Қуръони карим бандаларни табиатни авайлаб-асраш ва ҳимоя қилишга чақиради. Ислом динида бу вожиб амал ҳисобланади.

Аллоҳ таоло инсонларни табиатга умумий мулк сифатида қарашга буюрган. Шу сабабдан мусулмон киши учун ернинг барча бойликларини муҳофаза қилиши зарурий амаллардандир.  

Ер ва ундаги нарсалар Аллоҳ таолонинг биз бандаларга инъом этган неъмати. Берилган неъматга шукр – унинг доимий бўлишини таъминлайди. Шукр қилиш ўрнига неъматларнинг қадрига етмай, исроф қилсак, зарар келтирсак унинг заволига сабабчи бўлиб қолишимиз муқаррар. Аллоҳ таоло инсонни ерга халифа қилганида ер унга омонат қилиб берилган эди. Ислом эса ҳар қандай фасодни қоралайди. Жумладан, табиатни ифлослантириш, унга зарар келтириш, бойликларини исроф қилишни ҳам.  

Пайғамбаримиз Муҳаммад соллаллоҳу алайҳи васаллам бир неча муборак ҳадисларида дарахт ва кўчат экишнинг савоби ҳақида айтган бўлсалар яна бир нечта ҳадисларида уларни кесишдан қайтарганлар. Абдуллоҳ ибн Ҳабашийдан ривоят қилинади: Набий соллаллоҳу алайҳи васаллам дедилар: “Ким сидр дарахтини кесса Аллоҳ таоло унинг бошини дўзахга тўғрилаб қўяди” (Абу Довуд ривояти). Яна бир ҳадисларида “Дарахтларни кесманглар, чунки у чўлда чорва учун ҳимоядир”, деб айтганлар. Атроф-муҳитни тоза, озода сақлаш ҳам табиатга бўлган муносабатимизнинг бир кўриниши. Ваҳоланки, Исломда поклик иймондан хисобланади. Ислом поклик ва покланиш ишларига ўта жиддий назар билан қарайди. Абу Молик ал-Ашъарий розияллоҳу анҳудан ривоят қилинади: “Пайғамбар соллаллоҳу алайҳи васаллам “Поклик иймоннинг ярмидир...”, дедилар” (Муслим, Насаий ва Термизийлар ривоят қилишган). Абу Мусо Ашъарий розияллоҳу анҳу Басрага волий бўлиб борганларида одамларга шундай хутба қилган эканлар: “Мўминлар амири Умар (розияллоҳу анҳу) мени сизнинг ҳузурингизга юборди. Мен сизга Китобингиз (Қуръони карим) ни, Набиййингизнинг суннатини ўргатаман, атроф- муҳит ва йўлларингизни озода қиламан, тозалайман”.  

Ҳозирги кунда атроф-муҳитни муҳофаза қилиш асримизнинг энг муҳим муаммоларидан бири бўлиб турибди. Бу муаммо инсониятга келтириши мумкин бўлган ёмон оқибатлари бўйича ҳар қандай ҳалокатдан кам эмас. Албатта, технология соҳасидаги тараққиёт, янги энергия манбаларининг кашф этилиши, маъданлар ва кимёвий моддаларнинг пайдо бўлиши, оқибатини ўйламай, табиатдаги жараёнларга аралашув атроф-муҳитни муҳофаза қилиш борасида ниҳоятда ташвишли вазиятни вужудга келтирди. Шу боис мамлакатимизда экологик ҳолатни яхшилаш, дарахтлар муҳофазасини таъминлаш ва яшил майдонларни кенгайтириш бўйича Президентимиз томонидан катта ташаббус илгари сурилди. Яшил оламни сақлаш ва кўпайтириш давлат сиёсати даражасига кўтарилди. Табиийки, табиат ва унга оид муаммолар бутун оламдаги юз миллионлаб мусулмонларни ҳам, Ислом уламоларини ҳам ташвишга солмоқда ва улар бу муаммоларни ҳал қилишда Қуръони карим оятларига ҳамда Ислом таълимотларига мурожаат қилишмоқда.  

