muslim.uz
Интиқлик ила кутилганган кунларга ҳам етиб келдик
Катта тайёргарлик ва интиқлик билан кутилган муборак ойга ҳам етиб келдик, алҳамдулиллаҳ! Кўтаринки руҳда бошланган хатми Қуръон ва таровеҳлар сабаб диёримиз файзу баракага бурканди, десак муболаға бўлмайди.
Ушбу муборак ойни муносиб кутиб олиш, хатми Қуръон ва таровеҳ намозларини янада файзли ўтказиш учун кенг кўламли ишлар амалга оширилди. Бу йилги Рамазон ойида Фарғона вилоятидаги 194 та масжидда хатми Қуръонлар бошланди. Уч юз элликдан зиёд хушовоз қорилар йигирма етти кун давомида таровеҳ намозларида халқимизга Қуръони каримни ўқиб берадилар. Бу эса жуда ҳам катта файз ва баракотга сабаб бўлажак, инша Аллоҳ!
Аллоҳ таоло Рамазон ойини барчамизга баракотли айлаб, унинг файзидан юртимиз нурга тўлсин!
Фарғона вилояти вакиллиги Матбуот хизмати
Янги “Оқ уй” жомеси Рамазонга муносиб ҳадя бўлди
Рамазон ойи арафасиа янгидан бунёд этилаётган, қайта қурилаётган масжидларни кўриб, кўзинг қувонади, беихтиёр шукроналар айтасан, киши.
Жорий йил 9 март куни пешин намозида Тошкент шаҳри Миробод туманида янги барпо этилган “Оқ уй” жоме масжиди давлат рўйхатидан ўтказилиб, намозхонлар ихтиёрига топширилди. Уни очилиш маросимида Ўзбекистон мусулмонлари идораси раиси ўринбосари Ҳомиджон домла Ишматбеков, диний соҳа вакиллари, маҳалла оқсоқоллари ва кўплаб намозхонлар иштирок этди.
Ҳомиджон домла йиғилганларни янги масжид ва Рамазони шариф билан қутлар экан, кейинги йилларда Раҳмат ойи арафасида масжидлар янги қиёфа акс этиши анъана тусига кириб бораётганини таъкидлади. Бундай ободлик ва диний равнақ бардавом бўлишини тилади. Шу билан бирга Аллоҳнинг байтини обод қилишнинг ажру мукофотлари улкан эканлиги ҳақида сўз юритиб, уларнинг ҳақларига дуо қилдилар.
Очилиш маросимида Ҳомиджон домла Ишматбеков шу пайтгача Тошкент шаҳридаги “Холид ибн Валид” жоме масжиди имом-хатиби бўлиб ишлаб келаётган Исроилжон домла Исмоиловни "Оқ уй" жоме масжидига имом-хатиб этиб тайинланганини жамоатга таништирди.
Эндиликда мазкур масжид қавми янги жомеда ибодатларни эмин-эркин, хушу-ҳаловатда адо этадилар, иншоаллоҳ.
“Оқ уй” жоме масжиди замонавий талаблар асосида барпо этилган масжидда намозхонлар учун барча қулайликлар ҳозирланган. Озода ва шинам таҳоратхона, маъмурий бинолар, кутубхона ва бошқа хизмат кўрсатиш хоналари мавжуд.
Аллоҳнинг байтини обод қилаётган азизларга Яратганнинг розилиги насиб қилсин, юртимиз фаровонлиги бардавом бўлсин!
Ўзбекистон мусулмонлари идораси
Матбуот хизмати
Ilm yetkazishda omonatdorlik!
عَنْ ابْنِ مَسْعُودٍ عَنِ ﷺ النَّبِيِّ قَالَ: نَضَّرَ اللهُ امْرَأً سَمِعَ مِنَّا شَيْئًا فَبَلَّغَهُ كَمَا سَمِعَ فَرُبَّ مُبَلَّغٍ أَوْعَى مِنْ سَامِعٍ. رَوَاهُ التِّرْمِذِيُّ وَأَبُو دَاوُدَ.
Ibn mas`ud roziyallohu anhudan rivoyat qilinadi:
«Payg‘ambar sollallohu alayhi vasallam: «Bizdan bir narsani eshitib, uni xuddi eshitganidek qilib yetkazgan odamni Alloh yorlaqasin, bas, ba’zi yetkazilgan odam eshituvchidan ko‘ra anglovchiroqdir», dedilar». Termiziy va Abu Dovud rivoyat qilishgan.
