Инсон камтарлик билан, одобу ҳаёси чегарасидан чиқмай маромида кийиниши кераклиги Пайғамбаримиз соллаллоҳу алайҳи ва салламнинг ҳадисларида алоҳида таъкидланган. Сарвари олам: “Кийимларингизни дид билан кийинглар, токи одамлар орасида  юзга оро берган  хол мисоли чиройли бўласизлар”, деганлар.

Буюк мутафаккир Алишер Навоий ўзининг таълим-тарбия,  одоб-ахлоққа доир “Ҳайратул аброр” асарида  кишиларни зебу зийнатлар, молу дунё  эмас,  балки ақл-идрок,  шарму ҳаё безайди,  деб айтади.

Миллий кийим  масаласига тўхталадиган бўлсак,  қадимдан инсон қайси миллатга мансуб эканлиги  биринчи навбатда унинг кийимига қараб аниқланган. Ҳар  бир  миллат  ўзига хос кийиниш маданиятига эга. Бизнинг миллий кийимларимиз дунёнинг қай бурчагида бўлмасин ҳар қандай халқнинг ҳавасини келтириб ўзига маҳлиё қилади.

Мамлакатимизда истиқлолнинг биринчи кунларидан  бошлаб миллий ва диний қадриятларимизни қайта тиклаш ва ривожлантиришга катта эътибор қаратилди. Миллий байрамларимиз урф-одатларимиз  қайта тикланди.

Кейинги пайтларда афсуски,  ҳаддан  ташқари  замонавий либосларга берилиб кетган опа-сингилларимиз ҳам оз эмас. Юртимиз бозорларига кириб келаётган тор  ва  очиқ-сочиқ  кийимларни кийиб юриш динимизга  ҳам на шарқона миллий урф-одатларимизга ҳам тўғри келмайди. Барча  амалларимизда талаб қилинадиган меъёр камтарлик орасталик кийинишга ҳам татбиқ этилиши керак.

Чиройимизга чирой,  кўркимизга кўрк қўшадиган миллий либосларимиз қадрини баланд тутайлик.

Раъно Қодирова,

Хоразм вилояти бош имом-хатибининг

хотин-қизлар масалалари бўйича ёрдамчиси

Уйда ёлғиз қолган эр дастрўмолчасини қидириб, тополмади. Асабийлаша бошлади... Тахмондаги барча кийимларни ерга улоқтириб, уни “астойдил” излаган бўлди. Топилмади. Аксинча, устма-уст қалашган ва аралаш кийимлар орасидан бир парча матони топиш янада мушкул ҳолга келди. Умид узилди. Асаблар янада таранглашди. ...

Телевизорда футбол томоша қилиб ўтирган ўйин ишқибози овоз баландлигидан қониқиш ҳосил қилмади чоғи, бошқарув пультини қўлга олди. Аксига овоз кўтариш кнопкаси ишламай қолди. Пешонаси тиришди. Асабийлаша бошлади... Кнопкани янада қаттиқроқ босди. Кнопга бечора ҳам борича эзилди. Барибир ишламади. Кейин пультнинг орқасини кафтига такрор-такрор урди ва ҳалиги кнопкани яна босди. Натижа бўлмади. Алалоқибат, пультни қоқ “бели” билан кучи борича хонтахтага урди. У синиб, бўлак-бўлак ҳолича сочилиб кетди. “Натижа”ни кўргач футбол кўришдан ҳам хафсаласи пир бўлди. Асаблар янада таранглашди. ...

Сув трубасига нимадир бўлди шекилли, сув унинг жумрагидан яхши оқмай қолди. Махсус каттакон ключни олиб, унинг жағини трубанинг қайрилган қисмидаги уланмага солди. Уёқ-буёққа бураб кўрди. Бўшамади. Асабийлаша бошлади... Ключни баланд кўтариб, унинг муштдек темир бошини пластмасса трубанинг ялонғоч баданига забр билан солди. Труба чўрт синди. Унинг қорнини ёргудек бўлиб соатлаб оққан сув ҳамма томонни кўлга айлантирди. Пастки қаватдаги қўшнилар “дод” солди... Асаблар янада таранглашди. ...

Орадан бироз вақт ўтиб ҳар учала ҳолат “қаҳрамонлари” сўнги қарорларидан пушаймон бўлишди.

Унутманг ва ёдда тутинг!

