Мусулмон одам аввало аҳли суннат вал жамоат олимлари билдирганидек ишониши лозим. Жаҳаннамнинг абадий азобидан қутулувчилар эътиқоди аҳли суннат бўлган кишилардир.  

“Аҳли суннат” атамаси кўпроқ изофат ҳолида, яъни “Аҳли суннат эътиқоди ёки ақидаси”, “Аҳли суннат мазҳаби”, “Аҳли суннат йўли”, “Аҳли суннат фирқаси”, “Аҳли суннат ва жамоат фирқаси” шаклида ишлатилади.

Энг улуғ олим ва авлиёлардан имоми Раббоний Мужаддиди Алфи Соний Аҳмад Форуқий Сарҳандий (қуддиса сирруҳ) айтдики:

“Ақлли ва балоғатга етган ҳар эркак ва аёлнинг биринчи вазифаси аҳли суннат олимлари ёзган ақоид билимларини, ишониладиган нарсаларни ўрганиш ва буларга мос эътиқод қилишдир. Қиёматда, яъни ўлганидан кейин жаҳаннам азобидан қутулиш, уларнинг билдирганларига ишонишга боғлиқ” [Мактуботи Раббония].

“Мусулмонларнинг биринчи вазифалари эътиқодини тўғрилаб, аҳли суннат вал жамоат олимларининг билдирганларига мос ишонишдир. Иккинчи вазифаси фиқҳ (исломиятнинг амр ва тақиқларига оид) илмларни ўрганиб, ҳар ишини буларга мослаб бажаришдир” [Мавлоно Ҳолид-и Бағдодий, Эътиқоднома/ал-иймон вал-ислом].

Қийматли Усмоний олимларидан Тошкўприкзоданинг айтганидек:

“Аҳли суннатнинг ақоидда иккита тармоғи бор. 1. Мотуридия мазҳаби. Унинг имоми Абу Мансур Мотуридий (раҳимаҳуллоҳ). 2. Ашъория мазҳаби. Бунинг имоми эса Абул-Ҳасан Ашъорийдир (раҳимаҳуллоҳ). Иккаласи ҳам тарғиб қилган иймон асослари бирдай. Ораларида фақат баъзи кичик хусусларга тегишли изоҳ, ифода ва услуб тарзидан келиб чиққан жузъий фарқлар бор”.

“Аллоҳу таоло юборган ҳар бир дин икки қисмдан ташкил топган. Бири қалб билан ишонилиши лозим бўлган илмлар, иккинчиси бадан ёки қалб билан бажариладиган ибодат илмлари. Булардан эътиқод асослари ҳар бир динда бир хил бўлиб диннинг асли ва асосидир. Эътиқод дин дарахтининг танасидир. Амал эса, шу дарахтнинг шохлари ва барглари кабидир. Ҳар бир мусулмоннинг аввало эътиқодини тузатиши, аҳли суннат вал жамоат олимлари билдирганидек ишониши лозим. Жаҳаннамнинг абадий азобидан қутуладиганлар фақат мана шу эътиқодда бўлганлардир” [Имоми Раббоний, Мактуботи Раббония].

“Қалбга келадиган бутун маънавий аҳвол/ҳолларни, кашфларни бизга берсалар, лекин қалбимизни аҳли суннат эътиқоди билан безатмасалар, ўзимни хароб бўлган деб биламан. Бутун фалокатларни устимга тўпласа-ю, лекин қалбимни аҳли суннат эътиқоди билан шарафлантирса, ҳеч қайғурмайман” [Хожа Убайдуллоҳ Аҳрор].

ahlisunnat.uz

Иннаа лиллааҳи ва иннаа илайҳи рожиъун!

Ўзбекистон Мусулмонлар идораси, барча масжидлар имом-хатиблари, ноиб имомлар Зангиота тумани "Фатҳ" жоме масжиди имом ноиби Солихон домла Ортиқхўжаевнинг оталари Маҳкамхўжа ҳожи домлани вафоти муносабати билан уларнинг оила аъзоларига чуқур таъзия изҳор этамиз.

