muslim.uz

vendredi, 22 décembre 2017 00:00

ЭЪЛОН! ЎЗБЕКИСТОНДА ҚУРЪОНИ КАРИМ ҚИРОАТИ БЎЙИЧА МУСОБАҚА ЎТКАЗИЛАДИ

Ўзбекистон Республикаси Президенти Шавкат Мирзиёев жаноблари 2017 йил 1 сентябрда “Ҳазрати Имом” мажмуасида давлат, жамоат ва диний соҳа ходимлари билан бўлиб ўтган учрашувда Дин ишлари бўйича қўмита, Ўзбекистон мусулмонлари идораси ва Ўзбекистон Ислом цивилизацияси маркази биргаликда Республикада оммавий суратда ва турли босқичларда Қуръон қироати мусобақаларини ўтказиш бўйича топшириқ бердилар. Ушбу топшириқ ижросини таъминлаш бўйича Ўзбекистон мусулмонлари идораси буйруғига асосан 2018 йилнинг биринчи ярмида Ўзбекистонда Қуръон мусобақасини ўтказиш белгилаб олинди.

Муҳтарам Президентимизнинг ташаббуси билан ўтказилаётган ушбу Қуръон мусобақасида Ўзбекистон мусулмонлари идораси тасарруфидаги диний таълим муассасалари ва Тошкент ислом университети талабаларидан ташқари, масжидлардаги имом-хатиблар, имом ноиблари, муаззинлар ҳамда Қуръони карим қироати бўйича иқтидори бўлган 18-40 ёшдаги барча эркагу аёл фуқароларимиз иштирок этишлари мумкин.

Мусобақа икки йўналиш бўйича олиб борилади: ҳифз ва тиловат. Ҳифз йўналишида Қуръони каримни тўла ёд олган қори ва қориялар, тиловат йўналишида эса Қуръонни гўзал тарзда тиловат қила оладиган фуқаролар иштирок этади.

Иштирокчилар ёшга кўра иккига тақсимланади:

18‒25 ёшдаги иштирокчилар;

25‒40 ёшдаги иштирокчилар.

Мусобақанинг туман (шаҳар) ва вилоят босқичлари, шунингдек, мазкур ўқув юртларидаги саралаш босқичи 2018 йилнинг бошидан март ойига қадар ҳамда буларнинг барчаси учун республика босқичи 2018 йил апрель ойида ўтказилиши режалаштирилган.

Мусобақанинг биринчи босқичи вилоятлардаги бош шаҳар ва марказий туманларда (3‒4 та туманда) бўлиб ўтади. Иштирокчилар доимий рўхатдан ўтган манзиллари асосида қайтдан ўтадилар. Рўйхатга олиш 2018 йилнинг 1 январидан бошлаб 10 январигача давом этади. Ушбу Қуръон мусобақасида иштирок этиш истагида бўлган фуқаролар Ўзбекистон мусулмонлари идорасининг вилоятлардаги вакилликларига мурожаат қилишлари тавсия этилади (Мурожаат учун телефон рақамлар қуйида берилган).

Аёл-қизлар ўртасидаги Қуръон мусобақаси ўзига хос, шарқона тартибларга риоя этилган ҳолда ўтказилиши таъминланади. Бунга вилоятлардаги вакилликлар қошида хизмат кўрсатаётган отин ойилар масъул қилинади.

Биринчи босқич ғолиблари вилоят босқичида қатнашиш ҳуқуқига эга бўлади. Вилоятда биринчиликни қўлга киритганлар республика босқичига йўлланма олади.

Мусобақага доир бошқа хабарларни билиш учун Диний идоранинг muslim.uz сайтини мунтазам кузатиб боринг.

Ўзбекистон қорилари мусобақасини юқори савияда, ҳар тарафлама манфаатли, халқаро талабларга жавоб берадиган тарзда ўтказиш тўғрисида 2017 йил 18 декабрь куни Ўзбекистон мусулмонлари идораси Уламолар Кенгаши қарор қабул қилди ва ушбу мусобақа учун диний идора қошида махсус ҳайъат тузилди. Ушбу ҳайъат бутун Республика бўйлаб фаолият юритади.

Мусобақа ҳақида ЎМИ қошидаги ҳайъат котибияти билан боғланиш учун қуйидаги рақамларга мурожаат қилишингиз мумкин:

+998711487770, +998998987277

Мусобақада иштирок этмоқчи бўлган ҳар бир фуқаро ўз вилоятидаги ЎМИ вакиллигига мурожаат қилиб, рўйхатдан ўтади. Мусобақада иштирок этувчи аҳолиси кўпроқ бўлган вилоятларда мусобақа ўтказиладиган туманларда ҳам рўйхатга олиш ишлари олиб борилиши мумкин. Рўйхатга олиш 2018 йил 1 январдан 10 январгача эрталаб соат 09:00дан кечги соат 19:00гача давом этади.

