Ўзбекистон мусулмонлари идораси раиси, муфтий Усмонхон АЛИМОВ ҳазратларининг бевосита ташаббуслари ва умумий таҳрирлари остида «Вабо – инсонлар учун бир синов» номли янги китоб нашрдан чиқди...

Аллоҳ таоло инсониятни иродали ва қатъиятли қилиб яратган. Одамзот ҳар қандай вазиятга кўникиши, ҳар турли бало-офат, ўлат ва мусибатни осонликча енгиб ўтиши мумкин. Илло, бунинг ҳам ўзига яраша шартлари бор. Аввало, табиийки, бу борада Аллоҳ таолонинг каломига, суюкли Пайғамбаримизнинг суннатларига, улуғларнинг ҳаётий тажрибаларига эргашилади. Энг муҳими, жорий этилган қатъий қоидаларга риоя қилиш шарт.

Хабарингиз бор, орадан беш ойдан зиёдроқ вақт ўтган эса-да, ҳануз бутун дунё коронавирус инфекциясига қарши кураш олиб боряпти. Қатъий чоралар қўлланиши туфайли бу бало бироз чекинган бўлса-да, бироқ карантин талаблари юмшатилиши билан бу офат яна дарровбўй кўрсата бошлаяпти.

Сўз исботи билан гўзал. Жорий йил 9 июнь, соат 23:00 ҳолатига кўра, дунё миқёсида ушбу инфекцияга чалинганлар сони 7 миллион 265 минг нафардан ошиб кетди. Ўлат 411 минг нафардан зиёд кишининг ёстиғини қуритди.
Мамлакатимизда эса 4520 киши ушбу касалликни юқтириб олган.

Сўнгги кунларда юртдошларимиз карантин қоидаларига риоя қилишда сусткашликка йўл қўйишаётгани оқибатида аҳоли орасидан ҳам касалланганлар аниқланяпти. Бу ташвишланарли ҳол, албатта. Юқорида келтирилган рақамлар шунчаки сонлар эмас, балки улар ортида қанчадан-қанча маъсум инсонларнинг, муштипар кексаларнинг, бегуноҳ гўдакларнинг тақдири бор.

Бутун дунё халқлари коронавирусга қарши вакцина ишлаб чиқиш учун бор куч-ғайратини, маблағини сафарбар қилаётган, тиббиёт ходимлари ҳафталаб, ойлаб лабораториялардан чиқмай, изланишлар олиб бораётган бир пайтда муфтий Усмонхон Алимов ҳазратлари бошчилигида Ўзбекистон мусулмонлари идораси томонидан, таъбир жоиз бўлса, коронавирусга қарши “маънавий вакцина” ишлаб чиқилди.

...«Вабо – инсонлар учун бир синов» китоби шуниси билан аҳамиятлики, ундан ўқувчи “Коронавирус қандай касаллик?”; “Пандемия нима?”; “Вабо рўй берса, қандай йўл тутиш керак?”; “Тарихимиздаги даҳшатли ўлат қандай даф этилган?” каби саволларга ҳам диний, ҳам тиббий, ҳам замонавий жиҳатдан аниқ жавоблар олади.

Бир мавзуни ўз вақтида, батафсил, ҳар жиҳатдан очиб берган асар қўлма-қўл мутолаа қилинади, дейишади. Ҳақ гап. Ушбу асарнинг аҳамияти шундаки, унда Ўзбекистон мусулмонлари идораси Уламолар кенгашинин коронавирус (COVID-19) инфекция тарқалишининг олдини олиш бўйича Фатвоси ҳам ўрин олган. Буни бугунги шароитда ҳар бир мўмин-мусулмон киши ўқиб билиб олиши шарт.

Иссиқ жонни иситмасиз, ҳаётни ўлимсиз тасаввур қилиш қийин. Бундай вазият (коронавирус инфекция туфайли жорий этилган карантин)га илк марта дуч келяпмиз (бошқа дуч келмайлик, иншо Аллоҳ). Бундай пайтда жаноза ва дафн маросимлари қандай ўтказилади? Мабодо, коронавирус инфекциясини юқтириб олган бемор вафот этса, у қандай дафн этилади?

Албатта, бундай саволлар бошига шундай иш тушган кишиларни ўйлантириши табиий. «Вабо – инсонлар учун бир синов» китобида ана шу ва бошқа муҳим саволларга жавоб топишингиз мумкин.

Хуллас, мутолаа муҳибларининг китоб жавонлари яна бир дурдона – «Вабо – инсонлар учун бир синов» китобибилан бойийдиган бўлди.

Янги асар Ўзбекистон мусулмонлари идорасига қарашли янги очилган “Шамсуддинхон Бобохонов босмахонаси” масъулияти чекланган жамиятида чоп этилди. Китобга А.Хўжамов, Т.Низомов, Ж.Шодиев муҳаррирлик қилган бўлиб, иборалар халқчил, содда ва тушунарли шаклда.

 
Ушбу асар кенг китобхонларга мўлжаллангани билан янада аҳамиятлидир. Аллоҳ таоло ушбу китобни барчамизга муборак қилсин.

