muslim.uz.umi
Франция мактабларида араб тили ўқитилади
Франция ҳукуматида ўрта таълим мактабларида араб тилини ўқитиш билан боғлиқ лойиҳа қайта кун тартибига қўйилди. Ушбу лойиҳа Франция таълим вазири Жан-Мишел Бланк томонидан бир неча ой аввал эълон қилинган ва лойиҳа муаллифи Франция президенти Эммануэл Макрон экани айтилган. «Араб тили - буюк адабиёт тили, ва уни нафақат келиб чиқиши мағриблик французлар балки бошқалар ҳам ўрганиши зарур", - дея таъкидлаган Вазир. Ушбу баёнот франуз парламенти қаршисида эълон қилинган.
Араб тилини ўқитиш тўғрисидаги қонун лойиҳаси уни барча мактабларда ўқитилишини мажбурий қилиб қўймайди, лойиҳанинг мақсади бу тилни ўрганишга эҳтиёжи бўлганлар истагини қондириш экани таъкидланган.
Франциянинг собиқ президенти Валери Жискар д’Эстен томонидан муҳожирлар фарзандлари учун ўзлари келиб чиққан мамлакат тили ва маданиятини ўрганиш лойиҳаси тадбиқ этилган эди.
Араб тилини ўқитиш лойиҳаси эса Францияда қарийб 5-6 миллиондан ортиқ мусулмон яшаётганини ҳисобга олган ҳолда ишлаб чиқилган.
ЎМИ Матбуот хизмати
Уламолар ҳақида миш-миш тарқатиш – гуноҳ
Шу кунларда ижтимоий тармоқларда Шайх Абдулазиз Мансур вазифаларидан бўшатилди, деган мазмундаги ёлғон хабарлар тарқатилмоқда. Ушбу хабарлар ҳеч қандай асосга эга бўлмаган таги пуч гаплардир.
Ҳозирда Шайх Абдулазиз Мансур ҳазратлари Ўзбекистон мусулмонлари идораси раисининг ўринбосари ва Тошкент шаҳар бош имом-хатиби лавозимларида иш фаолиятларини жадал давом эттирмоқдалар.
Айни кунларда Шайх ҳазратлари динимиз ривожи, мўмин-мусулмонларимиз маърифати ва ёшларимиз камоли йўлида ўзларининг панду насиҳатларини қилиб келмоқдалар.
Ижтимоий тармоқларда тарқатилган Шайх Абдулазиз Мансур вазифаларидан бўшатилди, деган мазмундаги миш-мишлар асоссиз гап-сўзлардир.
Азизлар, ёлғон гапириш, одамларни алдаш ва миш-мишларни тарқатиш динимиз таълимотларида гуноҳ ҳисобланади. Шундай экан уламолар тўғрисида турли гаплар тарқатишни тўхтатайлик. Бир муддат аввал уламолар ва қори домлалар ҳақида миш-миш тарқатиб нимага эришдик, бундан фойда йўқлигини тушунайлик. Бунинг ўрнига вақтимизни илм-маърифатга сарфлайлик.
Ўзбекистон мусулмонлари идораси Матбуот хизмати
Ўзбекистонлик ҳожилар "Энг намунали ҳожилар", деб эътироф этилди
Жорий йил 9-12 август кунлари Қарши халқаро аэропортидан Қашқадарё ва Сурхондарё вилоятларидан 800 нафардан ортиқ юртдошимиз Ҳаж амалларини бажариш учун Саудия Арабистонига жўнаб кетган эди. Улар 32 кун давомида муборак Ҳаж зиёратини адо этиб, Ватанимизга эсон-омон қайтиб келди.
Бу йил Қашқадарё вилоятидан 413 киши муқаддас Ҳаж зиёратини адо этди. Мана шундай саодатли дамларда Ҳаж амалларини адо этган юртдошларимиз бугунги дориломон кунлар учун шукроналар айтиб, Яратгандан юртимизга тинчлик, халқимизга фаровонлик сўраб, хайрли дуолар қилди.
– Шу кунларга етказганига Аллоҳга ҳамду санолар бўлсин. Ҳаж зиёратида ибодат амалларини тўкис адо этдик, – дейди Қамбар момо Софиева. – У ерда бизга юқори даражада хизмат кўрсатилди. Шинам меҳмонхоналарга жойлашдик, автобуслар хизматимизда бўлди. Ҳаммани бу саодатга мушарраф қилсин. Биз кексаларга шундай қулайликлар яратиб берган давлатимиз раҳбаридан миннатдормиз.