Payg‘ambarimiz sollallohu alayhi vasallam o‘zlaridan eshitilgan ilmni xuddi eshitgandek qilib boshqalarga yetkazishga targ‘ib qilmoqdalar va ortidan ana shu yetkazish tufayli keladigan foydalardan birini eslatib qo‘ymoqdalar. Eshitganlar qanday eshitsa shunday qilib yetkazib qo‘ysalar, o‘sha yetkazilgan odamlar ichidan o‘sha narsani bevosita eshitgan odamdan ham ko‘ra chuqurroq anglab yetadigan kishilar yetishib chiqishini bashorat qilmoqdalar.
Shuning uchun ham sahobai kiromlar Payg‘ambarimiz sollallohu alayhi vasallamdan qandoq eshitsalar shundoq rivoyat qilganlar. Rivoyatda biror narsani o‘zgartmaganlar. Agar ba’zi bir izoh uchun aytilgan qo‘shimcha so‘z yoki harakatlar bo‘lsa, ularni alohida aytib, qo‘shimcha ekanini bildirib qo‘yganlar. Ba’zi bir so‘zlarni aniq eshita olmagan bo‘lsalar, uni ham ta’kidlab qo‘yganlar. Bu ruh sahobalardan keyingi tobe’inlar avlodiga ham o‘tgan. Shundoq qilib, bu narsa avloddan-avlodga o‘tib, kitoblarga bitilib bizgacha yetib kelgan.
Birovdan eshitgan narsani buzmasdan xuddi o‘zidek qilib boshqalarga yetkazish ham juda ahamiyatlidir. Chunki birovdan eshitgan narsani o‘zidek qilib yetkazmaslik omonatga xiyonatdir, yolg‘onchilik va bo‘htondir. Bu ish ko‘plab tushunmovchiliklarga, bahslarga sabab bo‘ladi. Ayniqsa, shariatga tegishli narsada halolni haromga, haromni halolga, savobni gunohga, gunohni savobga aralashtirib yuborish mumkin.
Shuning uchun ham har bir eshitgan gapni boshqalarga yetkazayotganda o‘ta hushyor bo‘lish kerak. Bir so‘zni ham, hatto ohangni ham buzmasdan naql qilish talab etiladi.
Muhitdinov Alisher
“Hidoya” o'rta maxsus islom
bilim yurti o'qituvchisi
Muborak oy suhbatlari ko‘rsatuvining 2024 yilgi 1 soni
O'zbekiston musulmonlari idorasi raisining birinchi o'rinbosari Homidjon domla Ishmatbekov
Муборак ой кириб келмоқда!
Ойларнинг султони, яхшилик ва саховат, меҳр-мурувват ойи бўлган Рамазон соя солмоқда. Бутун ислом олами Рамазон ойини ҳар вақт хурсандчилик ва шодлик билан кутиб оладилар.Чунки бу ой тоат-ибодат,раҳмат ва барака мавсумидир.Бундан ҳам ортиқ хурсандчилик борми?
Аллоҳ таоло Қуръони каримда марҳамат қилиб:“Айтинг, Аллоҳнинг фазли ва раҳмати билан, бас, албатта, шулар сабабли мўминлар шодлансинлар. У тўплаган нарса (бойликлари)дан яхшироқдир”(Юнус сураси, 58-оят)деган.
Бу ой сабаб жаннат эшиклари очилади, дўзах эшиклари ёпилиб, шайтонлар кишанланади. Бу ҳақда Расулуллоҳ соллаллоҳу алайҳи васаллам: “Қачон Рамазон ойининг аввалги кечаси бўлса, шайтонлар ва ўзбошимча жинлар кишанланур. Дўзахнинг эшиклари ёпилур. Улардан бирор эшик очилмас. Жаннатнинг эшиклари очилур. Улардан бирор эшик ёпилмас. Бир нидо қилгувчи:«Эй, яхшилик истовчи, келиб қол! Эй, ёмонлик истовчи, бас қил!» деб нидо қилур. Аллоҳнинг дўзахдан озод қилинган(банда)лари бўлур. Ҳар кеча шундоқ бўлур”, дея умматни фурсатни ғанимат билишга ундаганлар.
Демак, ана шундай улуғ онларда, жаннатлар очилган, дўзахлар ёпилган, шайтонлар кишанланган, Аллоҳнинг раҳмати ёғиб турган лаҳзаларда қилинган ибодатнинг самараси ҳам ўзгача бўлади, ибодатни мукаммал бажариш ҳам бандаларга осонроқ кечади. Қолаверса, банда ўзини тарбиялаши учун бу катта имконият ва фурсатдир.
