Ислом цивилизацияси марказида ўтказилаётган Халқаро Пресс-клубда бу ҳақда маълумот берилди.

Унда Ўзбекистон Республикаси Президентининг маслаҳатчиси – Спичрайтер Х.Султонов ўз фикрларини билдирди:

“Мамлакатимизда сўнгги йилларда китобхонликка жуда катта эътибор қаратилмоқда. Китоб, адабиёт нафақат ўз маданиятимизни бойитадиган, халқаро дипломатик муносабатларда ҳам таъсирчан восита эканлиги Президентимизнинг олиб бораётган сиёсати мисолида яққол англаш мумкин.

Президентимиз ўтган икки ярим йиллик фаолиятлари давомида дунёнинг жуда кўп мамлакатларида бўлганида ўша давлатларнинг раҳбарларига улуғ мутафаккирларимиз асарларини совға қилиш амалиётини йўлга қўйдилар. Бу эса ижобий натижа бермоқда. Жумладан, давлатимиз раҳбарининг Бирлашган Араб Амирликларига бўлган расмий давлат ташрифлари давомида мамлакатимизда чоп этилган БАА Вице-президенти, Дубай амирлиги ҳокими, машҳур давлат ва сиёсат арбоби Муҳаммад бин Рошид Ол Мактумга муаллифнинг юртимизда нашр қилинган иккита “Менинг тарихим”, “Менинг тасаввурим” номли китоблари давлатимиз раҳбари томонидан совға қилинди.

Мен шунга гувоҳ бўлдимки, китоб совға қилинган вақтда Президентимиз Амирга “Китобингизнинг бешинчи саҳифасида бизнинг буюк бобомиз Имом Бухорий ҳазратларининг муборак ҳадислари келтирилган экан”, деб қайд этганларида сиёсатчининг жуда қаттиқ тўлқинланганига гувоҳ бўлдик”.

Ўзбекистон мусулмонлари идораси Матбуот хизмати

Ўзбекистон Республикаси Туризмни ривожлантириш бўйича Давлат қўмитаси Бухоро вилояти ҳудудий бошқармаси делегацияси “ҳалол-туризм” ривожланишининг маркази ҳисобланган Ломбок (Индонезия) оролида музокаралар ўтказди.

Ғарбий Нуса вилояти губернатори ўринбосари Сити Рохми Жалилах билан учрашувда икки томонлама ҳамкорликнинг истиқболлари кўриб чиқилди. Қайд этилишича, Ломбок ороли бутун дунёда Индонезия “ҳалол-туризм” ривожланишининг маркази ҳисобланади, бу ерга ҳар йили 4 миллиондан ортиқ сайёҳлар ташриф буюради.

Ташриф якунларига кўра, вилоят туризм бошқармаси, туристик агентликлар, меҳмонхоналар ва ресторанлар маъмуриятлари билан 5 та шартнома имзоланди, улар ушбу йўналишда икки мамлакат ҳудудларининг ҳамкорлиги учун асос бўлиб хизмат қилади.

“Дунё” ахборот агентлиги хабарига кўра, шу йилнинг август ойида индонезиялик ҳудудий делегация Бухорого ташриф буюради.

Ўзбекистон мусулмонлари идораси Матбуот хизмати

2019 йилнинг 27 июнь куни Ўзбекистон Республикаси Ташқи ишлар вазири Абдулазиз Камилов Марокаш Подшоҳлигининг янги тайинланган Фавқулодда ва Мухтор Элчиси (қароргоҳи Боку шаҳрида) Муҳаммад Одил Эмбаршни қабул қилди.

Ишонч ёрлиқларини қабул қилиш маросимидан сўнг Вазир Элчини Ўзбекистонга тайинлангани билан қутлади ва Ўзбекистон-Марокаш муносабатларини мустаҳкамлашда муваффақият тилади.

Суҳбат чоғида икки томонлама ҳамкорликнинг ҳозирги ҳолати ва ривожланиш истиқболлари кўриб чиқилди.

Шу нуқтайи назардан Ўзбекистон Ташқи ишлар вазирлиги ва Марокаш Ташқи ишлар ва халқаро ҳамкорлик вазирлиги делегациялари ўртасида Тошкент шаҳрида сиёсий маслаҳатлашувлар ўтказиш долзарблиги тасдиқланди. Янги даражадаги ҳамкорликнинг асосларини яратиш мақсадида муносабатларнинг шартнома-ҳуқуқ базасини кенгайтиришга қизиқиш билдирилди.

Ўзбекистон томони 2018-йил декабрь ойида БМТ Бош Ассамблеясининг «Маърифат ва диний бағрикенглик» махсус резолюциясини қабул қилиншда фаол қўллаб-қувватлагани учун Марокаш томонига миннатдорлик билдирди.

Шунингдек, Бухоро шаҳри 2020-йилда ислом маданияти пойтахти деб эълон қилиниши муносабати билан ташкил этиладиган тадбирларни ўтказишда ҳамкорлик қилишга томонлар тайёр эканлиги қайд этилди.

