ЎМИ Матбуот хизмати

Бугун Тошкент вилояти Бўка туманида бошланган қорилар мусобақаси жуда ҳам файзу баракотли давом этмоқда, айниқса, қори йигитларнинг қалбларни юмшатувчи қироатлари мўмин-мусулмонларимизнинг кўзларига ёш келтирди.
Мана шундай юракларни қувватловчи, онгу шууримизни зийнатловчи Аллоҳнинг каломидан сиз ҳам баҳраманд бўлинг азизлар. Мусобақани бизнинг muslim.uz портали ва ижтимоий тармоқларимиз орқали жонли кузатинг.

Ўзбекистон мусулмонлари идораси Матбуот хизмати

Олиму уламоларга ҳурмат-эҳтиром кўрсатиш, ўтганларини хотирлаб уларнинг руҳларини шод қилишни ният қилиб, ишларини давом эттириш Аллоҳ таоло қошида, аждодлар хотираси олдида, жамики олам аҳли олдида миллатнинг юзини ёруғ қилади, йўлларини очади.

Тарихий манбалардан биламизки, Аллоҳ таолони севган бандаларни севган, уларга ниҳоятда катта эҳтиром кўрсатган Соҳибқирон Амир Темур 1363-64 йилларда буюк мутасаввуф Аҳмад Яссавийнинг набираси, улуғ авлиё Сузук ота қабри устида мақбара ва масжид бунёд эттирган.  

Адолатпарварлик, халқпарварлик, авлиёи киромга эҳтиром кўрсатиш, эл-юртнинг розилигини топиб яшашни ҳаётининг маъноси деб билган ва бошқалардан ҳам ана шу фазилатларни талаб қилаётган президентимиз ҳар жиҳатдан Соҳибқирон бобомизнинг ҳаётидан ибрат олиб келаётгани ана шу мақбара  қурилиши мисолида янада яққол намоён бўлмоқда.

Давлатимиз раҳбари 2017 йил 26 май куни бу масканда бўлиб, мақбара ва масжидни реконструкция қилиш, атрофини ободонлаштириш бўйича топшириқлар берган эди. Чунки бу мақбаранинг обод бўлиши, ушбу макон-манзилларда ётганларнинг руҳи шод қилади, шаҳар аҳолисининг дилини равшан этади ва энг муҳими, Аллоҳ таолонинг иккита севикли бандаси – Сузук ота ва Амир Темур ҳазратларининг руҳини ором топтиради. Аллоҳнинг изни-иродаси ила иншоаллоҳ, миллий меъморлик анъаналари асосида бунёд этилаётган, зиёратчилар учун кенг қулайликлар яратилаётган масжиднинг қурилиш ишлари жорий йилнинг 1 сентябрида якунланади.

Президентимизнинг мажмуага ташрифига Ўзбекистон мусулмонлари идораси раиси, муфтий Усмонхон Алимов ҳазратлари ҳамроҳлик қилди. Улар мажмуадаги қурилиш ишларини кўздан кечирдилар.

Президентимиз Шавкат Мирзиёев ташаббуси билан Чилонзор туманида барпо  этиладиган масжидга Шайх Муҳаммад Содиқ Муҳаммад Юсуф номи бериладиган бўлди.

– Шайх Муҳаммад Содиқ Муҳаммад Юсуф нафақат юртимизда, балки бутун ислом оламида тан олинган олим эди, – деди Шавкат Мирзиёев. Ҳаётини муқаддас динимиз арконларини ўрганишга ва тарғиб этишга, халқимиз, ёшларимизни диний маърифат руҳида тарбиялашга бағишлади.

Президентимизнинг масжид қурилаётган майдонда туриб айтган сўзларини тинглаган киши 1989 йилда, жуда қийин ва мураккаб даврда, бениҳоя қалтис шароитда Шайх Муҳаммад Содиқ Муҳаммад Юсуфнинг Ўрта Осиё ва Қозоғистон мусулмонлари диний идораси раиси, муфтий бўлгани Аллоҳ таолонинг ушбу минтақага бир марҳамати бўлганини чин юракдан ҳис қилди, десак, асло муболаға бўлмайди.

Меҳрибон Парвардигоримиз Шайх ҳазратларини восита қилиб, турли фирқалар, бидъатчилар, реакцион оқимлардан ўлкамизни Ўз паноҳида асради. Шайх ҳазратлари ислом оламида машҳур бўлган ва барча илм аҳллари, соғлом ақл эгалари мўътабар манба деб биладиган “Мухтасари Виқоя”, “Кифоя”, “Мазҳаблар – бирлик рамзи”, “Мазҳабсизлик – ислом шариатига таҳдид солувчи энг хатарли бидъат” каби китобларни ўзбек тилида шарҳлаб, ўша мураккаб йилларда кўпдан-кўп беҳуда ихтилофларнинг олдини олишга катта ҳисса қўшди.