Ушбу муборак ойда рўза тутиш билан инсон ўз нафсини тарбиялайди. Нафси устидан ғолиб келиб, руҳи енгил тортади. Фақат рўза тутувчигина бунинг руҳий лаззатини ҳис эта олади. Рўзада инсоннинг руҳи нафсини жиловлайди. Бу илоҳий тарбия ойида рўзадор киши ёлғон гапириш, ғийбат, туҳмат, чақимчилик ва уруш-жанжал каби иллатлардан сақланиб, доимо тилини ёмон сўзлардан, беҳуда гаплардан тиймоғи лозим. Зеро, кимки рўзадор бўлатуриб, ёлғончилик, чақимчилик ва ғийбатдан тўхтамаса, унинг оч-наҳор юриб рўза тутганидан фойда йўқ.
Рамазоннинг яна бир фазилати шуки, бу – маънавий покланиш ва ахлоқни сайқаллаш ойи. Рўзадор киши ўзини нафақат еб-ичишдан, балки номаъқул гап-сўз ва ишлардан ҳам тиймоғи лозим. Афсуски, бу ҳақиқатни унутиб қўйиб, рўзадор бўлишига қарамай кун бўйи беҳуда, ёлғон ва ғийбат гап-сўзлар, номаъқул ишлар билан машғул бўладиган ёки одамлар билан талашиб-тортишадиганлар ҳам йўқ эмас. Ваҳоланки, бундай ишлар рўзанинг савобини кетказади. Расулуллоҳ соллаллоҳу алайҳи ва саллам: “Ким ёлғон гапиришни, унга амал қилишни тарк қилмаса, унинг рўза тутиб, ейиш ва ичишдан тийилишига Аллоҳ муҳтож эмас”, – деганлар. Бошқа бир ҳадисда эса“Агар бирортангиз рўзадор бўлса, беҳаё сўзларни гапирмасин ва жоҳиллик ҳам қилмасин. Агар биров у билан сўкишмоқчи ёки уришмоқчи бўлса, “мен рўзадорман, мен рўзадорман”, десин” дейилган.
Ҳар бир инсон яхши амалларни адо этар экан, унинг Аллоҳ ҳузурида қабул бўлишини умид қилади. Бунинг учун, аввало, ҳар бир амални ихлос билан бажариши лозим.
Анас розияллоҳу анҳудан ривоят қилинган ҳадиси шарифда Расулуллоҳ соллаллоҳу алайҳи васаллам: “Энг афзал садақа Рамазондаги садақадир”, деганлар.Чунки Парвардигорнинг бундай ваъдаси бор: “Кимки (бир) ҳасана (савобли иш) қилса, унга ўн баробар (кўпайтириб ёзилур). Кимки (бир) ёмон (гуноҳ иш) қилса, фақат ўша (гуноҳ) миқдорида (бир гуноҳга яраша) жазоланур. Уларга ноҳақлик қилинмагай”(Анъом сураси, 160-оят).
Ҳақиқатан, бирор кишига бир нарсани эҳсон қилсангиз ёки унга бирор яхшилик кўрсатсангиз, бундан дилингиз равшан тортади, руҳий хотиржамлик юзага келади, ўзгаларга манфаат етказганингиздан хурсанд бўласиз. Эҳсон қилинган киши ҳам ўзига кўрсатилган яхшиликдан севинади, дилида сизга муҳаббат пайдо бўлади, агар сизга ичида сақлаб юрган кеки бўлса, унутади. Шу тариқа жамиятда кишилар ўртасида тотувлик, ҳурмат-эҳтиром пайдо бўлади, душманчиликлар барҳам топади, осойишталик ва фароғат барқарор бўлади. Шундай экан, ўзимиз яшаётган маҳаллаларда кам таъминланган оилаларни, боқувчисини йўқотган фуқароларни ва ёлғиз кексаларни яхши биламиз. Биз уларга қўлимиздан келганича моддий ёрдамларимизни кўрсатиб, Аллоҳ таоло томонидан бериладиган ажру-савобларга эга бўлайлик.
Фурсатдан фойдаланиб, Ўзбекистон мусулмонлари идораси Фарғона вилояти вакиллиги барча мўмин-мусулмон халқимизни моҳи Рамазон билан чин дилдан муборакбод этади. Аллоҳ бу ойни барчамизга хайрли ва баркотли айласин!
Убайдуллоҳ АБДУЛЛАЕВ,
Фарғона вилояти бош имом-хатиби