Ўзбекистон мусулмонлари идораси Масжидлар бўлими
muslim.uz
الخميس, 25 نيسان/أبريل 2019 00:00
ТИКА қўлёзма асарларни сақлаш ва таъмирлаш бўйича ўқув курс ташкил этди
Абу Райҳон Беруний номидаги Шарқшунослик институтида Туркия ҳамкорлик ва мувофиқлаштириш агентлигининг Тошкент ваколатхонаси ташаббуси билан 2019 йилнинг 17-27 апрель кунлари “Қўлёзма асарларни сақлаш ва таъмирлаш” мавзусидаги ўқув-амалий курс ташкил этилди. Унинг очилиш маросимида Туркиянинг Ўзбекистондаги Фавқулодда ва Мухтор элчиси Меҳмет Сурейя Эр жаноблари ва Туркия ҳамкорлик ва мувофиқлаштириш агентлигининг Тошкент ваколатхонаси раҳбари Али Эҳсон Чағлар иштирок этиб, икки давлат ўртасида турли соҳаларда олиб борилаётган ҳамкорликнинг ижобий натижаларига ва келгусидаги уфқларига алоҳида эътибор қаратдилар. Маданий мерос манбаларини ўрганиш, уларни сақлаш ва таъмирлаш амалиётлари икки тараф мутахассислари учун тажриба алмашинув мактаби бўлиб хизмат қилиши таъкидланди.
Мазкур ўқув-амалий курсида маърузачи сифатида Туркия қўлёзма асарлар кенгаши бошқармаси, Китоб шифохонаси ва архиви департаменти раҳбари Нил Байдар хоним ва Кўнё шаҳар қўлёзма асарлар минтақавий бошқармасининг бошлиғи Бекир Шаҳин жаноблари иштирок этмоқдалар.
Тадбирда Ўзбекистон мусулмонлари идораси, Ўзбекистондаги Ислом цивилизацияси маркази, Алишер Навоий номидаги миллий кутубхона, Ўзархив/Кинофото ҳужжатлари марказий архив, Ўзархив, Имом Бухорий халқаро илмий-тадқиқот маркази каби турдош ташкилотлардан соҳа мутахассислари иштирок этди.
Ўзбекистон мусулмонлари идораси Матбуот хизмати
Published in
Ўзбекистон янгиликлари
الخميس, 25 نيسان/أبريل 2019 00:00
Фиқҳ фани бўйича энг яхши мударрислар баҳслашмоқда
Ўзбекистон мусулмонлари идораси тасарруфидаги олий ва ўрта махсус диний таълим муассасаларининг педагог-ўкитувчилари ўртасида жорий йилнинг 25 апрель куни Тошкент ислом институтида "Йилнинг энг яхши фиқҳ фани ўқитувчиси" танловининг республика босқичи юқори савияда ўтказилди.
Юртимизнинг турли диний таълим муассасаларидан ташриф буюрган устозлар мусобақада қуйидаги шартлар бўйича беллашдилар:
1-шарт: очиқ дарс ўтиб бериш;
2-шарт: замонавий фиқҳий масалага ечим топиш;
3-шарт: иккита фиқҳий саволга жавоб бериш;
4-шарт: тезкор савол-жавоб.
Мусобақа натижалари ва ғолиблар номи яқин вақтлар ичида порталимизда эълон қилинади.
Ўзбекистон мусулмонлари идораси Матбуот хизмати
Published in
Ўзбекистон янгиликлари
الخميس, 25 نيسان/أبريل 2019 00:00
Диний таълим муассасалари талабалари ўртасида ўтказилган спорт мусобақалари ғолиблари аниқланди
Жорий йилнинг 24 апрел куни “Кўкалдош” ўрта махсус ислом билим юрти мезбонлигида “Жар” спорт соғломлаштириш комплексида Ўзбекистон мусулмонлари идораси тасарруфидаги диний таълим муассасалари талабалари ўртасида “Баркамол авлод – 2019” спорт мусобақасининг республика босқичи ўтказилди. Тадбирда Вазирлар маҳкамаси ҳузуридаги Дин ишлари бойича қўмита раиси ўринбосари Музаффар Комилов, Ўзбекистон мусулмонлари идораси раиси ўринбосари Шайх Абдулазиз Мансур, таълим бўлими мудири Салоҳиддин Шерхонов, Халқаро ислом академияси проректори Шоислом Акмалов, диний таълим муассасаларининг раҳбарлари ва бошқа меҳмонлар ташриф буюришди.
