muslim.uz
«Zagros Airlines» авиакомпанияси Самарқанд ва Бухорога қатновларни йўлга қўйиш таклифини билдирди
Ўзбекистон транспорт вазирлигида жума куни Эроннинг «Zagros Airlines» авиакомпанияси вакиллари билан учрашув бўлиб ўтди, деб хабар бермоқда «Дунё» АА вазирлик ахборот хизмати манбасига асосланиб.
Транспорт вазири ўринбосари Жасурбек Чориевнинг «Zagros Airlines» авиакомпаниясининг Ўзбекистондаги бош вакили Мортеза Шейхассани билан бўлиб ўтган мулоқотида икки давлат ўртасида мунтазам ҳаво қатновларини қайта тиклаш масаласи муҳокама қилинди.
Шунингдек, авиакомпания вакиллари йўналишлар географиясини кенгайтириш, транзит салоҳиятини ривожлантириш ва парвозлар сонини ошириш бўйича қатор таклифларни билдирди. Хусусан, «Zagros Airlines» авиакомпанияси Эроннинг турли шаҳарларидан Самарқанд ва Бухорога авиарейслар қўйиш истагида экани маълум қилинди.
Ўзбекистон мусулмонлари идораси матубот хизмати
Маънавият – жамият ҳаётининг жони ва руҳидир
Бугунги глобаллашув даврида дунё ахборот уммонида маънавияти юксак, маърифатли, имон-эътиқоди мустаҳкам бўлмаган ҳар қандай инсон ҳар он чўкиши муқаррар.
Чунки ахборот асрида “тўлқинлар гирдоби” шу қадар шиддатли тус олдики, имони, эътиқоди, маънавияти суст инсон дарҳол тузоққа тушиб қолиши турган гап.
Президентимиз Шавкат Мирзиёев раислигида маънавий-маърифий ишлар тизимини тубдан такомиллаштириш, бу борада давлат ва жамоат ташкилотларининг ҳамкорлигини кучайтириш масалаларига бағишланган видеоселектор анжуманида Юртбошимиз бугунги маънавий ҳаётимизни чуқур таҳлил этиб: “Агар жамият ҳаётининг танаси иқтисодиёт бўлса, унинг жони ва руҳи маънавиятдир. Биз янги Ўзбекистонни барпо этишга қарор қилган эканмиз, иккита мустаҳкам устунга таянамиз. Биринчиси – бозор тамойилларига асосланган кучли иқтисодиёт. Иккинчиси – аждодларимизнинг бой мероси ва миллий қадриятларга асосланган кучли маънавият”, дея таъкидладилар.
Дарҳақиқат, иқтисодий тазйиқни сезиш мумкин, аммо мафкуравий-маънавий тазйиқни кўриш, сезиш осон эмас. Бу офат турли кўринишларда халқ, айниқса, ёшлар ҳаётига, турмуш тарзига, онгу шуурига аста-секин кириб келади, фикру зикрини эгаллаб олади. Бузғунчи кучлар, бир қарашда ўта беозор кўрингани билан, таъсир кучи ғоят самарали воситалардан фойдаланади. Ҳаётий тажрибаси оз, суяги қотмаган ёшлар атрофида турли “маслаҳатчи”лар, йўл кўрсатувчи “жонкуяр” мураббийлар, ҳар ишга қодир “ҳомий”лар пайдо бўлиб қолади. Мустақилликнинг дастлабки йилларида барчамиз бу ҳолатга гувоҳ бўлдик.
Ана шундай вазиятда ҳар бир мўмин-мусулмон юртдошимиз Пайғамбаримиз соллаллоҳу алайҳи васалламнинг: “Ҳар бирингиз мутасаддисиз, ҳар бирингиз қўл остингиздагилар учун масъулсиз. Ҳар бир раҳбар инсонлар устидан мутасаддидир ва улар учун масъулдир. Эр ўз аҳли аёли ва қўл остидагилар устидан мутасаддидир ва улар учун масъулдир. Хотин эрининг уйида мутасаддидир ва қўл остидагилар учун масъулдир. Қул хожасининг молига мутасаддидир ва унинг учун масъулдир. Ҳар бирингиз қўл остингиздагилар учун масъулсиз” муборак ҳадисларини ўзига дастуриламал қилиб олиши шарт.
