Бугунги глобаллашув жараёнида Ислом умматлари ўртасида турли тафриқалар келиб чиқмоқда. Билиб-билмай хар хил фирқаларнинг таъсир доирасига тушиб қолган баъзи ёшларнинг бундай хато йўлга кириб қолаётгани кузатилмоқда. Кейинги пайтларда Ислом мафкураси ва тарихига зид ғоялари билан қайта намоён бўлаётган “сохта салафийлик” оқими ўзларининг ақидавий ва ҳуқуқий масалаларини кўпинча суриялик Ибн Таймия (1263-1328) таълимоти билан асосламоқчи бўлишади. Ибн Таймия асарларида, исломга турли бидъатлар кириб қолгани айтилиб, мусулмонлар ва улар яшаётган жамиятларни, Қуръон ва суннат таълимотига асосланган йўлга солиш зарур, деган ғоялар илгари сурилади.

Сохта салафийлар жамиятни иккига: “мусулмон” ва “динсизлар”га ажратади. Бу билан бошқа диндагиларни душман санаб, динлараро адоват уйғотишга уринади. Улар нафақат бошқа дин вакилларига, балки шариат ҳукмларини улар ўйлагандек тўлиқ бажармаётган мусулмонларни ҳам шундай аташади.

Бугунги кунимизда ҳар бир мусулмон якка тартибдаги ижтиҳод билан шуғулланиши керак, деган гап ҳам мутлақо асоссиздир. Имом Аҳмад айтади: “Ким динда тақлид йўқ деса, Аллоҳ ва Унинг расули олдида фосиқдир. Унинг сўзи суннат ва салафи солиҳлар қарашларини рад қилишдир”. Мужтаҳид Абдуллоҳ ибн Ваҳб айтади: “Ҳадис илмлари, агар фиқҳ илми бўлмаса, адаштиради”.

Имом Абу Бакр Ҳаравий айтади: “Инсонлар динда икки қисмдир: муқаллид ва мужтаҳид. Мужтаҳидларнинг илмли бўлиши шартдир. Дин илми эса, Қуръон ва суннатга ва у иккисида ворид бўлган араб тилига тааллуқлидир. Энди, кимки Қуръон ва суннатни, уларнинг лафзий ҳукмларини, собит ва мансухларини билса, олдин ва кейин келган ҳукмларини ажрата олса, ўша кишининг ижтиҳоди дуруст ва унинг даражасига етмаганлар унга тақлид қилишлари жоиздир. Мужтаҳид бўлмаган кишига эса, олимлардан сўрамоғи ва тақлид қилмоғи фарздир.

Бизнинг давримизда ҳам икки юздан ортиқ сохта салафийликка ўхшаш ёт оқимлар мавжуд.

Исломда бирон бир мусулмонга тажовуз қилиш ёки уни ноҳақ ўлдиришга асло рухсат берилмаган. Бундай хунрезликни қилган кимса учун охиратда улкан азоб бордир. Аллоҳ таоло бундай огоҳлантиради: “Ким мусулмонни қасддан ўлдирса, унинг жазоси жаҳаннамдир. У ерда у узоқ вақт қолади. Унга Аллоҳнинг ғазаби ва лаънати бўлсин! Ҳамда У (Аллоҳ таоло) унга улкан азоб тайёрлаб қўйгандир” (Нисо сураси, 93-оят).

Ояти Каримадан биламизки мусулмонни кофирга чиқаришдан жуда эҳтиёт бўлмоқ лозим. Ўзларига Қуръон ва ҳадиси шарифларда келган чиройли номлар қўйиб, чин маънодаги мусулмонликни даъво қилаётган турли хил оқимларнинг ёт ғояларига алданишдан огоҳ бўлиш зарур. Ислом тинчлик, меҳр-оқибат ва одоб-ахлоқ дини эканини асло ёддан чиқармаслигимиз, келгуси авлодларга ҳам асл мақсадни, шариатни, уламоларимиз йўлларини етказишда собитқадам бўлишлигимиз лозим ва лобуддир.

Норин тумани Қурбон ота масжиди
имом хатиби Авазбек Тўраев

Тарихий-меъморий аҳамиятга эга зиёратгоҳларни сақлаш, таъмирлаш, ободонлаштириш, уларнинг инфратузилмасини янада ривожлантириш Вақф фондининг асосий вазифаларидан бири ҳисобланади.
Бугун, 1-март куни Вақф фонди раҳбари Зиёвуддин домла Мирсодиқов Тошкент вилояти, Бўстонлиқ тумани, Боғистон қишлоғида жойлашган, фонд тасарруфидаги "Шайх Умар валий Боғистоний" зиёратгоҳига ташриф буюрди.

Ташриф давомида З.Мирсодиқов зиёратгоҳда олиб борилаётган ободонлаштириш ва таъмирлаш ишлари ҳамда зиёратчилар учун яратилаётган шароитлар билан яқиндан танишиб, керакли кўрсатмаларни бериб ўтди.

Маълумот ўрнида таъкидлаш лозимки, ушбу зиёратгоҳ ҳудудида Шайх Умар валий Боғистоний ҳамда у зотнинг рафиқаси Қурбонжон она ва невараси – Шайх Хованди Тоҳурнинг ўғли Довуд отанинг қабрлари бор. Шайх Умар Боғистоний диний ва дунёвий илмларни эгаллаб, тасаввуфда камолга етиб, халқни роҳи рост (тўғри йўл)га ва илму ирфонга даъват қилган зот бўлган.