Давлатимиз раҳбари томонидан илгари сурилган беш муҳим ташаббуснинг иккинчиси – ёшларни жисмоний чиниқтириш, уларнинг спорт соҳасида қобилиятини намоён қилишлари учун зарур шароитлар яратиш ташаббусини қўллаб-қувватлаш мақсадида ўтказилган ушбу маданий-спорт тадбирининг тантанали очилиш маросими бўлиб ўтди. Тадбир Республикамиз мадҳияси билан бошланди.Тадбирни очиб бериш учун билим юрти мудири Муҳаммадамин Насриев сўзга чиқдилар ва ўзларининг самимий тилакларини билдирдилар. Байрамона тадбир билан барча меҳмонлар ва иштирокчиларни қутладилар. Ўзбекистон мусулмонлари идораси раиси ўринбосари Шайх Абдулазиз Мансур сўзга чиқиб муқаддас динимизда мўмин-мусулмонларни бадантарбия, отда чопиш, пойгада мусобақалашиш, сувда сузиш, мерганлик, ақлни чиниқтириш каби машқлар билан мунтазам шуғулланиб юришга тарғиб қилинганлига, ҳозирги кунимизда соғлиқни сақлаш, хасталикка чалинмаслик учун бадантарбия қанчалик аҳамиятли эканлигини, каттаю кичик иложи борича бадантарбияга эътибор бериш лозимлигини таъкидлаб ўтди. Бу ҳақда Пайғамбаримиз соллаллоҳу алайҳи васалламнинг қуйидаги ҳадисларини: Оиша онамиз розияллоҳу анҳо ривоят қилади: «Набий соллаллоҳу алайҳи васаллам мен билан мусобақалашган эдилар, мен у зотдан ўзиб кетдим. Бир муддатдан сўнг мени жисмим оғирлашганида яна мен билан мусобақалашиб, мендан ўзиб кетдилар ва “ҳалиги билан биру бир”, дедилар» (Аҳмад ва Абу Довуд ривоят қилишган) айтиб бердилар.
Тадбир давомида Вазирлар маҳкамаси ҳузуридаги Дин ишлар бўйича қўмита раиси ўринбосари Музаффар Комилов сўзга чиқиб диний таълим соҳасидаги эришилаётган ютуқлар ва ислоҳотлар ҳақида малумот бериб ўтдилар. Ушбу тадбир давлатимиз раҳбари томонидан илгари сурилган беш муҳим ташаббуснинг иккинчиси – ёшларни жисмоний чиниқтириш, уларнинг спорт соҳасида қобилиятини намоён қилишлари учун зарур шароитлар яратиш ташаббусининг амалий ижроси эканлигини таъкидлаб ўтдилар.
Тадбир давомида “Жар” спорт соғломлаштириш комплексининг спортчи-тарбияланувчиларининг бадиий чиқишлари бўлиб ўтди. Сўнгра мусобақанинг асосий қисми бошланди. Иштирокчилар спортнинг стол тенниси, тош кўтариш, кураш, шахмат турлари бўйича ўз кучларини синовдан ўтказишди. Мусобақа жараёнларини адолатли баҳолаб бориш мақсадида тажрибали спорт мутахассислари-ҳакамлар ҳайъати жалб этилди.
Айниқса, мусобақага ташриф буюрган Ахрор бахши томонидан ижро этилган халқ достонлари барчанинг кўнглига хурсандчилик улашди.
Муросасиз кечган баҳсларда иштирокчилар фаол иштирок этиб, ҳакамлар ҳайъати томонидан ғолиблар аниқланди. Ғолибларни қуйидаги жадвал кўринишида тақдим этамиз:
Шахмат бўйича совриндорлар
1. Охунов Бобиржон - Мир Араб ўрта махсус ислом билим юрти
2. Иброҳимов Исмоил - "Кўкалдош" ўрта махсус ислом билим юрти
3. Атовуллоев Абдураҳмон - Мир Араб олий мадрасаси
Аёл-қизлар ўртасида шахмат бўйича ғолиблар:
1. Ахмеджонова Комила - Хадичаи Кубро аёл-қизлар ўрта махсус ислом билим юрти
2. Акбарова Ҳавасхон - Тошкент ислом институти аёл-қизлар жамоаси
3. Амирова Ойгул - "Жўйбори Калон" аёл-қизлар ўрта махсус ислом билим юрти
Стол тенниси бўйича совриндорлар
1. Аметниязов Ильяс - Муҳаммад ал-Беруний ўрта махсус ислом билим юрти
2. Мўйдинов Абдулҳамид - Мир Араб ўрта махсус ислом билим юрти
3. Жиемуратов Ажинияз - Тошкент ислом институти
Аёл-қизлар
1. Саъдуллаева Осима - "Жўйбори Калон" аёл-қизлар ўрта махсус ислом билим юрти
2. Муҳаммадодилова Ислома - Хадичаи Кубро аёл-қизлар ўрта махсус ислом билим юрти
3. Козимий Мухлиса - Тошкент ислом институти аёл-қизлар жамоаси
Тош кўтариш бўйича совриндорлар
1. Жуманов Бахтыбай - Муҳаммад ал-Беруний ўрта махсус ислом билим юрти
2. Аслиддинов Тожиддин - Тошкент ислом институти
3. Чориев Махмуд - Мир Араб ўрта махсус ислом билим юрти
Миллий кураш бўйича совриндорлар
1. Гадаев Фурқат - "Кўкалдош" ўрта махсус ислом билим юрти
2. Мадаминов Мансуржон - Фахриддин ар-Розий ўрта махсус ислом билим юрти
3. Далибаев Ануар - Муҳаммад ал-Беруний ўрта махсус ислом билим юрти
Жамоавий таркиб бўйича совриндорлар
1. Муҳаммад ал-Беруний ўрта махсус ислом билим юрти (2 та олтин, 1 та бронза )
2. Мир Араб ўрта махсус ислом билим юрти (1 та олтин, 1 та кумуш, 1 та бронза)
3. "Кўкалдош" ўрта махсус ислом билим юрти (1 та олтин, 1 та кумуш)
Мусобақа ғолиблари Ўзбекистон мусулмонлари идораси томонидан диплом, фахрий ёрлиқлари ва қимматбаҳо эсдалик совғалари билан тақдирланди.