1 март куни Ўзбекистон мусулмонлари идорасида Уламолар Кенгашининг навбатдан ташқари бўлиб ўтган йиғилишида 2022 йил 2 февраль куни Президентимиз раислигида экологик ҳолатни яхшилаш ва “Яшил макон” умуммиллий лойиҳасини амалга ошириш юзасидан ўтказилган йиғилишда қайд этилган масалалар ижроси бўйича Ўзбекистон мусулмонлари идораси Уламолар Кенгашининг баёноти қабул қилинди. Баёнотда муқаддас динимизнинг табиатга муносабати, нафақат инсонлар балки, наботот ва ҳайвонотга ҳам зарар бериш йўқлиги, “Яшил макон” умуммиллий лойиҳаси доирасида ҳар биримиз ўзимиз яшаб турган шаҳару қишлоқларимизни, маҳаллаларимизни обод қилиб, жорий йилнинг 1 мартидан “Яшил йиллик” умуммиллий тадбири доирасида бошланган кўкаламзорлаштириш ишларида фаол бўлишимиз зарурлиги қайд этилган. Маҳалламизда, кўчаларимизда бир тупдан кўчат ўтқазсак, бутун мамлакатимиз обод бўлиб, боғу бўстонга айланиши эслатилган. Бу улуғвор ишларнининг савоби нақадар улуғ эканлиги ояти карима ва ҳадиси шарифлар билан қўллаб-қувватланган. 

Умуммилий лойиҳада иштирок этиш ҳар томонлама савобли амалдир. Зеро, Раббимиз “Эй, имон келтирганлар! Рукуъ қилингиз, сажда қилингиз ва

Раббингизга ибодат қилиб эзгу иш қилингиз – шоядки, нажот топсангиз!” (Ҳаж сураси, 77-оят) дея, эзгуликнинг интиҳоси нажот эканлигини эслатган. Пайғамбар алайҳиссалом эса "Кимга яхшилик қилиш эшиги очилса, фойдаланиб қолсин, зеро, унинг қачон ёпилишини билмайди", дедилар. Бу яхшиликни қўлга киритишга шошилайлик, азиз юртдошлар.  

Зайниддин ЭШОНҚУЛОВ, 

Ўзбекистон Мусулмонлари идораси 

Самарқанд вилояти вакили, вилоят бош имом-хатиби ЎзА.

2021 йил 2 ноябрь куни Президентимиз томонидан ўтказилган видеоселектор йиғилишида «Яшил макон» умуммиллий лойиҳасини амалга ошириш белгиланган эди.

Самарқанд вилоят бош имом-хатиби ўринбосари Ёқубжон Мансуров, Самарқанд шаҳар “Дамариқ” жоме масжиди имом-хатиби Нурсултонхон Абдуманнонов, Ургут тумани бош имом-хатиби ўринбосари Ҳусниддин Иброҳимов ҳамроҳлигида Ургут тумандаги “Ғойиб ота” жоме масжидида “Яшил макон” умуммиллий лойиҳаси доирасида тадбир бўлиб ўтди. Маҳалла фуқаролари ҳам фаол иштирок этган тадбирда 200 тупдан зиёд мевали ва манзарали дарахтлар экилди.

