8 апрель куни Теҳронда талабалар ўртасида олтинчи халқаро Қуръон мусобақасига бағишланган матбуот анжумани ўтказилди.

Iqna хабарига кўра, матбуот анжуманида сўзга чиққан Эрон таълим вазири ўринбосари Али Ризо Козимий халқаро Қуръон мусобақаси мамлакатдаги энг катта маданий тадбир эканини таъкидлади. "Бу ҳафта 36-Қуръон мусобақаси вақфлар ва хайрия ишлари ташкилоти раҳбарлигида остида бўлиб ўтади ва у билан бир пайтда талабалар ўртасида олтинчи халқаро Қуръон мусобақаси ҳам ўтказилади", деди у.

Унинг сўзларига кўра, ушбу мусобақаларнинг энг муҳим жиҳатларидан бири талабаларни таниқли Қурон карим ҳофизлари ва арбоблари, Қуръон каримни қироат билан ўқиш ва ёд олиш усуллари билан таништиришдир. Козимийнинг таъкидлашича, бу йилги мусобақалар “Бир китоб, бир уммат” шиори остида бўлиб ўтади.

“Бу ислом умматининг биродарлиги ва бирлигини англатади. Мусобақанинг илк босқичида аниқ квоталарга мувофиқ, 34 мамлакатдан 105 нафар талаба Қуръон тиловатлари ёзилган ўз файлларини котибиятга Интернет орқали йўллади. Ироқ, Сурия, Иордания, Афғонистон, Жанубий Африка, Танзания, Қозоғистон, Қирғизистон каби 21 мамлакатдан 31 талаба мусобақанинг Қуръон тиловати ва ҳифзи номинацияларида яримфинал ва финал босқичларига чиқишди”, - дейди Козимий.

11 нафар йигит талабалар ва 11 нафар қиз талабалар ҳифз номинациясида, 9 нафар йигит талабалар тиловат номинациясида 9-14 апрель кунлари иштирок этишади.

Ўзбекистон мусулмонлари идораси Матбуот хизмати

Ўзбекистон билан Германияни 5 минг километрлик масофа ажратиб турган бўлса-да, икки халқнинг тинч ва фаровон ҳаётга интилиши, тараққиётга хизмат қиладиган муштарак ғоялари, меҳнаткаш ва олижаноб инсонлари ҳар қанча олис масофаларни яқин қилишга, бир қарашда мураккабдек туюлган вазифаларни ҳал этишга қодир. Ўзбекистон Республикаси Президентининг 2019 йил январь ойида Германияга амалга оширган расмий ташрифи икки мамлакат ўртасидаги ишончли алоқаларни янада мустаҳкамлаб, уларни янги босқичга олиб чиқди.

Ўзбекистондаги Ислом цивилизацияси маркази ва Имом Бухорий халқаро илмий-тадқиқот марказининг исломшунос, шарқшунос олимларидан иборат делегация Германия пойтахти Берлин шаҳрида кўҳна қитъанинг нуфузли университетлари, илмий марказлари, музей ва қўлёзма фондларида учрашув ва мулоқотлар ўтказмоқда. Сафардан кўзланган мақсад икки мамлакатнинг исломшуносликка ихтисослашган таълим ва илмий тадқиқот муассасалари ўртасида ўзаро манфаатли алоқаларни йўлга қўйиш, буюк аллома аждодларимизнинг Германияда сақланаётган нодир асарларини ўрганиш, ҳамкорликда конференциялар, илмий семинарлар ташкил этишдан иборат.

Берлин эркин университетининг Ислом тадқиқотлари институтида ўтказилган учрашув ўзбекистонлик ва немис исломшунос олимлари ҳамкорлигига тамал тошини қўйди.

Таъкидлаш лозимки, Берлин эркин университети Германиянинг энг нуфузли 4 та олий ўқув юртидан бири ҳисобланади. Бу ерда 35 мингга яқин талаба ижтимоий-гуманитар ва табиий фанлардан таҳсил олади. Германиянинг шуҳрати, обрў-эътиборини оширган Герхард Эртль, Герта Мюллер, Райнхард Зелтен сингари Нобель мукофоти совриндорлари, кўплаб таниқли олимлар, давлат ва жамоат арбоблари Германия эркин университетининг ўқитувчи ва талабаларидир.