Ҳакимлар шундай дебдилар:

يترك باللين ما لا يترك بالعنف،

و ما صاحب الرفق أمرا إلا زانه،

Қўпол куч билан ечими топилмаган ишлар оҳисталик билан ечим топади.

Қайсики ишда ОҲИСТАЛИК ва ФАРОСАТ ҳамроҳ бўлса – бу фазилатлар ушбу ишга зийнат ато этади!

 НУРАЛИ Мавланов,
Зангиота тумани бош имом-хатиби 

Тарихда улуғ шоҳ, шоир, олим,  том маънодаги буюк ижодкор бўлган Заҳириддин Муҳаммад Бобур жаҳон  маданиятига  улкан ҳисса қўшган   алломалардан биридир.

Бобур  Ҳинд заминига  Ислом таълимотларини олиб кирган ва дин равнақига  ўз ҳиссасини қўшган буюк шахсдир. Ўн икки ёшида отаси Умаршайх Мирзо вафотидан кейин    подшоҳ бўлган Бобур Мирзонинг  ҳаёти жангу жадалларда ўтган. Тақдир тақозоси билан она  юртидан кетишга мажбур бўлган. Ҳиндистонга бориб ўз ҳукмронлигини мустаҳкамлаб, марказлашган қудратли давлатни барпо этган.

Бобур  гўзал хулқ-атвор эгаси, тақво, шижоат, ҳалоллик, вафодорлик,  сабр-тоқат, ҳиммат, адолат,  раҳм-шафқат  каби хислатларни мужассамлаган.  Бу  хислатлар  унинг  ижодида ҳам   ўз ифодасини топган.

Бори элга яхшилиғ қилғилки, мундин яхши йўқ,

Ким, дегайлар даҳр аро қолди фалондин яхшилиғ.

Шоир ушбу машҳур байт орқали:  “Бировдан ёмонлик кўриб турганингда ҳам фақат яхшилик қил, ёвузликка эзгулик билан жавоб қайтар”, деб таъкидламоқда.

Заҳириддин Муҳаммад Бобур  Ҳинд заминида  қурилиш ишларига,  халқнинг яхши яшашига, ободончиликка  катта эътибор қаратди. Бу ҳақда Н.Низомиддинов  “Буюк Бобурийлар тарихи” номли асарида  шундай ёзади:  “Шаҳарларда ободончилик, таъмирлаш, боғу  роғлар барпо этиш ва экинзор ерларда  суғориш ишларининг йўлга қўйилиши, Самбҳал ҳамда Аграда масжиду мадрасаларнинг қурилиши Бобурнинг амалга оширган ижтимоий ва иқтисодий ислоҳотларининг илк куртаклари эди”.

Бобурнинг   асарларидаги ахлоқий қарашлар,  бағрикенглик,  инсонпарварлик  тамойиллари    инсонларни   доимо    эзгуликка чорлаб туради.

М.Абдуллаева,

ЎМИ мутахассиси

بسم الله الرحمن الرحيم

Муҳтарам жамоат! Илм олиш динимизда энг улуғ ибодатлардан саналади. Чунки банда илм воситасида Раббисини танишга, У зотнинг буйруқларини бажаришга, шунингдек, барча мавжудотларга тааллуқли бўлган ҳақларни адо этишга муваффақ бўлади. Бирор бир дин илм олишга Ислом динидек тарғиб қилмаган. Шунингдек, Ислом дини жаҳолатга қарши илм-маърифат билан курашишга катта эътибор қаратган. Илк нозил бўлган ваҳийнинг “Ўқи” деб нозил бўлиши сўзимизнинг ёрқин далил бўла олади. Ўқиш – илмнинг калитидир.

Аллоҳ таоло Муҳаммад соллаллоҳу алайҳи васалламни пайғамбар қилиб юборган пайтни эсга олайлик. Одамлар жаҳолат ботқоғига тамоман ботган эди. Жоҳилиятнинг бу ҳолатини ёритишга тарихчиларнинг қалами ўтмаслик қилади, дейилган. Аллоҳ таоло уларнинг бу ҳолатини Қуръони каримда шундай баён қилган:

وَكُنْتُمْ عَلَى شَفَا حُفْرَةٍ مِنَ النَّارِ فَأَنْقَذَكُمْ مِنْهَا

Яъни, “Дўзах чоҳи ёқасида турганингизда, сизларни ундан қутқарди”, (Оли Имрон сураси, 103-оят).