Бугун, 2 март куни Ўзбекистон мусулмонлари идораси раиси, муфтий Нуриддин домла ҳазратлари Ўмон Султонлиги ва Эрон Ислом Республикасининг Ўзбекистондаги Фавқулодда ва Мухтор элчиларини қабул қилдилар. Ўзаро мулоқотда кўп асрлик тарихий яқинлик ва халқларимизнинг дўстлик ришталарига асосланган икки томонлама муносабатлар ривожланиб бораётганини мамнуният ила қайд этилди.
Куннинг биринчи ярмида Муфтий ҳазратлари Ўмон Султонлигининг Ўзбекистондаги элчиси Аҳмад Саид ал-Катирий жанобларини қабул қилдилар. Ўмон Султонлигининг Вақф ва дин ишлари вазири маслаҳатчиси Муҳаммад Саид ал-Мамарий элчига ҳамроҳлик қилди.
Мулоқотда муфтий ҳазратлари сўнгги йилларда Ўзбекистонда диний-маърифий йўналишларда катта ўзгаришлар амалга оширилаётганини аниқ мисоллар ёрдамида баён этдилар. Жумладан, янги масжидлар очилаётгани, мадрасалар фаолияти яхшиланаётгани, диний таълим жараёнларига змонавий ахборот технологиялари жорий этилаётганини таъкидладилар.
Элчи жаноблари жавоб сўзида юртимизда амалга оширилаётган ислоҳотларга гувоҳ бўлаётганини айтиб, янгиланишларни юқори баҳолади. Ўзбекистон заминида аҳил-иноқлик, тинч-тотувлик каби фазилатлар бутун дунёга намуна қиладиган даражада яққол намоён бўлаётганини ўз кўзи билан кўраётганини билдирди.
Аҳмад Саид ал-Катирий Ўзбекистон мусулмонлари идораси билан таълим-тарбия, устоз-мударрисларнинг араб тили фани юзасидан касб-маҳоратларини ошириш каби ҳар икки томон учун манфаатли илмий-маърифий соҳаларда алоқалар ўрнатишга тайёр эканини изҳор этди.

Куннинг иккинчи ярмида муфтий Нуриддин домла ҳазратлари Эрон Ислом Республикасининг Ўзбекистондаги элчиси Ҳамид Наййирободий жанобларини қабул қилдилар.
Муфтий ҳазратлари Давлатимиз Раҳбари ташаббуслари билан юртимиздаги барча йўналишлар қатори диний-маърифий соҳада ҳам катта ижобий ўзгаришлар иштирокчиси бўлинаётгани, хусусан умра сафарлари қайта йўлга қўйилгани, фуқароларга Қуръони карим ва тажвидни ўргатиш ишлари тизимли олиб борилаётгани, диний таълим муассасаларда фан дастурларини сифат ва мазмун жиҳатдан такомиллаштириш борасида режали ишлар олиб борилаётганини алоҳида қайд этдилар.
Элчи Ҳамид Наййирободий муфтий Нуриддин домла ҳазратларининг шарафли вазифадаги муваффақиятли фаолиятлари билан самимий қутлаб, улкан зафарлар тилади. У Ўзбекистон тараққиёт йўлида дадил одимлаётгани, мазкур ўзгаришларга эришишда бугунги кунда амалга оширилаётган ислоҳотларнинг ўрни катта эканини эътироф этди.
Элчи жаноблари сўзида давом этиб, Ўзбекистон ва Эрон давлатларининг тарихан муштараклиги, ўтмиш аждодларимиз ҳамкорликда ижод этганлари ва икки халқни маънан бирлаштирганлари тўғрисида ҳаётий мисоллар келтирди.
Ҳамид Наййирободий икки мамлакат ўртасида зиёрат туризми соҳасидаги алоқаларни ривожлантириш, уламолар ва илмий-тадқиқотчиларнинг ўзаро ҳамкорликларини йўлга қўйиш, биргаликда халқаро анжуманлар ўтказиш кабиларга ҳам урғу қаратди.
Учрашув якунида муфтий Нуриддин домла ҳазратлари мазкур элчиларга уларнинг Ўзбекистон билан кўп қиррали ҳамкорликни мустаҳкамлаш йўлидаги масъулиятли фаолиятларига катта ютуқлар тиладилар.
Элчилар самимий қабул учун миннатдорлик билдириб, ўзаро манфаатли алоқаларни ривожлантиришга бор куч-ғайрати, билими ва тажрибасини қаратишга тайёр эканларини изҳор этдилар.

Ўзбекистон мусулмонлари идораси Матбуот хизмати

( 2 март 1992 йилдан бери байроғимиз БМТда )

“Эй имон келтирганлар!