Ўзбекистон мусулмонлари идораси
Матбуот хизмати

Сурхондарё вилоятида ташкил этилган “Имом Термизий” ўрта махсус ислом таълим муассасаси Адлия вазирлигининг 2020 йил 8 июндаги 24-сон гувоҳномасига асосан давлат рўйхатидан ўтказилди.
Бугун, 9 июнь куни мазкур гувоҳнома Ўзбекистон мусулмонлари идораси раисининг биринчи ўринбосари Ҳомиджон Ишматбеков томонидан ушбу таълим муассасаси директори Шукрулло Умаровга топширилди.
Муҳтарам Президентимиз ташаббуслари билан ташкил этилган таълим муассасаси Ўзбекистон мусулмонлари идораси тасарруфидаги диний таълим маскани ҳисобланиб, динлар тарихи ва назариясини чуқур эгаллаган, Ислом дини асосларини яхши ўзлаштирган, ватанга садоқат руҳида тарбияланган, ўрта махсус диний маълумотли ислом шариати ва ҳадис илмлари мутахассиси ҳамда имом-хатиблар тайёрланади.
Аввал хабар берганимиздек, таълим муассасасига 2020-2021 ўқув йили бўйича абитуриентлар қабул имтиҳонлари асосида ўқишга қабул қилинади. Ҳужжатларни қабул қилиш шу йил 15 июндан бошлаб онлайн масофавий шаклда амалга оширилиши режалаштирилмоқда.

Салоҳиддин ШЕРХОНОВ,
Таълим ва илмий-тадқиқот
бўлими мудири

Шу йил 6 июнь ҳолатига, Санитария-эпидемиологик осойишталик агентлиги томонидан туман ва шаҳарлар эпидемиологик тоифаларининг янгиланган рўйхати эълон қилинди.

Унга кўра, Қорақалпоғистон Республикаси Нукус шаҳри, Андижон вилояти Андижон шаҳри, Балиқчи ва Избоскан туманлари, Бухоро вилояти Бухоро шаҳар ва Қоракўл тумани, Наманган вилояти Норин тумани, Самарқанд вилояти Иштихон тумани, Тошкент вилояти Бўка туманига “яшил” ҳудуд тоифаси берилган.

Ўзбекистон мусулмонлари идорасининг карантин даврида масжидлар фаолиятини ташкил этиш юзасидан баёнотига мувофиқ, шу йил 9 июндан бошлаб, ушбу ҳудудларда жойлашган масжидлар намозхонлар учун очилади.

Аксинча, Қашқадарё вилояти Чироқчи тумани, Наманган вилояти Янгиқўрғон, Косонсой, Поп туманлари, Сирдарё вилояти Ховос тумани, Хоразм вилояти Урганч шаҳри “қизил” тоифа ва Бухоро вилояти Когон тумани, Тошкент вилояти Бўстонлик тумани, Сурхондарё вилояти Термиз шаҳрига “сариқ” тоифа берилиши сабабли ушбу ҳудудлардаги масжидлар фаолияти вақтинча тўхтатилади.

Айни кунларда халқимиз синовли кунларни бошидан кечиряпти. Барча биргаликда коронавирус касаллигининг кенг тарқалишининг олдини олишга жидду жаҳд қилиши лозим.

“Қизил” ёки “сариқ” худудлардан “яшил” худудлар қаторига ўтиш ва масжидлар ўз фаолиятини қайта бошлашида – ҳар бир инсоннинг ҳиссаси катта бўлади, карантин мезонларига амал қилиш айни матлуб ва шариатда буюрилган ишдир.

Аллоҳ таоло барча масжидлар эшиклари очилишини насиб этсин!

Қуйида республика бўйича туман-шаҳарлар кесимида “яшил”, “сариқ” ва “қизил” ҳудудга тоифаланишнинг рўйхатини кўришингиз мумкин.

Ўзбекистон мусулмонлари идораси Матбуот хизмати

Бугун, 8 июндан «яшил» ҳудудларда жойлашган масжидлар ўз фаолиятини бошлади. Жомеларда эрта тонгдан келган намозхонлар ижтимоий масофани сақлаган ҳолда бомдод намозини адо этдилар. Шу билан “яшил” ҳудудларда карантин мезонларига амал қилган ҳолда файзли ибодатлар бошланди.

Халқимиз бошга тушган синовларни “Аллоҳ сабр қилувчилар билан биргадир”, деган ояти каримага амал қилиб, чиройли сабр ила енгиб ўтмоқда. Чиндан ҳам, ҳар қадай қийинчилик ортида енгиллик борлигини аҳолимиз ўз фаолиятини қайтадан бошлаётган жомеларимиз мисолида яққол ҳис этмоқда.

Таъкидлаш керакки, “сариқ” ва “қизил” ҳудудлар “яшил” ҳудудга ўтгунга қадар бир оз сабр қиламиз, келгусида у ерларда ҳам масжидлар фаолиятига рухсат этилади, инша Аллоҳ.

Қуйида ўлкамиздаги масжидларда карантин давридаги 80 кундан сўнг илк бомдод намозидан олинган файзли лаҳзалар, намозхонларнинг юз-кўзидаги мамнунликни кўришингиз мумкин.
Ҳақ таоло бу вабони бандалари устидан кўтаришини ва барчани Ўз паноҳида сақлашини сўраймиз.

Ўзбекистон мусулмонлари идораси Матбуот хизмати