Ерга уруғ бир кун кеч сепилса, деҳқон ҳосилни бир ҳафта ёки ўн кун кейин ўриб олади. Худди шундай маънавий тарбияда ҳам бир кун кеч қолиш, бир зум бўлса-да, огоҳликни қўлдан бой бериш тузатиб бўлмас хатоларга олиб келиши аниқ. Шу боис давлатимиз раҳбари йиғилишда: “Терроризм, экстремизм, трансмиллий ва кибер-жиноятчилик, одам савдоси, наркотрафик каби таҳдидлар хавфи ошиб бормоқда. Баъзи ҳудудларда атайин беқарорлик юзага келтирилиб, норозилик кайфияти авж олдирилмоқда. Бундай таҳликали вазиятда ҳушёр ва огоҳ бўлиб, халқимизнинг тинчлиги, мамлакатимиз манфаатларини ўйлаб яшаш зарур”, дедилар.
Ҳадиси шарифда “Мўмин мўминнинг кўзгусидир” дейилган. Инсон ўз айбини, нуқсонларини ойнада қандай кўрса, мўмин биродари учун ҳам шундай. Ойнага қарамасдан киши юзидаги айбини кўролмаганидек, мўминлар ҳам ўзаро бир-бирларини, айниқса, ёшларни турли хуружлардан, экстремистик оқимларнинг кирдикорларидан, маънавиятимизга, маърифатимизга зид ҳар қандай ҳолатдан огоҳ қилишлари шарт. Ислом жамият ҳаёти билан барҳаётдир. Шу боис “Дин насиҳатдир” ҳукми барқарордир. Бу ҳукмга риоя қилиш тинчлик-тотувликнинг асосидир.
Тарихдан маълумки, аждодлар фарзанд тарбиясига алоҳида эътибор қаратганлар. Хусусан, бу ҳақда ўз асарларида сўз юритмаган аллома бўлмаса керак. Тиб илмининг султони Ибн Сино ўз асарларидан бирида: “Бола хулқини мўътадилликда сақлашга алоҳида эътибор бериш керак, бунга болани қаттиқ ғазабланиш, қўрқиш, уйқусизликдан сақлаш орқали эришилади. Ғазаб кучни қиздиради, қайғу кучни оздиради, хафалик беғамликка мойил қилади. Хулқнинг мўътадиллиги натижасида ҳам нафс, ҳам бадан соғлом бўлади”, дея таъкидлаган.
Хулоса ўрнида айтиш жоизки, бугунги таҳликали даврда маънавият ва маърифат фақат шу соҳа ходимларининг, ўқитувчи ва мураббийларнинггина эмас, балки барчанинг бурчи бўлиши лозим. Масалага ана шу жиҳатдан қараб, “Ҳеч бир ота-она ўз фарзандига гўзал тарбиядан кўра буюк мерос қолдира олмайди” ҳадиси шарифи ва халқимизнинг: “Бир болага етти маҳалла – ота-она” мақолига амалда риоя қилсак, ҳеч қандай куч маънавиятимизга рахна сола олмайди.
Нуриддин ХОЛИҚНАЗАРОВ,
Тошкент шаҳар бош имом-хатиби.
ЎзА
Фаришталар сизга салавот айтишини истасангиз
- Қуръони карим тиловат қилинг. Шунда фаришталар сизни қуршаб оладилар.
وَمَا اجْتَمَعَ قَوْمٌ في بَيت مِنْ بُيُوتِ اللهِ تَعَالَى ، يَتْلُونَ كِتَابَ اللهِ ، وَيَتَدَارَسُونَهُ بَيْنَهُمْ إلاَّ نَزَلَتْ عَلَيْهِمُ السَّكِينَةُ وَغَشِيتْهُمُ الرَّحْمَةُ وَحَفَّتْهُمُ المَلاَئِكَةُ وَذَكَرَهُمُ الله فِيمَنْ عِندَهُ.
Абу Ҳурайра розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Қайси бир қавм Аллоҳнинг уйларидан бирида жам бўлиб, Аллоҳнинг китобини тиловат қилсалар, уни ўргансалар, албатта, уларнинг устига сакийна тушади, уларни раҳмат ўраб олади, фаришталар қуршаб олади ва Аллоҳ Ўз ҳузуридагилар қаторида зикр қилади”, дедилар (Имом Муслим, Имом Абу Довуд ривояти).
- Мусулмон биродарингиз ҳаққига ғойибона дуо қилинг. Шунда фаришталар сизнинг ҳаққингизга дуо қиладилар.
دعوةُ المرءِ المُسْلِمِ لأخِيهِ بِظَهْرِ الغَيْبِ مستجابةٌ، عِنْدَ رأسهِ مَلَكٌ موكلٌ، كُلما دَعا لأخِيهِ بخيرٍ، قالَ المَلَكُ الموكلُ بِهِ: آمِينَ، وَلَكَ بمثلٍ
Расулуллоҳ соллаллоҳу алайҳи васаллам: “Қай бир мусулмон биродари ҳақига дуо қилса, фаришталар унга: “Сенга ҳам шу бўлсин, омин!” деб туришади”, деганлар (Имом Муслим ривояти).
