар пухта ва мустаҳкам эканига далолат қилади. Ушбу китобда мавжуд тўрт мазҳабнинг айнан Қуръон ва суннатга асослангани ва динимизнинг замонлар оша юзага келадиган муаммоларини ҳал қилишда айнан мазҳаб уламолари жорий қилган усул ва қоидаларга асосланиши ҳам баён этилган.
Аллоҳ таоло ушбу китобни илм талабида бўлган китобхонларга манфаатли айласин.
Ўзбекистон мусулмонлари идораси Матбуот хизмати