Аллоҳ таоло бандасига бу дунёни охират учун амаллар диёри қилиб берди. Банда нима қилса қилаверсин чунки нимаики қилса ўзи учундир. Истаса эҳсон қилсин, истамаса қилмасин. Истаса адолатли бўлсин, истамаса адолатли бўлмасин. Истаса сахий бўлсин, истамаса бахил, истаса савоб амал қилсин, истамаса гуноҳ. Зотан Аллоҳ таоло каломида: “Нимани хоҳласангиз, қилаверинг”, (Фуссилат сураси 40-оят) деган бўлса бошқа оятда: “Фойдаси ҳам ўз ксбидан, зарари ҳам ўз касбидан” (Бақара сураси 286-оят) дейди. Яна бир оятда: “Ким куфр келтирса, унинг куфри ўз зарарига. Кимлар яхши амаллар қилган бўлса, ўзлари учун замин тайёрларлар” (Рум сураси 44-оят) дейди.

Яъни: Хоҳласангиз, қуёшга сажда қилинг. Хоҳласангиз, ойга сажда қилинг. Хоҳласангиз, Аллоҳнинг оятлари ҳақида куфр сўзлар айтинг. Ҳар бир ишингизни Аллоҳ таоло кўриб туради, деганидир.

Демак, яшаб турган дунёйимиз охират учун захира қилиш имконини берувчи маскандир. Нимаики қилсак, уни кўриб, билиб турувчи зот ва ёзиб турувчи фаришталар бор.

Охират эса, амалларимизга яраша ё жазо, ё мукофот бериладиган диёрдир. Агар жон олувчи фаришта келса, ҳамма нарса тугайди. Ихтиёр тугуйди, амонат тугайди.

Бир ўйлаб кўрайлик! Талаба ўқишга кирса унда бир муҳлат ихтиёр бўлади. Бу даврда у истаса дарс қилади, истамаса қилмайди. Истаса тиришқоқлик билан берилган фанни ўрганади, истамаса ўрганмайди. Истаса вазифаларини ёзади, истамаса ёзмайди. Қачонки имтиҳон топшириш вақти келса, ана энди унда ихтиёр бўлмайди. Зотан унга имконият берилган ва унда муҳлат бор эди. Қани жавоб бер дея, олдига савол ташланади.

Биз ҳам хозир шу талаба кабимиз. Бизда фурсат бор. Хоҳласак илм ўрганамиз хоҳламасак ўрганмаймиз. Бу дунё бир бекат кабидир. Унда бироз дам олиб, яна юришда давом этилади.

Дунё таклиф диёри бўлса, охират ташриф диёридур. Охират ихтиёр, мукаллафлик, ҳалол-ҳаром сўзи каби ишлар тугайдиган майдонидир. Унда жаннат ва дўзох бордир. Жаннатга кирган киши учун кўзингни тий, эрта тонг бомдод намозига тур, молингни сарф қил дейиш йўқ ва инсонни қийнайдиган қуёшнинг иссиқ ҳарорати  ҳам йўқ.

Аллоҳ таоло жаннат аҳли ҳақида шундай дейди: “Албатта, жаннат эгалари у кунда завқланувчилик ила машғуллар. Улар ва уларнинг жуфтлари сояларда сўриларда ёнбошлаб ётурлар. Улар учун у ерда мевалар бордир. Улар учун у ерда истаган нарсалар бордир”. (Ясин сураси 55-57 оятлар)

Азизлар! Ҳаммамизнинг умидимиз жаннатга киришдир албатта. Шундай экан унга кириш учун имконят бўлган аммаллар дунёсида бор эканмиз бизга берилган умрдан унумли фойдаланиб қолайлик. Шунда иншаоллоҳ мақсадимизга ва орзуйимизга етамиз албат.