Германиялик мутахассислар Ўзбекистон тараққиётининг янги босқичида халқимизнинг кўп асрлик диний қадриятлари, бой илмий меросини асраш, тадқиқ этиш ва кенг жамоатчиликка етказиш бўйича амалга оширилаётган ислоҳотларни юқори баҳолади. “Ислом илмлари ривожида, айниқса, ҳадисшуносликнинг шаклланиши ва мукаммал фан соҳасига айланишида, ҳеч шубҳасиз, Марказий Осиё уламоларининг ўрни беқиёс. Ўзбекистоннинг бой маданий мероси, бу ерда сақланаётган қадимий қўлёзмалар дунёнинг турли чеккаларидан шарқшунос олимларни ўзига чорлайди”, - дейди исломшунослик фанлари доктори, профессор Конрад Хиршлер.

Мулоқотда дунёнинг турли чеккаларида дин номидан содир этилаётган нохуш ҳолатлар, муросасизлик ва жаҳолатга қарши туришда Ўзбекистонда амалга оширилаётган янги лойиҳалар – Ислом цивилизация маркази, Имом Бухорий халқаро илмий-тадқиқот марказининг ўрни ва аҳамияти юқори экани қайд этилди.

Берлин эркин университетининг Ислом тадқиқотлари институти билан ўқитувчи ва тадқиқотчилар алмашинувини йўлга қўйиш, германиялик исломшунос олимларни Ўзбекистонга жалб этиш, ўқувлар ташкил қилиш, махсус PhD дастурларни амалга ошириш бўйича келишувларга эришилди.

Ўзбекистонда малакали исломшунос олимлар тайёрлашга катта эътибор қаратилаётган бугунги шароитда эришилган ушбу келишувлар муҳим аҳамиятга эга.

Ўзбекистон мусулмонлари идораси Матбуот хизмати

Кеча, 9 апрель куни Имом Бухорий номли Тошкент ислом институтида ушбу олий таълим муассасаси талабалари ўртасида «Қуръон мусобақаси-2019» кўрик-танловининг институт босқичи ўтказилди.

Мусобақанинг саралаш босқичида 20 нафардан ортиқ қорилар иштирок этган.

Республика миқёсида ўтказиладиган мусобақага йўлланма берувчи “Қорилар мусобақаси”нинг саралаш босқичини Тошкент Ислом институтида ўтказиш анъанага айланган.

Институтнинг “Таҳфизул-Қуръон” кафедраси ташаббуси билан Қуръони каримнинг “ҳифз”(яъни, Қуръонни тўлиқ ёд олганлар) ҳамда “тиловат” (яъни, Қуръонни тўғри, гўзал ва равон ўқиш) йўналишларида “Қорилар мусобақаси” ўтказилди.

Мусобақани қуйидаги ҳакамлар ҳайъати баҳолаб борди: ТИИ “Таҳфизул-Қуръон” кафедраси мудири: Жаҳонгир қори Нематов, “Таҳфизул-Қуръон” кафедраси ўқитувчилари: Валихон қори Азимбоев, Муроджон қори Кабиров, Абдулбосит қори Қобилов, “Кўкалдош” ўрта махсус ислом билим юрти ўқитувчиси Жасур қори Кулбоев.

Мусобақа якунига кўра қуйидаги талабалар ғолиб деб топилдилар:

“Ҳифз” йўналишида мутлоқ ғолиб:
Ҳайитбоев Муҳаммадали (4 курс);

“Ҳифз” йўналиши 18-25 ёш:
1-ўрин: Тожиддинов Ҳабибуллоҳ (3 курс);
2-ўрин: Ҳомидов Муҳаммадюсуф (1 курс);
3-ўрин: Иззатуллаев Файзуллоҳ (2 курс).

“Ҳифз” йўналиши 25-40 ёш:
1-ўрин: Ҳайитбоев Муҳаммадали (4 курс);
2-ўрин: Ходжалиев Ёдгор (2 курс);
3-ўрин: Отахонов Адҳам (3 курс).

