muslim.uz
«Ўзбек қориларининг олтин силсиласи» китоб тақдимоти бўлиб ўтди (фотолавҳа)
2022 йил 30 март куни «Шайх Муҳаммад Содиқ Муҳаммад Юсуф» мажмуасида Қуръони Карим ходими Ҳасанхон Яҳё Абдулмажид қаламига мансуб «Ўзбек қориларининг олтин силсиласи» номли китобнинг тақдимоти ўтказилди.
Тақдимотда юртимизнинг таниқли уламолари, хусусан, устоз қорилар, хориж олимлари, кўплаб аҳли илмлар, домлалар Қуръонга шайдо мухлислар иштирок этишди ва муслима аёлларимиз ҳам ташриф буюришди.
Тадбир Қуръони Карим тиловати билан бошланди ва устоз Яҳё қори домла дуо қилиб бердилар.
Тадбирни очиб бериш учун Ўзбекистон мусулмонлари идораси раиси, биринчи ўринбосари Ҳомиджон домла Ишматбеков сўзга чиқдилар. «Ўзбек қориларининг олтин силсиласи» китобидаги ҳар бир маълумотлар илмий асос билан баён этилган», дея таъкидлайди Ҳомиджон домла Ишматбеков.
Кейин устоз қорилар ҳаёти ҳақида ҳикоя қилувчи ҳужжатли фильм намойиш этилди.
Видеороликдан сўнг «Шайх Муҳаммад Содиқ Муҳаммад Юсуф» жомеъ масжиди имом-хатиби, «Ҳилол нашр» нашриёти матбааси раҳбари Исмоил домла Муҳаммад Содиқ сўзга чиқдилар. Мезбон сифатида тақдимотга ташриф буюрган барча меҳмонларга ташаккур билдириб, шайх Муҳаммад Содиқ Муҳаммад Юсуф роҳимаҳуллоҳ шу каби ишларга шогирдларини доим тарғиб этиб, рағбатлантириб келганларини эслаб ўтдилар. Хусусан, шайх ҳазратлари Ўрта Осиё ва Қозоғистон мусулмонлари диний идораси раиси бўлган вақтларида ўзбек қориларининг олтин силсиласини тикланишига илк қадамни қўйиб берганлар, дейди Исмоил домла Муҳаммад Содиқ. 1992 йил 31 март куни шайх ҳазратлари ўзбек қорилар силсила борасидаги фармонни чиқарган эканлар.
Сўнгра Тошкент шаҳри «Убай ибн Каъб» жомеъ масжиди имом-хатиби, «Qur’on TV» илмий-маърифий онлайн телеканали раҳбари, устоз Абдулҳаким қори Матқулов сўзга чиқдилар. Устоз Абдулҳаким қори мазкур китобнинг аҳамияти ва юртимизда Қуръони Каримга бўлган муҳаббат доим юқори даражада бўлганини таъкидлаб ўтдилар.
Кейин Ўзбекистон халқаро ислом академияси ўқитувчиси, доктор Абдуманнон домла Исматуллаев «Қироат ва тажвид илми тарихи» мавзусида суҳбат қилиб бердилар.