Тошкент шаҳаридаги

“Шайх Зайниддин” жомеъ масжиди имом хатиби

Абдурахманов Яхё

Ўғирлик барча жамият ва тузумларда қораланган, инсоният ҳаёти ва мулкига зарар етказувчи ижтимоий хавфли қилмиш – жиноят ҳисобаланади. Халқимиз азалдан ҳалолликни улуғлаб, ўғрилик, қўли эгриликни қоралаган. Эгасидан сўроқсиз ҳеч бир нарсага ҳатто қўл теккизишга ботинмаган.

Афсуски, бу иллат сўнгги пайтларда ёшлар орасида тез-тез содир этилаётгани қулоғимизга чалинади. Нафс ортидан қувиш, билимсизлик, содир этаётган қилмишининг дунё ва охиратдаги азобини ўйламаслик баъзи кишиларни шу кўчага олиб кирмоқда. Жойларда имом-хатиблар гуноҳи кабиралар ҳақида тушунтириб, динимиз таълимотидан хабар бермоқдалар.

Навоий вилояти “Дўрмон” жоме масжиди имом-хатиби Музаффар Раҳмонов Навоий кон металлургия комбинатига қарашли 1-сонли ётоқхонада  истиқомат қилаётган 50 дан ортиқ ишчи-ходимлар билан ўтказилган учрашувда "Ўғирлик - гуноҳи кабира" мавзусида маъруза қилди. 

Имом-хатиб ўз сўзида қуйидагиларни айтиб ўтди:

“Аллоҳ таоло ўғирлик ва унинг жазоси ҳақида Қуръони каримда шундай дейди:“Ўғри эркак ва ўғри аёлнинг қўлларини кесинглар. Бу Аллоҳдан бездирувчи иқоб ўлароқ, касб қилган нарсаларига яраша жазодир. Аллоҳ ўта иззатлидир, ўта ҳикматлидир” (Моида, 38).

Уламолар айтадиларки, ўғирлаган нарсани эгасига қайтармас экан, ўғрининг тавбасидан ҳеч наф йўқ. Агар ҳеч вақоси бўлмаса, молнинг эгасидан розилик олиши шарт.

Мол – мулк эгасининг ёки бошқаларнинг йўқлигида ёки улар бор бўлса-да, уларга билдирмасдан ўзганинг мол-мулкини яширин талон - тарож қилиш ўғирлик ҳисобланади.

Ўғирлик содир этган одам ишончни йўқотади. Агар у қилган иши учун тавба килмаса, Қиёмат кунида жавоби бундан-да қаттиқроқ бўлади. Ўғирлик моли ўғрининг зиммасига тўланиши керак бўлган қарз бўлиб туради”. 

Ўзбекистон мусулмонлари идораси Масжидлар бўлими 

     Умавийлар даврида  Росулуллоҳ соллаллоҳу аълайҳи васалламнинг улуғ саҳобийларидан, ашараи мубашшаралардан бири, Саид ибн Зайд билан Мадина аҳли уни узоқ вақт гапириб юрадиган ҳодиса содир бўлди. Арво бинти Увайс Саид ибн Зайд унинг ерини бир қисмини босиб олиб ўзининг ерига қўшиб олди деб даъво қилди. Аёл гапини мусулмонлар орасида тинмай қайтарар ва ҳаммага айтиб берар эди. Сўнгра ишини Мадинаи мунаввара волийси Марвон ибн Ҳакамга олиб чиқди. Марвон бу ҳақида гаплашиш учун Саид ибн Зайднинг олдига бир қанча одамларни юборди. Росулуллоҳ соллаллоҳу алайҳи васалламнинг соҳобасига бу иш жуда оғир ботди ва уларга шундай деди: “Мени у аёлга зулм қилаяпди деб ўйлаяпсизларми !! Қандай қилиб унга зулм қиламан ?! Ахир мен Росулуллоҳ соллаллоҳу алайҳи васалламнинг: “Ким бир қарич ерни зулм билан эгалласа, қиёмат куни бўйнига етти қават ер тавқи лаънат қилиб осилади” деганларини эшитганман. Эй Аллоҳ у аёл мени унга зулм қилди деб даъво қилаяпди. Агар ёлғончи бўлса унинг кўзини кўр қилгин ва уни мен билан талашаётган ердаги қудуғига улоқтиргин. Мен унга зулм қилмаганимни мусулмонларга баён қиладиган ҳужжатни зоҳир қилгин”.