Ўзбекистон Қуръони карим қироати мусобақасининг шаҳар ва туман босқичини ўтказиш бўйича

ЖАДВАЛ

№	Вилоят ва шаҳар номи	Ўтказиш жойи	Шаҳар ва туман босқичини ўтказиш санаси
1.	Жиззах вилояти	ЎМИ Жиззах вилояти вакиллиги +998973257243 Ботирхон Рўзиев	11-13.01.2018
2.	Сирдарё вилояти	ЎМИ Сирдарё вилояти вакиллиги +998911019820 Дилмурод Сулаймонов	11-13.01.2018
3.	Самарқанд вилояти	ЎМИ Самарқанд вилояти вакиллиги +99893485870 Ёқубжон Мансуров	14-16.01.2018
4.	Бухоро вилояти	ЎМИ Бухоро вилояти вакиллиги +998956000031 Анваржон Нуриллаев	14-16.01.2018
5.	Навоий вилояти	ЎМИ Навоий вилояти вакиллиги +998919911555 +998939507303 Музаффар Раҳмонов	16-18.01.2018
6.	Қорақолпоғистон Республикаси	Қорақолпоғистон Республикаси вакиллиги +998934897670 Зулфиқор Сапашов	19-21.01.2018
7.	Хоразм вилояти	ЎМИ Хоразм вилояти вакиллиги +998622284438 +998937572557 Бобожонов Ҳамид	19-21.01.2018
8.	Қашқадарё вилояти	ЎМИ Қашқадарё вилояти вакиллиги +998972004716 Бобомуродов Назруллоҳ ҳожи	22-23.01.2018
9.	Сурхондарё вилояти	ЎМИ Сурхондарё вилояти вакиллиги +998912382717 Абдусалом Фатҳуллаев	22-23.01.2018
10.	Андижон вилояти	ЎМИ Андижон вилояти вакиллиги +998742280196 +998916107040 Нуруллоҳ Қодиров	25-27.01.2018
11.	Наманган вилояти	ЎМИ Наманган вилояти вакиллиги +998906429977 Обидхон Икромов	27-29.01.2018
12.	Фарғона вилояти	ЎМИ Фарғона вилояти вакиллиги +998914532870 Ҳусниддин Турсунзода	29-31.01.2018
13.	Тошкент вилояти	ЎМИ Тошкент вилояти вакиллиги +998903482262 Султонов Фаррух	01-02.02.2018
14.	Тошкент шаҳри	Тошкент шаҳар вакиллиги +998712351733 +998974206264 +998949320022 Муроджон Кадиров	03.04.2018

Ушбу жадвал асосида шаҳар ва туманларда саралаш босқичи ўтказилгач, улардан ҳар бир йўналишнинг биринчи рақамли ғолиблари вилоят босқичида қатнашади.

Республика бўйича вилоят босқичлари февраль ойи ичида ўтказилиши режалаштирилган. Уларни ўтказиш санаси ва манзили келгуси хабарларда эълон қилинади.

ЎМИ Матбуот хизмати

Published in Ўзбекистон янгиликлари

vendredi, 22 décembre 2017 00:00

Муфтий ҳазрат AzTVда чиқиш қилди

Аввал хабар берганимиздек, Ўзбекистон Республикаси Президенти давлат маслаҳатчиси Рустам Комилов, Дин ишлари бўйича қўмита раиси Ортиқбек Юсупов, Ўзбекистон мусулмонлари идораси раиси, муфтий Усмонхон Алимов ҳазратлари ва бир неча уламолардан иборат делегация “2017 йил – Ислом ҳамжиҳатлиги йили: динлараро ва маданиятлараро мулоқот” номли халқаро анжуманда иштирок этиш учун Боку шаҳрида бўлиб туришибди.

Бугун, 22 декабрь куни Ўзбекистон мусулмонлари идораси раиси, муфтий Усмонхон Алимов ҳазратлари Озарбайжон телевидениясида Туркия дин ишлари бошқармаси бошлиғи Доктор Али Эрбаш ҳамда Кавказ мусулмонлари идораси раиси ўринбосари Ҳожи Фуад Нуруллоҳ иштирокида ташкил этилган давра суҳбатида иштирок этдилар.

Сўнгра, делегацияси аъзолари Боку шаҳрининг марказий масжиди “Ҳайдар” жомеида жума намозини адо этишди.

ЎМИ Матбуот хизмати

Published in Дунё янгиликлари

vendredi, 22 décembre 2017 00:00

Фиқҳ мусобақаси

Нукусдаги Муҳаммад ибн Аҳмад ал-Беруний номидаги ўрта махсус ислом билим юртида фиқҳ мусобақаси ташкил қилинди.

Унда мадрасанинг 3 “А”, 3 “Б”, 4 “А” ва 4 “Б” гуруҳи талабалари иштирок этди. Билим юрти устоз ва мураббийлари ҳамда Тошкент ислом институтининг амалиётчи талабалари ҳамкорлигида ташкил этилган мусобақа юқори савияда ўтди.