Дарҳақиқат, Аллоҳ таоло илм дини бўлмиш Ислом дини билан инсониятни жаҳолат зулматидан Ислом нурига олиб чиқди. Ислом дини илмни имонга тасдиқ, амалга эса йўлбошчи қилган диндир. 

Расулуллоҳ соллаллоҳу алайҳи васаллам ҳар бир мусулмон киши илм олиши фарз экани ҳақида шундай деганлар:

عَنْ أَنَسِ بْنِ مَالِكٍ رَضِيَ اللهُ عَنْهُ، قَالَ: قَالَ رَسُولُ اللَّهِ صلى الله عليه وسلم: طَلَبُ الْعِلْمِ فَرِيضَةٌ عَلَى كُلِّ مُسْلِمٍ. رَوَاهُ ابْنُ مَاجَةَ

Яъни, Анас ибн Молик розияллоҳу анҳудан ривоят қилинади: “Расулуллоҳ соллаллоҳу алайҳи васаллам: “Ҳар бир мусулмон кишига илм талаб қилиш фарздир”, дедилар”. Ибн Можа ривоят қилган

Ислом дини диний ҳамда дунёвий илмга умумий даъват қилиб, динда фақиҳ бўлишликка алоҳида урғу берган. Имом Бухорий ва Муслим раҳматуллоҳи алайҳумолар ривоят қилган ҳадисда шундай дейилган:

عَنْ مُعاويةَ رَضِيَ اللهُ عَنْهُ قَالَ : قَالَ رسول الله صلى الله عليه وسلم: « مَنْ يُرِدِ اللهُ بِهِ خَيْراً يُفَقِّهْهُ في الدِّينِ » . متفقٌ عَلَيْهِ 

Яъни, Муовия розияллоҳу анҳудан ривоят қилинади: “Расулуллоҳ соллаллоҳу алайҳи васаллам: “Аллоҳ кимга яхшиликни ирода этса, уни дин ишида фақиҳ қилиб қўяди”, дедилар”. (Муттафақун алайҳ)

Ушбу ҳадисга кўра, илм эгалари улуғ фазилат эгаси экани, маълум бўлади.

Ҳакимлар айтган экан: “Кимда-ким ўзининг билмаслигини яшириб, илм олишдан бош тортса ёки касалини яшириб, даволанишдан бош тортса, у ўзига ўзи хиёнат қилибди”.

Чунки диний иш бўлсин ёки дунёвий иш бўлсин, унга билмасдан киришган кишининг фойдасидан кўра зарари кўпроқ бўлади.

عَنِ الزَّنْجِيِّ بْنِ خَالِدٍ؛ قَالَ: دَخَلْنَا عَلَى الزُّهْرِيِّ وَنَحْنُ غِلْمَانٌ، فَقَالَ لَنَا: اطْلُبُوا الْعِلْمَ؛ فَإِنْ أَرَدْتُمُ الدُّنْيَا نِلْتُمْ، وَإِنْ أَرَدْتُمُ الْآخِرَةَ نِلْتُمْ

Занжий ибн Холид айтади: “Болалик пайтимизда Зуҳрийнинг ҳузурига кирган эдик, у зот бизга: “Илм талаб қилинглар. Шунда сиз дунёни истасангиз унга етишасиз, охиратни истасангиз ҳам унга етишасиз”, дедилар”.

Муҳтарам жамоат! Ислом дини инсоннинг дунё ҳаёти учун лозим бўлган барча илмларни ўрганишни фарз даражасига кўтарган диндир. Масалан, тиб ёки ҳисоб илмини олайлик. Бу илмларсиз инсон ҳаётини саодатли кечишини тасаввур қилиб бўлмайди. Бошқа дунёвий илмлар ҳам худди  шулар кабидир. Бу илмлар фарзи кифоя ҳисобланади. Бу илмлар билан машғул бўлаётган кишилар фарз ибодатини бажаряпман деган ниятда машғул бўлишса, дунёвий манфаатларни қўлга киритишдан ташқари, улкан ажр-савобларга ҳам эришадилар.

Худди шунингдек, турли ишлаб чиқариш ва саноатга доир илмлар ҳам фарзи кифоядир. Демак, ҳозирги замонда мусулмонлар фан-техника соҳасида ҳам барча дақиқ илмлардан кифоя қилиш даражасида билишлари зарур бўлади. Чунки давлатнинг куч-қудрати, ўзга давлатларга қарам бўлиб қолмаслиги илм-фаннинг ривожи ва тараққиётига боғлиқдир.

