Бугун, 26 июль куни Самарқанд вилоятида жойлашган Ҳадис илми мактабига ҳужжат топширган абитуриентлар учун “Ҳадис ва Мусталаҳул ҳадис” фанидан ижодий имтиҳон бошланди. Шу муносабат билан ўтказилган тадбирда диний соҳа раҳбарлари ва мутасадди вакиллари, имтиҳон олувчи педагог-ўқитувчилар ҳамда абитуриентлар иштирок этди.

Тадбир анъанага кўра Қуръони карим тиловати ва хайрли дуолар ила бошланди. Дастлаб Олий мактаб ректори Олимхон домла Юсупов қабул имтиҳонларини юқори савияда ўтказиш учун кўрилган тайёргарлик ишлари, имтиҳон жараёнида абитуриентлар учун яратилган шарт-шароитлар ҳақида маълумот берди.

Тадбирда сўзга чиққан Дин ишлари бўйича қўмита раисининг биринчи ўринбосари Давронбек Мақсудов ҳамда Ўзбекистон мусулмонлари идораси раисининг биринчи ўринбосари Ҳомиджон домла Ишматбековлар қабул имтиҳонларидан энг асосий мақсад абитуриентларнинг энг билимли ва зукколарини саралаб олиш экани, шу боис имтиҳонларни шаффоф, очиқ ва ошкора ўтказишга алоҳида эътибор берилиши зарурлигини қайд этди.

Сўнгра Диний идора Таълим ва илмий-тадқиқот бўлими мудири Салоҳиддин Шерхонов абитуриентларга ижодий имтиҳони ўтказиш тартиб-қоидалари ва баҳолаш мезонларини тушунтирди. Кейин қабул ҳайъати аъзолари, абитуриентлар ва ота-оналар гувоҳлигида имтиҳон билетлари солинган ва муҳрланган махсус қоплар очилиб, имтиҳон жараёнлари бошланди.

Эслатиб ўтамиз, шу йил 10 июль кунидан бошлаб Ҳадис илми мактабига ҳужжат топширган абитуриентлар учун “Араб тили”, “Ҳадис истилоҳлари”, “Ҳадис шарҳлари” ва “Ўзбекистон тарихи” фанлари бўйича масофавий тайёрлов курси ташкил этилди. Унда ижодий имтиҳон ва тест синовларини ўтказиш тартиб-қоидалари тушунтириб борилди.

Маълумот учун, эртага, 27 июл куни “Араб тили” ва “Ўзбекистон тарихи” фанларидан тест синовлари ўтказилади.

Бугунги ижодий имтиҳон очиқ ва шаффоф тарзда ўтказилмоқда. Мазкур жараённи қуйидаги линклар орқали онлайн кузатишингиз мумкин:

https://youtube.com/live/KL_9CgU0ayo?feature=share

https://youtube.com/live/04NZJP1E_OI?feature=share

https://fb.me/e/3O3cg3ebz?mibextid=RQdjqZ

https://us06web.zoom.us/j/87574287131?pwd=MWk2ZjlHcTBCbUlzZXMxL0hwS1BFZz09

Ўзбекистон мусулмолари идораси
Матбуот хизмати

Дунёдаги энг муҳим ва асосий мақсадимиз мазмунли ҳаёт кечириш ва ўзимиздан сўнг яхши ном қолдиришдир. У бу ишни турли кўринишларда амалга ошириш мумкин. Масалан, бирор касб танлашдан олдин у касб ўзгалар учун қандай манфаат келтириши ҳақида фикр юритишимиз керак. Фақат ўша касб ортидан келадиган даромад ёки обрў-эътиборни кўзлашимиз тўғри бўлмайди.

Мақсадимиз йўлида натижага эътибор қаратамиз. Кўпинча: “Қанча ҳаракат қилмай, барибир натижа бўлмаяпти” қабилидаги гапларни айтамиз. Бирор ўзгариш сезмасак, дарров тушкунликка тушамиз.

Ёдда тутайлик, натижа Аллоҳдан. Биздан талаб қилинадигани фақат интилиш. Бунга ёрқин мисол Пайғамбаримиз алайҳиссаломнинг ҳаётларидир. У зот алайҳиссалом бир неча йиллар давомида Макка аҳлини иймонга чақирдилар, аммо жуда озчилик мусулмон бўлди. Натижанинг озлиги Набий алайҳиссаломни мақсадларидан тўхтатмади. Рисолатни етказиш учун Тоифга бордилар. У ерда ўз юртларидан ҳам ёмонроқ муносабат кўрдилар. Тоиф аҳлидан ҳеч ким шаҳодат келтирмади. Набий алайҳиссалом илтижо қилавердилар.

Бундай қараса, ушбу сафардан ҳеч қандай натижа бўлмагандай кўринади. Аммо ўша вақт Расулуллоҳ соллаллоҳу алайҳи ва салламнинг яқинларидан бир тур жинлар ўтиб борарди. Улар Қуръонни у зот алайҳиссаломдан эшитиб, мусулмон бўлишди. Ҳатто шерикларини ҳам иймонга чақирувчи даъватчига айланишди. Натижада сон-саноқсиз жинлар Исломни қабул қилди. Бу ҳолатни Расули акрам соллаллоҳу алайҳи ва саллам ўз кўзлари билан кўрмаган бўлсалар ҳам, Аллоҳ таоло ваҳий орқали билдирди.

Ҳаракатларимиз ортидан ўзгариш сезмасак, бу  натижа йўқ эканини билдирмайди. Натижа ҳамиша бўлади!

Иброҳим алайҳиссаломнинг ҳаётларида ҳам бизга гўзал намуна бор. У зотга эргашувчилар жуда озчиликни ташкил этди. Кейин Халилуллоҳ бир ўлкадан бошқа ерга саёҳат қила бошладилар. Охир-оқибат саҳрода тўхтадилар. Одамларни Маккага боришларини сўраб, Аллоҳга илтижо қилдилар. Дуоларининг ижобатини ҳаётлик чоғларида кўрмадилар.

Бугун Ернинг ҳеч бир қитъасида иймон келтирмаган, Каъбага интилмаган мусулмон топилмаса керак. Аллоҳнинг уйига жисмонан боришмаса ҳам, қалблари ўша ерда. Бу Иброҳим алайҳиссаломнинг дуоларининг ижобати эмасми?

Шайх Муҳаммад Содиқ Муҳаммад Юсуф ҳазратларининг китоблари бугун деярли барчанинг севимли асарига айланган. Ҳаётлари давомида юздан ортиқ асар таълиф этган бўлсалар, барчаси ҳам халқнинг қўлига етишидан умид йўқ эди. Ўшанда ўзбек халқи эндигина атеистик тузумдан чиққан, Ислом динидан сабоқни аста-секинлик билан олишни бошлаши зарур бўлган. Аммо Ҳазрат халқнинг ҳаётида маънавият юксаладиган, илм ва маърифат ортадиган даврлар келишидан умидвор ҳолда ёзаверди. Натижа эса барчамизга маълум.

Парвардигор бизга расуллари ва солиҳ бандалари ҳаётида гўзал ибратлар кўрсатди. Шуни билишимиз лозим, биз натижадан эмас, балки қилган амалимиздан сўраламиз.

Моҳигул АНВАРОВА,

Имом Бухорий номидаги

Тошкент ислом институти

4- курс талабаси