muslim.uz
Ҳ А Б И Б И М... !
Эй, Роббимнинг севикли қули!
Эй, Набийлар сардори!
Эй, Расуллар сарвари!
Эй, умматнинг беназир раҳбари!
Эй, саодат йўлининг машъали!
Эй, қалбимизнинг ҳузури!
Эй, кўнглимизнинг сурури!
Эй, ҳидоят элчиси!
Эй, гўзаллик тимсоли!
Эй, ибрат-намуна маёғи!..
Биз учун ҳаётингиз ибрат, йўлингиз суннат, меҳрингиз раҳмат, сўзингиз ҳикмат, фикрингиз неъмат...
Қанийди, биз ҳам асҳобларингиз каби Сизга муҳаббат қўя олсак, бутун вужудимиз ила вафодор бўлсак, ҳар бир сўзингизни қонун деб билсак, гапларингизни эшитишдан тўймасак, суннатингиз йўлида жон фидо этсак.
Эй ҳабибим, биз умматларнинг саодати, нажоти, зафари, ютуғи, ғалабаси бўлган аниқ йўлни тиниқ кўрсатиб бердингиз. Аммо биз гумроҳлар буни яхши англамай, баъзан беъэтибор бўлиб бормоқдамиз. Гоҳо нафсимизга эрк бериб, одоб-ахлоқ чегарасидан чиқиб кетсак, гоҳида эса билиб-билмай шайтонга малай бўлиб қолмоқдамиз.
Ҳабибим, нима бўлганда ҳам Сизни жонимиздан, ота-она, фарзанд ва молу дунёмиздан ҳам чандон яхши кўрамиз.
Шафоатингиздан умидвормиз, дийдорингизни кўришга иштиёқмиз, жаннатда ҳамнишин бўлиш илинжидамиз.
Тўғри, Сизни бу дунёда кўролмадик, сўзларингизни эшитолмадик, бирга яшай олмадик, қийналган вақтларингизда ёрдам беролмадик, ёнингизда бел боғлаб туролмадик, душманларингиздан ҳимоя қилолмадик, асҳобларингизга қўшилиб муаммоларингизни бартараф этолмадик, ислом равнақига ҳисса қўшолмадик. Лекин Сизни бутун вужудимиз билан, қошу кўзимиз билан яхши кўрамиз, севиб-ардоқлаймиз.
Ҳабибим, ҳар тун тушларимга кириб туринг. Қачон тушимга кирсангиз, эртасига кун бўйи ўзимни масрур ҳис этаман. Худди жаннат чаманида юргандек қувонаман. Гуллар ифорига тўйгандек завққа тўламан. Еттинчи осмонда учиб юргандек бахтиёр бўламан.
Мабода бирор тун тушларимга кирмай қолсангиз, ўзимни қўярга жой тополмай қийналаман. Тинимсиз салавотлар айтаман, шаънингизни улуғлайман, сийратингизни ўқийман, ҳаётингизни ўрганаман, дуо ва илтижолар қиламан. Мендан нима хатолик ўтибди деб нафсимни сарҳисоб қиламан, уни тергайман, қайғуга тушаман, азоб чекаман...
Тезроқ кун ботишини, тун бўлишини кутаман. Тушимга кирсангиз, ҳаммаси бир зумда унут бўлади, бари ортда қолади, яна янги завқ-шавқ бошланади.
Ҳабибим, Сизнинг йўлингиз саодат, раҳмат, фазилат, шарофат ва ҳидоят йўлидир. Сиз бизга энг юксак ахлоқ қандай бўлишини кўрсатиб ўтдингиз. Ўзингиз бунга риоя этиб яшадингиз, бошқаларни ҳам шунга чорладингиз.
Бу йўлни маҳкам тутганлар асло бадбахт бўлмайди, икки дунёда ҳам ҳурмат қозонади, хору зорликка маҳкум этилмайди.
Ҳабибим, Сизни севиш, муҳаббат қўйиш ибодат, савоб, мислсиз ажр. Сизни севиш, муҳаббат қўйиш гуноҳларга каффорот. Муҳаббатдан мосуволик эса тубанлик ва фалокатдир.
Ҳабибим, Сизга бўлган муҳаббатимиз асло сўнмасин. Ҳар бир ишда, турмушда, юриш-туришда, борингки барча ҳолимизда суннатингизга амал қилиб яшаш барчамизга насиб этсин!
Эркин ҚУДРАТОВ
Ихлос ва Сидқнинг самараси!
Францияда чиқадиган «Jeune Afrique» журнали қуйидаги хабарни эълон қилди:
«Албатта, «Ал-арбаъийн ан-нававийя» (Имом Нававий тўплаб, шарҳ қилган қирқта ҳадис) китоби Францияда энг кўп сотилган китобдир».
Имом Нававий раҳимаҳуллоҳ Париж кўчаларида ҳам у киши учун ҳасанотлар бўлишини хаёлларига келтирганмидилар?!
Албатта, бу ихлос, сидқнинг натижасидир! Аллоҳ таолодан бизни ҳам шундай икром қилишини сўраймиз!