     Орадан кўп ўтмай Мадинанинг Ақиқ водийсида олдин унинг мисли кузатилмаган кучли сел оқди. Сел иккаласи ихтилоф қилаётган чегарани очиб ташлади. Шунда барча мусулмонларга Саид ибн Зайдни ростгўй эканлиги равшан бўлди. Шундан кейин бир ой ўтмасдан аёл кўр бўлиб қолди ва ўша ерини айланиб юрганида қудиғига йиқилди. Абдуллоҳ ибн Умар айтади: Биз ёшлигимизда бир инсон бошқаси билан уришиб қолса: “Аллоҳ сени Арвони кўр қилганидек кўр қилсин” деганини эшитар эдик.

     Буни ҳеч ажабланарли жойи ҳам йўқ. Чунки Росулуллоҳ соллаллоҳу алайҳи васаллам: “Мазлумнинг дуосидан сақланинг, чунки у билан Аллоҳнинг ўртасида парда йўқ” дер эдилар. Агар бу мазлум тириклигида жаннат башоратини олган ўнта саҳобийдан бири Саид ибн Зайд бўлсачи ?! [1]

Манбалар асосида

Имом Бухорий номидаги Тошкент Ислом институти ўқитувчиси,

“Ислом нури” жоме масжиди имом хатиби

 А. Собиров.

[1] Доктор Абдурроҳман Раьфат. Суварун мин ҳаятис саҳаба 233-239-бет

Бугунда  Фарғона вилоятининг маркази ҳисобланган Фарғона шаҳрида 18 нафар имом-хатиб ва имом-ноиблари, 36 нафар отинойилар фаолият олиб бормоқда. Улар ҳудудда истиқомат қилаётган аҳолининг диний-маърифий ва ижтимоий кўмакка оид тадбирларида доимо кўмак бериб келаётганлари эътиборга моликдир.

Жорий йилнинг 22 июнь куни Фарғона шаҳрида фаолият олиб бораётган имомлар ва отинойилар ташаббуси билан 10 нафар боқувчисини йўқотган ва имконияти чекланган болалар учун хатна тўйи ташкил этилди. Тадбирда вилоят бош имом-хатиби ўринбосари А.Наимов ҳамда қатор ҳамкор ташкилотлар мутасаддилари иштирок этди.

Абу Умомадан ривоят қилинган ҳадисда Пайғамбаримиз алайҳиссалом шундай марҳамат қилганлар: “Ким Аллоҳ учун бир етимнинг бошини силаса, қўли нечта сочнинг устидан ўтса, шунча ҳасанот ёзилади. Ким ўз ҳузуридаги етим қизга ёки болага яхшилик қилса, мен ўша одам билан жаннатда мана бундай бўламан”, деб икки бармоқларини яқинлаштирдилар. 

Тадбирда сўзга чиққанлар тўй болаларни келажакда юксак иймон-эътиқод соҳиби, Ватанига садоқатли фарзанд бўлиб камол топишини тилаб, дуога қўл очдилар. Бир қатор ҳомий ташкилотлар болаларга ўзларининг эсдалик совғаларини топширдилар.

Дунёда бола кулгуси, шодлигиданда ширин манзара йўқ. Унинг беғубор табассуми ҳар қандай тош қалбни ҳам эритиб юборади. Ҳазрати Умар розияллоҳу анҳудек зотлар мурғак қалб соҳибларидан дуо олар эди. Бу кеча қилинган ишларнинг ҳамма-ҳаммаси Раҳмонга суюкли амал – болага табассум, меҳр-муҳаббат улашиш ниятида бўлди.

Ўзбекистон мусулмонлари идораси Масжидлар бўлими