muslim.uz
Ўзбекистон делегацияси Тунисда ўтадиган ISESCO анжуманларида иштирок этмоқда
2019 йилнинг 16 декабрь куни юртимиз делегацияси Тунис Республикасига жўнаб кетди. Тунис Республикаси Маданият вазири ва Ислом ҳамкорлик ташкилотининг таълим, фан ва маданият йўналиши (ISESCO) Бош директори С.ал-Малики томонидан таклиф этилган. Ўзбекистон делегациясига Маданият вазири Б.Сайфуллаев раҳбарлик қилаётгани маълум қилинган.
Ташриф мақсади 2019 йил Тунис Республикаси Ислом маданиятининг пойтахти деб эълон қилиниши ҳамда Ислом ҳамкорлик ташкилотига аъзо давлатларнинг маданият вазирларининг 11-конференциясида иштирок этиш эканлиги қайд этилди.
Жорий йилнинг 17-19 декабрь кунлари давом этадиган бир қатор тадбирлар, яъни Маданият соҳасида ўзаро тажриба алмашиш, 2019 йилда Тунис давлати Ислом маданиятининг пойтахти сифатида ёпилиш маросимида иштирок этиш, шу билан бирга, 2020 йил Бухорони Ислом маданияти пойтахти деб эълон қилинганлиги масалалари юзасидан режалаштирилаётган тадбирлар муҳокама қилинади.
Бугун Тунис давлатида “Ислом дунёсида замонавий маданий сиёсатни ривожлантириш йўлида” номли маданият вазирларининг 11-Исломий конференцияси бошланди. Унда Ислом дунёсида маданиятни ривожлантириш бўйича маслаҳат кенгашининг 17-йиғилишининг якуний ҳисоботи, ISESCO конференциясининг 10 ва 11- сессиялари орасидаги маданият соҳасидаги ютуқлари тўғрисида ҳисобот, Ислом дунёси мероси кўмитасининг ҳисоботи, “Рақамли инновацион маданият кўлланмаси лойиҳаси: истиқбол ва муаммолар”, маданий лойиҳаларни параллел молиялаштириш манбалари бўйича амалий таклифлар, Туниснинг “Ислом дунёсида замонавий сиёсатни ривожлантириш йўлида” декларацияси лойиҳаси ва жориж давлатларнинг маданият соҳасидаги ютуқлари борасида масалалар муҳокама қилинди.
Ўзбекистон мусулмонлари идораси Матбуот хизмати
Абу-Дабида халқаро анжуман ташкил этилди
Жорий йилнинг 16 декабрь куни Абу-Даби (БАА) Миллий кўргазма марказида БМТнинг Коррупцияга қарши конвенциясига аъзо давлатлар конференциясининг саккизинчи сессияси ўз ишини бошлади. Унда Ўзбекистон адлия вазирлиги делегацияси ҳам иштирок этмоқда.
Иштирокчиларга Ўзбекистонда коррупцияга қарши кўрилаётган чоралар тўғрисида батафсил маълумот берилган. Мамлакатда ушбу ўта салбий ҳодисанинг олдини олиш ва унга қарши курашиш, ҳуқуқий ҳамда институционал асосларни мустаҳкамлаш бўйича қатъий қадамлар қўйилаётгани таъкидланди. Давлат сиёсати коррупция хатарларининг сабаблари ва шартларини ҳар томонлама ўрганишни, ҳуқуқбузарликларни ўз вақтида аниқлаш ва уларга барҳам беришни, жазонинг муқаррарлиги принципини назарда тутади.
Президент Шавкат Мирзиёев сайланганидан кейин имзолаган биринчи қонун бу - “Коррупцияга қарши курашиш тўғрисида”ги қонун бўлди. Бу мамлакат раҳбарияти сиёсий йўналишининг аниқ белгисига айланди.
Ўз навбатида, давлат хизматларини тақдим этишда жисмоний ва юридик шахсларга “ягона дарча” асосида давлат хизматларини кўрсатиш тизими шакллантирилди. Бу фуқаролар ва давлат ҳокимияти ҳамда бошқаруви органлари ходимлари ўртасида давлат хизматларини кўрсатишда юзага келиши мумкин бўлган коррупция ҳолатларининг олдини олишга ёрдам беради.
Ўзбекистон мусулмонлари идораси Матбуот хизмати
Қирғизистон Президенти Умра зиёратини адо этди
Қирғизистон Республикаси президенти Сооронбой Жээнбеков ва қирғизистонлик бир гуруҳ маъмурият вакиллари Умра зиёратини бажаришди. Бу ҳақда saudi-arabia.ru нашри хабар берди.
Ал Ҳарам мажсидида қўшни мамлакат зиёратчиларини масжид махсус хавфсизлик кучлари қўмондони генерал Яхё ибн Абдул Раҳман ал-Ақил тантанали кутиб олган.
