Ўзбекистон ва Қозоғистон томонидан «Самарқанд – Туркистон» маршрути бўйича тезюрар поездни ишга тушириш масаласи кўриб чиқилмоқда, Бу ҳақда Қозоғистон элчиси Дархон Сотиболди «Дунё» ахборот агентлигига берган интервьюсида маълум қилган.

«Икки мамлакатнинг туристик потенциалини бирлаштиришнинг истиқболлари ёрқинроқ намоён бўлмоқда. Қўшимча равишда «Самарқанд – Туркистон» маршрути бўйича тезкор поездни ишга тушириш масаласи ишлаб чиқилмоқда. Кейинги босқичда Silk Visaни жорий этиш, бунинг оқибатида меҳмонхоналар, йўллар қуришдан тортиб то чегара пунктларида яшил коридорларни таъминлашгача умумий туристик инфратузилмани тақдим этиш масаласи кўриб чиқилади», – дейди дипломат.

Ўзбекистон мусулмонлари идораси Матбуот хизмати

«Süddeutsche Zeitung» етакчи немис газетасининг навбатдаги сонида журналист Ханс Гасернинг Ўзбекистоннинг тарихий шаҳарларига уюштирган сафари таассуротларига бағишланган мақоласи чоп этилди. Бу ҳақда «Дунё» ахборот агентлиги хабар бермоқда.

Архитектор Зоиршох Қиличевдан журналист қачонлардир Бухорода Лаби Ҳовузга ўхшаш 100 дан ортиқ ҳовузлар бўлганлигини билиб олган. «Қадимги меъморлар қайноқ қуёш тафти ва қум бўронларидан ҳимоя қилган ҳолда шаҳарни қандай қуриш кераклигини билишган», - дейилади материалда.

Фотосуратчи Шавкат Болтаевга таянган ҳолда, муаллиф бухороликларнинг ҳаёти билан яқиндан таништиради. Айниқса шаҳарда миллатлараро тотувлик ва диний бағрикенглик тарихий илдизга эгалиги алоҳида таъкидланади. Турли хил миллат, ирқ ва дин вакилларининг баргаликда тинч-тотув яшаши бунга ёрқин мисол бўлиб хизмат қилади.

Мақолада потенциал туристлар учун «Ўзбекистон ҳаво йўллари» МАК, «Ўзбекистон темир йўллари» АК хизматлари, шунингдек Ўзбекистон бўйича турларнинг ҳар хил кўринишларини таклиф этаётган ўзбек ва немис туркомпаниялари ҳақида кенг маълумотлар ҳам берилган.

Ўзбекистон мусулмонлари идораси Матбуот хизмати

102 ёшли Тайланд қироллигининг Сонгкхла вилояти Тефа туманида яшовчи Но Ланаи Ҳаж-2019 мавсумининг энг ёши улуғ зиёратчиси ҳисобланиши айтилди. Ушбу муслима шу кунларда Мадинадан Маккага ўз ўғли ҳамроҳлигида етиб келган.

islam.ru нашрига кўра, шаҳар маъмурлари ёши улуғ муслимага саломатлиги яхшилигига қарамасдан ногиронлар аравасида ҳаракатланишни, ўз кучини тежаши лозимлигини тавсия қилишди.

«PRD Thai Hajj» порталига берган интервьюсида Но Ланаи хоним узоқ вақт Ҳажга келишни режалаштирганини, бироқ нимадир охирги дақиқаларда халақит қилганини атйиб ўтган.

Но Ланаи хонимнинг айтишича, у Ҳаж зиёратининг 100 фоиз амалларини ўз кучига таяниб адо этишга ҳам руҳан, ҳам жисмонан тайёр.

Ўзбекистон мусулмонлари идораси Матбуот хизмати

Кун ўтгани сайин юртимизда диний соҳада кенг имкониятлар тобора юксалиб бормоқда. Бу Аллоҳнинг биз бандаларига, жумладан, юртимиз мусулмонларига ато этаётган улуғ неъматларидандир. Ана шундай қувонарли воқеалардан бири Навоий вилоятида янги масжиднинг очилиши бўлди.

