Президентимиз Шавкат Мирзиёев Ислом цивилизацияси маркази билан танишар экан, у Ислом дини тарғиботида Ўзбекистоннинг юзи бўлиши кераклигини таъкидлаб, унинг ташқи кўриниши, у ерда ишлатиладиган қурилиш материалларига ҳам эътибор қаратиш лозимлигини қайд этиб, жумладан, «Одатдаги, кўзимиз ўрганиб қолган лойиҳалардан воз кечиб, янги шакл ва дизайн топишимиз керак», — дея топшириқ берган эди.

Бугунги кунда қурилиш ишлари тизимли олиб борилмоқда. Куни кеча марказ директори Ш.Миннаваров ўзининг ижтимоий тармоқлардаги саҳифасида ҳам бу ҳақда: “Ислом цивилизацияси маркази биноси қурилиши, марказнинг ички ва ташқи безаклари, ички ва ташқи мазмуни қурувчилар, меъморлар ва етакчи олимларнинг яқиндан ҳамкорлиги жараёнида амалга ошмоқда” дея изоҳ қолдирган. Бу ҳақда Дин ишлари бўйича қўмита Матбуот хизмати хабар берди.

Лойиҳага кўра, марказ кўриниши зоҳиран юртимизнинг энг ҳашаматли ва забардаст иншоатларидан бирига айланади. Шунинг билан бирга ботинан ушбу марказ академия, кутубхона, архив ва қўлёзмалар фондига, Ўзбекистон заминидан етишиб чиққан буюк мутафаккирлар ва уламолар томонидан асос солинган илмий ва диний мактабларга доир юртимизда ва чет элларда сақланаётган қадимий қўлёзма ва тошбосма китобларга, тарихий далил ва ҳужжатлар, археологик топилмалар, осори-атиқаларга, шу йўналишдаги замонавий илмий-тадқиқот ишлари, видео ва фото ҳужжатларга бой бўлади.

Ўзбекистон мусулмонлари идораси Матбуот хизмати

Сайёҳлик рейтингларига кўра, Оман султонлиги сайёҳлар учун дунёнинг энг хавфсиз давлатларидан бири сифатида тан олинди. Бу ҳақда Muslimpolitic нашри хабар тарқатди.

Таъкидланишича, Оман 6,5 балл тўплаган ҳолда Исландия билан иккинчи ўринни бўлишиб турибди. Биринчи ўринни Финляндия эгаллаган.

Рейтинг тузишга масъул бўлганларнинг айтишига қараганда, уни тузишда мамлакатдаги умумий жиноятчилик ва зўравонлик даражаси, террорчилик ҳужумлари эҳтимоли, шунингдек полиция хизматларининг иш сифатига эътибор берилган.

Ўзбекистон мусулмонлари идораси Матбуот хизмати

Икки-уч кундан бери Интернетдаги ижтимоий тармоқларда    шу йил 17 сентябрь куни Тошкент шаҳар имом-хатиблари йиғилишида муҳокама қилинган масалалар тўғрисидаги уйдирма хабарлар тарқатилаётгани кузатилди.

Асоссиз хабарда гўёки йиғилишда айрим имом-хатиблар сўроққа тутилгани, тирикчилиги рўкач қилингани ва аксарияти норози кайфиятда бўлгани ёзилган... Бундан ташқари ушбу хабарда Тошкент шаҳар бош имом-хатиби Нуриддин домла Холиқназаровни турли сўзлар билан ҳақоратланган.

Қатъий маълум қиламизки, бундай масалалар Тошкент шаҳар имом-хатиблари йиғилишида муҳокама қилинмаган. Ушбу ёлғон хабарни ким ва қандай мақсадларда тарқатгани аниқ, яъни диний-маърифий ислоҳотларга соя солиш ва имом-домлалар билан раҳбарият орасини бузишдан бошқа нарса эмас.

Юртимизда олиб борилаётган халқ дардини ўйлаб иш тутиш ва фаолиятга танқидий баҳо бериш каби ишларга мос равишда йиғилишда имом-домлаларнинг меҳнат фаолиятлари таҳлил қилинди ва камчиликлар борасида оғзаки танбеҳ берилди.

Мазкур сохта хабар эгаси Фейсбук ижтимоий тармоғи орқали Тошкент шаҳар бош имом-хатибининг шаъни ва қадр-қимматини қасддан камситиб, ҳақорат қилган. Ваҳоланки, Нуриддин домла Холиқназаров эътиборли уламолардан. У кишининг “Тасаддуқ, ё Расулаллоҳ” номли 57 қисмдан иборат мавъизаларини 1.000.000 нафардан зиёд киши тинглаб, имон нури ила зийнатланди ва ҳидоят йўлини топди. Энди шундай уламони ҳақоратлаган ўша ижтимоий тармоқ юритувчиси қуйидаги ваъидлардан ўзининг аҳволини бир тасаввур қилиб кўрсин!

