Қиш мавсумида кўпчилигимиз, дорихоналардан иммунитетимизни мустаҳкам қилувчи, грипп, ангина, бронхит ва бошқа касалликлардан ҳимоя қилувчи қимматбаҳо “мўъжизавий” дориларни сотиб оламиз.

Бироқ, биз ўйлагандек мўъжизавий препаратлар ҳали яратилмаган. Бундан ташқари, мусулмон  кишига дорихоналардан бу турдаги воситаларни ахтаришнинг ҳожати йўқ, чунки Ислом дини саломатликни мустаҳкамлаш ва иммунитетни кучайтириш учун асрлар давомида исботланган воситаларни тақдим этади:

Таҳорат

Таҳорат мусулмон кишига нафақат ибодат учун, балки соғлиқ учун ҳам зарурдир. Юрак қон томир тизими учун таҳоратнинг фойдаси аллақачон исботланган, бундан ташқари, у рефлексотерапия усулларини ҳам ўз ичига олади.

Илиқ ёки ёзда салқин сув билан таҳорат қилиш танани мукаммал даражада мустаҳкамлайди. Оғиз ва бурунни мунтазам ювиш инфекцияларнинг ривожланишига тўсқинлик қилади. Умуман олганда, барчаси осон: таҳорат қилинг – соғлом бўласиз!

Занжабил (Имбирь)

Бу ўсимликнинг илдизи антибактериал, яллиғланишга қарши, антимикроб, антисептик, бактерицид хусусиятларига эга. Занжабил жуда фойдали бўлиб, С, В витаминларига бой, унинг таркибида танадаги ҳужайраларни “даволаш” ва янгилаб туриш қобилиятига эга ретинол моддаси мавжуд. Занжабил асал билан истеъмол қилинганда у  асалининг фойдали хусусиятларини мукаммал равишда тўлдиради.

Асал

Асалнинг шифобахш қудрати Қуръони каримда айтилганлигини яхши биламиз. Ушбу маҳсулот иммунитет тизими учун тенги йўқ ҳисобланади. Қайд этиш керакки, инсон қонининг кимёвий таркиби ва асал ҳайратланарли даражада ўхшайди. Қонимизда 24 микроэлемент мавжуд бўлса табиий асалда – 22 та.

Шамоллаш билан боғлиқ касалликларни олдини олишнинг ажойиб услубларидан бири асални ёнғоқ билан қориштириб истеъмол  қилишдир. Бунда ҳар қандай ёнғоқ туридан фойдаланиш мумкин. Асосийси, аралашма маълум вақт  туриши лозим.

Қора седана ёғи

Тадқиқотлар шуни кўрсатадики, қора седана ёғи ошқозон-ичак фаолиятини нормаллаштиради, иммунитет тизимини фаоллаштиради, кўплаб патоген бактерияларни йўқ қилади, қонда холестеринни камайтиради ва холеретик таъсир кўрсатади.

Седана ёғидан профилактик даволаш ҳамда умумий қувватлантириш мақсадларида фойдаланиш мумкин. Агар сиз кун давомида ҳеч бўлмаганда бир чой қошиқ седана ёғидан ичсангиз, сизда модда алмашинуви нормаллашади ва танангизнинг ҳимоя кучи ортади.

Ҳилба (Хельба)

Ҳилба уруғи (Семена пажитника) шамоллаш, иситма, вирусли инфектсиялар оқибатларини бартараф этишга ёрдам беради. Ўзининг юмшоқ хусусиятларидан келиб чиқиб, бу ўсимлик шамоллашни даволашда яллиғланишга қарши ва балғам кўчиришда ишлатилади.

Ҳилба шилимшиқ пушти массаларни юмшатиб, эритиб, лимфа тизимидан токсинларни олиб ташлашга ёрдам беради. Шунинг учун бир ош қошиқ пажитник уруғини  ярим литр сувга солиб билан истеъмол қилиш шамоллашни даволашда ичимлик сифатида ишлатилади. Бундан ташқари, витаминлашнинг қўшимча самарасини ошириш учун ичимликка, лимон ёки клюква шарбати қўшилади.

Тошкент шаҳар вакиллиги ходими

Зоиржон СОДИҚОВ

тайёрлади

Жорий йилнинг 23 декабрь куни Ўзбекистон мусулмонлари идорасинингТошкент вилояти вакиллиги томонидан Зангиота туманидаги “Тиббиёт” касб-ҳунар коллежида маърифий тадбир ташкил этилди. Унда вилоят бош имом хатиби Ҳайруллоҳ домла Турматов, туман ҳокими ўринбосари Д.Мўминова, туман бош имом-хатиби Н.Мавлонов, туман прокуратураси ва солиқ идораси ходимлари, шунингдек, “Тарнов” маҳалласи аҳолиси, коллеж ўқитувчи ва ўқувчилари иштирок этишди.