Шу йилнинг 1 август куни Навоий вилояти Қизилтепа тумани Варозун маҳалласида «Абу Бакр Сиддиқ» номли янги жоме масжидининг тантанали очилиш маросими бўлиб ўтди.

Маросимда Ўзбекистон мусулмонлари идораси раиси ўринбосари Иброҳим домла Иномов, Навоий вилоят бош имом-хатиби Тоҳиржон Рўзиев, туман бош имом хатиби Завқиддин Орипов, туман ҳокими бошчилигидаги мутасадди раҳбарлар, имомлар, шунингдек, қишлоқ ва маҳалла фаоллари иштироки этишди.

Ўзбекистон мусулмонлари идораси раиси ўринбосари Иброҳим домла Иномов сўзга чиқиб, маҳалла аҳлини янги масжид билан қутладилар ва ушбу масжид мусулмонларнинг дуолари ижобат бўладиган, ёш авлоднинг гўзал ахлоқий фазилатлари шаклланадиган мўътабар маскан бўлишини тилаб, керакли тавсиялар бердилар, хайрли дуолар қилдилар.

Аллоҳ таоло янги масжидни қишлоқ аҳли учун, умуман, вилоят мусулмонлари учун илм-маърифат ва ахлоқий тарбия маскани бўлишини насиб этсин!

Ўзбекистон Мусулмонлари идораси Масжидлар бўлими

Олимлар югуриш спорти билан шуғулланувчилар устида узоқ йиллик изланиш ва тадқиқот олиб борганларидан сўнг мазкур спортчиларнинг тизза мускуллари жуда мустаҳкам, бақувват ва яхши ҳолатда бўлишини аниқладилар.

Инсон мунтазам равишда юриш, аниқроғи тўхтамасдан, бир маромда пиёда юриш билан шуғулланса, оёқ мускуллари мустаҳкамланишини таъкидладилар. Яна улар шуни айтишяптики, ҳар куни пиёда юриш тизза мускуллари қувватини оширибгина қолмай, балки юрак мускулларини ҳам яхшилаб, қандли диабет касаллигини муолажа қилар, қон босимининг мўътадиллашишига хизмат қилар, умуртқа поғонаси ва тизза бўғимларидаги оғриқларнинг йўқолишига ҳамда жисмнинг иммунитет тизими мустаҳкамланишига сабаб бўлар экан.

Абу Ҳурайра розияллоҳу анҳудан ривоят қилинади:

Расулуллоҳ соллаллоҳу алайҳи васаллам:

«Сизларни Аллоҳ хатоларни ўчирадиган, даражаларни кўтарадиган нарсага далолат қилайми?» дедилар. Улар:

«Албатта, эй Аллоҳнинг Расули», дейишди.

У зот:

«Қийинчиликларга қарамай, таҳоратни яхшилаб қилиш, масжидларга қадамни кўпайтириш ва намоздан сўнг намозни интизор бўлиб кутиш. Ана ўша сиз учун «муробитлик»дир», дедилар». Имом Муслим ривоятлари

Бу ҳадисда банданинг хатолари ўчирилиб, даражалари кўтарилишига сабаб бўладиган амаллар қаторида “масжидларга қадамни кўпайтириш” ҳам зикр қилинмоқда. Ҳа, масжидга бир кунда беш марта пиёда юриб борадиган одам намоз ўқиш билан бирга кунлик пиёда юриш машқини ҳам бажарган бўлади. Бу эса юқорида айтиб ўтганимиздек, кўплаб касалликларининг барҳам топишига, мускуллар ва иммунитет тизими мустаҳкамланишига сабаб бўлади.

Қолаверса, Набий соллаллоҳу алайҳи васаллам ҳайит куни масжидга пиёда борар ва масжиддан қайтишда бошқа йўлдан пиёда уйга келар эдилар. Бундай қилиш аввало суннат амал бўлса, шунингдек, тананинг саломатлиги учун ҳам айни муддаодир.

Аллоҳ таоло барчамизга Динимиз кўрсатмаларига амал қилиб, икки дунёда азизу мукаррам бўлишимизни насиб этсин!

www.kaheel7.com сайти маълумотлари асосида

Нозимжон Ҳошимжон тайёрлади