Ўзбекистон мусулмонлари идораси Матбуот хизмати

Қозоғистоннинг Арис шаҳридаги қатор портлашлардан сўнг, шаҳарда жойлашган масжидларнинг биноси ҳеч қандай жиддий талафот кўрмади. Бу ҳақда Sputnik хабар қилади.

Масжид хизматчилари сўзларига кўра, айрим биноларга кичик шикаст етган. Масжид атрофида жойлашган уйларнинг ойналари синган. Арис марказий масжидининг бош имоми Абдукаман Абдукарим масжид биноларига бироз шикаст етганини айтди.

Имомнинг сўзларига кўра, Арис туманида жами 27 та масжид очилган бўлиб, шаҳарнинг ўзида 9 та масжид фаолият кўрсатади.

«Бирорта ҳам ойна синмаган», — дейди видео муаллифи.

Ўзбекистон мусулмонлари идораси Матбуот хизмати

Дунёнинг турли минтақаларида юз бераётган можаролар, тўқнашувлар, афсуски, кўп ҳолларда диний ақидалар ниқоби остида илгари сурилаётган бузғунчи ғояларга бориб тақалмоқда. Бундай вазиятда муқаддас ислом динининг инсонийлик, бағрикенглик, тинчликпарварлик қадриятларини жаҳон афкор оммасига кенг танитилиши муҳим аҳамият касб этмоқда.

Бу борада Ўзбекистон раҳбарияти янги ташаббусларни илгари сурмоқда. Президент Шавкат Мирзиёев 2016 йил октабр ойида Ислом ҳамкорлик ташкилоти Ташқи ишлар вазирлари кенгашининг Тошкент шаҳрида ўтказилган учрашувида Имом Бухорий халқаро илмий-тадқиқотлар марказини тузиш ва исломнинг асл қадриятларини дунё аҳлига кенг тарғиб қилиш таклифини умумжаҳон кун тартибига қўйган эди.

2017 йил Бирлашган Миллатлар Ташкилоти Бош Ассамблеясининг 72-сессиясида давлатимиз раҳбари томонидан мазкур йўналишда янги халқаро ташаббуслар таклиф қилинди. Булар орасида, айниқса, БМТ Бош Ассамблеясининг «Маърифат ва диний бағрикенглик» деб номланган махсус резолюциясини қабул қилиш ҳақидаги ташаббус алоҳида аҳамият касб этади.

Ўзбекистон замини инсоният цивилизациясининг қадимий бешикларидан бири ҳисобланади. Халқимизнинг бой тарихий, илмий, маънавий меросини ҳар томонлама ўрганиш, жаҳон афкор оммасига кенг таништириш, энг муҳими, ислом динининг асл инсонпарварлик моҳиятини чуқур очиб бериш мақсадида давлатимиз томонидан изчил амалий чоралар кўрилмоқда. Жумладан, Ўзбекистон халқаро ислом академияси ва Ислом ҳамкорлик ташкилотининг (ИҲТ) муҳим органи ҳисобланган Ислом тарихи, санъати ва маданияти тадқиқот маркази (ИРCИCА) ўртасида ҳамкорликни ривожлантириш ҳақида келишувларга эришилди.

Ислом оламида ўз ўрнига эга бўлган ушбу Марказ ва Академия ўртасида имзоланган меморандумга асосан, икки муассаса қадимий қўлёзмаларни тадқиқ қилиш, илмий-тадқиқотлар олиб бориш, конференция ва семинарлар ташкил этиш каби масалаларда ўзаро ҳамжиҳатлик билан иш олиб бормоқда.

ИРCИCА бош директори, профессор Халит Эрен «Дунё» ахборот агентлиги мухбирига берган интервьюсида Ўзбекистон халқаро ислом академияси билан ҳамкорликдан фахрланишини айтди. «Ўзбекистон – ИҲТ муносабатлари бугунги кунда ўзаро ишонч ва ҳурмат асосида турли соҳаларда изчил ривожланмоқда, икки томон раҳбарларининг учрашув ва мулоқотлари бунда муҳим аҳамият касб этмоқда. Томонларнинг муштарак интилиши ва саъй-ҳаракатлари туфайли ИРCИCА ва Ўзбекистон халқаро ислом академияси ўртасидаги дўстона муносабатлар янги шериклик босқичига кўтарилди», дея таъкидлади у.

Х.Эрен мамлакатимизнинг инсоният цивилизациясига қўшган буюк ҳиссасини эътироф этар экан, «Ўзбекистон дунё ислом тамаддуни марказларидан биридир», деб таъкидлади. У юртимизда амалга ошири амалга оширилаётган янгиланиш, жадал тараққиёт жараёнини юқори баҳолаб, Ўзбекистон билан муносабатлар юксак даражага кўтарилганидан ҳар икки тараф ҳам ғоят мамнун эканини қайд этди.

Ўзбекистон мусулмонлари идораси Матбуот хизмати