muslim.uz
"Малҳам" акцияси доирасида Диёрбекка кўмак кўрсатилди
Жорий йилда "Вақф" хайрия жамоат фонди томонидан "Малҳам" акцияси доирасида турли касалликларга дучор бўлган ва даволаниш учун катта миқдордаги маблағ талаб этилган ҳамюртларимизга кўмак кўрсатиш режалаштирилган эди.
"Малҳам" акцияси доирасида Толипов Диёрбек учун маблағлар тўплаш бўйича тадбир ташкил этилди. Мурувватпеша фуқаролар томонидан "Малҳам" лойиҳасига акция эълон қилинганидан буён бугунги кунга қадар 1 012 002 сўм маблағ тўпланди.
Толипов Диёрбек танглайида II-Б даража туғма кемтиги, нафас олиш, чайнаш, ютиш фаолиятининг бузилиши ташҳиси қўйилган ҳамда тезкор жарроҳлик амалиётини ўташи лозимлиги кўрсатилган эди.
Бугун, 20 ноябрь куни Диёрбекнинг оналари шахсан Фондга келиб йиғилган маблағни олдилар, бироқ бу пулларнинг жарроҳлик амалиётига етмаслиги сабаб, имкон даражада қўшимча кўмак кўрсатилишини сўраб мурожаат қилдилар. Фуқаро аризасига мувофиқ Фонд бошқаруви буйруғи билан жами 5 000 000 сўм миқдорида ёрдам берилди.
Диёрбекка Аллоҳдан шифосини тилаб қоламиз!
"Вақф" хайрия жамоат фонди барча мўмин-мусулмонларни "Малҳам" акциясида иштирок этишга, бошқаларнинг кўмагига муҳтож бўлганларга фаол кўмак кўрсатишга чақиради.
"Вақф" хайрия жамоат фонди Матбуот хизмати
Муфтий ҳазрат таълим-тарбия масканига ташриф буюрди
Куни кеча, 19 ноябрь куни Ўзбекистон мусулмонлари идораси раиси, муфтий Усмонхон Алимов ҳазратлари Қорақалпоғистон Республикаси Қўнғирот туманида жойлашган Қорақалпоғистон шаҳарчасига ташриф буюрдилар. Сафар давомида муфтий ҳазратлари мактабгача таълим муассасалари, ўқув юртлари, оилавий поликлиникалар ва ишлаб чиқариш корхоналари фаолияти билан яқиндан танишдилар.
Қўнғирот туманида “Обод қишлоқ” дастури доирасида жуда кўп бунёдкорлик ва ободонлаштириш ишлари амалга оширилганига гувоҳ бўлинди. Айниқса, “Орзулар ороли” номли мактабгача таълим муассасаси фаолияти билан яқиндан танишиш жараёнида бу жиҳатга яна бир бор амин бўлинди. Муфтий ҳазратлари давлатимиз Раҳбарининг мактабгача таълим тизимини ривожлантиришга қаратаётган алоҳида эътиборлари натижасида Қорақалпоғистонда ҳам замонавий болалар боғчалари бунёд этилаётганини алоҳида қайд этдилар.
Мазкур тумандаги “Орзулар ороли” номли мактабгача таълим муассасаси замонавий шаклда барпо этилган. Болаларни қизиқтирадиган, дунёқарашларини бойитадиган ўқув предметлари ва ўйинчоқлар билан жиҳозланган. Болаларнинг яхши таълим-тарбия олиши, тўғри овқатланиши, жисмоний машғулотлар билан шуғулланиши, мароқли дам олиши учун барча шароитлар яратилгани барчанинг ҳавасини келтирди.
Муборак динимизда ёшлар таълим-тарбиясига алоҳида аҳамият қаратилиши ҳам бежиз эмас, албатта. Зеро, Ҳазрати Пайғамбаримиз соллаллоҳу алайҳи васалламнинг: “Кишининг ўз фарзандини чиройли одоб-ахлоқ билан тарбиялаши кўп миқдорда қилган нафл садақасидан яхшироқдир” ва “Болаларингизга одоб беринглар ва одобларини чиройли қилинглар”, деган ҳадисларида ҳам жуда кўп ҳикматлар мужассамдир.
Ташриф давомида муфтий ҳазратлари ушбу шаҳарчада истиқомат қилувчи Есенбай ота Наврўзов, Ажибаев Жоламан, Мамутов Муҳаммадали каби фуқароларнинг хоноданларига ташриф буюриб, улар билан самимий суҳбат қилиб, дуои хайрлар қилдилар.
Шаҳарчадаги “Маданият саройи”да муфтий ҳазратлари маҳаллий аҳоли ва нуронийлар билан учрашди. Муфтий ҳазратлари халқимиз тинчлиги бебаҳо неъмат экани, динимиз софлигини асраш ҳамда турли бидъат ва хурофатларни бартараф этиш ҳақида сўзладилар. Фуқаролар ўзларининг қизиқтирган саволларига батафсил жавоб олдилар.
Қорақалпоғистон мусулмонлар қозиёти қозиси Шамсуддин Бауатдинов ва жойлардаги мутасадди кишилар сафар давомида муфтий ҳазратларига ҳамроҳлик қилмоқда.
Қорақалпоғистон Республикасига сафар давом этмоқда.