Учрашувда вилоят бош имом-хатиби бузғунчи гуруҳларнинг ғоя ва мақсадлари, бу каби ғоялар таъсирига фақатгина соф Исломнинг асл моҳиятини англамаган инсонларгина тушиб қолиши мумкинлиги, кейинги пайтларда шу каби салбий ҳолатларнинг олдини олиш, Ислом дини равнақи йўлида кенг кўламли ислоҳотлар амалга оширилаётгани, жуда кўплаб диний-маърифий адабиётларнинг нашр этилаётгани ҳақида атрофлича тўхталди.

“Ачинарлиси шундаки, буюк аждодларнинг авлодлари, инсон цивилизацияси ва Ислом илми ривожи учун бениҳоя ҳисса қўшган олиму фузалолар етишиб чиққан юртнинг фарзандлари илм ва маърифатда оқсаганликлари сабаб, китоб ва мутолаадан узоқлашганликлари боис динимизга ёт ғояларга эргашмоқда, турли жиноят ва ҳуқуқбузарликларга қўл урмоқда, ахлоқсизлик ва оммавий маданиятнинг асирига айланмоқда. Азизлар, келинг, ўзимизни ислоҳ қилайлик, ўзгаришни бугундан бошлайлик. Юртимиз, миллатимиз, динимиз равнақи учун бир тану бир жон бўлиб, аҳил ва иноқликда ҳаракат қилайлик, ўтган ота-боболаримизга муносиб ворис, кейинги келадиган авлодлар учун ўрнак бўлайлик!” – деб, йиғилганларга мурожаат қилди Хайруллоҳ домла Турматов.

Тадбир якунида иштирокчилар ўзларини қизиқтирган барча саволларга жавоблар олишди.

ЎМИ Матбуот хизмати

Аввалроқ, Ўзбекистон мусулмонлари идораси тасарруфидаги диний таълим муассасаларида “Араб тили” фани бўйича пуллик ўқув курслари ташкил этилиши ҳақида маълум қилган эдик.

Ўқув курсларида таҳсил олиш истагида бўлган тингловчиларнинг ҳужжатлари 2017 йилнинг 25 декабридан 27 декабрига қадар қабул қилиниши кўзда тутилган эди.

Бугун, 25 декабрь эрта тонгдан “Араб тили” фанини ўрганиш истагида бўлган юзлаб инсонлар таълим олишда талаб этиладиган ҳужжатлар билан пойтахтимиздаги Имом Бухорий номидаги Тошкент ислом институти “Кўкалдош” ўрта махсус ислом билим юрти ва “Хадичаи Кубро” аёл-қизлар билим юртига келишди.

Қуйида ҳужжатларни қабул қилиш жараёнидан фотолавҳаларни тақдим этамиз.

Маълумот учун, мазкур ўқув курслари 2018 йилнинг 2 январидан бошлаб ўз фаолиятини бошлайди.

ЎМИ Матбуот хизмати

22 декабрь куни Симпозиумлар саройида Ўзбекистон Президенти Шавкат Мирзиёевнинг тўрт соатдан ортиқ тик оёқда туриб нутқ сўзлаганини кўриб, ўша нутқда тилга олиб ўтилган ютуқларимиздан севиниб, камчиликларимизни бартараф этиш йўлларини ўзаро муҳокама қилиб турганимизда муҳтарам Президентимиз жойларда ижтимоий-иқтисодий ислоҳотларнинг бориши, амалга оширилаётган бунёдкорлик ва ободонлаштириш ишлари, янги лойиҳалар билан танишиш, халқ билан мулоқот қилиш мақсадида 23 декабрь куни Тошкент шаҳридаги бир қатор ижтимоий объектларга ташриф буюрди.

Давлат раҳбари бунёдкорлик ишлари билан танишишни Адиблар хиёбонидан бошлади.

Юртбошимизнинг бу иши замирида ҳам ўзига хос ҳикмат мужассам. Зотан, шоиру ёзувчилар ҳар доим элнинг дарди билан яшаб, элнинг орзу-армонларини куйлаб, халқни, ёшларни эзгуликка, хайрли ишларга, ватанпарварликка ундаб ҳар доим Она Ватан шарафини тараннум этиб келган.

Турк назмида чу тортиб алам,

Айладим ул мамлакатни якқалам,

дея ўзининг бажарган хизмати билан ҳақли равишда фахрланган ҳазрат Навоий тилимизнинг обрўси учун курашишга умрини бағишлаган бўлса, Абдурауф Фитрат, Чўлпон, Абдулла Қодирий, Усмон Носир, Абдулла Авлоний ва яна кўплаб адибларимиз миллат ва юрт озодлиги учун жон фидо қилиб, мустабид тузум истилосига қарши курашиш учун халқнинг қалбида озодлик туйғуси жўш уриши йўлида жидду жаҳд этдилар...

