Қуйида келтириладиган фикрлар, ҳикматлар сайтлардан ва ижтимоий тармоқлардаги турли саҳифалардан олиб таржима қилинган.

Саждадаги энг ажойиб нарса шуки, сиз ернинг “қулоғи”га пичирлайсиз. Сизни эса оламлар Робби эшитади.

*****

Фақирлик фақатгина пулнинг етишмовчилиги эмас. Ақлий ва ахлоқий тарбиянинг етишмовчилиги ҳам бор.

“Ховатир роқия журнали”

*****

Ҳар қанча ғазаб қилсанг ҳам, ҳар қанча адоват қилсанг ҳам, ҳар қанча ҳасад қилсанг ҳам, ҳаммадан кўпроқ ўз асабларингни еб битирасан, ўз қалбингни ёқасан ва фақат ўзингнинг ҳасанотларинг сочилиб кетади.

“Ховатир роқия журнали”

*****

Одамларнинг мақтов ва ёмонлашларидан кўра ўз амалларингга ва қалбинг ислоҳига машғул бўл! Чунки, мол ва болалар фойда бермайдиган, фақатгина Аллоҳ таолога саломат қалб билан келганларгагина фойда берадиган кунда амалларинг ҳақида сўроққа тутиласан!

“Ховатир роқия журнали”

*****

Менга ёрдам бермасанг берма, аммо менга озор берма!

Мени ёмон кўрсанг, ўзингни худди мени яхши кўрадигандек тутма!

“Ховатир роқия журнали”

*****

Шундай инсон бўлгинки, одамлар сени таниганларига афсус қилмасинлар!

“Ховатир роқия журнали”

Интернет материалларидан тўплаб, таржима қилувчи

Нозимжон Иминжонов

2020 йил 30 январь куни Тошкент шаҳридаги “Убай ибн Каъб” жоме масжидига хушхон ҳофиз Авазбек қори Давлатов имом ноиби этиб тайинланди.

Авазбек Давлатов Акбарали ўғли 1983 йил 29 июлда Андижон вилояти Марҳамат туманида зиёлилар оиласида дунёга келган. Қуръон илмини Ўш шаҳридаги Абдулмуталлиб қори дада роҳимаҳуллоҳдан олиб, Қуръони Каримни тўлиқ ёд олган. Авазбек қори 1990-1999 йилларда ўрта мактабда таълим олган. 1999-2000 йилларда «Саййид Муҳйиддин Махдум» ўрта махсус Ислом билим юрти тайёрлов курсида таълим олган. Таълим даврида мадрасанинг катта устозларидан Раҳматуллоҳ қори ака қўлларида Қуръони каримни яна қайта ўтказиб олган. 2000-2004 йилларда Имом Бухорий номидаги Тошкент Ислом институти (олий маъҳад)ни тамомлаган.

2005 йилда Саудия Арабистонида Фаҳд ибн Абдулазиз номидаги Халқаро Қуръони карим мусобақасида иштирок этиб, совринли ўринни эгаллаган.

2006-2007 йилда Дамашқдаги шайх Аҳмад Юсуф Даббонийзодадан Осим қироатининг икки ривояти бўйича Қуръони карим ижозасини олган.

Авазбек қори биринчи маротаба Андижон вилоятида хатми Қуръон қилиб, таровеҳ намозларига ўта бошлайди. Шундан сўнг 2000-2004 йилларда Тошкент шаҳар «Дўстжонбой» жоме масжидида, бир неча йил «Жўрабек» (ҳозирги Ислом ота), 2017 ва 2018 йилларда  «Ислом ота» жоме масжидида хатми Қуръон таровеҳ намозларида иштирок этган.

2019 йилда Тошкент шаҳридаги Таровеҳ намозларида ўтказилган хатми қуръонларларда қориларнинг қироати, ҳифз, тажвид, тараннум билан ўқишларини назорат қилиш ишларига жалб қилинган.

2018 йилда Ўзбекистон Республикаси президенти ташаббуси билан ўтказилган “Ўзбекистон Қуръон мусобақаси-2018”нинг барча босқичларида ҳакамлик  қилган. Аллоҳ таоло инъом этган илми ва ширали овози билан кўплаб мухлис ва устозлар муҳаббатига эришиб келмоқда.

Авазбек қори Давлатовга янги вазифада Аллоҳ таолодан куч-қувват ва муваффақиятлар тилаймиз.

Ўзбекистон Мусулмонлари идораси Матбуот хизмати

Ботинкатумшуқ – лайлаксимонлар гуруҳига мансуб бўлиб, ботинкатумшуқлар оиласининг вакили ҳисобланади.