Ислом дини илм фанга тарғиб қилиб, унинг ҳукмини фарз даражасига кўтарар экан, бу ҳукм аёл қизларни ҳам четлаб ўтмаган. Чунки жамиятнинг ярмидан кўпини аёл-қизлар ташкил қилади. Уларни илмсиз қолдириш жамиятни илмсиз қолдириш демакдир. Айниқса, келажак авлод тарбияси аёл-қизларимизга боғлиқдир. Улар билимли бўлишса, улар тарбиялаган авлод ҳам билимли бўлади. Улар одобли бўлишса, улар тарбиялаган авлод ҳам одобли бўлади.

Ривоят қилинишича, бир киши ҳакимлардан бирининг ҳузурига келиб: “Ҳазрат, менинг бир ўғлим ва бир қизим бор. Улардан ҳар иккисини ўқиштишга қурбим етмайди, фақатгина биттасини ўқитишга имконим бор, қайси бирини ўқитай?”, деб сўрабди. Шунда ҳаким зот: “Қизингни ўқит, чунки у келажакда фарзанд тарбия қилади. Агар ўғлингни ўқитсанг, бир кишини ўқитган бўласан, аммо қизингни ўқитсанг, бутун бир жамиятни ўқитган бўласан”, деб жавоб берган экан. Қанчадан-қанча алломаларни оналари тарбиялагани ҳеч биримизга сир эмасдир.

Муҳтарам жамоат! Биз фарзандларимизни, айниқса, қизларимизнинг таълим ва тарбиясига катта аҳамият қаратишимиз лозимдир. Жамиятнинг салоҳияти ва равнақи унинг илмга бўлган муносабати билан ўлчанади. Дарҳақиқат, қайси жамиятда илмга ташналик сусайса, илм ўрганишга эътибор камайса, ўша жамият тараққиётдан ортда қолади. Энг ёмони, у маънавий инқирозга ёки ҳалокатга юз тутиши муқаррардир.

Ҳар қандай жамиятнинг олимлари, зиёлилари, айниқса, ота-оналар миллатнинг маънавий дунёси қашшоқланмаслиги, ахлоқи бузилмаслиги, сохта ва бузғунчи эътиқодлар ва маданиятлар таъсирига тушиб қолмаслигига масъулдирлар. Фарзандларимизга мактабга бориб таълим олишнинг ибодат эканини билдиришимиз керак. Устоз, ўқитувчи ва мураббийлар ҳам ўзларига юклатилган бурч ва масъулиятни яхши англаб, таълим ва тарбияни пухта олиб боришлари керак бўлади. Мактабда берилаётган дарсларни пухта ўзлаштиришга алоҳида эътибор қаратиш ҳар бир ота-она ва устозларнинг масъулиятидир. Уларни ўз ҳолларига ташлаб қўйиб, қаерда юргани, кимлар билан ўртоқлашаётгани, нималарга қизиқаётганидан огоҳ бўлмасликнинг оқибати аянчли бўлади. Аллоҳ асрасин!

Илмнинг шарафи ҳақида Расуллуллоҳ соллаллоҳу алайҳи васаллам қуйидаги ҳадсилари ҳам далолат қилади:

عَنْ أَبِي وَاقِدٍ الحارث بن عوف رضي الله عنه أنَّ رسولَ الله صلى الله عليه وسلم بَيْنَمَا هُوَ جَالِسٌ في المَسْجِدِ، والنَّاسُ مَعَهُ، إذْ أقْبَلَ ثَلاثَةُ نَفَرٍ، فأقْبَلَ اثْنَانِ إِلَى رسُولِ اللهِ صلى الله عليه وسلم وَذَهَبَ واحِدٌ؛ فَوَقَفَا عَلَى رسولِ الله صلى الله عليه وسلم. فأمَّا أحَدُهُما فَرَأَى فُرْجةً في الحَلْقَةِ فَجَلَسَ فِيهَا، وَأمَّا الآخرُ فَجَلَسَ خَلْفَهُمْ، وأمَّا الثَّالثُ فأدْبَرَ ذاهِباً. فَلَمَّا فَرَغَ رَسُولُ الله صلى الله عليه وسلم قَالَ: «ألا أُخْبِرُكُمْ عَنِ النَّفَرِ الثَّلاَثَةِ: أَمَّا أَحَدُهُمْ فَأوَى إِلَى اللهِ فآوَاهُ اللهُ إِلَيْهِ. وَأمَّا الآخَرُ فاسْتَحْيَى فَاسْتَحْيَى اللهُ مِنْهُ، وأمّا الآخَرُ، فَأعْرَضَ، فَأَعْرَضَ اللهُ عَنْهُ». متفقٌ عَلَيْهِ.

