Сирдарё вилояти Гулистон шаҳридаги “Осиё” кошонасида бўлиб ўтаётган Қуръон мусобақасининг ҳудудий босқичи жуда ҳам кўтаринки кайфиятда ўтмоқда. Айни пайтларда аёл-қизлар ўртасидаги тиловат йўналиши бўйича мусобақа ғолиблари аниқланди. Марҳамат ғолиблар билан танишинг:
18-25 ёшли аёл-қиз иштирокчилар орасида қуйидагилар ғолиб бўлди:
1-ўринга Мустафоева Сарвиноз;
2-ўринга Вафоева Дурдона;
3-ўринга Нўъмонова Маърифат муносиб деб топилди.
26-40 ёшли аёл-қиз иштирокчилар орасида қуйидагилар ғолиб бўлди:
1-ўринга Усманова Ҳулкар;
2-ўринга Турдиева Феруза;
3-ўринга Ҳасанова муносиб деб топилди.

Ҳудудий босқичнинг аёл-қизлар ўртасидаги ғолиблар Ўзбекистон мусулмонлари идораси ҳамда ҳомийлар томонидан ташкил этилган диплом ва қимматбаҳо совғалар билан тақдирландилар.
Бизни жонли тарзда кузатишда давом этинг.

Ўзбекистон мусулмонлари идораси Матбуот хизмати

Аллоҳга ҳамдлар бўлсинки, оммавий тарзда ўтказилаётган Қуръон мусобақасининг илк йилидаёқ диёримизда Аллоҳнинг каломига муҳаббат қўйган қори йигит-қизларимиз сони минг-минглаб экани яққол намоён бўлди. Мусобақанинг илк босқичини кузатар эканмиз, қори ва қорияларимизнинг юзидаги нур, муомаласидаги самимийлик ва қироатидаги жозибадан барчамиз сўз билан таърифлаб бўлмайдиган даражада мамнунликни ҳис этдик.

Агар инсоннинг қалби Қуръонга муҳаббатли бўлса, унинг қироатидан лаззатланади, унга бор эътиборини қаратади ва бунинг натижасида чуқур тушуниш учун тадаббур ҳосил бўлади. Барча ишлари ўнгидан олади, нафс истаклари камайиб, ихлоси ортиб бораверади. Аксинча, агар муҳаббат бўлмаса, қалбнинг Қуръонга юзланиши қийин бўлади. Қуръонга томон бурилиш фақатгина нафсини қаттиқ тергаш, ўзини мажбурлаш орқали бўлади.

Биз орзу қилган комил инсон ва баркамол авлодлар мана шундай Қуръонга муҳаббатли кишилардан чиқади. Яратган Парвардигорга минг шукрки, мана шундай инсонлар бизнинг ўлкамизда ҳали жуда ҳам кўп экан. Бундай улуғ неъматни Ҳақ таоло бардавом айласин, барча мутасаддилардан Аллоҳ таоло рози бўлсин.

Ташкилий ҳайъат томонидан Матбуот хизматига маълум қилинишича, Қуръон мусобақаси иштирокчиларини рўйхат олиш ишлари 15 январь куни якунланган. Унга кўра, жами иштирокчилари сони 5366 нафарни ташкил этган. Шундан 3263 нафар эркак 2103 нафари аёл-қиз иштирокчилар экан. Мана бу кўрсаткич ҳақиқий кутилмаган натижа, тарихий воқеа бўлди.

Мана энди кўпчилик муҳтарам Президентимизнинг Қуръон мусобақасини ўтказишга катта ташаббус кўрсатиб: “Қуръонни эшитиш, эшита олиш юксак маънавият, маърифат. Қуръон ҳеч қачон ёмонликка даъват қилмайди. Агар, Қуръони каримни эшита олсак, эшиттира олсак бу муваффаққият бўлади. Элимизга нур келади”, деб айтган гапларининг ҳикматини англаган бўлса, ажаб эмас...
Мусобақаларнинг ўтиш жараёнларини кузата туриб, мана шундай файзу баракотли кунлардан мамнун бўлган ҳамюртларимизнинг кўзлари ёш ила қўлларини дуога кўтариб, унинг шукронаси учун яратган Парвардигорга ҳамду санолар айтишаётгани, бу ишга ташаббускор бўлган Давлатимиз раҳбари, ташкилий ишларга бош бўлиб турган олиму уламоларимиз ҳаққига дуолар қилишаётганинг бевосита гувоҳи бўлдик, Яратган Парвардигорга шукр.

Азизлар барчангизнинг эътиборингизга Қуръон мусобақаси иштирокчиларининг минтақа, аёл-эркак ва йўналишлар бўйича сонини ҳавола этамиз.
Қори ва қорияларимизнинг чиқишларини жонли кузатиб, Қуръонга бўлган муҳаббатимизни янада сайқаллашга чақирамиз.

Ўзбекистон мусулмонлари идораси Матбуот хизмати

“Абражул Байт” – Саудия Арабистонининг муқаддас Макка шаҳридаги муборак “Масжидул Ҳаром” масжиди ёнида барпо этилган бино бўлиб, у баландлиги бўйича дунёдаги энг баланд бинолардан биридир.

Ушбу бинодаги соат (Makkah Royal Clock Tower) ҳам жаҳондаги энг йирик (оғирлиги 21 тонна) соат бўлиб, унинг диаметри 40 метр, дақиқа кўрсаткичининг узунлиги 22 метр, соат кўрсаткичи 17 метр. Мазкур соатни кундуз куни 12 чақирим, тунда эса 17 чақирим масофадан ҳам кўриш мумкин. Соат ҳар намоз вақти кирганда бонг уради.  

Суриялик Шади Эйд соат атрофида акс эттирилган хаттотлик намуналари муаллифидир. Шоди Ийд мазкур хаттотлик ишларини уч ойда якунлаган.

Даврон НУРМУҲАММАД тайёрлади

Жиззах ва Сирдарё вилоятларида давом этаётган Қуръони карим мусобақасининг ҳудудий босқичи энг қизғин жараёнларга кириб бормоқда. Ушбу икки заминнинг хушсурат, хушовоз, овозлари кишини ўзига ром этадиган, ёқимли қироатга эга қориларнинг чиқишлари ҳали олдинда.
Зеро, Қуръони карим Аллоҳ таолонинг Ўз пайғамбари Муҳаммад соллаллоҳу алайҳи ва салламга ваҳий орқали нозил қилган каломидир. Ҳар бир мусулмон унинг ҳайбатини қалбда ҳис қилиб, ҳурматини ўз ўрнига қўйиши лозим. Уламоларимиз оят ва ҳадисларга асосланиб, Қуръон ўқиш, тажвид қоидаларига риоя қилиш, тинглаш ва унга амал қилиш кўп фазилатли ва савобли эканини таъкидлашган. Аллоҳ таоло бу борада Ўзининг каломида шундай марҳамат қилган: “Қуръон ўқилганда уни тинглангиз ва сукут сақлангиз! Шояд (шунда) раҳм қилингайсиз!”.
Шундай экан бизни кузатишда давом этинг, ушбу икки вилоятдаги Қуръони карим қироатларини жонли тинглаб, руҳингизга қувват беринг.

Ўзбекистон мусулмонлари идораси Матбуот хизмати