Ботинкатумшуқ йирик қуш бўлиб, ўртача баландлиги 1.2 метрни, қанотларининг узунлиги 2.3 метрни, вазни эса 4-7 килограммни ташкил этади. Шарқий Африканинг тропик ўрмон ботқоқликларида яшаб, балиқ овлаб кун кечиради. Ёғоч поябзалга ўхшаган тумшуғи унинг балиқ овлашда моҳир уста бўлишига хизмат қилади. Бошқа қушлардан фарқли ўлароқ, ботинкатумшуқнинг кўзлари бош суягининг икки ёнида эмас, балки олди тарафида жойлашган. Бу эса унга узоқдаги нарсаларни яқинлаштириб кўриш имконини беради. Бу жониворнинг тумшуғи йирик бўлгани учун у дам олаётган пайтда тумшуғини кўкраги устига қўяди.

Бу қуш Африканинг Судан, Эфиопия, Конго, Уганда, Кения, Танзания, Замбия ва Ботсвана давлатларида ботқоқли жойларда яшайди. Унинг узун оёқлари ва кенг панжалари ботқоқлик устида бемалол юришга имкон беради. Узоқ вақт саёз сувда ҳаракатланмай тура олади. Бу қуш кун давомида ов қилади, бироқ тонгда жуда фаол бўлади. Асосан балиқлар билан, шунингдек, қурбақа, илон ва кичик тошбақалар билан ҳам озиқланади. Бошини сувга тиқиб, қимирламай, ўлжасини сабр билан кутиб туради. Бу қуш қамишзорда аста-секинлик билан юриб, ўлжасини кўрган заҳоти қанотларини кенг ёйиб, унинг ортидан юугуради, аввал тумшуғи билан қисиб олиб, кейин тумшуғи учидаги илгаги билан ўлжасини илиб олади. Овдан сўнг у ўлжани хас-ҳашак, ўсимликлардан ажратиб олади-да, кейин ютиб юборади.

Бу жонивор уясининг диаметри 2.5 метрга етади. Уя учун папирус ва қамиш пояларини ишлатади.

Бу жониворнинг насл бериш даври у яшайдиган минтақага боғлиқ. Масалан, Суданда ёмғирли мавсум тугаши билан жуфтлашиш бошланади. Бу қушнинг табиатда қандай жуфтлашиши билан боғлиқ маълумотлар жуда оз.

Беш кун ичида урғочиси 1-3 та тухум қўяди ва уни кўпинча тунда иситади. Жўжалар тахминан 30 кундан сўнг тухумдан чиқади. Улар юмшоқ, кулранг туклар билан қопланган бўлиб, тумшуқлари кичик, аммо ўткир, илгакли учга эга бўлади. Жўжалардан, одатда, биттаси омон қолади. Ота-оналари унга ярим ҳазм қилинган таом беришади. Бир ойдан сўнг ёш жўжа йирик ўлжаларни ҳам юта бошлайди. Жўжа уяда тахминан икки ой давомида қолади. Тўрт ой ўтгач эса ота-онасидан мустақил ҳолда яшай бошлайди. Бу қуш жуда ноёб бўлиб, уларнинг сони тахминан 10-15 минг атрофида.

Азизлар, Аллоҳ таоло ҳамма жонзотлар қаторида бу қушни ҳам яшайдиган муҳитига мослаб яратган. Ботқоқда эркин юра олиши учун узун оёқлар ва панжалар, ов қилиши учун катта тумшуқ, овни ушлаб туриш учун тумшуқ учида илгак, ўлжани чўчитиб юбормаслик учун сувда ҳаракатланмай туриш, қамишзорда секин юриш каби кўплаб имкониятларни яратиб берган.

Буларнинг ҳаммаси Буюк Яратувчининг барча нарсага қодир ва ўта ҳикматли Зот эканига далолат қилади.

Сўзимиз сўнггида Аллоҳ таолонинг ушбу оятини келтирсак:

هَذَا خَلْقُ اللَّهِ فَأَرُونِي مَاذَا خَلَقَ الَّذِينَ مِن دُونِهِ بَلِ الظَّالِمُونَ فِي ضَلَالٍ مُّبِينٍ

“Бу Аллоҳнинг яратганидир. Қани менга кўрсатинг-чи, Ундан бошқалар нимани яратдилар. Йўқ! Золимлар очиқ-ойдин адашувдадирлар” (Луқмон сураси, 11-оят).

Аллоҳ таоло барчамизни Ўзининг ҳидоятидан айирмасин ва хотимамизни гўзал қилсин!

Интернет маълумотлари асосида Нозимжон Ҳошимжон тайёрлади

Ўзбекистон мусулмонлари идораси жамоаси Фатво бўлими масъул ходими Сайдаралиев Саидаҳмад домланинг волидаи муҳтарамалари вафоти муносабати билан чуқур таъзия изҳор этади.