Яъни, Абу Воқид ал-Ҳорис ибн Авф розияллоҳу анҳудан ривоят қилинади: “Расулуллоҳ соллаллоҳу алайҳи васаллам одамлар билан бирга масжидда ўтирган эдилар. Шу пайт уч киши кириб келди. Иккитаси Расулуллоҳ соллаллоҳу алайҳи васалламга қараб юрди, биттаси эса кетиб қолди. Шунда у иккиси Расулуллоҳ соллаллоҳу алайҳи васалламнинг тепаларида туриб қолишди. Улардан бири даврада бўш жойни кўриб, ўша ёрга ўтирди. Наригиси эса одамларнинг орқа томонига ўтирди. Учинчиси эса орқасига қайтиб кетди. Расулуллоҳ соллаллоҳу алайҳи васаллам фориғ бўлгач: “Сизларга бу уч киши ҳақида хабар берайми? Уларнинг бири Аллоҳдан бошпана сўраган эди, Аллоҳ унга бошпана берди. Наригиси ҳаё қилганди, Аллоҳ ҳам ундан ҳаё қилди. Бошқаси эса юз ўгирди, Аллоҳ ҳам ундан юз ўгирди”, дедилар”.( Муттафақун алайҳ).

Ушбу ҳадисда илм даврасига қўшилган кишини Аллоҳдан бошпана сўради, дейилди. Аслида, зулм, хавф-хатар ва тазйиқларда бошпана сўралади. Демак, жаҳолат бу - зулм ва хавф-хатар экан. Бундан қутилишнинг ягона йўли эса илм олишдир. Фақат илм билангина Аллоҳ таолодан бошпана сўралади. Имом Бухорий раҳматуллоҳи алайҳнинг “Илмдан бошқа нажот йўқ ва бўлмагай!”, деган маънода машҳур сўзлари ҳам бор.

Шундай экан, илм ҳалқасига қўшилиш ва доимий илм излаш лозим бўлади. Чунки илм ўқиган киши Аллоҳнинг паноҳида бўлади. Шунингдек, илмдан юз ўгириш Аллоҳдан юз ўгириш экан. Аллоҳнинг ҳузуридан бошпана топмоқчи бўлсак, унутмайликки, бу нарсага илмсиз эришиб бўлмайди.

Муҳтарам намозхонлар! Қуръон уммати, Илм уммати, Муҳаммад соллаллоҳу алайҳи васаллам уммати  бўлган биз мусулмонлар учун илмсиз қолиш ордир. Чунки буларнинг барчаси илмга даъват қилади. Биз агар илм ўқимасак, фарзандларимизни илмга қизиқтирмасак, Муҳаммад соллаллоҳу алайҳи васалламнинг умматимиз деган даъвони нима билан исботлаймиз!?.

Бир олим айтган экан: “Агар бирор қимматли нарсангизни ҳеч ким топа олмайдиган жойга беркитмоқчи бўлсангиз, китобнинг орасига солиб қўйинг, чунки бугунги одамлар китоб очмайдиган бўлиб кетишди”.

Муҳтарам жамоат! Дунёда ҳам, охиратда ҳам инсонга илмдан кўра кўпроқ фойда келтирадиган нарса йўқ. Жаҳолатдан-да кўра зарар берувчироқ нарса ҳам йўқ. Али розияллоҳу анҳу айтган экан: “Инсонларнинг энг қадри ози – илми озидир”, деганлар.

Илмсизлик, жаҳолат инсониятни тубанликка, ҳалокатга олиб бориши муқаррар. Инсонлар илм орқали парвардигорларини танийдилар. Охирати ва дунёсини илм билан обод қилади.

Алҳамдулиллаҳ, юртимизда барча соҳада китоблар нашрдан чиққан ва чиқмоқда. Масалан биргина диний соҳани олсак, тафсир, ҳадис, фиқҳ, ақида, улумул-қуръон, усул-фиқҳ, ҳатто грамматика фанига ҳам оид бўлган кўплаб китоблар она тилимизда нашрдан чиққан. Биз фақат олиб ўқисак, кифоя. Биз фарзандларимизни китоб ўқишга тарғиб қилайлик. Фақат интернет билан чекланиб, илмни юзаки ўрганмасдан, китоб мутолаасига ҳам эътибор қаратайлик.