Улардан кейинги авлод  – Ҳамид Олимжон, Ғафур Ғулом, Ойбек, Саид Аҳмад ва бошқаларнинг эса баъзилари умрининг узоқ йилларини қамоқда ўтказди, баъзилари ҳар тунда энди мени ҳам олиб кетади деган қўрқув-ваҳима остида яшади. Лекин улар ана шундай даҳшатли шароитда ҳам ижод қилишдан тўхтамади, халқнинг дардини айтишга, миллатнинг ўзлигини сақлашга тарғиб этишга жасорат топа олди.

Абдулла Орипов, Эркин Воҳидовлар авлоди ҳам қаттиқ сиқув остида ижод қилганидан хабаримиз бор. Лекин ана шу дилбар шоирлар шу қадар ажойиб шеърлар ёздики, жаҳон адабиётининг энг машҳур намоёндалари ҳам улардан ўтказиб шеър айта олгани йўқ.

Адиблик – қисмат. У миллат ва Ватан учун қалбидаги энг теран туйғуларни  бахшида этиш қисмати. Шунинг учун ҳам муҳтарам Президентимиз жорий йилнинг 18 апрелида “Алишер Навоий номидаги Ўзбекистон Миллий боғи ҳудудида Адиблар хиёбонини барпо этиш тўғрисида”ги қарор қабул қилди. Ушбу хиёбон нафақат юртимиз, балки жаҳоннинг турли мамлакатларидан меҳмонлар ва сайёҳлар ташриф буюрадиган ҳар томонлама гўзал ва бетакрор масканга айлантирилиб, маънавий ҳаётимизда ўчмас из қолдирган атоқли сўз санъаткорларининг тарихий хотирасини абадийлаштириш мақсадида барпо этилмоқда.

Дарҳақиқат, бу борада олиб борилаётган ишларнинг моҳиятида бу ерга ташриф буюрувчи сайёҳлар фақат томоша қилиш билан чекланиб қолмайди, балки ўтган адибларимиз хотираси ҳурматидан зиёрат ҳам қилади. Ўтганларни хотирлаб, уларнинг руҳига бағишлаб тиловат ва дуолар қилади.  Бу эса ўз навбатида зиёрат туризми равнақига ҳам ҳисса бўлиб қўшилади.

Давлатимиз раҳбари қарорида Адиблар хиёбонидан Ўзбекистон Ёзувчилар уюшмаси учун  бино қуриш масаласи ҳам бор эди. Ушбу бино қуриб битказилди. Президентимиз Ўзбекистон Ёзувчилар уюшмасининг замонавий биноси билан танишди, ёзувчи-шоирлар билан мулоқот қилди.

Икки қаватли замонавий бинонинг биринчи қаватида "Жаҳон адабиёти", "Шарқ юлдузи", "Ёшлик" журналлари таҳририяти, "Ижод" жамоат фонди, 150 ўринли фаоллар зали жойлашган. Иккинчи қаватда Ўзбекистон Ёзувчилар уюшмасининг бошқаруви маъмурияти, турли тадбирлар, учрашувлар ўтказиладиган битта 50, иккита 30 ўринли заллар ўрин олган. Бинонинг ертўла қисмида кутубхона, музей бор.
– “Биз доимо зиёлиларни, ижодкорларни қўллаб-қувватлашимиз керак”, – деди Шавкат Мирзиёев. – Улар яратган ибратли асарларни, шеърларни ёшларимиз қанча кўп ўқиса, маънавияти, маърифати юксалади, демакки, ватанпарвар бўлади. Ватанпарварлар қанча кўп бўлса, мамлакатимиз ҳам шунча тез равнақ топади.
Бинобарин, ижодкорларга муносиб шароит яратилса, улар эркин ижод қилади. Юртбошимизнинг ташрифидан руҳланган ижодкорлар суҳбат чоғида яратилган шароит, юксак эътибор учун давлатимиз раҳбарига самимий миннатдорлик билдириб, халқимиз маънавиятини бойитиш, ёш иқтидорларни юзага чиқариш борасида бор куч-ғайратини ишга солишларини таъкидлади.

Хиёбонда улуғ адибларимиз Абдулла Қаҳҳор, Ойбек, Саид Аҳмад ва Саида Зуннунова хотираларига бағишлаб ўрнатилган ёдгорлик мажмуалари қаторига Ўзбекистон Қаҳрамони, атоқли олим ва жамоат арбоби Озод Шарафиддинов, Ўзбекистон Қаҳрамонлари, халқ шоирлари Эркин Воҳидов ва Абдулла Орипов, Ўзбекистон халқ шоири Муҳаммад Юсуф хотирасига бағишланган ёдгорлик мажмуаларини барпо этиш, Ҳамид Олимжон, Ғафур Ғулом ва Зулфия мажмуаларини хиёбонга кўчириш бўйича амалий ишлар қизғин давом этмоқда.