Аллоҳ таоло охират сафарига кузатилган марҳума онахоннинг барча солиҳ амалларини ўзларига ҳамроҳ айлаб, Ўз мағфиратига олсин.
Ҳақ таоло марҳуманинг яқинлари, фарзанду аржумандларига чиройли сабр бериб, бу мусибатларга ажру мукофотлар ато этсин.

Ўзбекистон мусулмонлари идораси жамоаси, уламолари, имом-домлалари ва ўқитувчи-мударрислари номидан Сайдаралиев Саидаҳмад домлага ва марҳуманинг яқинларига ҳамдардлик билдирамиз.

Жаноза намози 2020 йил 29 январь куни соат 16:30 да Фарғона вилояти Ёзёвон тумани Тошҳавуз қишлоғи Беруний кўчасида адо этилади.

Иннаа лиллааҳи ва иннаа илайҳи рожиъуун.

Ўзбекистон мусулмонлари идораси

Жорий йилнинг 14 январь куни “Озодлик” радиосининг “BUGUNUZ” расмий телеграм каналида “Маданият вазирлигидан “Вақф” жамғармасига ўтказилган 189 обида қаровсиз қолди” номли мақола эълон қилинди.

Дастлабки таассуротда ушбу мавзунинг ёритилиши юртимиздаги тарихий қадамжолар ва муқаддас зиёратгоҳларни асраб-авайлашга жонкуярлик сифатида кўринади. Аммо мақолани теранроқ мутолаа қилувчи зийрак муштарий маълумотлар фақат бир ёқлама экани, айбланаётган ташкилотнинг ёритилаётган масала бўйича изоҳлари келтирилмагани, айрим асоссиз маълумотлар мавжудлиги (мисол учун, нима сабабдан мақоладаги “баъзи бинолар ичидаги ложувард кошин ва ўймакор устунлар ғойиб бўлди” каби ҳолатларни аниқлаган мутасаддилар ёки ушбу маълумотга эга шахслар тегишли идораларга хабар бермаган) ушбу мақола айрим манфаатдор тарафнинг хоҳиш-истакларини кўзлаб ёки навбатдаги “сенсация” орқасидан обрў орттириш илинжида эълон қилинганини дарҳол англайди.

Мўътабар манбаларимизда ҳам адолатли ҳукм чиқаришда икки тарафнинг важларини тинглаш лозимлиги таъкидланади. Хусусан, “Сод” сурасининг
21-24-оятлари тафсирида Довуд алайҳиссаломнинг тавба қилишига сабаб бўлган хатоси даъвогарларнинг иккисидан баробар сўраб, муаммони аниқлаб, сўнгра ҳукм чиқармасдан, бир томоннинг гапи билан ҳукм қилиб юборгани келтирилади.

Энди мақолада келтирилган важлар юзасидан батафсилроқ маълумотлар келтирсак:

Биринчидан, Ўзбекистон Республикаси Вазирлар Маҳкамасининг 2018 йил 28 августдаги 708-сонли Фармойишида қайд этилган 189 та зиёратгоҳ Маданият вазирлигидан тўлиқ Фонд тасарруфига ўтказилмаган, балки вазирликнинг Маданий мерос департаменти ва унинг ҳудудий департаментлари баланси ва тасарруфида бўлиб, “Вақф” фондига уч томонлама ижара шартномаси асосида текин фойдаланиш учун бириктирилган.

Иккинчидан, мақоладаги “ëдгорликларга хизмат кўрсатувчи мутахассислар йўқлиги” иборасига ҳам аниқлиқ киритиш талаб этилади. Агар ушбу фикрда “моддий маданий мероснинг кўчмас мулк объектлари ҳолатини кузатиб бориш, муҳофаза ва сақланишига салбий таъсир этиши мумкин бўлган омилларни ҳамда нооқилона фойдаланилишига олиб келиши мумкин бўлган вазиятларни аниқлаш” бўйича мутахассис назарда тутилган бўлса, унда бу фаолият Ўзбекистон Республикаси Вазирлар Маҳкамасининг 2019 йил 30 мартдаги “Ўзбекистон Республикаси Маданият вазирлиги ҳузуридаги Маданий мерос департаменти фаолиятини ташкил этиш ҳамда моддий маданий мерос объектларини муҳофаза қилиш ва улардан фойдаланишга оид айрим норматив-ҳуқуқий ҳужжатларни тасдиқлаш тўғрисида”ги 265-сон қарорига мувофиқ моддий маданий мерос объектларини муҳофаза қилиш бўйича жамоатчи инспекторлар томонидан амалга оширилади.