Интернет маълумотлари асосида Нозимжон Ҳошимжон тайёрлади
ТАЪЗИЯ
Ўзбекистон мусулмонлари идораси жамоаси Диний идора масъул ходими Масайитов Саиджамол домланинг волидаи муҳтарамалари вафоти муносабати билан чуқур таъзия изҳор этади.
Аллоҳ таоло охират сафарига кузатилган марҳума онахоннинг барча солиҳ амалларини ўзларига ҳамроҳ айлаб, Ўз мағфиратига олсин.
Ҳақ таоло марҳуманинг яқинлари, фарзанду аржумандларига чиройли сабр бериб, бу мусибатларга ажру мукофотлар ато этсин.
Ўзбекистон мусулмонлари идораси жамоаси, уламолари, имом-домлалари ва ўқитувчи-мударрислари номидан Масайитов Саиджамол домлага ва марҳуманинг яқинларига ҳамдардлик билдирамиз.
Иннаа лиллааҳи ва иннаа илайҳи рожиъуун.
Ўзбекистон мусулмонлари идораси
Телеграмдаги пул тикиб ўйналадиган ўйинлар
Ҳозирги кунда баъзи телеграм каналларида айрим кишилар спорт ўйинлари, масалан футболда қайсидир жамоага пул тикиб, кимнинг пул тиккан жамоаси ютса, ўша одам нариги жамоага тикилган пулларни ҳам олиши билан боғлиқ ўйинлар эълон қилинмоқда. Бу каби нарсалар қимор ҳисобланади. Бошқача қилиб айтганда ғолиб мағлубдан бирор нарса оладиган ҳар бир ўйинга қимор дейилади.
Динимизда қимор қаттиқ қораланган ва гуноҳи кабира дейилган.
Аллоҳ таоло Қуръони Каримнинг Бақара сураси, 219-оятида қиморни қаттиқ қоралаб, шундай марҳамат қилган:
يَسْأَلُونَكَ عَنِ الْخَمْرِ وَالْمَيْسِرِ قُلْ فِيهِمَا إِثْمٌ كَبِيرٌ وَمَنَافِعُ لِلنَّاسِ وَإِثْمُهُمَا أَكْبَرُ مِن نَّفْعِهِمَا وَيَسْأَلُونَكَ مَاذَا يُنفِقُونَ قُلِ الْعَفْوَ كَذَلِكَ يُبيِّنُ اللّهُ لَكُمُ الآيَاتِ لَعَلَّكُمْ تَتَفَكَّرُونَ
“Сендан хамр ва қимор ҳақида сўрарлар. Сен: «Иккисида катта гуноҳ ва кишилар учун манфаат бор ва гуноҳлари нафларидан каттадир», деб айт. Ва сендан нимани нафақа қилишни сўрарлар. Сен:«Ортиқчасини», деб айт. Аллоҳ шундоқ қилиб сизга Ўз оятларини баён қилади. Шоядки тафаккур қилсангиз”.
(Оятдаги «хамр» сўзини ичкилик, ароқ ёки вино деб таржима қилмадик. Чунки «хамр» сўзи умумий бўлиб, истеъмол қилган кишининг ақлини тўсувчи, яъни, бир оз бўлса-да таъсир ўтказувчи барча нарсага айтилади. Бунинг ичига наша, қорадори, кўкнори ва бошқалар ҳам киради.Дунёда адолат ўрнатиш, ер юзида Аллоҳнинг халифаси бўлиш вазифаси юклатилган шахс ароқхўр ёки қиморбоз ва молини ноўрин сарфлайдиган бўлиши мумкинми? Албатта, йўқ. Ҳолбуки, хамр ичиш, қимор ўйнаш ва ноўрин нафақа қилиш ҳоллари жоҳилият вақтида кишилар ҳаётига сингиб кетган эди. Хамрсиз ҳаётни тасаввур қила олмас эдилар.)
Аллоҳ таоло ушбу оятда хамр ичиш ва қимор ўйнашни «катта гуноҳ» деган.
Аллоҳ таоло Моида сурасининг 90-оятида шундай марҳамат қилган:
يَا أَيُّهَا الَّذِينَ آمَنُواْ إِنَّمَا الْخَمْرُ وَالْمَيْسِرُ وَالأَنصَابُ وَالأَزْلاَمُ رِجْسٌ مِّنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ
“Эй иймон келтирганлар! Албатта, хамр, қимор, бутлар ва (фол очадиган) чўплар ифлосдир. Шайтоннинг ишидир. Бас, ундан четда бўлинг. Шоядки, нажот топсангиз”
Оламлар Робби бу оятда қиморни «ифлослик ва шайтоннинг иши» деб марҳамат қилган. Айнан шу оятда хамр ичиш ва қимор ўйнаш каби амалий гуноҳларни бутга чўқиниш ва фолбинга ишониш каби куфр ва ширк саналган улкан маънавий жиноятларга тенглаштирган.
Абу Ҳурайра розияллоҳу анҳудан ривоят қилинади, Расулуллоҳ соллаллоҳу алайҳи васаллам: «Ким ўз соҳибига «Кел, сен билан қимор ўйнайман», деса, садақа қилсин», - дедилар».
