www.muslimuz

samedi, 18 août 2018 00:00

Пок жойда барака бор

Жорий йилнинг 18 август куни “Кўкалдош” ўрта махсус ислом билим юртида Муборак Қурбон ҳайити ҳамда Республикамиз Мустақиллигининг 27 йиллик байрамини нишонлашга пухта тайёргарлик кўриш ва уни кўтаринки руҳда ўтказиш мақсадида ҳамда юртимизда ободонлаштириш, кўкаламзорлаштириш ишларини амалга ошириш мақсадида билим юрти мударрис, ишчи-ходимлари ва талабалари иштирокида умумхалқ хайрия хашари ўтказилди.

Талабалар мударрислар бошчилигида билим юртининг ички ва ташқи ҳудудида супуриш, тозалаш ва ободонлаштириш ишларини олиб бордилар.

Дарс хоналари, йўлаклар, таҳоратхона ва билим юртининг ички ҳовлиси тозаланди. Ҳовлидаги гулхонага экилган гулларга ишлов берилиб, бегона ўтлар олиб ташланди, дарахтлар ва йўлакларнинг четки қисмлари оқланди.

Шунингдек, атроф маиший чиқиндилардан тозаланди. Жумладан, мадраса биносининг олди ва ёнидан ўтган пиёдалар йўлаги супурилди, ариқлар тозаланди. Атроф бегона ўтлардан тозаланди, боғнинг ён қисмидаги ўсган бегона ўтлар ўрилди. Билим юртининг ён қисмига гул кўчатлари экилди. Билим юртининг ҳовли қисмига ва олди кириш қисмига гул туваклар олиб келиниб манзарали гул кўчатлари экилди.

“Назарбек” талабалар турар жойида ҳам барча ҳодимлар ва талабалар иштирокида ҳашар ўтказилди. Ётоқхона биносининг ички ва ташқи қисмлари, намозхона, каридорлар ва барча хоналар тозаланди, каридорнинг гиламлари ювилди, ўриндиқлар лак билан бўялди. Ҳовли атрофи, бинонинг орқа қисмлари маиший чиқиндилардан тозаланди. Ҳовлидаги гулхоналарга экилган манзарали гулларга ишлов берилиб ўғитлар солинди.

Ҳашарда билим юрти мударрис, ишчи-ходимлар ва талабалар фаол иштирок этдилар.

“Кўкалдош” ўрта махсус

ислом билим юрти мудир муовини А.Ғаниев

Published in Ўзбекистон янгиликлари

samedi, 18 août 2018 00:00

Муфтий ҳазратнинг зиёратчилар билан якуний учрашувлари

17 август куни Макка шаҳридаги муҳташам “Аброж ал-Ҳидоя” меҳмонхонасида ҳаж амалларини адо этишга ҳозирлик кўраётган юртдошларимизнинг Ўзбекистон мусулмонлари идораси раиси, муфтий Усмонхон Алимов ҳазратлари билан якуний учрашувлари бўлиб ўтди.

Шу кунга қадар Мадинаи мунавварадан навбати билан Маккаи мукаррамага етиб келган 7200 нафар зиёратчи билан ўн маротаба суҳбатлар ўтказилди. Ушбу учрашувда муфтий ҳазратлари сўзга чиқиб, муҳтарам Президентимиз ташаббуслари билан барча соҳалар қаторида муборак ҳаж сафарини намунали ўтказиш борасида бир қатор хайрли ислоҳотлар амалга оширилаётганини сўзлаб, жумладан, бу йилги ҳаж сафарига келган юртдошларимиз навбат билан эмас, балки суҳбатлар асосида ҳаж сафарига танлаб олинганини алоҳида таъкидладилар ҳамда қуйидаги панду насиҳатларни қилдилар:
– Ҳар биримиз, аввало, Мадинаи мунаввара зиёратини адо этдик, у ерда Равзаи муборакда намоз ўқидик, Расулуллоҳ соллаллоҳу алайҳи ва салламга саломларни етказдик, Уҳуд тоғи, “Қиблатайн” ва “Қубо” масжидларини зиёрат этдик. Кейин эса умра амалларини жуда ҳам чиройли ҳолатда бажардик.

Энди олдимизда ҳаж ибодатини адо қилиш вазифаси турибди. Дуоларимиз ижобат бўлиб, умра амалларини осон адо этганимиз каби ҳаж ибодатини ҳам енгил, нуқсонсиз ва мукаммал бажаришимизни Парвардигоримиздан дуо қилиб сўраймиз. Ўз навбатида, ҳаж амалларининг фазилатларини билиб олиш лозим. Айниқса, Байтуллоҳни тавоф қилишда “Ҳажарул асвад” ва “Рукнул ямоний” ўртасидаги дуонинг фазилати, ушбу икки рукн орасида фаришталар жам бўлиб, ҳожиларнинг дуоларига “омин” деб туришларини англаш керак. Пайғамбаримиз соллаллоҳу алайҳи ва саллам қачонки, Байтуллоҳнинг ичига кирганларида ёки хатимга кириб намоз ўқиганларида доимо умматнинг саодатини сўраб, Ҳақ таолога илтижо қилганларини мушоҳада қилиш зарур.