100 дан ортиқ илмий-оммабоп асарлари билан халқимизнинг қалбидан чуқур жой олди. У киши юртимиз одамларининг маънавий суянчи эди. Юртбошимиз айтганидек, Шайх ҳазратлари бир ибратли ҳаёт кечирдики, ҳар бир ишларидан, ҳаракатларидан намуна олишга арзир эди.

Муҳаммад Содиқ Муҳаммад Юсуф ҳазратлари юксак инсоний фазилатлари, қомусий илми, даврнинг руҳини теран англаш хислати билан юртимиз одамларига қанчалик севимли бўлса, дунёнинг бошқа давлатларида ҳам шунчалик ардоқли эди, дунё олимларининг пешволаридан эди.

Эрталаб идорамизга телефон қилган бир юртдошимиз айтади:

– Ҳеч қачон ахборот кўрсатувини бунчалик ҳаяжон билан кўрмаган эдик, Президентимиз гапиряптилар, бизнинг кўз ёшимиз сел бўляпти. Ундан кейин муфтий ҳазратларининг гаплари севинчга тўла кўз ёшларимизни янада зиёда қилди, Илоҳо, Парвардигоримиз ўтганларимизни ҳурматлаган юртбошимизнинг, марҳум Шайхимизни устозимиз деб эъзозланган муфтий ҳазратларининг умрига, ризқига барака берсин. Бундай савобли ишларни қилишда уларнинг куч-қувватини, ғайрат-шижоатини зиёда қилиб, ёмон кўзлардан Ўз паноҳида асрасин.

Дарҳақиқат, Аллоҳ таоло ҳар доим Ўзининг каломига муҳаббати зиёда бўлган, аждодларини, олиму уламоларини эъзозлаган, ўзаро ҳурмат-эҳтиромни одат қилиб олган халқнинг насибасини зиёда қилиб қўйган.

Бинобарин, Ватанимизда давом этаётган Қуръон мусобақаси бу – шунчаки одамлар ўрганиб қолган беллашув эмас. Бунда Аллоҳнинг Каломи тиловат қилинаётир, Ушбу Калом ҳурматини васила қилиб дуоларга қўл очилаётир. Муфтий ҳазратлари кеча қурилиш объектида турганларида “Аллоҳ таоло Президентимиз қалбига илҳом солиб” дея  эсда қоладиган жуда ҳам чиройли иборани айтдилар.

Дарҳақиқат, Аллоҳнинг Каломини ўқиш бўйича мамлакат бўйлаб мусобақа ўтказиш ғояси, Унинг илмларини ўрганиш бўйича янги-янги марказлару мактаблар, олий ўқув юртлари, академиялар ташкил этиш, азизу авлиёларнинг манзилини обод қилиш ташаббуси уйғоқ қалбларда ҳар доим илҳом билан бўлади.

Аллоҳимиз юртимизни, халқимизни, бошимизда турган Йўлбошчимизни ҳар доим ҳифзу паноҳида асрасин! Бошлаган хайрли ишларимизда Ўзи ҳар доим мададкор бўлсин!

ЎМИ матбуот хизмати

Бугун Шайх Ҳазратимизнинг қадри баланд кўтарилиб, обрўлари ўзларига муносиб даражага қўйилган кун бўлди!

Умрларидан барака топсинлар, президентимиз Шавкат Мирзиёевнинг қалбларига Аллоҳ Ўзидан бўладиган илҳомни солиб, Чилонзор туманидаги Ҳазратимиз қурилишини бошлаган, шунча йилдан бери хароба бўлиб ётган, қурилиши тўхтаб қолган масжидга ташриф буюрдилар ва Шайх ҳазратимиз ҳақида шундай гапларни айтдиларки, «Э, Худога шукур, олтин зангламайди, деганлари шу экан», — деб юбордим.

«Шайх Муҳаммад Содиқ Муҳаммад Юсуф 1989 йилда, жуда қийин ва мураккаб даврда Ўрта Осиё ва Қозоғистон мусулмонлари диний идораси раиси, муфтий бўлди. Бу давр исломий илмлар, диний қадрият ва анъаналар қайта тикланган давр сифатида тарихимизда алоҳида ўрин тутади, — дедилар президентимиз. – У кишининг дунё мусулмонлари ўртасидаги обрў-эътибори жуда баланд эди. Шайх Муҳаммад Содиқ Муҳаммад Юсуф ўзининг илми, сўзи ва ибратли амаллари билан она Ватанга, динимиз равнақига чин дилдан ҳалол хизмат қилиш бўйича катта бир мактаб яратиб кетдилар, десак, тўғри бўлади. У кишининг илм ва ҳаёт йўли, бой меросини ўрганиш ва халқимизга етказиш — барчамизнинг бурчимиздир».

«Мен у киши билан кўп суҳбатлашганман», — дедилар президентимиз ва Ҳазратимизнинг кўп китоб ўқимаган одамнинг маънавияти паст бўлишини таъкидлаганларини эсладилар.