Тақдимот жараёнида Тошкент ислом институтининг «Таҳфизул Қуръон» кафедраси мудири Жаҳонгир қори Неъматов «Ўзбек қориларининг олтин силсиласи» китоби ҳақида маълумотлар бериб ўтдилар. Китобда Ўзбек қориларининг Набий соллаллоҳу алайҳи васалламга бевосита туташган санади, яъни қироатни нақл қилган ровийлар силсиласи илмий асосда аниқлаб чиқилган. Бу билан минглаб ўзбек қорилари, улардан таълим олган кишилар, жумладан, Қирғизистон, Қозоғистон, ҳатто Россиядаги кўплаб мусулмонларнинг Қуръондан олган таълими санадга эга экани ўз исботини топган. Уларнинг силсиласи Набий соллаллоҳу алайҳи васалламга боғлиқлиги очиқланган. Шунингдек, китобнинг арабча қисми юртимизда яшаб ўтган устозларни араб оламига таништириш билан бир қаторда ўзбек қориларининг олиб борган тарихий ислоҳотларидан бохабар қилади. Шу билан бирга, уларнинг юртимизда Қуръони Каримга қанчалар эътибор берилгани, халқимизнинг Қуръонга ихлоси, хизмати ҳақидаги тасаввурларини ҳам кенгайтиради. Хусусан, Қуръони Карим устози Абдулбоқий ибн Мулла Рўзи ибн Муҳаммад Толеъ Андижоний ҳамда Қуръони Карим муаллими Муҳаммад Мубин ибн Аминжон махдум Андижонийнинг имом Ҳафс имом Осимдан ривоят қилган қироатлари бўйича Набий соллаллоҳу алайҳи васалламга туташган санадлари шулар жумласидандир. .
Тақдимотга Имом Мотуридий роҳимаҳуллоҳнинг ҳаёт йўллари, ижодий фаолиятлари ва мотуридийлик таълимоти борасида мўътабар асарлардан бўлган «Саддус суғур» китоби муаллифи, Ўзбекистон халқаро ислом академияси ва Имом Мотуридий халқаро илмий тадқиқот маркази устози, мисрлик Аҳмад Даманҳурий ҳафизаҳуллоҳ ташриф буюриб, юртимиздаги диний ислоҳотларни эътироф этдилар. «Ўзбек қориларининг олтин силсиласи» китоби ҳақида самимий фикр-мулоҳазалар билдирдилар. Хорижлик меҳмон ўз сўзида: «Аллоҳ таоло Қуръони Каримда Пайғамбарлар ҳақида гапирганда «Истифо» (танлаб олиш) феълини ишлатган бўлса, Қуръон ҳомиллари, Қуръонни ҳифз қилувчилар ҳақида гапирганда ҳам «Истифо» феълини ишлатган», деб қориларнинг ва Қуръонга хизмат қилувчиларнинг мақоми юксаклигини алоҳида эътироф этиб ўтдилар.
Сўнгра Муҳаммад Айюб қори бошчилигидаги «Жаннат булбуллари» гуруҳи томонидан Қуръони Каримга бағишланган гўзал нашидалар ижро этилди.
Шундан сўнг «Ўзбек қориларининг олтин силсиласи» китоби муаллифи, имом ноиб, Қуръони Карим ходими Ҳасанхон Яҳё Абдулмажид сўзга чиқдилар. Муаллиф китобнинг ёзилиш тарихи, бу борада олиб борилган изланишлар ҳақида гапириб, презентация тақдим этдилар.
Ҳа азизлар «Ўзбек қориларининг олтин силсиласи» китобидаги санадларнинг илмий равишда исботланиши юртимиз мусулмонлари, хусусан, қорилари учун тарихий ҳодиса бўлди, иншааллоҳ, диний-илмий жиҳатдан юксак аҳамият касб этади. Бу ўз навбатида яқинлашиб келаётган Қуръон ойи моҳи Рамазонга туҳфа бўлди.
Тақдимот сўнгида устоз қориларга, фахрий ёрлиқлар, Қуръон ходимларига ташаккурномалар ҳамда эсдалик совғалар улашилди.
Тадбир якунида устозлар томонидан дуолар қилинди.
Китоб тақдимоти «Шайх Муҳаммад Содиқ Муҳаммад Юсуф» жомеъ масжидида ҳам катта экранда намойиш этиб борилди.
Шунингдек, ахборот ҳамкорларимиз muslim.uz, AlQuran.uz, Azon.uz ва AzonTV, Qur’on TV илмий-маърифий онлайн телеканалларида онлайн тақдим этиб борилди.