Шу ўринда қайд этиш керакки, юртимиз истиқлолга эришгандан сўнг вилоятдан 4 мингдан зиёд киши Ҳаж амалини бажариб қайтди. Юртдошларимизнинг Ҳаж амалини бажариши учун давлатимиз томонидан қулай шароитлар яратишга алоҳида эътибор қаратилмоқда. Жорий йилда ҳам Ҳаж амалларини тўла-тўкис адо этиш учун Саудия Арабистонида зиёратчиларга ҳашаматли меҳмонхона, қулай шароитлар, истеъмоллари учун покиза ва лаззатли таомлар, борадиган манзиллари учун автобуслар, малакали тиббий хизматлар муҳайё қилинди.
– Ҳожиларимиз Ҳаж зиёратини жуда тартибли адо этди, – дейди зиёратчилар гуруҳи раҳбари Ўткир Ғузоров. – Бундай дейишимга сабаб, Мадина шаҳри амири Файсал ибн Салмон ҳазратлари дунёнинг турли мамлакатларидан келган Ҳаж делегациялари раҳбарлари учун ўтказилган қабул маросимида ўзбекистонлик ҳожилар энг намунали ҳожилар бўлди, деб эътироф этди ва бунинг учун давлатимизга, ҳожиларимизга, ишчи гуруҳга алоҳида миннатдорлик билдирди. Бу ҳам биз учун катта шараф. Зеро, бу ҳожиларимиз Имом Бухорий, Имом Термизий, Бурҳониддин Марғиноний каби буюк аждодларимизга муносиб авлод эканликларининг амалдаги исботидир.
Ўлмас Баротов, ЎзА
Қозоғистонда қишлоқ масжидларининг имомларига маош тайинланди
Қозоғистон мусулмонлар идорасининг Остона шаҳрида бўлиб ўтган йиғилишида имомларни маош билан таъминлаш ва диний хизматчиларни ижтимоий қўллаб-қувватлаш масаласи муҳокама этилди. Бу ҳақда muftyat.kz сайти маълумот берди.
ҚМДИ раиси, муфтий Серикбай ҳожи Ўразнинг қарорига кўра, «Қозоғистон ҳаж жамғармаси» ҳисобидан 100 нафар имомга 50 минг тенге миқдорида маош тайинланди.
“Элимизда 2058 та қишлоқ масжидлари бор. Уларнинг аксарияти ўз харажатларини қоплай олмайди. Тез орада маошсиз ишлаётган барча диний хизматчиларни маош билан таъминлашни режалаштирганмиз. Бугунги мажлисда 100 нафар имомга маош тайинланди.”, – деди Бош муфтий Серикбай ҳожи Ўраз.
Шунингдек, «Вақф» хайрия жамғармаси 300 дан ортиқ диний хизматчиларга 50 минг тенг миқдорида моддий кўмак кўрсатмоқда.
Қозоғистондаги 2605 та масжидда 6189 нафар ходим хизмат қилади. Шундан 4 мингдан ортиғи дин хизматчиларидир. Барча диний хизматчиларнинг 30 фоизи маош билан таъминланган.
ЎМИ Матбуот хизмати
Озарбайжонда диний меросни тарғиб этиш учун маблағ ажратилди
Озарбайжоннинг диний қадриятларни тарғиб қилиш жамғармаси давлат бюджетидан 400 минг манат миқдорида молиявий кўмак олиши ҳақида маълум қилинди.
Бу ҳақдаги фармон Озарбайжон Республикаси президенти Илҳом Алиев томонидан имзоланган. Ушбу маблағлар диний муассасаларни моддий-техник таъминлашга йўналтирилади ва маблағлар Озарбайжон президентининг заҳира жамғармасидан ажратилиши кўзда тутилган.
Жамғарманинг мақсади сифатида Озарбайжонда фаолият юритувчи диний конфессияларни қўллаб-қувватлашдир. Ушбу жамғарма диний тузилмалар билан ишлаш бўйича давлат қўмитаси бошқарувида экани маълум қилинган.
ЎМИ Матбуот хизмати