24 июль куни Ўзбекистон Республикаси Президенти Шавкат Мирзиёев Туркия Республикаси Президенти Режеп Таййип Эрдоған ҳамда Бирлашган Араб Амирликлари Бош вазирининг ўринбосари, Президент ишлари бўйича вазир Шайх Мансур бин Зоид Ол Наҳаён билан телефон орқали мулоқот қилдилар.

Суҳбат аввалида БАА Бош вазири ўринбосари ва Туркия етакчиси давлатимиз раҳбарини туғилган куни билан самимий муборакбод этиб, Ўзбекистон Президентининг мамлакатларимиз ўртасидаги кўп қиррали муносабатларда бугунги юксак даражага эришишга қўшган шахсий ҳиссасини алоҳида қайд этди.

Телефон орқали мулоқот чоғида молия ва инновациялар соҳаларида, энергетика, нефть-газ ва кимё саноатида, транспорт, туризм ва ишбилармонлик инфратузилмасини модернизация қилиш, соғлиқни сақлаш ва бошқа йўналишларда инвестиция лойиҳаларини амалга ошириш масалаларига алоҳида эътибор қаратилди.

Ўзбекистон мусулмонлари идораси Матбуот хизмати

Бугунги кунгача 162 мамлакатдан 21000 дан ортиқ одамлар Саудия Арабистонида ташкил этилган иккита нуфузли мусобақада иштирок этиш учун ариза топширди. Жорий йилнинг бошида Қиролликнинг кўнгилочар бош маъмурияти раиси Турки ал-Шайх бошлаб берган Қуръон ва азон танловлари ғолибларига 1,9 миллион АҚШ доллари миқдоридаги пул мукофоти совға тариқасида тақдим этилади.

Ислом.уз хабарига кўра, ушбу ташаббус мусулмон олами маданиятининг хилма-хиллигини ёритишга қаратилган. Мусобақада иштирок этишни хоҳловчилар июль ойининг охирига қадар рўйхатдан ўтишлари лозим. Ҳозирги кунга қадар Қуръон тиловати мусобақасига 11000 дан ортиқ, азон мусобақасига эса 9000 киши қатнашиш учун аризалар тақдим қилган. Саҳнада жонли ижролар 24 августдан 24 сентябргача бўлиб ўтади. Финал босқичи эса 25 сентябрдан 25 октябргача давом этади ҳамда ғолиблар эълон қилиниб тақдирланади.

Ўзбекистон мусулмонлари идораси Матбуот хизмати

Nottingham шаҳридаги мусулмонларнинг ислом маданияти фестивали шаҳарнинг форрест майдончаси ҳудудида бўлиб ўтмоқда. Бу ҳақда iqna хабар беради.

Ушбу маросим Керимий хайрия жамғармаси томонидан ўтказилди. Бу маросим 2014 йилдан буён «Nottingham байрам фестивали» деб номланган.

Ташкилотчиларнинг таъкидлашича, ушбу фестивал барча оила ва турли дин вакиллари томонидан ижобий қарши олинди. Байрамнинг мақсади - кўнгилочар ва маданий тадбирлар, кичик бозор орқали ижтимоий ҳамжиҳатликни рағбатлантиришдан иборатдир.

Бундан ташқари, фестивалда исломий юртлардаги кийим-кечак, идиш-товоқ, заргарлик ва адабиётга оид дастурлар намойиш этилмоқда. Керимий хайрия жамғармаси маслаҳатлар бериш, болалар ва катталарни билимга йўналтириш, спорт тадбирлари ва маҳаллий жамоаларда динлараро ҳамкорликни ривожлантиришда фаол иштирок этмоқда.

Ўтган йилги фестивалда иштирок этган ишчи партияси депутати Норрис шундай деди: «Жамиятимизнинг Ислом динига хайрихоҳ бўлиши ва бу масалада билимга эга бўлиши муҳим саналади. Бу фестивалда қатнашиб завқ олдим ва ўйлайманки бу воқеа жуда фойдали бўлади».

Статистик маълумотларга кўра, Nottingham шаҳрида 30 минг мусулмон яшайди ва 32 та масжид фаолият юритиб келмоқда.

Ўзбекистон мусулмонлари идораси Матбуот хизмати

Ислом олами робитаси китоб ва суннатга хизмат қилиш ҳайъати Қирғизистон мусулмонлари идораси билан ҳамкорликда Қуръони каримни ёд олган қирқ етти қори шарафига Қуръон хатмонаси тадбирини ўтказди. Бу ҳақда ioqas.org манбасига таяниб quran.uz сайти хабар беради.

Қирғизистонда бўлаётган маросимнинг эътиборли томонларидан бири ҳофизи Қуръонларнинг етти нафари Пайғамбаримиз Муҳаммад соллаллоҳу алайҳи васалламга етиб борадиган силсилага боғланган ижозага эга бўлганидир.

Тадбирда сўзга чиққан ҳайъатнинг таълим ва илмий ишлар бўлими бошлиғи шайх Холид Абдулкафий маросим ёш Қуръон ҳофизларини икром қилиш учун ташкил этилганини таъкидлади.

Шунингдек, байрамона тадбирга Қирғизистон мусулмонлар идораси муфтий ўринбосари шайх Замир Рокиф ҳамда мадраса ва маъҳад устозлари ва масжид имомлари ташриф буюрди.

Ўзбекистон мусулмонлари идораси Матбуот хизмати

Ўзбекистон мусулмонлари идорасига қарашли Тошкент шаҳридаги «Усмон ибн Мазъун» жоме масжиди имом-хатиби вазифасида ишлаб келган Исҳоқжон Бегматов Олмазор туманидаги «Имом Термизий» жоме масжидига имом-хатиб этиб тайинланди.

Мазкур масжидда фаолият кўрсатган Роббимқул Муҳаммадиев Яккасарой туманидаги «Ракат» жоме масжидига имом-хатиб этиб тайинланди.

«Ракат» жоме масжиди имом-хатиби Ўткир Ҳакимов «Усмон ибн Мазъун» жоме масжиди имом-хатиб этиб тайинланди.

Ўзбекистон мусулмонлари идораси Матбуот хизмати