«Ўзбек қориларининг олтин силсиласи» китобини «Hilol nashr»нинг китоб дўконларидан харид қилишингиз мумкин.
Ўзбекистон мусулмонлари идораси матбуот хизмати
"Оят ва ҳадисдан ўзимиз ҳукм оламиз" шиорини олға сураётганлар аслида дин душманларидир!
Исҳоқжон домла Бегматов
Филадельфия озиқ-овқат банки ифторга 6000 та таом таклиф этади
Муборак Рамазон ойидан бир неча кун олдин АҚШнинг Филадельфия озиқ-овқат банки маҳаллий мусулмон бизнес ассоциацияси билан биргаликда муҳтожларга 6000 порция озиқ-овқат маҳсулотларини тарқатади.
Islam.ru хабар қилишича, Philabundance озиқ-овқат банки иккинчи йил Рамазон ойида ҳар куни 200 дан ортиқ оилага ифторлик учун таомлар етказиб беришни мақсад қилган. "Рамазон ойи давомида биз нафақат кундузи овқатланиш ва ичишдан воз кечишга, балки муҳтожлар овқатланиш имкониятига эга бўлишига ишонч ҳосил қилишига ёрдам берамиз", деди штат сенатори Шариф Стрит.
Philabundance раҳбари Лори Жонснинг таъкидлашича, бу йилги ифторликларга муҳтожларни хурсанд қиладиган соғлом ва тўйимли овқатларга алоҳида эътибор беорилмоқда.
Ўзбекистон мусулмонлари идораси матбуот хизмати
Нуриддин Йилдиз ҳафизаҳуллоҳ: Обрўларимиз бир-биримизга омонат! (инфографика)
Рўза танадаги ортиқча ёғларни кетказади ва унинг жигарга фойдаси
Ислом динида буюрилган рўзанинг ҳам маънавий, ҳам жисмоний саломатлик учун чексиз фойдалари мавжуд. Аллоҳ таоло Рамазон рўзаси ҳақида бундай марҳамат қилган:
شَهْرُ رَمَضَانَ الَّذِي أُنْزِلَ فِيهِ الْقُرْآَنُ هُدًى لِلنَّاسِ وَبَيِّنَاتٍ مِنَ الْهُدَى وَالْفُرْقَانِ فَمَنْ شَهِدَ مِنْكُمُ الشَّهْرَ فَلْيَصُمْهُ
“Рамазон ойики, унда одамларга ҳидоят ҳамда ҳидояту – фурқондан иборат очиқ баёнотлар бўлиб, Қуръон туширилгандир. Сизлардан ким у ойда ҳозир бўлса, рўзасини тутсин” (Бақара сураси, 185-оят).
Рўзанинг ҳикматлари, инсоннинг дунёю-охирати учун манфаатлари кўп. Ҳатто бошқа дин вакиллари ҳам унинг инсонга фойдаларини ўрганиб, эътироф этмоқдалар ва ўзларида татбиқ қилмоқдалар.
Рўза ҳозирги даврда аниқланган очлик билан даволаш услубларидан буткул фарқ қилади. Бугунги кунда дунёнинг турли бурчакларида очлик билан даволайдиган сиҳатгоҳлар ташкил этилиб, беъморларга муолажалар қилишяпти ва буни “тиббий рўза”, “умумий рўза” ёки “очлик билан даволаш” каби номлар билан номлашмоқда. Лекин бу муолажаларнинг барчаси ижобий натижа бериши мушкул. Чунки бандалар томонидан ўйлаб топилган тартиб-қоидалар ҳеч қачон мукаммал бўлмай, қайсидир жиҳати ноқис бўлади.
Ислом динида фарз қилинган Рамазон рўзаси ва нафл рўзалар тиббиётда қўлланадиган очлик орқали даволаш услублари билан баъзи жиҳатларда ўзаро мувофиқ келса, баъзи томондан бутунлай фарқ қилади. Қуйида ушбу фарқларни келтириш мумкин:
- Рўза ва очлик орқали муолажа қилиш ошқозон ҳазми яхшиланиши ва ундаги йиғилиб қолган заҳарларнинг чиқиб кетишига ёрдам беради.