Эртадан кейин эҳром боғлаб, ният ила ҳаж амалларини бажаришга киришамиз. Мино, Арафот, Муздалифа ва Жамарот майдонларида ҳаж рукнларини адо этамиз. Ўзбекистонлик ҳожиларга шундай шароитлар муҳайё қилинганки, улар ҳеч нарсага чалғимайди, фақат ибодат қилади, ибодатнинг лаззатини ҳис этади, иншоаллоҳ.

Йиғилишда тиббиёт гуруҳи раҳбари Алишер Саатов эса зиёратчилар диққат қилиши лозим бўлган тиббий масалалар ва саломатликларини сақлаш йўлида амал қилиши лозим бўлган тавсияларни билдирди.
Якунда Қуръони карим оятларидан тиловат қилиниб, муфтий ҳазратлари томонларидан, аввало, муҳтарам Президентимиз, она-Ватанимиз, халқимиз ҳаққига, шунингдек, барча мутасадди кишилар, ишчи гуруҳлари, элликбошилар, шифокорлар, ошпазлар, зиёратчилар ва саудиялик ҳамкорларимиз ҳақларига дуои хайрлар қилдилар.

Ўзбекистон мусулмонлари идораси Матбуот хизмати

Published in Ўзбекистон янгиликлари

samedi, 18 août 2018 00:00

Ўзбекистон “Ҳаж – 2018” ишчи гуруҳи тақдирланди

16 август куни Саудия Арабистонининг Макка шаҳрида бутун дунёдан келган давлатларнинг ҳожиларга хизмат кўрсатувчи тиббиёт гуруҳлари раҳбарлари иштирокида илмий-амалий анжуман бўлиб ўтди. Анжуманда ўтган 2017 йилги ҳаж сафари давомида амалга оширилган ташкилий ишлар, ўтказилган амалий тадбирлар ва зиёратчиларда кўп учраган касалликлар ҳақида сўз борди.
Шунингдек, жорий мавсумда Макка шаҳридаги Мино, Арафот ва Муздалифа водийларида ташкил этилган тиббиёт марказлари ҳамда шифохоналар ҳақида батафсил маълумотлар берилди.

2018 йилги ҳаж мавсуми давомида Саудия Арабистонининг Соғлиқни сақлаш вазирлиги мутасаддилари ўзбекистонлик зиёратчилар учун ташкил этилган Макка ва Мадина шаҳарларидаги тиббиёт марказлари ҳолати, шифокорлар фаолияти ва тиббий жиҳозларнинг яроқлилигини назоратдан ўтказиб, юқори баҳо беришди. Маълумот ўрнида айтиб ўтиш керакки, ўзбекистонлик зиёратчилар учун 35 та шифокор, 40 ўринли аёл-эркакка ажратилган стационар ва 4 та тез ёрдам машинаси хизмат қилмоқда.

Қувонарли жиҳати шуки, ушбу нуфузли тадбирда Ўзбекистон “Ҳаж – 2018” мавсуми тиббиёт гуруҳи мақтов ёрлиғи билан тақдирланди. Саудия Арабистонининг Соғлиқни сақлаш вазирлиги масъуллари Ўзбекистон тиббиёт гуруҳи раҳбари, шифокор Алишер Саатовга ушбу ёрлиқ тантанали равишда топширилди.

Мана шундай тақдирланган саноқли давлатлар шифокорлари орасида Ўзбекистон вакилининг бўлиши, айниқса, МДҲ мамлакатлари орасида фақатгина бизнинг юртга тақдим этилгани барчамизга юксак ифтихор бағишлайди.

Мақтов ёрлиқларининг таржималари

Саудия Арабистони Подшоҳлиги
Соғлиқни сақлаш вазирлиги

Ташаккурнома ва эътироф

Маккаи мукаррама минтақасидаги Соғлиқни сақлаш бош бошқармаси Ўзбекистон Республикаси ҳожиларга хизмат кўрсатувчи ишчи гуруҳининг намунали меҳнатлари учун миннатдорчилигини изҳор қилишдан мамнунлигини билдиради.
Ҳижрий 1439 йилдаги (милодий 2018 йил) ҳаж амалларини муваффақиятли амалга оширишдаги Сизнинг юксак саъй-ҳаракатларингиз ва ташаббусларингизни эътироф этган ҳолда Аллоҳ таолодан Сизнинг келгусидаги ишларингизда улкан зафарларга эриштиришини сўраймиз.