Давлатимиз раҳбари ёдгорлик мажмуалари яратиш концепцияси ишлаб чиқишга алоҳида ёндашиш лозимлигини қайд этди.

Қарорнинг бошида айтилганидек, Алишер Навоий номидаги Ўзбекистон Миллий боғи мустақиллик йилларида халқимизнинг бунёдкорлик салоҳияти билан тобора чирой очиб бормоқда.

1991 йили Миллий боғ ҳудудида буюк шоир ва мутафаккир Алишер Навоийнинг муаззам ҳайкали барпо этилгани, таъбир жоиз бўлса, ана шу ишларнинг дебочаси эди. Насиб этса адибларимиз ана шундай муҳташам масканда, гўзал боғ ичида, қулай шароитларда ижод қилиб, ёшларимизнинг чинакам ватанпарвар, миллатпарвар инсонлар бўлиб етишишига хизмат қилади. Марҳум шоиримиз Эркин Воҳидов бир шеърида:

Мен шеър ёзсам, ўқисам уни,

Тинглаганлар қарсак чалмаса,

Бирор кимса бирор сўзини,

Ёдида ҳам сақлаб қолмаса,

Фақат биттагина бўз ўғлон

Уйга қайтгач, йиғласа тўлиб,

Йиғлаб-йиғлаб тонг бўзарган он

Уйғонса у Алпомиш бўлиб,

дея орзу қилганидек, бизнинг жамики адибларимиз ана шундай самимий орзу-ҳаваслар билан нафас олади.

Юртбошимиз 22 декабрдаги Мурожаатномасида айтганидек, ҳали бу юртдан яна Абдулла Ориповлар, Эркин Воҳидовлар етишиб чиқади. Бугунги бажарилаётган бунёдкорлик ишлари эса ана шундай эзгу ниятлар йўлидаги ишлардир.  

ЎМИ Матбуот хизмати

Жорий йилнинг 23 декабрь куни Тошкент ирригация ва қишлоқ хўжалигини механизациялаш муҳандислари институтида талаба ёшларнинг диний ва дунёвий билимларини янада ошириш, миллий қадриятларга бўлган ҳурматини юксалтириш, инсонлар ўртасида муомала маданияти ва айниқса, институтнинг ўрнатилган тартиб-қоидалари, кийиниш маданияти борасидаги билим, кўникмаларини ошириш ва уни тарғиб қилиш мақсадида худди шу ном остида маърифий-тарбиявий тадбир бўлиб ўтди.

Тадбирда Тошкент шаҳар бош имом-хатиби ўринбосари, “Ислом ота” жоме масжиди имом-хатиби Жасурбек Раупов иштирок этди. Тадбир давомида миллий қадриятлар ва ўзбекона одоб-ахлоқ, шарму ҳаё, миллий менталетитимизга хос бўлган фазилатларни ёшларимиз ўзларида шакллантиришлари лозимлигини, ота-боболаримиздан йиллар силсиласидан ўтиб бизгача етиб келган ўзига хос таълим-тарбия қоидаларига бўйсуниш, уни ҳурмат қилиш, қадрлаш ва фарзандларимизга етказишимиз лозимлигини ва айнан мана шу жиҳатлар Юрт тинчлиги, Ватан тараққиётида дастуруламал бўлиб хизмат қилишини таъкидлади.

Ж.Раупов айниқса, аёл-қизларимизнинг кийинишларида, жамоат жойларида ўзларини тутишларида мусулмон кишининг энг муҳим сифатларидан  бўлмиш ҳаё, иффат кўтарилиб кетаётганлигини тилга олиб, бу нафақат ўша қиз ёки аёлнинг балки, ўзгаларнинг ҳам гуноҳга ботишига сабаб бўлишини ҳадиси шарифлар билан таъсирчан тушунтириб берди.

Шариатимизда эркак ва аёлларнинг ўз кийиниш усуллари бор. Эркаклар хотинларнинг кийимини кийиши қанчалик хунук бўлса, эркакларнинг кийимларини кийган хотинлар ҳам шундай бўлади. Рус адиби Лев Толстой таъбири билан айтганда эркакка ўхшамоқчи бўлган аёл, худди хотинсифат эркак каби тасқарадир.

Тадбирда талаба-ёшлар мавзу юзасидан ўзларини қизиқтирган барча саволларга жавоблар олишди.

ЎМИ Матбуот хизмати