Порт-Саид (Миср) шаҳрида бўлиб ўтадиган Халқаро Қуръони каримни ёддан ўқиб бериш ва диний нашидлар мусобақалари олий қўмитаси Жаҳон халқаро Қуръон мусобақалари раҳбарларининг Бош ассамблеяси мамлакат пойтахтидаги Миср масжидида бўлиб ўтишини маълум қилди.
Ҳозирги кунда ушбу шаҳарда Қуръони карим ва ибтиҳолат (дуолар ва нашидлар) ёд олиш бўйича еттинчи халқаро мусобақани ўтказишга ҳозирлик кўрилмоқда.
Ушбу халқаро мусобақа мисрлик қори, Миср ва ислом оламида Қуръони Каримнинг энг улуғ қориларидан бири Шайх Шаҳат Муҳаммад Aнвар номи билан аталади.
Танловнинг якуний босқичи 2024 йилнинг 2 – 6 февраль кунлари Порт-Саид шаҳрида бўлиб ўтади.

Ўзбекистон мусулмонлари идораси ходими
Илёсхон Аҳмедов тайёрлади

Ўзбекистондаги Ислом цивилизацияси маркази томонидан нашрга тайёрланган “Тўрт мазҳаббоши имомлардан гўзал ибратлар” рисоласи чоп этилди. Мазкур рисолада тўрт мазҳаб – ҳанафий, шофеъий, моликий ва ҳанбалий мазҳаблари имомларининг ҳаётига оид ибратли воқеалар баён этилган.
Рисолада одоб-ахлоқ, таълим-тарбия, инсонийлик фазилатларини бойитишга хизмат қилувчи ҳамда инсон руҳиятини камолотга етказувчи сифатлар ҳақида сўз боради. Шунингдек, аждодларимизнинг урф-одат ва анъаналари асосида шаклланган гўзал одобларимиз батафсил ёритилган.
Уламоларнинг ҳаётига бағишланган табақот асарлари асосида Абдушукур Муратов томонидан тайёрланган мазкур рисола кенг китобхон оммаси учун мўлжалланган.

Ўзбекистондаги Ислом цивилизацияси маркази
Ахборот хизмати

Ер юзини обод қилиш савобли амаллар сирасига киради. Киши дунёдан ўтиб, амал саҳифаси ёпилгандан сўнг ҳам ҳаққига муттасил равишда савоб бориб туришига сабаб бўлади. Шунинг учун ҳам мўмин-мусулмонлар бу каби эзгу ишдан четда қолмай, доимо ободончилик ва фаровонлик йўлида хизмат қилиб келганлар.

Бугунги кунда ушбу эзгу амал кенг миқёсда ривож топмоқда. Давлатимиз раҳбарининг ташаббуси билан “Яшил макон” умуммиллий лойиҳаси амалга ошириб келинмоқда. Лойиҳа доирасида кўплаб хайрли ишлар амалга оширилаётир.

Фарғона вилоятидаги имом-хатиблар ҳам лойиҳа доирасида яшил маконларни барпо этмоқдалар. Жумладан, Қўштепа, Ёзёвон ва Тошлоқ туманларидаги имом-хатиблар дарахт кўчатлари ва гуллар ўтказиб, масжидлар атрофини обод қилмоқдалар.

Кўчат экиб, боғ яратиш — халқимизнинг азалий қадриятларидан бири. Зеро, ўзимиз яшаб турган жойни ободонлаштириш ва кўкаламзорлаштириш туфайли кўнглимиз шодликка тўлади, турмушимиз файзли ва фаровон бўлади.

Бундан кўзланган асосий мақсад ёшларни она табиатни асраш ва унга муҳаббат руҳида тарбиялашдан иборат.

Фарғона вилояти вакиллиги Матбуот хизмати

Шу йил 3 ноябрь куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Самарқанд вилоятига сафарлари давомида “Яшил макон” умуммиллий лойиҳаси доирасида Самарқанд туманида жойлашган "Имоми Аъзам" жоме масжиди ҳовлисига манзарали дарахт кўчатларини ўтқаздилар.

Ўзбекистон мусулмонлари идораси
Самарқанд вилояти вакиллиги
Матбуот хизмати

Шаржа халқаро китоб кўргазмасида Қуръони каримнинг нафис нусхаси тақдимоти ташриф буюрувчилар эътиборини тортди.

IQNA сайтининг “Khaleej Times” нашрига таяниб хабар беришича, бу нафис Қуръон китобининг 11-12-асрларга оид қўлёзма нусхаси бўлиб, машҳур эронлик хаттот Ибн Бавобнинг дурдона асари саналади.

Aсл қўлёзма Мюнхендаги Бавария давлат кутубхонасида сақланади. Бу даврда Қуръоннинг бу тури атиги ўн нусхада чоп этилган.
Мазкур нусха тадбирда намойиш этилган бу қимматбаҳо асарнинг аниқ ўлчами, услуби ва визуал жозибаси бўйича чоп этилган атиги 300 нусхадан биридир.
“Adeva Rare Collectibles” компанияси вакили Флориан Строллс бундай дейди: “Бу Қуръон ҳақиқий санъат асари бўлиб, зарҳал қоғозга курсив насх ёзувида ёзилган оятлардир”.

У қўшимча қилди: “Мазкур қўлёзма ақл бовар қилмайдиган даражада безатилган ва қўлёзма санъати оламида ўзига хос ўрин тутади. Ҳар бир суранинг сарлавҳалари кўк, оқ ва қизғиш жигарранг ёзувда чиройли тарзда ёзилган. Оятлар эса кўк, кумуш ва нафис атиргул нақшлари билан ажратилган. Ҳарфларнинг ўлчами математик тамойилларга асосланган бўлиб, масштаб бирлигида араб алифбосининг биринчи ҳарфи бўлган “Aлиф” ҳарфининг ўлчами қўлланилади.

Бир оз чапга қийшайган вертикал ҳарфлар ўйланган ҳолда жойлаштирилган ва Ибн Бавоб мактабидан фарқ қиладиган услубни кўрсатади”, – деди Строллс. Унинг қўшимча қилишича: “Биринчи саҳифанинг диққатга сазовор хусусияти бу икки сура номларининг ўзига хос тартибда жойлашувидир, бу эса Қуръони каримни ноёб санъат асари қилади”.

Ўзбекистон мусулмонлари идораси
Матбуот хизмати