Беллашув тўртта шарт асосида ўтказилди.

Биринчи шарт: тўрт мазҳаббошининг ҳаёти ва илмий мероси тўғрисида; иккинчи шарт: фиқҳга оид саволлар бўлди, учинчи шартда эса фиқҳга доир кроссвордлар тайёрланиб, иштирокчиларга уларни ечиш топширилди. Энг охирги шарт, талабалар учун энг қизиқарли шартга айланди. Чунки бу шартда мураккаб бўлган, фиқҳ фанига доир мантиқий саволлар оғзаки ҳолатда жамоаларга ўқиб эшиттирилди. Қизиқарлилиги шундаки, тезкорлик билан ўйлаб жавоб берган жамоага биринчи ўринга чиқиб олиш имкониятини берадиган балл бериладиган бўлди. Аввалги учта шартда биринчи ўринда келган 3 “Б” курс талабалари бунда ҳам биринчиликни қўлга киритди. 3 “А” курс талабалари иккинчи ва 4 “А” курс талабалари учинчи ўринни қўлга киритди.

Мусобақа сўнгида ғолибларга мадраса раҳбарияти тайёрлаган совғалар топширилди.

Жумабек ИСКАНДАРОВ,

билим юрти ўқитувчиси

Published in Ўзбекистон янгиликлари

vendredi, 22 décembre 2017 00:00

Расулуллоҳ соллаллоҳу алайҳи васалламнинг суннатлари (8-қисм): Кийим кийганда

Абу Саид Худрий(розияллоҳу анҳу)дан ривоят қилинади: Расулуллоҳ (соллаллоҳу алайҳи ва саллам) кийимларини кийганда “Бисмиллоҳни” айтиб,

“Аллоҳумма инний асалука мин хойриҳи хойри ва ҳува лаҳу ва аъзу бика мин шарриҳи ва шарри ма ҳува лаҳу”,

(Аллоҳим,Сендан унинг яхшисини ва унга бериладиган нарсанинг яхшисини сўрайман ва унинг ёмонидан ҳамда унга бериладиган нарсанинг ёмонидан паноҳ тилайман),

деб айтардилар.

Published in Мақолалар

vendredi, 22 décembre 2017 00:00

Буюк Британия Ислом маркази

Бирмингем Ислом ва Ўрта Шарқ тадқиқотлари маркази Ислом дини асосларини ўрганишга ихтисослашган марказлардан бири ҳисобланади. Марказ Буюк Британиядаги Бирмингем университетининг “Фалсафа, диншунослик ва дин бўлими”да жойлашган. Бирмингем пойтахт Лондон каби машҳур ҳамда Оксфорд ва Кэмбриж шаҳарлари каби қадимий, тарихий шаҳардир. Ҳар йили марказга кўплаб тадқиқотчи олимлар малака ошириш ва илмий тадқиқотлар юзасидан ташриф буюрадилар. Марказда бир қатор таълим курслари ҳам йўлга қўйилган.

Ислом динига оид тадқиқотлар олиб бориш ҳамда мутахассисларнинг малакасини ошириш ушбу марказнинг асосий мақсадини ташкил этади. Марказ фаолияти кенг тармоқли бўлиб, у ўз ичига бир қатор фан соҳаларини қамраб олган. Жумладан:

Ислом динига оид манбалар;
Ҳозирги дунёда Ислом дини;
Маънавий Ислом;
Ислом динида аёлга муносабат;
Ўрта Шарқ тарихи ва маданияти.

Марказ қошида Шарқ қўлёзмалари бўлими ҳам фаолият юритади. Бу ерда Қуръони каримнинг энг қадимги қўлёзмаси сақланади. Ушбу қўлёзманинг ёшини билиш учун Оксфорд лабораториясида радиоуглерод усули ёрдамида тадқиқ қилинди. Олимлар 95 фоиз эҳтимоллик билан қўлёзма 568-645 йиллар орасида ёзилганини аниқлашган. Бу эса ушбу қўлёзма Қуръоннинг сақланиб қолган энг қадимий нусхаларидан бири эканини англатади. Бирмингем профессори Дэвид Томас: “Ушбу Қуръоннинг хаттоти Муҳаммад алайҳисаломнинг саҳобаларидан бири бўлиши мумкин”, дейди. Қўлёзма икки саҳифадан иборат бўлиб, ҳижозий усулда битилган.

Марказ қошида илмий тадқиқотлар олиб боришга асосланган магистратура йўналиши ҳам мавжуд. Бу йўналиш илмий тадқиқот олиб боришни хоҳловчилар учун мўлжалланган. Ушбу ўқув дастурида Ислом билимларини пухта ўрганиш ва тадқиқ этиш талаб этилади. Хусусан, Ислом тарихи ва фалсафаси ҳамда бугунги диний ва сиёсий ғоялар чуқур ўрганилади.

Даврон НУРМУҲАММАД тайёрлади

Published in Мақолалар