Ёппасига итоатга киришингиз ва шайтоннинг

изидан эргашмангиз!

Албатта у сизларга аниқ душмандир”.

Қуръони Карим

Бақара сураси 208 оят

Бирлашган Миллатлар Ташкилоти (инглиз. United Nations) БМТ – Ер юзида тинчликни ва хавфсизликни таъминлаш, давлатларнинг ва миллатларнинг ўзаро хамкорлигини ривожлантириш мақсадида 1945 йил 24 октябрда фашизм устидан ғалаба қозонган мустақил давлатларнинг ихтиёрий бирлашиш асосида тузилган энг йирик халқаро ташкилот.

БМТ Уставида кўрсатилгандек, у халқаро тинчлик ва хавфсизликни сақлаш, халқларнинг тенгхуқуқлили бўлиши ва ўз тақдирини ўзи белгилаши қоидасига амал қилиб, миллатлар ўртасида дўстлик муносабатларини ривожлантиришни, иқтисодий, ижтимоий, маданий муаммоларни хал этишда халқлар ўртасида хамкорлик бўлишини таъминлашни кўзда тутиб, шу умумий мақсадларга эришишда миллатлар харакатини уйғунлаштириб турадиган маркази хисобланади.

Бирлашган Миллатлар Ташкилоти:

ташкил топган сана:  1945 йил 24 октябр.

асосий мақсади:  ер юзидаги тинчликни мустаҳкамлаш ва хавфсизликни таъминлаш бўлиб, давлатларнинг ўзаро ҳамкорлигини ривожлантириш мақсадида ташкил этилган.

қайси давлатлар томонидан барпо этилган: БМТни барпо этиш ҳақидаги қарор СССР, АҚШ, Англия ва Хитой ташқи ишлар вазирларининг Москвадаги Кенгашида 1943 йилда,

ташкилот Устави қачон ва қаерда қилинган: Устави эса Сан-Франциско Конференциясида 1945 йилда қабул қилинган. БМТ Уставига даставвал 51 давлат имзо чеккан бўлса, ҳозирга келиб бу кўрсаткич 193 тани ташкил қилмоқда.

Тузилмаси
раҳбар: Бош котиб

раҳбарлик муддати:  5 йил

БМТнинг Бош Ассамблеясида мазкур ташкилотга аъзо бўлган барча давлатларнинг аъзолари иштирок этадилар. БМТнинг Хавфсизлик кенгашига 15 давлат аъзодир. Шулардан 5 таси – АҚШ, Россия, Буюк Британия, Франция ва Хитой – доимий аъзо давлатлардир. Кенгашнинг қолган 10 аъзоси Бош Ассамблея томонидан икки йил муддатга сайланадилар.

Бош Ассамблея Котибияти қуйидаги департамент ва бошқармаларга бўлинади: Сиёсий масалалар ва Хавфсизлик Кенгаши ишлари департаменти, Иқтисодий ва ижтимоий масалалар департаменти, Васийлик ва ўз-ўзини бошқармайдиган ҳудудлар департаменти, Назорат бошқармаси, Ходимлар бошқармаси, Бош котибнинг маъмурий идораси, Ижтимоий ахборот бошқармаси, Конференцияларга хизмат қилиш бошқармаси, Умумий хизмат бошқармаси, БМТнинг Женева бўлими.

БМТ сессияси йилда бир марта чақирилади. Хавфсизлик Кенгашининг ёки БМТ аъзолари кўпчилигининг талаби билан ҳар қандай масала юзасидан махсус сессиялар чақирилиши мумкин.

БМТнинг расмий тиллари — инглиз, француз, рус, испан, хитой ва араб тиллари.

Ўзбекистон БМТда
Ўзбекистон Республикаси мустақилликка эришганидан сўнг кўп ўтмай – 1992 йилнинг 2 мартида БМТга аъзо бўлди. Шу куни БМТ Бош Ассамблеяси биноси олдида Ўзбекистон Республикасининг Давлат байроғи кўтарилди. 1993 йилнинг 24 августида БМТнинг Тошкентдаги ваколатхонаси очилди.