- Рўзани ҳар бир мусулмон киши ҳар йили Рамазон ойида бир кун ҳам қолдирмай тутиши фарз ҳисобланади. Рўза тутганда саҳардан оқшомгача ҳар қандай озуқадан тийилинади. Аммо тиббиётда қўлланадиган очлик билан муолажа қилиш баъзи кишиларнинг касаллиги, ҳолати ва ихтиёрига қараб маълум муддат қўлланади.
- Рамазон рўзасини ҳар бир минтақада, барча мусулмонлар тутиши фарз ҳисобланади. Унда машаққат ва жисмга хавф-хатар бўлмайди. Очлик билан муолажа қилишда эса, ўзига яраша машаққат, жонни қийнашлик мавжуд. Уни ҳамма ҳам уддалай олмайди. Касаллигига очликдан бошқа даво тополмаган ва унинг фойдаларига аниқ ишонч ҳосил қилган кишигина бу муолажага киришади. Чунки уни жорий қилувчи табиблар ва маълум бир шифохоналар ҳисобланади.
- Очлик билан даволаш беъморга салбий таъсир қилиши мумкин. Лекин Рамазон рўзасида инсонга салбий таъсир қилувчи ҳолатлар кузатилмайди.
Маълумки, инсон жисми кун давомида тўла ўз фаолиятини бажариши ва йўқотилган куч-қувватни тиклаши учун керакли миқдорда озуқа талаб қилади. Агар инсон тана эҳтиёжидан ортиқ озуқа истеъмол қилса, у ёғга айланиб, вазн ортишига олиб келади. Албатта, меъёрдан ортиқ вазн инсон саломатлигига салбий таъсир қилади.
Ҳозирги пайтда ортиқча вазндан азият чекадиганлар кўп учрайди. Уларга муолажа қилиш учун турли даволаш услублари ўйлаб топилган. Лекин бу услублар инсон танасидаги сув миқдори камайиши ва соғлиққа зарар етказиши мумкин. Рўза эса зарарсиз ортиқча вазндан қутулишда тенгсиз йўлдир. Бунда саҳарликда ва ифторликда кундузги иш-ҳаракатга мос равишда, меъёрда овқаланиш лозим.
Инсон тўқимасида кўплаб заҳар ва зарарли моддалар йиғилади. Бу моддалар асосан, истеъмол қилинадиган озуқалар орқали пайдо бўлади. Айниқса, ҳозирги пайтда тайёрланаётган озиқ-овқат маҳсулотларининг деярли барчасида оз миқдорда бўлса-да “заҳар”лар мавжуд. Улар ўсимликларни ўстириш учун сепиладиган дорилар, маҳсулотларни тайёрлаш жараёнида қўшиладиган ранглар, хушбўйлантирувчи ёки сақлаш учун қўшиладиган кимёвий моддалар орқали пайдо бўлади. Қўшимча, ҳаво орқали автомобиллар, завод ва фабрикалардан чиқаётган заҳарли тутунлар ютилади. Касалликлардан даволанишда кимёвий моддалардан тайёрланган дори-дармонлар қўлланади. Бу моддалар қонга сингиб, ҳужайраларнинг йўқ бўлишига сабаб бўлади.
Заҳарлар ва барча зарарли моддалардан танани тозалашда муҳим вазифани бажарувчи аъзо – жигар ҳисобланади. Организмда зарарли моддалар пайдо бўлганда жигар фаолияти бузилади. Уни яна асл ҳолатига қайтаришда эса рўзанинг ўрни беқиёс. Рўза тутганда танадаги ортиқча ёғлар ва жигар атрофидаги заҳарлар йўқолади.
Даврон НУРМУҲАММАД