“Тиловат” йўналиши 18-25 ёш:
1-ўрин: Абдураҳмонов Муҳаммадюсуф (4 курс);
2-ўрин: Ҳомидов Ҳикматуллоҳ (1 курс);
3-ўрин: Муҳаммадсолиев Сайфуллоҳ (3 курс).

“Тиловат” йўналиши 25-40 ёш:
1-ўрин: Тўрақулов Иброҳим (1 курс);
2-ўрин: Абдураҳмонов Шерзод (2 курс);
3-ўрин: Шарипов Назар (3 курс).

Мусобақа сўнгида ғолиблар институт томонидан дипломлар ва қимматбаҳо совғалар билан тақдирланди.

Тадбир охирида юртимиз тинчлиги ва тараққиёти, халқимиз фаровонлигини сўраб дуойи хайр қилинди.

Ўзбекистон мусулмонлари идораси Матбуот хизмати

Айни кунларда Саудия Арабистонининг Жидда шаҳрида Ислом бирдамлиги спорт федерациясининг навбатдан ташқари Бош Ассамблеяси бўлиб ўтмоқда. Бу ҳақда ЎзА хабар берди.

Ушбу йирик анжуман доирасида ташкилотга янги президент сайлаш кун тартибининг асосий масаласи эди. Сайлов натижаларига кўра, 2019-2021 йиллар учун ташкилот президенти лавозимига шаҳзода Абдулазиз Бин Турки Ал Файсал Ал Сауд сайланди.

Ассамблеяда сайловдан ташқари, Миллий олимпия қўмиталари ва Халқаро спорт федерациялари ўртасида қатор соҳаларни биргаликда ривожлантириш, ҳамкорлик алоқаларини мустаҳкамлаш чора-тадбирлари бўйича музокаралар олиб борилди. Унда Ўзбекистон номидан Миллий олимпия қўмитаси Бош котиби Жасур Матчанов иштирок этаяпти.

Биз учун аҳамиятлиси, ўзбек халқининг миллий спорти ҳисобланмиш Кураш эндиликда Ислом бирдамлиги спорт ўйинлари дастурига киритилади. Қувонарлиси, Кураш тобора кўплаб комплекс спорт мусобақалари дастурига кириб бормоқда.

Дастлаб 2017 йили Туркманистоннинг Ашхобод шаҳрида бўлиб ўтган Жанг санъати ва ёпиқ иншоотлардаги V Осиё ўйинлари, кейинчалик ўтган йили Индонезияда ўтказилган XVIII ёзги Осиё ўйинлари дастурига кирган Кураш эндиликда Ислом бирдамлиги спорт ўйинлари оиласи сафидан жой олади.

Осиё ўйинларида Кураш бўйича 7 вазн тоифасида медаллар жамланмаси ўйналган эди. Яқинда Осиё Олимпия кенгаши президенти Шайх Аҳмад Ал-Фаҳад Ал-Сабах ҳамда Халқаро кураш ассоциацияси президенти, Осиё ўйинлари департаменти директори Хайдар Фармоннинг юртимизга ташрифи ва Ўзбекистон Миллий олимпия қўмитаси президенти Умид Аҳмаджонов билан ўтган учрашувидан сўнг 2022 йилги Осиё ўйинларида кураш бўйича 15та медаллар жамланмаси ўйналиши борасида келишувга эришилганди.

Ўзбекистон мусулмонлари идораси Матбуот хизмати

Аллоҳ таоло ҳар бир эркакка оила раҳбарлигини берган. У Зот Қуръони Каримда шундай марҳамат қилган:

الرِّجَالُ قَوَّامُونَ عَلَى النِّسَاء بِمَا فَضَّلَ اللّهُ بَعْضَهُمْ عَلَى بَعْضٍ وَبِمَا أَنفَقُواْ مِنْ أَمْوَالِهِمْ

“Аллоҳ баъзиларини баъзиларидан устун қилгани ва молларидан сарфлаганлари учун эркаклар аёлларга раҳбардирлар” (Нисо сураси, 34-оят).