“Вақф” хайрия жамоат фонди фаолият йўналишини эътиборга олган ҳолда, жойларда доимий штат асосида ишлайдиган санъатшунос мутахассисларга ҳам эҳтиёж мавжуд эмас. Чунки зиёратгоҳларда амалга ошириладиган реставрация ҳамда маданий мерос объектларининг тарихий-маданий қимматини асрашга доир ишлар жойлардаги инспекциялар билан келишилган ҳолда олимлар, халқ усталари, реставраторлар, экспертлар билан ҳамкорликда, меҳнат шартномаси асосида Илмий кенгаш рухсати билан ўрнатилган тартибда амалга оширилади.

Ўз навбатида таъкидлаш жоизки, ҳозирда ушбу масканлар фаолиятини самарали ташкил этиш, ҳудудни ободонлаштириш ҳамда аҳолига хизмат кўрсатиш мақсадида “Вақф” фондига бириктирилган 189 та зиёратгоҳда 
760 нафар ходим фаолият юритмоқда. Уларнинг аксарияти аввалдан зиёратгоҳларда фаолият олиб борган.

Учинчидан, “Вақф” фонди томонидан зиёратгоҳ ва қадамжоларда амалга ошириладиган ташкилий-ҳуқуқий ҳамда маданий-маърифий ишлар бўйича 2019-2023 йилларга мўлжалланган “Йўл харитаси” ишлаб чиқилган. Ушбу “Йўл харитаси” доирасида 2019 йилда зиёратгоҳ ва қадамжоларни сақлаб туриш, таъмирлаш, ободонлаштириш ва уларнинг инфратузилмасини янада ривожлантиришга ишлари учун жами 18,6 млрд сўм маблағ сарфланди. Биргина мисол, ободонлаштириш ишлари учун Самарқанд вилоятидаги “Шоҳи Зинда” мажмуасига 1 млрд 142 млн сўм, “Хўжа Дониёр” зиёратгоҳига 29,7 млн сўм вилоят бўйича 5,5 млрд сўм ҳамда Хоразм вилоятидаги зиёратгоҳларга
910 млн сўм миқдорда маблағ ажратилган.

Гўёки қаровсиз қолгани айтилаётган Бухородаги “Чор Бакр” мажмуаси ҳамда Самарқанддаги “Ҳазрати Хизр” обидаларида 2018-2019 йиллар давомида 3 млрд. сўмга яқин кенг кўламли реставрация ва ободонлаштириш ишлари амалга оширилган.

Хивадаги “Саид Муҳаммад Моҳи рўйи Жаҳон” мажмуасида сақланаётган туман ободонлаштиришга тегишли бўлган ашёларга келсак, ушбу “супургилар” айнан зиёратгоҳ Фондга бириктирилганидан сўнг ички ҳудуддан алоҳида хўжалик хонасига кўчирилган.

Тўртинчидан, Фонд мутасадди раҳбарлари хизмат ваколатларини суиистеъмол қилиб¸ фонд тасарруфидаги биноларни талон-торож қилгани ва хайрия маблағларини ўзлаштиргани ҳақидаги ёлғон иддаолари масаласида ҳам етарли раддиялар берилган эди.

“Маданият вазирлигидан “Вақф” жамғармасига ўтказилган 189 обида қаровсиз қолди” номли мақолани синчковлик билан ўқиган муштарий “Нуруллабой” саройи ҳақидаги қисмига келганда, шубҳасиз муаллифнинг мақсади нима эканини англаши қийин эмас.

Доно халқимизда “иш бор жойда камчилик бўлади”, деган гап бор. Жумладан, “Вақф” хайрия жамоат фондининг зиёратгоҳлар йўналиши бўйича фаолияти ҳам хатолардан холи эмас. Эътироф этиш керакки, Сиз азиз юртдошларимизнинг таклифларингиз, амалий саъй-ҳаракатларингиз билан ривожланиб бормоқда. Ушбу фонднинг келажаги, ривожи ҳам, шубҳасиз сизларнинг ташаббусингиз билан амалга ошади.

Сўзимиз сўнгида, турли баҳс-мунозалардан четланган ҳолда, ҳурматли муаллифга бирор муаммоли масалани кенг жамоатчиликка етказишдан аввал уни атрофлича ўрганиш, қандайдир хусуматларни четга суриб, ислоҳ учун ҳаракат қилиш манфаатли бўлишини эслатиб ўтишни лозим топдик.

Шунингдек, “Вақф” фонди ўз фаолиятини такомиллаштириш бўйича билдириладиган барча ўринли таклиф ва мулоҳазаларни мамнуният билан қабул қилишга тайёр эканини маълум қилади.

“Вақф” хайрия жамоат фонди Матбуот хизмати