Котибият
Котибият Бирлашган Миллатлар Ташкилотининг Бош Ассамблеяси, Хавфсизлик Кенгаши ва бошқа ташкилотлари кўрсатмаларига мувофиқ тезкор ва маъмурий ишларни амалга оширади. Уни умумий маъмурий раҳбарликни олиб борадиган Бош котиб бошқаради. Нью-Йорк, Женева, Вена ва Найробида Бирлашган Миллатлар Ташкилотининг бўлимлари мавжуд.

БМТнинг муҳим саналари
1945 йил 24 октябр – Бирлашган Миллатлар Ташкилоти тузилди: унинг Низоми Хавфсизлик Кенгашининг беш доимий аъзоси ҳамда уни имзолаган давлатларнинг кўпчилиги томонидан ратификация қилинди ва кучга кирди.
1947 йил 24 октябр – Бош Ассамблея ўзининг 168-сонли Резолюцияси билан «Бирлашган Миллатлар куни»ни расмий равишда эълон қилди.
1948 йил 10 декабр – Бош Ассамблея Инсон ҳуқуқлари умумжаҳон Декларациясини қабул қилди.
1949 йил 24 октябр – Нью-Йоркда БМТ Марказий муассасалари биносига биринчи ғишт қўйилди.
1965 йил – БМТ Болалар Фонди – UNICEF га тинчлик учун Нобел мукофоти берилди.

Бирлашган Миллатлар Ташкилоти ташкил топиши билан инсон ва шахс хуқуқларини химоя қилишни халқаро хуқуқий тартибга солишни замонавий босқичига асос яратилди ва БМТ Уставида таъкидланганидек: “Биз, Бирлашган миллатлар халқлари, инсоннинг асосий хуқуқларига, инсон шахсининг қадр қимматига, эркак ва аёлларнинг тенг хуқуқларига ва катта кичик миллатлар хуқуқларининг тенглигига ишончини қайта қарор топтиришга қатъий ахд қилиб, Бирлашган Миллатлар Ташкилотининг ушбу Уставини қабул қилишга ва Бирлашган Миллатлар Ташкилотини таъсис қилишга розилик бердик!”

Айни маҳалда, Бирлашган Миллатлар Ташкилотига аъзо давлатлар “Барча давлатлар ўртасида дўстона муносабатларни ривожлантириш учун таъминлаш учун зарур бўлган тинчлик адоват ва фаровонликнинг мухим ахамияти хисобланадиган инсон хуқуқлари ва асосий эркинликларининг хурмат қилиниши ва уларнинг ялпи аҳамиятини тан олиш” мажбуриятини ўз зиммаларига олдилар.

БМТ Устави – барча давлатлар риоя этилиши шарт бўлган ягона халқаро хужжатдир.

Бугунги кунда ер юзида 270 дан ортиқ мамлакат мавжуд бўлиб, улардан 193 таси БМТга аъзо бўлган.

Ўзбекистон Республикаси 1992 йилнинг 2 мартида БМТга аъзо бўлди. Дунёдаги энг нуфузли ташкилот бўлмиш БМТнинг Бош Ассамблеяси биноси олдида Ўзбекистон Республикасининг Давлат байроғи шу куни 2 март 1992 йилдан бери йуқорига самога кўтарилган. 1993 йилнинг 24 августида БМТнинг Тошкентдаги ваколатхонаси очилди.

Бирлашган Миллатлар Ташкилотининг ва Бирлашган Миллатлар Ташкилот тараққиёт Дастурининг Ўзбекистондаги доимий вакили хамда Ўзбекистон Республикаси Президентининг фармойишига биноан Ўзбекистон Республикасининг Бирлашган Миллатлар Ташкилоти (Нью-Йорк шаҳри) даги доимий вакили фаолият юритадилар.