Ўзбекистон мусулмонлари идораси Матбуот хизмати
Published in
Ўзбекистон янгиликлари
الخميس, 25 نيسان/أبريل 2019 00:00
Ўқувчиларга глобал муаммо хавфи ҳақида тушунтириш берилди
Инсон учун ўз ҳаётиданда азизроқ нарса йўқ. Аллоҳ таоло томонидан ато этилдиган умр неъмати унинг учун энг катта омонат ҳисобланади. Шу боис ислом шариати инсоннинг шаъни, молига, жони ва насабига тажовуз қилишга олиб келадиган барча ишларни ман қилиб қўйди. Бу ҳақда муқаддас манбаларимизда шундай дейилади. Қуръони каримнинг “Бақара” сураси 195-оятида шундай марҳамат қилинади: “Ўз қўлларингиз билан ўзларингизни ҳалокатга ташламангиз”.
Ўзбекистон мусулмонлари идораси Масжидлар бўлими мудири, “Дўмбиробод” жоме масжиди имом-хатиби Муҳаммадназар домла Қаюмов Тошкент шаҳридаги 131-сонли умумий ўрта таълим мактабида “Ўз жонига қасд қилиш оғир гуноҳ” мавзусида юқори синф ўқувчиларига диний-маърифий суҳбат ўтказди.
Имом-хатиб: “Нима учун ушбу мавзу тез-тез тадбирларда такрорланяпти? Чунки ўз жонига қасд қилиш ва бунга уриниш ҳолатлари жаҳон бўйлаб кўпайиб, глобал муаммога айланди. Ўзимизда ҳам бу гуноҳи азимга қўл ураётган кимсаларни эшитиб қоляпмиз.
Жаҳон Соғлиқни сақлаш ташкилоти берган баёнотга қараганда, ҳар йили 800 мингдан ортиқ киши ўз жонига қасд қилади. Яъни ҳар 40 дақиқада бир кишининг ўз жонига қасд қилишини англатади”, дея маълумот бериб динимизда ўз жонига қасд қилишнинг оғир гуноҳлиги тўғрисида ҳадиси шарифлар ва ҳаётий ибратлар билан ўқувчиларга тушунтириб берди. Тадбир якунида имом домла мактаб кутубхонасига “Ўз жонига қасд қилиш оғир гуноҳ” номли китобни ҳадя қилди.
Published in
Ўзбекистон янгиликлари
الخميس, 25 نيسان/أبريل 2019 00:00
Ўзбекистонда Ислом банк-молия тизимини жорий қилиш йўлида
Ислом тараққиёт банкининг Ўзбекистондаги вакили томонидан махсус сўровнома эълон қилинди. Унда Ўзбекистонда ислом банк-молия тизимини жорий этишда вужудга келиши мумкин бўлган муаммолар ва уларнинг ечимлари, ҳамда соҳанинг ривожланиш истиқболлари ҳақидаги турли хил қарашлар ва фикрлар ўрганилади.
Ушбу сўровнома Ўзбекистонда ислом банк-молия тизимини жорий қилиш имкониятлари, муаммолари ва уларнинг ечимларини ўрганишга катта ҳисса қўшади, деган умиддамиз. Тўлдирилган сўровномалар махфий сақланади ва сўровномада иштирок этган шахс хақидаги маълумот ҳам ошкор қилинмаслиги кафолатланади.
Сизнинг сўровномада қатнашишингиз ҳам ихтиёрий бўлиб исталган вақтда ҳеч қандай жавобгарликсиз сўровномада иштирок этишни тўхтатишингиз мумкин.
Сарфлаган вақтингиз, саъй-ҳаракат ва эътиборингиз учун олдиндан миннатдорлигимизни билдирамиз.
Агар бирор саволингиз бўлса, мазкур рақамлар (+998712389797) ёки e-mail عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته. орқали Ислом тараққиёти банкининг Ўзбекистондаги вакиллик офисига мурожаат қилишингиз мумкин!
Қуйидаги линк орқали сўровномани тўлдиришингиз мумкин.
Ўзбекистон мусулмонлари идораси Матбуот хизмати
Published in
Ўзбекистон янгиликлари