Маккаи мукаррама минтақасидаги соғлиқни сақлаш бош бошқармаси мудири, доктор Воил ибн Ҳамза Мутир

Саудия Арабистони Подшоҳлиги
Соғлиқни сақлаш вазирлиги

Ташаккурнома ва эътироф

Макка минтақасидаги ҳаж ишлари муассасалари қўмитаси Маккаи мукаррамадаги соғлиқни сақлаш бош бошқармаси номидан 1439 йил Аллоҳнинг уйига ҳаж зиёратига келган ҳожиларга кўрсатган хизматларингиз учун Ўзбекистон Республикаси ҳаж ишчи гуруҳига чуқур миннатдорлигини изҳор қилишдан мамнун эканини билдиради.

Маккаи мукаррама ҳаж ишлари муассасалари қўмитаси раиси, доктор Талъат ибн Абдулазиз Мунший

Ўзбекистон мусулмонлари идораси Матбуот хизмати

Макка шаҳридан

Published in Ўзбекистон янгиликлари

vendredi, 17 août 2018 00:00

Ўзбекистон «Ҳаж-2018» тиббий хизмати энг яхши 10 давлатдан бири

Куни кеча Саудия Арабистони Подшоҳлигининг соғлиқни сақлаш вазирлиги томонидан ҳаж сафарига келган 100 га яқин мамлакатлар орасида ҳаж-2018 мавсумидаги тиббий тайёргарлик ва тиббиёт марказларининг қай даражада ташкил этилганлигини ўрганиш мақсадида танлов ўтказилди. Ўтказилган ушбу танловнинг асосий мезони сифатида ташкил қилинган тиббиёт марказларининг биринчи тиббий ёрдамга шайлиги, ташкил қилинган даволаш стационарида аёллар ва эркаклар учун алоҳида, қулай ва зарурий шароитни яратилганлиги, дори-дармон воситалари билан таъминланганлик даражаси, тез тиббий ёрдам машиналарининг мавжудлиги ва сони, кўп тармоқли тиббий мутахассисларининг жалб қилинганлиги, тиббиёт ходимларининг ҳожиларга тиббий хизмат кўрсатишдаги сифат даражаларига алоҳида эътибор қаратилди.

Таъкидлаш керакки, юқорида қайд этилган мезонлар асосида кўрсатилаётган тиббий хизмат даражасини ўрганиш Саудия Арабистонидаги соғлиқни сақлаш вазирлиги томонидан ташкиллаштирилмаган ҳолда кутилмаган ташрифлар орқали ўрганилди. Ниҳоят ҳаж-2018 мавсумига ташриф буюрган 100 га яқин мамлакатларнинг тиббий хизмат кўрсатиш даражаси тантанали тарзда эълон қилинди. Натижа эса, Ўзбекистон Республикаси 100га яқин мамлакатлар орасида Хитой ва Малайзия каби ривожланган давлатлар қаторида кучли ўнталикка кирди. Қайд этиш жоизки, мамлакатимиз Ўзбекистон Мустақил давлатлар ҳамдўстлигига кирувчи давлатлар орасида ягона бўлиб ҳожиларга энг юқори ва сифатли тиббий хизмат кўрсатиш даражаси бўйича тақдирланди.

ДИҚ Матбуот хизмати

Макка шаҳридан

Published in Ўзбекистон янгиликлари

vendredi, 17 août 2018 00:00

Бугун Китоб сайли ўтадиган масжидлар билан танишинг

Жорий йилдан бошлаб китоб мутолаа қилишни оммалаштириш мақсадида Тошкент шаҳри ва Тошкент вилоятида ҳар жума куни Китоб сайли ўтказилмоқда.

Китоб сайллари Ўзбекистон Республикаси Президентининг 2017 йил 12 январдаги "Китоб мутолааси китобхонлик маданиятини ошириш ҳамда тарғибот қилиш ҳақида"ги фармойиши ҳамда Ўзбекистон мусулмонлари идорасининг кўрсатмасига асосан турли ҳудудларда ташкил этилмоқда.

"Мовароуннаҳр", "Ҳилол-нашр", "Янги аср авлоди", "Шарқ" ва "Ғафур Ғулом" нашриётлари иштирок этаётган ушбу сайллар жума айёми муносабати билан туман-шаҳарлардаги жоме масжидларида ташкил этилмоқда.

Бу эса кўпчилик юртдошларимизнинг эътирофига сазавор бўлмоқда. Ушбу сайлларда диний-маърифий мавзудаги китобларни нашриёт нархида исталган усулда харид қилишингиз мумкинлигини эслатиб ўтамиз.

Бугун, 17 август куни Тошкент вилояти ва Тошкент шаҳрининг қуйидаги масжидларида Китоб сайли ташкил этилади.

1. Тошкент вилоятининг Чирчиқ шаҳар "Марказий" жоме масжидида бўлиб ўтади (масъул шахс А.Абраев Туронов +998 91 778 10 20).

2. Тошкент шаҳридаги “Қўйлиқ ота” жоме масжидида ташкил этилади (Раимқулов Равшанбой 3234109, 2958683).

ЎМИ Матбуот хизмати

@muslimuzportal

Published in Ўзбекистон янгиликлари