Ўзбекистон Республикаси БМТнинг тенг хуқуқли аъзоси сифатида бу энг нуфузли халқаро ташкилотнинг мақсад ва қоидаларига қатъий амал қилиб келмоқда.

1948 йил 10 декабрда Бош Ассамблеяси Инсон хуқуқлари Умумжахон Декларациясини эълон қилди ва қабул қилди. “Ҳар бир одам учун инсоннинг умумий хуқуқлари илк бор ўз ифодасини топган ушбу хужжат бугунги кунда 360 дан ортиқ тилда чоп этилган ва жахондаги энг кўп таржима қилинадиган хужжат хисобланади. Бу унинг универсал хусусиятга эга эканлиги ва кенг тарқалишидан далолатдир. Мазкур хужжат кўплаб янги, мустақил давлатлар конституциялари ва янги демократиялар учун намуна бўлиб хизмат қилмоқда, онгимизда эзгулик ва ёвузлик хақида фикр юритиш имконини берадиган мезонга айланди,” – деб тарифлади БМТнинг Бош котиби.

Ушбу декларация мустақил Ўзбекистон Республикаси имзолаган энг биринчи халқаро хужжатдир. 1991 йил 30 сентябрь. Ўзбекистон Республикаси Конституциясининг “Инсон ва фуқароларнинг асосий хуқуқлари, эркинликлари ва бурчлари” деб аталган икки бўлими мазкур декларация талабларига тўла мос бўлиб, унда Ўзбекистон Республикаси барча фуқаролари тенг хуқуқ ва эркинликларга эга бўлиши, жинси, ирқи, миллати, тили, дини, ижтимоий келиб чиқиши, эътиқоди, шахси ва ижтимоий мавқесидан қатий назар, қонун олдида тенглиги таъминланган. Республикамизда инсон хуқуқларига оид юздан ортиқ қонунлар қабул қилинган ва улар халқаро меъёрлар ва андозаларга мувофиқлаштирилган.

БМТ Бош Ассамблеясида Ўзбекистон Республикаси Президенти муҳтарам Президентимиз томонларидан минтақавий хавфсизлик ва барқарорлик муаммоларини ҳал этиш йўл-йўриғи дунё миқёсидаги муаммолар билан бирга қўшиб очиб берилди. Ҳамда Ўзбекистоннинг кенг кўламли ҳамкорликка оид ҳамма таклифларида уни БМТ фаолияти ва бу ташкилотнинг ихтисослашган муассасалари орқали амалга ошириш тамойиллари илова қилинди.

Ҳаммамизнинг хабаримиз бор, Муҳтарам Президентимиз ўз нутқларида муборак Ислом динимизнинг асл инсонпарварлик моҳиятини бутун жаҳон жамоатчилигига етказиш олдимизда турган муҳим вазифа эканини алоҳида қайд этдилар.

Давлатимиз раҳбари БМТ Бош Ассамблеясининг 72­-сессиясида жахоннинг энг юқори минбаридан туриб, мустақил Ўзбекистон ташқи сиёсатининг маънавий йўналиши инсонпарварлик, инсонийлик, ошкоралик, хуррият, ўз имкониятларига таяниш ва инсониятнинг ягона оиласида ўз тараққиёт йўлига эга бўлишлигини таъкидлаб, баён қилдилар.

Шунингдек давлатимиз Раҳбари аслида Ислом дини эзгулик ва тинчликка, асл инсоний фазилатларга риоя этишга даъват этишини алоҳида таъкидлаб ўтдилар. Жумладан, Муҳтарам Президентимиз Ш.М.Мирзиёев шундай дедилар: «Биз бутун жаҳон жамоатчилигига Ислом динининг асл инсонпарварлик моҳиятини етказишни энг муҳим вазифа, деб ҳисоблаймиз. Биз муқаддас динимизни азалий қадриятларимиз мужассамлигининг ифодаси сифатида беҳад қадрлаймиз. Биз муқаддас динимизни зўравонлик ва қон тўкиш билан бир қаторга қўядиганларни қатъий қоралаймиз ва улар билан ҳеч қачон муроса қила олмаймиз. Ислом дини бизни эзгулик ва тинчликка, асл инсоний фазилатларни асраб-авайлашга даъват этади”.