«Шу масжидга Шайх Муҳаммад Содиқ Муҳаммад Юсуф номи берамиз, бу ерда у кишининг музейларини қиламиз, у кишига тегишла ҳамма нарса шу ерда туради», — деганларда, очиғи, кўз ёшларимни тия олмадим.

Худога шукур, анча кеч Ҳазратимиз қадр топдилар, тиригида қадрлансалар қанчалар яхши бўларди, аммо бундан ҳам кўп кутишимиз мумкин эди, бунинг учун Президентимизга раҳмат!

Ҳозиргача қилган ишларининг ичида балки энг олийжаноб ишлари мана шу бўлгандир!

Дуо қиламиз, Аллоҳим, президентимизни Ўз ҳифзингда сақлагин! Бошлаган барча эзгу, хайрли ишларининг оқибатини хайрли қилгин! Шундай савобли ишларда бардавом бўлишларини насиб қилгин! Президентимизга дунёда ҳам охиратда ҳам саодат бер!

Каримберди Турамурод

ЎМИ Матбуот хизмати

Аллоҳ таоло марҳамат қилиб айтади: «Уларнинг ёнбошлари ўрин-тўшакка етмайди» (Сажда сураси, 16-оят).

Пайғамбар соллаллоҳу алайҳи васалламдан ривоят қилинади: «Кечалари қоим бўлингиз! Зеро, кечаси туриш сизлардан аввалги солиҳларнинг одатларидан эди. У Парвардигорингизга яқин қилади. Ёмонликларнинг мағфират бўлишига олиб келади ва ярамасликлардан қайтаради» (Имом Термизий ривояти).

Ҳасан Басрий айтадилар: «Кечасида туриб ўқилган намоздан ҳам оғирроқ ибодатни билмайман». Ундан сўрашди: «Нима учун кечаси туриб таҳажжуд ўқувчиларнинг юзлари одамлар орасида энг гўзалидир?» У зот жавоб бердилар: «Улар тунда Раҳмон билан ёлғиз қолишади ва Аллоҳ уларга Ўз нуридан инъом этади».

Билинг! Кечада қоим бўлиш жуда оғир, магарам, қоим бўлиш шартлари муяссар бўлган кишигина кечалари туришга муваффақ бўлади.

Бу сабабларнинг баъзилари зоҳирий, баъзилари ботинийдир.

Зоҳирий сабаблар:

– Кўп таом емаслик. Баъзилар айтади: «Эй муридлар жамоаси! Зиёда таом есангизлар, ортиқча сув ичасизлар, бас, кўп ухлайсизлар. Натижада ортиқча панду пушаймон бўласизлар».

– Оғир иш билан кундузи ўзини толиқтирмаслик.

– Кундузи қайлула – бир оз ором олишни тарк этмаслик. Зеро, у кечаси қоим бўлишда ёрдам беради.

– Гуноҳлардан эҳтиёт бўлиш. Имом Саврий айтади: «Бир гуноҳим сабабидан беш ой кечалари туришдан маҳрум бўлдим».

Ботиний сабаблар:

– Мусулмонларга ҳасад этишдан қалбнинг салим бўлиши. Қалбни бидъат ва залолатдан холи этиш. Ортиқча дунё ҳожатидан қалбни эътироз этиш.

– Доимий хавф – умиднинг озлиги қалбда бўлиши.

– Кечаси қоим бўлиш фазлини билиш.

– Аллоҳ йўлидаги муҳаббат ва иймон қуввати энг шарафли боислардандир, чунки Парвардигорга муножот этувчи кечаси қоим бўлса, У Зот ҳозир ва унга шоҳиддир. Бас, муножоти уни тун бўйи рағбатлантиради.

Абу Сулаймон раҳматуллоҳи алайҳ айтадилар: «Тун аҳли ўз кечаларида ўз дилхушлигида бўлган ўйин аҳлидан кўра кўпроқ лаззатда бўладилар. Тун бўлмаса, дунёда яшашни истамас эдим».

Пайғамбар соллаллоҳу алайҳи васаллам: «Кечада дуолар ижобат бўладиган шундай бир соат борки, агар мусулмон банданинг дуоси шу соатга тўғри келиб қолса, тилаган яхши тилагини Аллоҳ унга ато этади. Бу соат ҳар тунда бўлади»,  деб марҳамат қилдилар (Имом Муслим ривояти).

Кимнинг кечаси қоим бўлиб адо этадиган ибодати бўлса, уни тарк этишдан эҳтиёт бўлсин. Икки «Саҳиҳ»да ривоят бўлганки, Расулуллоҳ соллаллоҳу алайҳи васаллам Абдуллоҳ ибн Амрга бундай деб марҳамат қилдилар: «Кечаси қоим бўлиб, сўнг унда туришни тарк этган фалончига ўхшама».

 Мирсобит ВОҲИДОВ,

Тошкент вилояти Пискент тумани «Мулла Бўта Қози»
жоме масжиди имом-хатиби

ЎМИ Матбуот хизмати