Аллоҳ таоло марҳум домлани Ўз раҳматига олиб, охиратини обод қилсин, маконини жаннатлардан айласин. Бу дунёда қилган барча хайрли ва эзгу ишларини бошига соябон, охиратига захира қилсин.

Бугун 23 август куни Ўзбекистон халқаро ислом академиясида «Қуръони Карим ва тажвид» ўқув курсининг очилиш маросими бўлиб ўтди.

Маросимни Ўзбекистон халқаро ислом академияси ректори, Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита раисининг биринчи ўринбосари Музаффар Комилов очиб берди. У «Қуръони Карим ва тажвид» ўқув курсининг ўқув дастури тайёрланганини ва бу ўқув курсида билимли, ижозали устозлар таълим беришини эълон қилди.

Шунингдек, Ўзбекистон мусулмонлари идораси раисининг биринчи ўринбосари Ҳомиджон домла Ишматбеков бугун юртимиз мусулмонларининг узоқ кутган орзулари ушалиш арафасида турганини таъкидлади. Жумладан, Ҳомиджон домла Қуръонни тажвид билан ўқиш фарз эканига урғу бериб, ушбу янги очилаётган ўқув курси ҳам мазкур фарз ибодатни бажаришда бизга кўмакчи бўлишини таъкидлади.

Тадбирда сўзга чиққан Тошкент ислом институти ректори Уйғун домла Ғофуров давлатимиз томонидан Қуръон таълимига катта эътибор қаратилаётганлигини, юртимиздаги 17 та «Қуръони Карим ва тажвид» ўқув курсларида 18 мингдан ортиқ тингловчилар Қуръонни тўғри ўқиш малакасига эга бўлишганини айтиб ўтди.

Шунингдек, тадбирда Ўзбекистон мусулмонлари идораси қошидаги «Қуръони Карим тажвидини ўргатиш» бўлими бошлиғи ўринбосари Ўзбекистон халқаро ислом академияси фахрий доктори Аброр Мухтор Али домла Жиззах ва Фарғона вилоятларида жами 4 та «Қуръони Карим ва тажвид» ўқув курслари очилиши ҳақида маълум қилди.

Тадбирнинг фахрий меҳмони профессор Абдулҳаким Шаръий Жузжоний ҳам сўзга чиқди. Абдулҳаким домла тадбир иштирокчиларини табриклаб, Қуръоннинг мазмун-моҳияти мўжизакорлиги, илм-фан билан ҳамоҳанглиги, араб тилининг яхлитлигини сақлаб туриши ҳақида қимматли маълумотларни тақдим қилди.

Тадбир жараёнида Ўзбекистон халқаро ислом академияси «Қуръони Карим ва тажвид» ўқув курсида таълим берадиган устозлар тингловчиларга таништирилди.

Маросим сўнггида янги очилган ўқув курсининг келгусидаги фаолиятига муваффақиятлар тилаб, дуои хайрлар қилинди.

Испаниянинг “Реал Мадрид” жамоаси собиқ бош мураббийи, дунёнинг энг машҳур мусулмон футболчиларидан бири Зайниддин Зидан Жазоирга мамлакатдаги охирги ёнғинлардан кейин молиявий ёрдам кўрсатди, деб хабар беради Shoot Africa.

Ёнғинлар пойтахт Жазоир шаҳрининг шарқида жойлашган Кабилия минтақасида содир бўлган. Оммавий ахборот воситаларининг хабар беришича, Зидан зарарни бартараф етиш учун икки миллион евро (ҳозирги ҳисоб бўйича 24 847 920 000 сўм) хайрия қилган. Ёнғин оқибатида камида 65 киши ҳалок бўлган.