Қимор шу қадар жирканч иш эканки, киши ҳали ўйнамаган бўлса ҳам, ўйнашни таклиф қилиши биланоқ гуноҳкор бўлиб қолар экан. Шу боис унинг каффоротига ўйнамоқчи бўлган пулини садақа қилиб юбориш керак экан.
Динимизда инсонлар ҳалол меҳнат қилиб пул топишга буюрилган. Бировни алдаб, хиёнат қилиб, муттаҳамлик йўли билан унинг мулкига эга бўлиб олиш ҳаромдир. Қимор эса айнан шундай йўл билан пул топишдир.
Қиморда ютқазган тараф ютган тарафни ҳеч қачон яхши кўрмайди. Ўртада адоват, нафрат, жанжал пайдо бўлади. Ютқазган тараф имкон топилди дегунча ютган тарафдан пулларини қайтариб олишга, бунинг учун ҳатто ўша ютган кимсани ўлдиришгача бориб етади. Хуллас, қимор сабабли инсонлар ўртасида душманлик, бир-бирини ёмон кўриш ва ҳатто қотиллик юзага келади. Мана шуларнинг ўзиёқ қиморнинг жамиятга соладиган хавфи, келтирадиган зарарлари нечоғли аянчли эканини кўрсатади.
Одамларда меҳнат қилмай, қийналмай, осон ва тез пул топишга бўлган истак уларни мана шундай жирканч иш — қимор ўйнашга, қиморга йўналтирилган каналларга аъзо бўлишга ундайди.
Қимор ўйновчи кимса бориб-бориб ҳамма нарсасидан жудо бўлади. Оиласининг пароканда, фарзандларнинг уйсиз қолишига, уларнинг луқмаси бузилишига сабаб бўлади.
Кимда ким қимор ўйнаб, пул ютиб олган бўлса, ўша ютган пулни дарҳол эгасига қайтариб бериши керак. Агар эгаси ўлиб қолган бўлса, унинг меросхўрларига беради. Бордию меросхўрларни ҳам топа олмаса, эгасининг номидан бирорта фақирга беради.
Азизлар, ҳалол меҳнат қилиб пул топишга, фарзандларимизга ҳалол луқма едиришга, оилада ибратли ота бўлишга ҳаракат қилайлик!
Аллоҳ таоло барчамизни Ўзининг ҳидоятидан айирмасин ва хотимамизни чиройли қилсин!
Интернет маълумотлари асосида Нозимжон Иминжонов тайёрлади
Сичқонсимон кийик
Ушбу ҳайвон камёб жонзотлардандир. Бу қўштуёқлилардан бўлиб, кийикларнинг энг кичик туридир. Бу тур Жануби Шарқий Осиё ва Африка қитъасининг марказида яшайди. Осиёда яшайдиганининг вазни 8 килограм, Африкада яшайдиганининг вазни 16 килограм келади. Узунлиги 85 сантиметрни ташкил этади. Оёқлари калта, эркагининг қозиқтишлари бор бўлиб, ундан кураш пайтида фойдаланади. Бу турдаги кийикларнинг баъзиси сувда суза олади. Аммо буларда бошқа кийиклардагидек шохлар йўқ. Қулоқлари сичқоннинг қулоғига ўхшайди. Думи калта, кўзлари катта бўлади. Урғочисининг ҳомиладорлик даври 5 ой бўлиб, битта бола туғади. Боласи тахминан 5 ойда вояга етади. “Сичқонсимон кийик” тунда овқат излайди. Улар асосан дарахт барглари, гуллар, мевалар ва кўкатлар билан озиқланади. Хатар пайтида туёқларини ерга тез-тез уриб, турдошларини хавфдан огоҳлантиради. Бу жонзот тахминан 14 йил яшайди. Табиатда жуда оз қолгани учун бугунги кунда қўриқхоналарда парвариш қилинади.
Аллоҳ таоло бутун борлиқни, шу жумладан барча тирик жонзотларни ҳам Ўзи яратган. У Зот Қуръони Каримда шундай марҳамат қилган:
وَاللَّهُ خَلَقَ كُلَّ دَابَّةٍ مِن مَّاء فَمِنْهُم مَّن يَمْشِي عَلَى بَطْنِهِ وَمِنْهُم مَّن يَمْشِي عَلَى رِجْلَيْنِ وَمِنْهُم مَّن يَمْشِي عَلَى أَرْبَعٍ يَخْلُقُ اللَّهُ مَا يَشَاءُ إِنَّ اللَّهَ عَلَى كُلِّ شَيْءٍ قَدِيرٌ
“Аллоҳ ҳамма жониворни сувдан яратди. Бас, улардан баъзилари қорни билан юрадир, баъзилари икки оёқ билан юрадир ва баъзилари тўрт (оёқ) билан. Аллоҳ Ўзи хоҳлаган нарсани яратур. Албатта, Аллоҳ ҳар бир нарсага қодирдир” (Нур сураси, 45-оят).
Интернет маълумотлари асосида Нозимжон Ҳошимжон тайёрлади