muslim.uz
Расулуллоҳ соллаллоҳу алайҳи васалламнинг суннатлари (7-қисм): Жума тонгида
Анас (розияллоҳу анҳу)дан ривоят қилинади: Расулуллоҳ (соллаллоҳу алайҳи ва саллам):
Ким жума куни бомдод намозидан олдин: “Астағфируллоҳаллазий ла илаҳа илла ҳувал ҳаййул қоййум ва атубу илайҳ”, деб уч марта айтса, Аллоҳ таоло унинг гуноҳларини денгиз кўпигича бўлса ҳам кечириб юборади, дедилар.
Диний-маърифий сайтлар учун ўқув семинари
Замонавий ахборот технологиялари ҳаётимизга шиддат билан кириб келмоқда. Интернет тармоғининг ҳаётимиздаги ўрни жуда ҳам катта бўлмоқда. Ҳозирда бирор-бир хабарни дунёга ёйишда ёки керакли саволларга жавоб топишда, бир сўз билан айтганда, ахборотга бўлган эҳтиёжни қондиришда интернет энг асосий хизматчига айланди.
Шу кабиларни инобатга олган ҳолда миллий домендаги диний-маърифий мавзудаги интернет манзиллари фаолиятини янада такомиллаштириш, веб-саҳифа юритишга масъул шахсларнинг билим ва маҳоратларини ошириш мақсадида, диний-маърифий сайтлар муҳаррирлари ва техниклари учун ўқув тренинглар ташкил этиб келинмоқда.
Бугун, 21 декабрь куни Тошкент шаҳрида фаолият олиб бораётган диний-маърифий сайтларнинг муҳаррирлари учун ана шундай ўқув машғулотлари бошланди. Улар бир неча кун давомида соҳанинг энг етук мутахассислари томонидан ўқиладиган маърузаларни тинглашади ва давра суҳбати шаклида долзарб масалаларни муҳокама қилишади.
Бундан аввал вилоятларда фаолият олиб бораётган диний-маърифий сайтларнинг муҳаррирлари ва техниклари мана шундай курсларда ўз касб-маҳоратларини ошириб қайтишди.
Ўзбекистон мусулмонлари идораси
Матбуот хизмати
“Араб тили” фани бўйича пуллик ўқув курслари ташкил этилди
Ўзбекистон мусулмонлари идораси тасарруфидаги диний таълим муассасаларида “Араб тили” фани бўйича пуллик ўқув курслари ташкил этилди. Мазкур ўқув курслари 2018 йилнинг 2 январидан бошлаб ўз фаолиятини бошлайди.
Ўқув курсларида таҳсил олиш истагида бўлган тингловчиларнинг ҳужжатлари 2017 йилнинг 25-27 декабрь кунлари соат 09:00 дан 17:00 гача барча таълим муассасаларида қабул қилинади.
Ўқув курсларига Ўзбекистон Республикасининг “Виждон эркинлиги ва диний ташкилотлар тўғрисида”ги қонунига мувофиқ 18 ёшга тўлган Ўзбекистон Республикаси фуқаролари суҳбат асосида қабул қилинади.
Тингловчилар диний таълим муассасасига қуйидаги ҳужжатларни тақдим этади:
- ректор номига ариза;
- соғлиги ҳақида тиббий маълумотнома (У-086-шакл);
- паспорт нусхаси (асли кўрсатилади);
- 4 дона фотосурат (3,5 х 4,5 ҳажмдаги);
- яшаш жойидан маълумотнома;
Ўқув курслари бўйича қизиқтирган саволлар юзасидан қуйидаги телефон рақамларига мурожаат қилиш мумкин:
- Имом Бухорий номидаги Тошкент ислом институти (+99871-227-42-37).
- Мир Араб олий мадрасаси (Бухоро вилояти, +99894-604 45 97).
- “Кўкалдош” ўрта махсус ислом билим юрти (Тошкент шаҳри, +99871-242 10 82).
- “Хадичаи Кубро” аёл-қизлар ўрта махсус ислом билим юрти (Тошкент шаҳри, +99871-299 24 11).
- “Хожа Бухорий” ўрта махсус ислом билим юрти (Қашқадарё вилояти, Китоб шаҳри, +99875-542 74 25).
- “Мир Араб” ўрта махсус ислом билим юрти (Бухоро вилояти, Бухоро шаҳри, +99895- 600 45 97).
- “Жўйбори Калон” аёл-қизлар ўрта махсус ислом билим юрти (Бухоро вилояти, Бухоро шаҳри, +99865-221 77 44).
- “Саййид Муҳйиддин махдум” ўрта махсус ислом билим юрти (Андижон вилояти, Андижон шаҳри, +99895-201 68 70).