Уламоларни ҳурмат қилиш имоннинг саломатлигига далилдир. Уларни камситиш эса нифоқ аломатидир. Чунки Расулуллоҳ соллаллоҳу алайҳи васалламни фақат мунофиқлар ёмон кўришар, У зотни камситишга ҳаракат қилишарди. Олимларимиз Набий соллаллоҳу алайҳи васалламнинг омонатларини етказувчилардир. Шу маънода уларни ёмон кўриш мунофиқлик аломатларидан ҳисобланади.

Машҳур саҳоба Убода ибн Сомит розияллоҳу анҳудан ривоят қилинади, Расулуллоҳ соллаллоҳу алайҳ васаллам “Катталаримизни  улуғламаган, кичикларимизга раҳм қилмаган ва олимларимизнинг ҳаққини билмаган умматимдан эмасдир”, дедилар” (Имом Мунзирий, “Тарғиб”).

Ушбу ҳадиси шарифда Пайғамбаримиз соллаллоҳу алайҳи васаллам жуда ҳам оғир гап айтяптилар. “Умматимдан эмасдир” дегани менинг йўлимда эмас дегани. Инсон учун бундан ҳам оғир мусибат борми?!

Ёлғон хабар тарқатилган ижтимоий тармоқ юритувчиси илм-аҳлларининг қадр қимматини камситадиган, ерга урадиган сўзлари билан минглаб диний соҳа ходимларининг ҳақли эътирозларига сабаб бўлди.

Ўзбекистон мусулмонлари идораси уламолар ва имом-домлаларга билдирилган бўҳтон фикрларга нисбатан доимо муросасиз кураш олиб боради. Диний идора ҳар доим, ҳар қандай вазиятда диний соҳа ходимларини ҳимоя қилади.

Бугунги кунда ижтимоий тармоқларда виждонли, холис иш юритадиган ва воқеликни ҳаққоний ёритадиган юзлаб блогер ва журналистлар бор. Биз уларни қўллаб-қувватлаймиз, ҳамкорлик қилишга доимо тайёрмиз.

Ўз навбатида Ислом дини ва уламолар шаънига айтилаётган бўҳтонларга нисбатан ўзининг муносабатини билдирган блогерлар, журналистлар ва бунга бефарқ бўлмаган мўмин-мусулмонларга ўз миннатдорлигимизни изҳор қиламиз.

Ўзбекистон мусулмонлари идораси Матбуот хизмати

Тожикистон миллий банки мамлакатнинг илк исломий банки – “Тавҳидбанк”ка миллий ва хорижий валютада исломий банкинг хизматларини кўрсатиши учун лицензиция (https://azon.uz/content/views/tojikistonning-ilk-islomiy-bankiga-licen) берди.

Жорий йилнинг 1 июлида “Соҳибкорбанк”нинг номи “Тавҳидбанк” деб ўзгартирилган эди. “Соҳибкорбанк”нинг ўзгариш жараёнини ўтган йилнинг баҳорида бошлаган. Бу борада Хусусий секторни ривожлантириш бўйича Ислом корпорацияси (Ислом тараққиёт банки таркибига киради) мутахассислари ёрдам берди. “Соҳибкорбанк” вакиллари исломий банкинг орқали аҳолининг банк тизимига бўлган ишончини қайтаришга умид қилмоқда.

Тожикистонда исломий банкингни жорий этиш ҳақида 2010 йилда айтилган эди. 2014 йилнинг ёзида “Исломий банк фаолияти тўғрисида”ги қонун қабул қилинди. Шундан сўнг Қатар Тожикистондаги илк исломий банкингни очишда қатнашиш истагини билдирди. Бироқ 2015 йилда республикада бошланган молиявий инқироз туфайли лойиҳалар тўхтаб қолганди.

Марказий Осиёда исломий банклар Қозоғистонда ва Қирғизистонда ҳам фаолият кўрсатиб келмоқда.

Ўзбекистон мусулмонлари идораси Матбуот хизмати

Дубай амири Муҳаммад бин Рошид Ал-Мактумнинг шеърлари ўзбек тилига таржима қилиниб чоп этилди. Бу ҳақда ижтимоий тармоқлардаги саҳифаларда хабар берилди.

Ўзбекистон Ёзувчилар уюшмаси буюртмасига асосан тайёрланган ушбу китобда бугунги кунда араб адабиётининг ўзига хос овози билан араб шеърияти ривожига муносиб ҳисса қўшиб келаётган муаллифнинг она-ватанга муҳаббат туйғуси, илоҳий ишқ муждалари, соф инсоний фикрлари ўрин олган.

Ўзбекистон мусулмонлари идораси Матбуот хизмати