Илм олишга боғлиқ одоблар ҳам бор бўлиб, уларни билиш учун шунга тегишли бўлган китобларни ўқиб ўрганайлик. Фарзандларимиз илм-маърифатли бўлишида энг катта масъул биз ота-оналар эканимизни зинҳор унутмайлик.

Аллоҳ таоло юртимизни тинч-омон қилсин. Илм ва тарбия йўлида хизмат қилаётган ва унга ташаббус кўрсатётган барча раҳбар ва ходимларимизни, устоз ва мураббийларимизни эзгу мақсадалрига муваффақ қилсин! Омин!

2017 йилнинг 12 февраль куни Имом Бухорий халқаро марказида диний ходимларнинг II давра Х босқич ўқувларининг бошланишига бағишланган суҳбат тадбири бўлиб ўтди. Унда Қорақалпоғистон Республикаси, вилоятлар ва Тошкент шаҳридан рўйхат асосида 70 нафар масжид имом-хатиблари иштирок этишди.

Мазкур тадбирда Ўзбекистон мусулмонлари идораси раиси ўринбосари в.б. И.Иномов, Марказ директори Ш.Зиёдов, Ўзбекистон мусулмонлари идораси масжидлар бўлими мудири М.Қаюмов ва Дин ишлари бўйича қўмита масъул ходими Ш.Абдирасилов қатнашиб, тингловчиларни янги ўқув машғулотларининг бошланиши муносабати билан қутлаб, Ўзбекистон Республикаси Биринчи Президенти ташаббуси билан ташкил этилган Имом Бухорий халқаро маркази, унинг мақсад ва вазифалари ҳақида тушунчалар беришди. Марказдаги шарт-шароитлар ҳамда тингловчилар томонидан риоя этилиши лозим бўлган тартиб-қоидалар тушунтирилди.

Суҳбат якунида ҳозирдаги айрим экстремистик гуруҳларнинг бузғунчи ғоялари айниқса, Яқин Шарқ мамлакатларидаги турли низо ва фитналардан доимо огоҳ бўлиш ва шу билан бирга жойларда ўтказилаётган маънавий-маърифий тадбирларда бу масалалар юзасидан холисона ва тўғри тушунтириш ишлари олиб бориш, диний соҳа ходимлари, айниқса, имом-хатиблар бугунги кунда янада шижоатли, билимли, ҳар тамонлама етук кадр бўлиб, замон билан ҳамнафас яшаш, бепарво ва лоқайд бўлмаслик лозимлиги таъкидланди. Юртимизда чоп этилаётган маънавий-маърифий газета ва журналларда, интернет сайтларида ўзларининг ҳозирги глобаллашув даврида халқимиз, хусусан ёшларни тўғри йўлдан оғдиришга уринаётган ёт ғоя ва таҳдидларга қарши долзарб мавзулардаги мақолалар билан фаол иштирок этиш тавсия этилди.
Тингловчилар бундан бир неча йил муқаддам бу даргоҳда олган билим ва тажрибалари ўзларининг иш фаолиятларида қўл келганини эътироф этиб, дунёда ягона бўлиб турган бу марказнинг келгусидаги ишларига муваффақиятлар тилаб, ўз миннатдорчиликларини изҳор этишди.

13 февраль куни тасдиқланган ўқув жадвалига мувофиқ биринчи машғулотлар ўтказилди.
Унда Ўзбекистон мусулмонлари идораси раиси ўринбосари в.б. Иброҳим Иномовнинг “Имом Бухорийнинг ҳаёти ва ижодий фаолияти”, “Имом-хатибларнинг маънавий-маърифий соҳадаги долзарб вазифалари” мавзуидаги маърузалари тингланди.
Марказда тингловчиларнинг самарали таҳсил олишлари, ётоқхонада мазмунли ҳордиқ чиқаришлари учун барча шароитлар яратилган. Ўқув хоналари ва ётоқхона электр манбаи, иссиқ сув ва бошқа қулайликлар билан талаб даражасида таъминланган.
Марказ ошхонасида тингловчилар учун уч маҳал иссиқ овқат, ётоқхона буфетида енгил тамадди қилишлари учун зарур шароитлар ташкил этилган.
Таъкидлаш жоизки, II давра Х босқич тингловчилари дастлабки машғулотларни кўтаринки кайфиятда бошлашди.

Муҳаммадназар Қаюмов,
ЎМИ Масжидлар бўлими мудири