Уламоларимиз айтишадики, бу раҳбарлик зулм раҳбарлиги эмас, истаган пайтда истаган буйруқ бериш, аёли ва фарзандларининг хоҳлаган жойига уриш раҳбарлиги эмас, балки хизмат, устозлик, шароит қилиб бериш ва ҳимоя раҳбарлигидир. Зеро Пайғамбаримиз соллаллоҳу алайҳи васаллам муборак ҳадиси шарифларидан бирида: «Қавмнинг саййиди (бошлиғи) уларнинг хизматчисидир» деганлар. Абу Абдурроҳман ас-Суламий ривояти.

Масжид имоми масжид қавмига хизмат қилади. Намозхонларнинг таҳорат олишлари, хотиржам намоз ўқишлари учун зарур бўлган шароитларни тайёрлайди, шу ишга бош бўлади. Масжиднинг иссиқ-совуқ сувларига, хонақоҳдаги гиламларнинг тозалигига эътибор беради.

Корхона раҳбари ходимларига хизмат қилади, уларнинг қулай меҳнат қилишларига шароит қилиб бериб, техника хавфсизлиги қоидаларига амал қилишларини назорат қилади. Уларга ҳалолликни, омонатдорликни, садоқатни эслатиб, улар учун қайғуради.

Хонадон бошлиғи бўлган эркак оила аъзоларига хизмат қилади. Уларнинг эҳтиёжларини қондиришга, керакли нарсаларини олиб беришга уринади. Дунё ва охирати учун зарур нарсалар билан таъминлайди. Аёли ва фарзандлари бемор бўлсалар, уларни шифокорга кўрсатиб, дори-дармон олиб бериб, муолажаси учун елиб-югуради. Илм-маърифатли бўлишлари, Аллоҳни, Пайғамбарни, Қуръонни, Динни танишлари, ўрганишлари учун барча керакли китобларни, таълимга йўналтирилган дискларни олиб беради. Билмаган нарсаларини ўргатади. Оиладаги раҳбарлик мана шундай бўлади. Шунингдек, оила аъзоларининг диний кўрсатмаларга мувофиқ ҳаёт кечиришларини назорат қилиш, буни йўлга қўйиб бориш ҳам оила раҳбарининг вазифаси ҳисобланади.

Чунки, Аллоҳ таоло Қуръони Каримда шундай марҳамат қилган:

يَا أَيُّهَا الَّذِينَ آمَنُوا قُوا أَنفُسَكُمْ وَأَهْلِيكُمْ نَاراً وَقُودُهَا النَّاسُ وَالْحِجَارَةُ عَلَيْهَا مَلَائِكَةٌ غِلَاظٌ شِدَادٌ لَا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ

“Эй иймон келтирганлар! Ўзингизни ва аҳли аёлингизни ёқилғиси одамлару тошдан бўлган ўтдан сақланг. Унинг тепасида қўпол, дарғазаб фаришталар бўлиб, улар Аллоҳнинг амрига исён қилмаслар ва нимага буюрилсалар, шуни қилурлар” (Таҳрим сураси, 6-оят).

Хўш, дўзах оловидан ўзни ҳам, уларни ҳам сақлаш қандай бўлади? Албатта, дўзахдан узоқлаштирадиган ва жаннатга яқинлаштирадиган амалларни ўргатиш, шуларни ўрганишга шароит қилиб бериш билан ва ўрганганларига қанчалик амал қилишларини назорат қилиш билан бўлади.

Аёлимизнинг авратлари очиқ-ёпиқлигига жавоб берувчи ҳам, фарзандларимизнинг хулқу атворига ҳисоб берувчи ҳам оиланинг раҳбари бўлган биз эркаклардир.

Ушбу оятда Аллоҳ таоло дўзахнинг ёқилғиси одамлар ва тошлардан иборат эканлигини баён қилмоқда. Демак, ўша ёқилғиларнинг бири бўлиб қолмаслик учун ўзимиз ҳам дўзахдан узоқлаштирадиган ва жаннатга яқинлаштирадиган амалларни қилиб бориб, фарзандларимизга ҳам шуларни таълим берайлик!

Ўғлимиздан: “Усома ибн Зайдни танийсанми?” деб сўрайлик. Агар ўғлимиз “У одам қайси футбол командасида ўйнайди, дада?” деса, ўзимизга қабр кавласак ҳам бўлади.