Бирлашган Миллатлар Ташкилоти – тинчликни ва халқаро хавфсизликни қўллаб қувватлаш, давлатлараро хамкорликни ривожлантириш мақсадида ташкил этилган универсал ташкилотдир.

БМТ ҳар бир инсонни хуқуқларини қўллаб қувватлаш, кенгайтириш ва химоя қилиш мажбуриятини ўз зиммасига олган дунёдаги ягона ташкилот сифатида дунёнинг “умужахон парламенти” сифатида календарнинг маълум бир кунини инсоният учун, халқ учун, умумжамият учун зарур бўлган масалаларга бағишлаб қўйган.

“Динлараро бағрикенглик хафтаси”, “Саратон билан курашиш халқаро куни”, “Халқаро ижтимоий адолат куни”, “Халқаро она тили куни” февраль ойида. Март ойида “Камситишга ноль куни”, “Халқаро ёввойи табиат”, “Халқаро ирқий камситилишни бартараф этиш куни”, “Ирқчилик ва ирқий камситилишларга қарши курашаётган халқлар билан бирдамлик хафтаси”, “Халқаро сил касаллигига қарши курашиш куни”, “Халқаро инсон хуқуқлари поймол бўлишида хақиқатни ўрнатиш куни”. Апрель ойида “халқаро спорт, тинчлик ва тараққиёт йўлида куни”, “Йўл ҳаракатларида содир этилган ходисаларда халок ўлганларни хотиралаш куни”, июнь ойида “Халқаро атроф мухитни мухофаза қилиш куни”, “Халқаро қочоқлар куни”, “Гиёҳвандликка қарши курашиш куни”, “Халқаро мурувват куни”, сентябрь ойида “Халқаро тинчлик куни” бўлиб, деярли 365 кун инсонларнинг турли муаммоларини енгиллаштиришда, баъзи муаммоларни ечилишида ўз самарасини бермоқда.

БМТ ўз тараққиёт дастурини амалга оширишда дунёнинг турли чеккаларида ва ер юзининг барча минтақаларида БМТнинг кўплаб ихтисослашган ташкилотлари ва муассасалари орқали ҳам тинчликни сақлашда, инсонлар ҳаётидаги муаммоларни бартараф этишда салмоқли ҳисса қўшиб келмоқда. Зеро Бирлашган Миллатлар Ташкилотининг XIX та бобларидаги 111 та моддаларининг барчалари ҳам ер юзида халқлараро тинчлик ва хавфсизликни барпо этиш билан йўғирилган.

БМТ Уставида таъкидланган халқаро тинчлик ва хавфсизликни барпо этишда Ўзбекистон Республикасининг ҳиссаси беқиёс ва бетакрор. Жаннатмакон юртимизни тинчлиги, муқаддас Ватанимиз равнақи доно халқимиз саломатлиги ва фаровонлиги, муборак динимиз камолоти ва масжиду мадрасаларимиз ободлиги учун муҳтарам Президентимиз Ш.М.Мирзиёев раҳнамоликларида  ҳукуматимиз,  Диний идорамиз раҳбарияти томонларидан оқилона олиб борилаётган хайрли, савобли ишларни амалга ошириш мақсадида вилоятларимиз раҳбарлари ҳамда шаҳар, туман раҳбарларининг бошчиликларида истиқлолимиз шарофати билан меҳнаткаш халқимиз кўп ишларни амалга оширди ва шу олижаноб ислоҳотлар ҳали ҳамон бажарилиб келинмоқда. Бунга дунё тан бермоқда...

Иброҳимжон ИНОМОВ

Ўзбекистон мусулмонлари идораси раиси ўринбосари

Тошкент вилояти бош имом-хатиби Жасур Раупов