Қирғизистон президенти матбуот хизмати берган маълумотларга кўра, Саудия Арабистони подшоҳи Салмон бин Абдулазиз Ал Сауднинг таклифиша биноан Қирғизистон делегацияси 15–17 декабрь кунлари расмий ташриф билан Саудия Арабистонида бўлишган.
Ушбу ташриф доирасида Қирғизистон Республикасининг Ар Риёддаги элчихонасининг янги биноси очилиш маросими ташкил этилган.
Ўзбекистон мусулмонлари идораси Матбуот хизмати
Қозоғистонда ҳаж зиёрати ҳаражатларини пасайтириш механизмлари муҳокама қилинди
muftyat.kz сайтининг хабар беришича, Нурсултон шаҳрида Ҳаж зиёрати нархларини пасайтириш хусусида расмийлар иштирокида учрашув ўтказилган. Учрашувда Қозоғистон мусулмонлари идораси девони бошлиғи Гилимбек Мажиев, Дин ишлари бўйича қўмита раҳбари Досимжон Нурбаев, Бош муфтий маслаҳатчиси Болтабой Мекежанов, Идоранинг зиёрат бўлими бошлиғи Жандилда Бекжигитов ҳамда зиёрат компаниялари раҳбарлари иштирок этишган.
Сайёҳлик ва зиёратни ташкил этувчи компаниялар раҳбарлари бу борада ўз фикрларини билдириб ўтганлар ҳамда нархларнинг ошишига асосий сабаб транспорт, овқатланиш, авиаташув хизматлари учун нархларнинг юқорилаши эканини қайд этиб ўтишган. Бу борада муҳокамалар яна давом этиши маълум қилинди.
Ўзбекистон мусулмонлари идораси Матбуот хизмати
Эронда катта ҳажмдаги ҳарфлар билан битилган Қуръони карим чоп этилди
"Авай-е Раха" босмахонаси директори Мейсам Хесараки "Iqna" нашри билан суҳбатда ушбу Мусҳаф ҳақида маълумот бериб ўтди.
Унинг сўзларига кўра, бу Қуръони карим ислом дунёсида ўхшаши йўқ бўлиб, унинг ўзига хослиги ўта йирик ҳажмдаги ҳарфлар билан битилган.
Ҳаттот Мустафо Ашрафий Табризий томонидан битилган ҳамда 1232 саҳифада чоп этилган Мусҳафнинг дастлабки ва охирги 16 бети хушбўй ифор таратувчи қоғозда чоп этилган.
Ушбу Қуръони карим устида саккиз йил давомида ишлангани, ҳозирда эса 5000 ададда чоп этилгани айтилган.
Ўзбекистон мусулмонлари идораси Матбуот хизмати
ХОРИЖДАГИ ЮРТДОШИМ САҲИФАСИ
КОНЦЕПЦИЯ
Дунё дарвозалари янада кенгроқ очилиб, хорижий давлатлар фуқароларининг юртимизга келиб-кетишларига қулай шароитлар яратилмоқда. Жумладан, 39 та давлат фуқароларига туристик визаларни расмийлаштириш тартиби соддалаштирилди, Ўзбекистон билан визасиз давлатлар сони кўпайди.
Шунинг баробарида бизнинг юртдошларимизнинг ҳам хорижий давлатларга чиқиши ортмоқда.
Одатда, чет элга, умуман, йўлга чиқаётган ҳар қандай йўловчига олдиндан йўловчилик машаққатини тортган, бу борада бой тажриба тўплаган кишилар; китоб кўрган олиму уламолар йўл-йўриқлар кўрсатиб, панду наисҳатлар қилишган. Зеро, нотаниш манзиллар сари сафарга отланган кишиларга бундай тавсияю насиҳатларнинг аҳамияти жуда ҳам катта.
Бинобарин, хорижга чиқаётган мўмин-мусулмонлар ушбу сафарида давлатнинг қонунларига амал қилгани каби шариатимиз кўрсатмаларига ҳам амал қилмоғи ниҳоятда муҳимдир.
Масаланинг ана шу жиҳатлари эътиборга олиниб, muslim.uz Интернет порталида “Муҳожир ватандошлар” лойиҳаси иш бошлади. Ушбу лойиҳа доирасида янги рукн очилиб “Хориждаги юртдошим” номланди.
Ушбу рукнда:
- хорижда таълим олаётган, меҳнат қилаётган, узоқ муддатга даволанишга кетган ватандошларимиз тўғрисида ҳаётий мақолалар;
- йўлга чиқувчиларга тавсиялар, маслаҳатлар;
- узоқ муддатли сафарларнинг ижтимоий ҳаётга, оилавий масалаларга таъсири ва бошқа долзарб муаммоларга доир савол-жавоблар дастурий равишда ёритилади;
- Интернет сайтда эълон қилинган мақоланинг аудио формати ҳам тавсия қилинади.
Ушбу материаллар оят, ҳадис ва уламоларимизнинг илмий меросларига асосланган ҳолда ёритилади.