Маълумот учун, Зиданнинг ота-онаси Кабилияда яшаган, лекин уруш бошланганда Парижга кўчиб ўтган. Бироз вақт ўтгач, оила Марсел чеккасидаги Ла Кастелланга кўчиб ўтди. У ерда Жазоирнинг кўплаб маҳаллий аҳолиси яшаган. Зидан футболчилик фаолиятини шу ерда бошлаган.

Зайниддин Зидан – машҳур футболчи, Франция терма жамоасининг собиқ етакчиси, дунёга машҳур спортчи ва айни пайтда мусулмон диндори саналади. Интервьюлардан бирида журналистнинг у диндорми ёки йўқлиги ҳақидаги саволига Зайниддин Зидандан ҳотиржам ва тўғридан-тўғри: “Ҳа, мен мусулмонман. Мен яратган яккаю ягона Аллоҳга ишонаман”, дея жавоб берди.

ЎМИ Халқаро алоқалар бўлими

Яна бир неча кунлардан сўнг юртимизда Мустақиллик байрами катта тантана қилинади. Ўзбекистон Республикаси ўз истиқлолини қўлга киритганининг 30 йиллигини кенг нишонлаш мақсадида республикамизнинг барча ҳудудларида турли объектлар фойдаланишга топшириляпти.

Тошкент вилоятида ҳам айём арафасида маданий-маърифий соҳа объектлари қатори масжидлар ҳам мўмин-мусулмонлар ихтиёрига топшириляпти.

– Тўйга тўёна билан бориш халқимизга хос қадим қадриятдир, – дейди Тошкент вилояти бош имом-хатиби Жасурбек домла Раупов. – Аллоҳ таолонинг инояти билан, Мустақиллик байрами арафасида Бўка туманидаги “Оқсоқ ота” жоме масжидини фойдаланишга топшираётганимиздан беҳад шодмиз. Сўнгги йилларда намозхонлар сони ошиб, эски услубда қурилган масжидларимиз торлик қилиб қолаётган эди. Шу боис мазкур масжидни ҳомийлар ва саховатпеша тадбиркорлар кўмагида қайта қурдик. Иншоаллоҳ, бу жоме кўп йиллар мўмин-мусулмонларга хизмат қилади. Масжид очилишида Тошкент вилояти бош имом-хатиби ўринбосари Зиёвуддин домла Нортожиев ҳамда Бўка тумани ҳокими Аббосов Низомиддин ҳам қатнашганлари намозхонларни мамнун қилди.

Масжиднинг эски биноси 150 кишига мўлжалланган эди. Ёмғирли, қорли-қировли кунларга тўғри келадиган жума ва иккала ҳайит байрамида намозхонлар ибодат қилиш учун қийналиб қолишаётгани ҳам ҳақиқат эди. Янги жоме ўз бағрига 300-400 кишини сиғдира олади.

Масжидга иссиқ пол ётқизилди. Эндиликда совуқ кунларда намозхонлар мазза қилиб ибодатларни бажаришади. Яна бир муҳим жиҳат. Йўловчиларга қулайлик яратиш мақсадида масжиднинг янги биноси эксисидан 200-300 метр нарига, яъни катта йўл бўйига кўчирилди. Эндиликда сафарга чиққан юртдошларимиз бу зиё масканига кириб, ҳузур билан Аллоҳ таолога илтижолар қилишади.

Олдинги масжиднинг таҳоратхонаси йўқ эди. Янги масжидга мос тарзда замонавий таҳоратхона ҳам қурилди. Оқова сув тармоғига уланган таҳоратхонада бир вақтнинг ўзида 10-12 киши покланиши мумкин.

Аллоҳ таоло бу масжидни Ўзининг обод байтларидан қилсин. Жоменинг қурилишига ҳисса қўшган барча азизларимизга ният ва ихлосларига яраша улуғ ажрлар ато этсин.

Тошкент вилоят вакиллиги матбуот хизмати