- Беморларни зиёрат қилиб туринг. Шунда фаришталар сизнинг ҳаққингизга салавот айтадилар.
مَا مِنْ مُسْلِم يَعُودُ مُسْلِماً غُدْوة إِلاَّ صَلَّى عَلَيْهِ سَبْعُونَ ألْفَ مَلَكٍ حَتَّى يُمْسِي وَإنْ عَادَهُ عَشِيَّةً إِلاَّ صَلَّى عَلَيْهِ سَبْعُونَ ألْفَ مَلَكٍ حَتَّى يُصْبحَ وَكَانَ لَهُ خَرِيفٌ في الْجَنَّةِ
Расулуллоҳ соллаллоҳу алайҳи васаллам: “Бир мусулмон бошқа бир бетоб мусулмонни эрталаб бориб кўрса, албатта, унга кечқурунгача етмиш минг фаришта салавот айтади. Агар кечқурун касални кўрса, албатта унга 70 минг фаришта эрталабгача салавот айтади. Яна унга жаннатда бир боғ яратилади” (Имом Термизий ривояти).
- Жамоат намозининг биринчи сафида туришга интилинг. Шунда Аллоҳ таоло ва Унинг фаришталари сизнинг ҳаққингизга салавот айтадилар.
إنّ الله وملائِكتَهُ يُصَلُّونَ على الصَّفِّ الأَوَّلِ
Абдураҳмон ибн Авф розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Аллоҳ ва унинг фаришталари биринчи сафдагиларга салавот айтади”, дедилар (Имом Можа, Имом Аҳмад, Имом Абу Довуд ривояти).
- Ҳамиша Аллоҳ таолонинг зикри билан банд бўлинг. Шунда фаришталар сизни ўраб оладилар.
إِنَّ لِلَّهِ مَلاَئِكَةً يَطُوفُونَ فِي الطُّرُقِ يَلْتَمِسُونَ أَهْلَ الذِّكْرِ، فَإِذَا وَجَدُوا قَوْمًا يَذْكُرُونَ اللَّهَ تَنَادَوْا: هَلُمُّوا إِلَى حَاجَتِكُمْ قَالَ: فَيَحُفُّونَهُمْ بِأَجْنِحَتِهِمْ إِلَى السَّمَاءِ الدُّنْيَا
Абу Ҳурайра розияллоҳу анҳудан ривоят қилинади. Расулуллоҳ соллаллоҳу алайҳи васаллам айтадилар: «Аллоҳнинг бир тоифа фаришталари бор. Улар йўлларда айланиб зикр қилувчилар (аҳли зикр)ни излаб юрадилар. Қачон улар Аллоҳни зикр қилаётган қавмни топсалар “ўзингиз истаган нарсага келинглар” деб нидо қиладилар. Бас, уларни қанотлари билан ўраб олиб, дунё осмони баробар бўлиб турадилар» (Имом Термизий ривояти).
Даврон НУРМУҲАММАД
Ислом олами уюшмаси Покистонда Қуръон мусобақаси ўтказди
Ислом олами уюшмаси Покистон Ислом Республикасида ўтказилган Қуръони карим мусобақасида ғолиб бўлган ёш қори ва қориялар мукофотлар билан тақдирлади.
Шу муносабат билан Ислом олами уюшмасининг Исломободдаги минтақавий ваколатхонасида ташкил этилган тадбир Покистон Ислом Республикаси Президенти Доктор Aриф Aлавий раҳбарлигида ўтказилди.
Тадбирда Покистоннинг Дин ишлари бўйича вазири Нурулҳақ Қодирий, Ислом олами уюшмаси котиби ёрдамчиси, доктор Aбдурроҳман бин Aбдуллоҳ аз-Зайд ва Саудия Арабистони Подшоҳлигининг Покистон ислом Республикасидаги элчиси Наввоф бин Саид Aл-Маликий ва Уюшманинг Покистондаги минтақавий ваколатхонаси директори Саад бин Масуъд Aл-Ҳарсийлар қатнашди.
Покистон Ислом Республикаси Президенти Доктор Aриф Aлавий Ислом олами уюшмаси Қуръони каримни ёд олиш бўйича мусобақаларни Покистонда ташкиллаштираётгани учун миннатдорчилик билдириб, мусобақа ғолибларини самимий табриклади.
Халқаро алоқалар бўлими мутахассиси
Илёсхон Аҳмедов тайёрлади
“Илмга кўмак” акцияси якуний босқичи: Тошкент ислом институти ва Мир Араб олий мадрасаси талабаларининг ҳам шартнома пуллари тўлаб берилди
Бугун, 25 январь куни Ўзбекистон мусулмонлари идораси мажлислар залида, “Илмга кўмак” акциясининг якуний босқичи бўлиб ўтди.