Шайх Умар Валий Боғистоний 1320 йил 90 ёшида Боғистон қишлоғида вафот этган. Шайх Умар Валий Боғистоний машҳур тариқат вакилларидан бири бўлган. Унинг ўғли-довруғи етти иқлимга кетган шайх Хованди Тоҳур бўлиб, у Шайх Умар Валининг ягона фарзандлари бўлган. Эвараси-Нақшбандия тариқатининг пешвоси шайх Хўжа Аҳрор Вали XV аср Мовароуннаҳр маънавий ва сиёсий ҳаётида катта ўрин тутган. Шайх Умар Вали Боғистонийга қурилган мақбара меъморий ечими жиҳатидан содда услубда қурилган бўлиб, айни дамда фонд томонидан таъмирланмоқда. Мақбарада, юзасига етти қатор ёзув ва “1189 йил” деган сана ўйиб ёзилган ғаройиб узунчоқ қайроқтош бор.

Вақф фонди Матбуот хизмати

Жорий йил 1 март куни “Ҳидоя“ ўрта махсус ислом билим юртида “Виждон эркинлиги ва диний ташкилотлар тўғрисида”ги қонунда диний таълим олиш тартиби” мавзусида тадбир бўлиб ўтди. Унда Наманган вилояти адлия бошқармаси бўлим бошлиғи Зулфия Aхмадхўжаева ҳамда билим юрти ўқитувчи ва талабалари қатнашди.
Тадбирда сўз олган Наманган вилояти адлия бошқармаси бўлим бошлиғи Зулфия Aхмадхўжаева юртимизда виждон эркинлиги қонунан ҳимоя қилингани, қонунда белгиланган нормаларга амал қилиш зарурияти, шахснинг дин борасидаги фаолияти қонун талабаларидан ташқарига чиқмаслиги, диний таълим бериш ва олиш тартиб-қоидалари тўғрисида маъруза қилди.
Давра суҳбати давомида ўқитувчи талабалар ўзларини қизиқтирган саволларига мутахассис томонидан жавоб олди.

Билим юрти матбуот хизмати

Ўзбекистон мусулмонлари идораси «Қуръони карим ва тажвидни ўргатиш» бўлими мудири қироат илми устози, мударрис, олим Aлижон қори Файзуллоҳ Махдум ўғли Ҳайдаров Бухоро вилоятидаги “Мир Араб” олий мадрасасига ташриф буюриб, талабаларга илмий-маърифий суҳбат қилиб берди. Шунингдек, таълим учун зарур бўлган, Вақф фонди томонидан хайрия қилинган “ақлли” доскани, фонд номидан мадраса жамоасига тақдим этди. 

Ўзбекистон мусулмонлари идораси Матбуот хизмати

Бугун, 2 март куни Ўзбекистон мусулмонлари идораси томонидан “Инсонга эътибор ва сифатли таълим йили”да давлат ва нодавлат идораларининг ҳамкорлик алоқаларини мустаҳкамлаш, ёшларнинг мафкуравий иммунитетини янада ошириш, турли оқимларнинг ёт ғоялари тасирига тушиб қолишини олдини олишга қаратилган “Ёшларнинг ахборот психологик хавфсизлигини таъминлаш, турли хил ёт ғоялар таъсирига тушиб қилишини олдини олиш бўйича муаммо ва ечимлар” мазусида Олий ва диний таълим муассасалари профессор-ўқитувчи ҳамда талабалари иштирокида ЗООМ платформаси орқали онлайн маънавий-маърифий, профилактик тадбир ўтказилди.

Мазкур тарғибот тадбирида ЎМИ раисининг Ёшлар ишлари бўйича ўринбосари У.Ғафуров, Таълим ва илмий-тадқиқот бўлими мудири С.Шерхонов, Ички ишлар вазирлиги терроризм ва экстермизмга қарши курашиш бош бошқармаси масъул ходими А.Каримов, Дин ишлари бўйича қўмита “Диншунослик экспертизаси” бўлими ходими Ж.Алиев, ТИИ ректори, сиёсий фанлар доктори, профессор М.Муҳаммадсиддиқов, “Кўкалдош” ўрта махсус ислом таълим муассасаси мудири М.Насриев иштирок этдилар.

Тадбирда мавзу юзасида сўзга чиққан нотиқлар томонидан турли диний материаллардан фойдаланиш, тарқатиш, унинг ҳуқуқий асослари ва ноқонуний диний таълим оқибатлари ҳусусида батафсил маълумотлар бериб ўтилди. Шунингдек, Тақиқланган сайтлар рўйхати махсус тақдимот ва аниқ фактлар асосида батафсил ёритиб берилди. Шу билан бирга турли оқимларнинг зарарли оқибатлари ва уларнинг фаолияти тўғрисида тушунтириш ва тавсилар бериб ўтилди.
Диний таълим муассасаларининг профессир-ўқитувчиларидан 243 нафар, талабалардан 1940 нафар жами 2183 нафар иштирокчи қатнашди.

ЎМИ Таълим ва илмий-тадқиқот бўлими