- “Ҳидоя” ўрта махсус ислом билим юрти (Наманган вилояти, Наманган шаҳри, +99869-226 60 60).
- “Фахриддин ар-Розий” ўрта махсус ислом билим юрти (Хоразм вилояти, Урганч шаҳри, +99895-606 92 55).
- “Муҳаммад ал-Беруний” ўрта махсус ислом билим юрти (Қорақалпоғистон Республикаси, Нукус шаҳри, +99861-229 03 20).
Давлат маслаҳатчиси Президент табригини ўқиб эшиттирди
Аввал хабар қилганимиздек, Ўзбекистон Республикаси Президенти давлат маслаҳатчиси Рустам Комилов, Дин ишлари бўйича қўмита раиси Ортиқбек Юсупов, Ўзбекистон мусулмонлари идораси раиси, муфтий Усмонхон Алимов ҳазратлари ва бир неча уламолардан иборат делегация “2017 йил – Ислом ҳамжиҳатлиги йили: динлараро ва маданиятлараро мулоқот” номли халқаро анжуманда иштирок этиш учун Боку шаҳрида бўлиб туришибди.
Бугун, 21 декабрь куни ушбу халқаро конференция ўз ишини бошлади. Анжуманни Озарбайжон Республикаси Президенти Илҳом Алиев очиб берди. Шундан сўнг, бир қатор давлатлар Президентларининг табриклари ўқиб эшиттирилди. Ўзбекистон Республикаси Президенти Шавкат Мирзиёевнинг табригини давлат маслаҳатчиси Рустам Комилов йиғилганларга етказди.
Эслатиб ўтамиз, Озарбайжонда 2017 йилни “Ислом бирдамлиги йили” деб эълон қилиниши муносабати билан бир қанча мамлакатларда қатор маърифий тадбирлар ўтказилди. Йил давомида амалга оширилган тадбирларнинг якуни сифатида бўлиб ўтаётган ушбу тадбирда 40 дан ортиқ давлатлардан 200 га яқин дин пешволари, уламолар, олимлар, муфтийлар ва соҳа мутахассислари иштирок этишмоқда.
Ушбу халқаро конференциянинг илмий-амалий қисми, бугун, соат 14:00 да бошланади. Унда Ўзбекистон мусулмонлари идораси раиси, муфтий Усмонхон Алимов ҳазратлари Ўзбекистон ва Озарбайжон халқлари ўртасидаги маданий, маърифий ва дўстона алоқалар, Ислом динининг асл қадриятларини асраб-авайлаш, мусулмон давлатлари ўртасида ҳамкорлик ришталарини мустаҳкамлаш, диний бағрикенглик ва миллатлараро тотувлик масалаларига бағишланган маърузалари билан чиқиш қиладилар. Анжуман тафсилотларини сайтимизда кузатиб боринг.
ЎМИ Матбуот хизмати
Ибратли ҳикоялар: Тупроқ каби бўл...
Ақлли, фаросатли йигит комил устозга шогирд тушиб, анча вақт хизматида бўлди. Бир куни устоз уни ёнига чақириб:
– Масжидни тозала, ҳар тарафда кир-чанг тўпланибди, – деди.
Бу топшириқни олганидан кейин мусофир йигитни узоқ муддат ҳеч ким кўрмади. Йигитнинг бу иши гап-сўзларга сабаб бўлди. Кунларнинг бирида устознинг шогирдларидан бири ҳалиги мусофирни учратиб қолди ва унга:
– Эй дўстим, тўғри иш қилмадинг. Ҳаммамиз сенга яхши муомалада эдик. Ишдан қочиб, бизни ташлаб кетдинг. Одамлар меҳнат қилиб юксалади ва камолга эришади, – деди.
Шунда йигит ёниб сўзлай бошлади:
– Дўстим, буйруқни олган заҳоти тозалаш учун масжидга бордим. Кўрдим, ҳамма жой топ-тоза экан. Кир менинг кўнглимда экан. Шундан кейин кетдим. Киши энг олдин кўнгил масжидини тоза тутиши лозимлигин англадим.
Қиссадан ҳисса: имонли киши ўз қусурларини кўра олувчи, тавозели бўлади. Мевали новданинг боши эгилгани каби, ақлли, фаросатли киши ҳам мутавозе бўлади. Буюклик истасак, тавозени танлайлик.
Аллоҳ таоло одамни тупроқдан яратди. Камтарликда тупроқ каби бўлайлик. Модомики, аслимиз тупроқ экан, олов каби ҳирсли, саркаш бўлмаслигимиз керак. Олов ўзини юксак тутгани учун ундан шайтон бино бўлди. Тупроқ тавозели бўлгани учун ундан ўн саккиз минг олам гултожи Одам алайҳиссалом яратилди.