“Усома ибн Зайд буюк саҳобий Зайд ибн Ҳориса розияллоҳу анҳунинг ўғли бўлганлар. Пайғамбаримиз соллаллоҳу алайҳи васаллам Зайдни ҳам, унинг ўғли Усомани ҳам жуда қаттиқ яхши кўрганлар. Унинг онаси Умму Айман Пайғамбаримиз соллаллоҳу алайҳи васалламнинг энагалари бўлган.  Набий соллаллоҳу алайҳи васаллам у аёлни тақдирлаб, «У онамдан кейинги онам. Аҳли байтимнинг қолгани», дер эдилар. У зот алайҳиссалом Усома ҳақида «Аҳлимнинг менга энг маҳбуби, батаҳқиқ, Аллоҳ унга инъом берган ва мен ҳам унга инъом берган шахс, Усома ибн Зайддир», деганлар” деб фарзандларимизга ўргатайлик!

Ўзимиз билмасак, шу каби тарихий воқеалар ёзилган Ислом тарихига оид китобларни сотиб олиб берайлик! Масалан, “Оламларга раҳмат Пайғамбар”, “Тарихи Муҳаммадий”, “Расулуллоҳ соллаллоҳу алайҳи васаллам”, “Сиз Пайғамбарни кўрганмисиз?”, “Ислом тарихи”, шунингдек, намозга оид “Мўминнинг меърожи”, “Мен ҳам намоз ўқийман”, тарбияга оид “Оилада фарзанд тарбияси” каби китобларни олиб бериб, намозни, динимиз тарихини, тарбия борасидаги қимматли маълумотларни, бу дин бизгача етиб келгунича кимлар жон фидо этганини ўзимиз ўрганиб, фарзандларимизга ҳам ўргатайлик! Шу каби илмий-маърифий китобларни олиб берсак улкан савобга эришамиз, бордию олиб бермасак, Аллоҳ таолонинг олдида гуноҳкор, фарзандларимиз олдида жиноятчи бўламиз.

Дўсту улфатлар билан 20-30 минг сўмга овқатланишни биламиз. Аммо 15-20 минг сўм турадиган бу китобларни олиб беришга келганда ўйланиб қоламиз, пулимиз кўзимизга кўриниб кетади. Ваҳоланки, шу китоблар ўзимизнинг ҳам, оила аъзоларимизнинг ҳам дунёю охиратларига фойдадир. Қилинган тушликнинг фойдаси эса икки-уч соатдан у ёғига ўтмай ҳазм бўлиб кетади.

Биз шу ейилган таомнинг қувватини гуноҳ, маъсиятларга ишлатиб қўйишимиз ҳам мумкин. Аммо китоблар ҳеч қачон гуноҳга ишламайди. Аксинча, фарзандларимизнинг бахту саодати, келажакда баркамол инсон бўлиши учун хизмат қилади. Олиб берилган китоблар токи ўқиб, фойдаланиб турилар экан, сизу бизнинг вафотимиздан кейин ҳам қабримизга унинг ажридан келиб туради.

Пайғамбаримиз соллаллоҳу алайҳи васаллам шундай деганлар: “Агар инсон вафот этса, амаллари тўхтайди. Фақатгина учта ишдан, садақаи жориядан ёки фойдали илмдан ёки унинг ҳаққига дуо қиладиган солиҳ фарзанддан унга савоб бориб туради” (Имом Муслим ривояти).

Биз олиб берган китоблар бу ҳадисдаги учта ишни ҳам ўз ичига олади. Аввало у сиздан садақаи жория бўлади, қолаверса, у сизнинг қолдирган илмингиз бўлади. Сўнггида эса ўша китобларни ўқиган фарзандларингиз дуо қилишни, вафот этганлар ҳақига истиғфор айтишни ўрганади. Улар сизу бизнинг ҳам ҳақимизга дуойи хайрлар қилади.

Азизлар, шунинг учун фарзандларимизга китоб олиб берайлик, оиладаги раҳбарлигимизни унутиб қўймайлик, охиратда ўзимиз учун ҳам, улар учун ҳам жавоб беришимиз эсимиздан чиқиб қолмасин! 

Аллоҳ таоло бу борада барчамизга Ўзи куч-қувват, ёрдам, ҳиммат, ғайрат ва енгиллик берсин, омин!

Нозимжон Иминжонов тайёрлади