Азалдан юртимиз дунё аҳлига устозлик қилган уламолар ватанидир. Бу эса аждодларимизнинг илмга, олимларга ва толиби илмларга бўлган чексиз муҳаббатидан нишонадир.
Толиби илмга моддий ва маънавий кўмаклашиш, оғирини енгил қилиш мусулмонларнинг энг улуғ, савоби улкан қадриятларидандир. Олимлар бизнинг йўлбошчиларимиз, тараққиёт сабабчиларидир.
Юртимиздаги диний таълим муассасаларида Ислом дини илмларини чуқур ўрганаётган талабаларга моддий ёрдам бериш Вақф хайрия жамоат фондининг асосий вазифаларидан ҳисобланади.
Шу сабаб Вақф фонди томонидан жорий йилнинг 14 январь куни мамлакатимизда фаолият олиб бораётган диний таълим муассасаларидан саралаб олинган 20 нафар талабаларнинг тўлов шартномалари учун “Илмга кўмак” акцияси эълон қилинди. Акцияга 101 миллион 562 минг 408 сўм маблағ зарур эди. Аллоҳга беҳисоб шукрлар бўлсинки, қисқа муддат ичида саховатпеша, илмга муҳаббатли халқимиз томонидан, 22 январь соат 16:30 ҳолатига кўра 109 миллион 757 минг 715 сўм яъни (8 миллион 195 минг 307 сўм) ортиғи билан хайриялар қилинди.
Бугун, мазкур акциянинг якуний босқичида, Мир Араб олий мадрасасининг 1 нафар талабасига 4 миллион 28 минг 610 сўм ҳамда Тошкент Ислом институтининг 9 нафар талабаларига 58 миллион 777 минг 348 сўм шартнома пуллари тўлаб берилганлиги ҳақида сертификатлар ва ҳар бир талабага биттадан Қуръони карим нусхалари топширилди.
Тадбир давомида Вақф хайрия жамоат фонди раҳбари Яҳё қори Абдураҳмонов сўзга чиқиб толиби илмларга қилинадиган яхшиликнинг мукофоти улуғ эканлиги ва бу йўлда хизмат қилган, хайрия қилган, далолат қилган инсонларнинг ҳар бирига, шу талабалар умри давомида қилган савоб амаллари, тарқатган илмлари миқдорича ажр берилиши умидворлиги ҳақида таъкидлаб ўтди.
Аввал хабар қилганимиздек, акциянинг биринчи ва иккинчи босқичларида, Хоразмдаги “Фахриддин ар Розий” ва Андижондаги “Саййид Муҳиддин махдум” ислом билим юртларининг 5 нафардан жами 10 та талабага 38 миллион 756 минг 450 сўм шартнома пуллари тўлаб берилган эди.
Ўтган қисқа вақт давомида биз билан яхшилик йўлида ҳамкорлик қилган, хайрия қилган, далолат қилган азиз ватандошларимизнинг барчаларидан, мусофир юртдошларимиздан ҳам Аллоҳ таоло рози бўлсин, Ўзи мукофотласин!
Мазкур акцияни оммавий ахборот воситаларида кенг ёритишда яқиндан ёрдам берган Kun.uz ахборот сайти таҳририяти, Muslim.uz портали таҳририяти, Аzon.uz сайти таҳририяти ва Islom.uz сайти ходимларига ўз миннатдорлигимизни билдирамиз!
Жобир ибн Абдуллоҳ розияллоҳу анҳудан ривоят қилинади: “Пайғамбар соллаллоҳу алайҳи васаллам: “Гуноҳларнинг кечирилишига сабаб бўладиган иш – мусулмоннинг қалбига хурсандчилик киритиш, қорнини тўйдириш ва машаққатини енгиллатишдир”, – дедилар” (Ҳорис ибн Абу Умома ривояти).
Ҳиммати баланд халқимизни кейинги акцияларимизда фаол иштирок этишга чақириб қоламиз. Хайрияларингизни ўз эгаларига етиб боришида шаффофликни таъминлаймиз!
“Яхшиликнинг мукофоти фақат яхшиликдир” (Ар Раҳмон сураси, 60 оят).
“Илмга кўмак” акциясига хайрия қилмоқчи бўлганлар учун:
Payme орқали хайрия қилиш учун шу ерни босинг:
Нақд пул ёки пул ўтказмалари учун:
ҳ/р : 20212000900881753008
МФО 00837, СТИР: 207276595
АТИБ “Ипотека банк” Юнусобод туман филиали
Вақф хайрия жамоат фонди
Матбуот хизмати
Видеолавҳалар