Ўзбекистон мусулмонлари идораси Матбуот хизмати
Қаноат қўрғондир
Зулқарнайн ярим кеча ўз қўшини билан бир ғордан ўтиб борар экан, “Оёғингиз остида учраган нарсалардан олиб кетинг” дея амр қилди. Қўшиндагилардан бир гуруҳи: “Кўп юрдик, жуда чарчаганмиз, энди кечаси билан оёғимиздаги нарсаларни ҳам йиғамизми?” – деб ҳеч нима олмадилар. Иккинчи бир гуруҳ: “Қўмондонимиз айтган экан, бир оз тўплай қолайлик, буйруққа қарши чиқмайлик. Зеро, қўмондонга бўйсуниш керак”, – деб озгина нарса оладилар. Учинчи гуруҳ эса: “Қўмондон бежизга бундай демади, бунда қандайдир ҳикмат бўлиши керак”, – дея тўрваларини тўлгунча қўлга илинган нарсалар билан тўлдирдилар.
Кун ёришганда қарасаларки, олтин конининг ёнидан ўтишибди. Ва оёқларига теккан нарсалар олтин экан. Буни билганларида эса, ҳеч нарса олмаган биринчи гуруҳ: “Эҳ, нега олмадик а! Нега қўмондонимизнинг гапига кирмадик, қанийди олганимизда... Битта бўлса ҳам олсайдик”, – деб пушаймон бўлдилар. Озгина олган иккинчи гуруҳдагилар: “Эҳ, яна озгина олсак эди. Чўнтакларимизни, халталаримизни тўлдирсак бўлар экан...” – деб қолишди. Кўп олган учинчи гуруҳ эса: “Кошки кераксиз нарсаларимизни ташлаб юборсайдик, кўпроқ олсайдик. Ҳамма нарсаларимизни тўлдирсайдик. Бундан ҳам кўпроқ олиб қолсайдик...” – дея кўп олганларига қарамай барибир хафа эдилар.
Ҳикмат
Қаноат қўрғондир. – У ерга кирсанг нафс ёмонлигидан қутиласан. Тоғликдир – у ерга чиқсанг душман ва дўстга қарамликдан халос бўлурсан.
(Алишер Навоий)
Саидаброр УМАРОВ таёрлади
Татаристонда янги масжид очилди
Нижнекамск туманида янги масжиднинг очилиш маросими бўлиб ўтди. Масжид Қуйи Уратьма қишлоғида қурилган. Ушбу қишлоқнинг эски масжиднинг қурилганига 160 йил бўлган. Шу сабабли маҳаллий аҳолини уни қайта тиклагандан кўра янги масжид қуришга қарор қилдилар.
Очилиш маросимида Нижнекамск шаҳри ва Нижнекамск тумани имоми Солиҳ Ибрагимов, қишлоқ раиси Айрат Гарифуллин, қўшни шаҳарлар уламолари, жамоатчилик вакиллари ҳамда туман маъмурияти вакиллари иштирок этган.
Islam-today нашрининг маълум қилишча, масжид қурилиши 2012 йилда бошланган. Очилиш маросимида меҳмонлар учун дастурхон ёзилгани ҳам қайд этилган. Маросим пешин намозига азон айтилиши билан якунланган. Дуо хайрлар қилинган.
ЎМИ Матбуот хизмати
Париж жоме масжидида бўлганмисиз?
Париж жоме масжиди Франциядаги энг йирик масжид ҳисобланади. Унинг гўзал ислом архитектураси асосида қурилгани, биринчи жаҳон урушида ҳалок бўлган мусулмон-аскарлар хотирасига ҳурмат келтириш мақсадида қурилгани унинг аҳамиятини оширади. Биринчи жаҳон уруши мобайнида 100 минг мусулмонлар Франция озодлиги учун курашиб жон берган.
Қуйида ушбу масжиднинг суратлари билан танишишингиз мумкин.
ЎМИ Матбуот хизмати
ХОРИЖДАГИ ЮРТДОШИМ САҲИФАСИ
КОНЦЕПЦИЯ
Дунё дарвозалари янада кенгроқ очилиб, хорижий давлатлар фуқароларининг юртимизга келиб-кетишларига қулай шароитлар яратилмоқда. Жумладан, 39 та давлат фуқароларига туристик визаларни расмийлаштириш тартиби соддалаштирилди, Ўзбекистон билан визасиз давлатлар сони кўпайди.
Шунинг баробарида бизнинг юртдошларимизнинг ҳам хорижий давлатларга чиқиши ортмоқда.
Одатда, чет элга, умуман, йўлга чиқаётган ҳар қандай йўловчига олдиндан йўловчилик машаққатини тортган, бу борада бой тажриба тўплаган кишилар; китоб кўрган олиму уламолар йўл-йўриқлар кўрсатиб, панду наисҳатлар қилишган. Зеро, нотаниш манзиллар сари сафарга отланган кишиларга бундай тавсияю насиҳатларнинг аҳамияти жуда ҳам катта.
Бинобарин, хорижга чиқаётган мўмин-мусулмонлар ушбу сафарида давлатнинг қонунларига амал қилгани каби шариатимиз кўрсатмаларига ҳам амал қилмоғи ниҳоятда муҳимдир.
Масаланинг ана шу жиҳатлари эътиборга олиниб, muslim.uz Интернет порталида “Муҳожир ватандошлар” лойиҳаси иш бошлади. Ушбу лойиҳа доирасида янги рукн очилиб “Хориждаги юртдошим” номланди.
Ушбу рукнда:
- хорижда таълим олаётган, меҳнат қилаётган, узоқ муддатга даволанишга кетган ватандошларимиз тўғрисида ҳаётий мақолалар;
- йўлга чиқувчиларга тавсиялар, маслаҳатлар;
- узоқ муддатли сафарларнинг ижтимоий ҳаётга, оилавий масалаларга таъсири ва бошқа долзарб муаммоларга доир савол-жавоблар дастурий равишда ёритилади;
- Интернет сайтда эълон қилинган мақоланинг аудио формати ҳам тавсия қилинади.
Ушбу материаллар оят, ҳадис ва уламоларимизнинг илмий меросларига асосланган ҳолда ёритилади.