Бугун, 31 январь куни пойтахтимиздаги “Wyndham Tashkent” меҳмонхонасида “Ўзбекистондаги Ислом цивилизацияси тарихи музейини шакллантиришга оид долзарб масалалар” мавзусидаги республика илмий-амалий анжуман бўлиб ўтди.

Мазкур анжуманда Ўзбекистондаги Ислом цивилизацияси маркази директори Шоазим Миноваров, Ўзбекистон мусулмонлари идораси раисининг биринчи ўринбосари Ҳомиджон домла Ишматбеков, Фанлар академияси вице-президенти Баҳром Абдуҳалимов, Дин ишлари бўйича қўмита раисининг биринчи ўринбосари Давронбек Махсудов, шунингдек, олимлар, соҳа мутахассислари, тадқиқотчилар иштирок этишди.

Анжуман давомида Диний идора раисининг биринчи ўринбосари Ҳомиджон Ишматбеков сўзга чиқиб, Ўзбекистондаги Ислом цивилизацияси маркази фаолиятининг йўлга қўйилиши юртимиздаги хайрли ишларнинг узвий қисми экани, Ислом динининг асл моҳиятини халқимизга етказиш, азиз-авлиёлар меросини ўрганиш ва қадамжоларини обод қилиш борасида амалга оширилаётган ишлар юртимизни яна илм-фан марказига айлантиришга пойдевор бўлишини таъкидладилар.

Ҳомиджон домла Ишматбеков ўз сўзи давомида мазкур илмий-амалий конференция ўтказилишига сабаб бўлган Ислом цивилизацияси тарихи музейи ҳақида алоҳида тўхталар экан, жумладан бундай деди:

– Мазкур музей бебаҳо экспонатлар билан бойитиб борилаётгани қувонарли ҳол. Хусусан, аждодларимиз томонидан эрамизнинг биринчи асридан бошлаб ҳозирги кунигача илм-фан, маданият, адабиёт, мусиқа, шаҳарсозлик ва бошқа соҳаларда Ислом ва жаҳон цивилизациясига қўшган ҳиссаларини акс эттирувчи нодир ашёлар, тарихий ҳужжатлар, қўлёзма асарлари ушбу заллардан ўрин олади.

Маърифат масканига келувчилар ушбу музейда алломаларнинг илм-фан соҳаларида эришган ютуқлари ҳақида ҳикоя қилувчи асарлар билан танишади, мутафаккирларимиз баён этган соф ислом маърифатидан баҳраманд бўлади, иншоАллоҳ.

Шунингдек, анжуманда соҳа мутахассислари, олимлар ва тадқиқотчилар томонидан мавзу доирасида долзарб чиқишлар қилиш билан бирга муҳим фикр-мулоҳаза ва таклифлар билдирилди.

Ўзбекистон мусулмонлари идораси Матбуот хизмати

Агар ҳеч кимга ҳасад қилмасанг, сенга саодатнинг ярми мерос бўлади. Агар ўзингдан бошқага яхшиликни истайдиган бўлсанг, бахт-саодатнинг барчаси сенга мерос бўлади.

Донишмандлар ҳасад қилувчини огоҳлантириб қуйидагиларни айтганлар:
- Ҳасад савоб ишларни йўққа чиқаради.
- Ҳасад гуноҳ ишларга бошлайди.
- Ҳасад бировга зулм қилишга бошлайди.
- Ҳасад юзи қароликни келтириб чиқаради.
- Ҳасади бор кишининг дуо-ибодати қабул бўлмайди.
- Ҳасад эгасини фойдасиз ва оқибати йўқ ғам-ташвиш, қийинчиликларга солади.
- Ҳасад инсон қалбидан раҳмни чиқариб ташлайди.
Дунёнинг аввалида шайтон инсонга ҳасад қилди. Иблис ҳасад туфайли Аллоҳ таолога гуноҳкор, осий бўлди ва Аллоҳ таолонинг даргоҳидан лаънатланган ҳолда қувилди.

Ривоят қилинишича, Аллоҳ таоло Одам алайҳиссаломнинг ўғилари Қобил билан Ҳобилга қурбонлик қилишликни буюрди. Ҳобил ўз қўйларидан энг чиройлисини қурбонликка танлаб, қурбонлик қилди. Қобил деҳқончилигидаги энг ёмон маҳсулотни қурбонликка атади. Одам алайҳиссалом дуо қилдилар, осмондан олов тушиб, Ҳобилнинг қурбонлиги қабул бўлди. Ва Ҳобилнинг қурбонлиги қабул бўлиши билан Қобулнинг Ҳобулга нисбатан ҳасадини юзага келтирди. Қобул ҳасаддан тийилмади, у охир-оқибатда жиноятга қўл урди. Ер юзида энг аввал инсон қони ҳасад туфайли тўкилди.

Юсуф алайҳиссаломнинг кўрган тушлари сабаб акалари ҳасад қилдилар. Ва Юсуф алайҳиссаломни қудуққа ташлаб, уни бўри еди, деб зулм қилишди. Юсуф алайҳиссалом акаларининг ҳасади сабабли қилган зулмларига сабр қилдилар. Ва охир-оқибат сабр туфайли Юсуф алайҳиссаломнинг юзлари ёруғ бўлди, ҳасад қилган акалари эса ҳасадлари туфайли юзлари қаро бўлди.

Абу Лайс Самарқандий айтадилар:
«Уч кишининг дуоси қабул бўлмайди. Улар луқмаси нопок, ғийбатчи ва ҳасадчи кишилардир».
Донишмандлардан бири айтади: «Ҳасад қилувчи одамдан бахтсиз киши йўқ, чунки унга ҳар доим ғам-қайғу ҳамроҳ бўлади».
Донишмандлардан бири: «Ҳасад қилишдан сақлан, шунда қалбинг пок юради», дедилар.
Ҳасад инсонга хорлик келтиради. Ҳасад қилувчи кишининг соғлигига зарар беради.
Луқмони Ҳаким ўз фарзандларига насиҳат қилиб шундай дейди:
«Ўғлим, ҳеч қачон бировга ҳасад қилма, ҳасад ҳасадчининг соғлигига келган офатдир».

Ҳасадни амал билан даволаш қуйидагича:
Бунда ҳасад дардига мубтало бўлган шахс ҳасади унга қайси амални буюрадиган бўлса, ўшанинг аксини қилиши лозим бўлади. Мисол учун унга душманини ёмонлашни амр қилмоқда, у уни мақташга ўтсин. Ҳасади унга мутакаббирлик қилишни тавсия қилмоқда, у унга тавозуъ кўрсатсин.
Аллоҳ таоло барчамизни ҳидоят йўлидан адаштирмасин. Инсонларга яхшилик ва меҳр улашадиган шахслардан бўлишимизга муваффақ қилсин.

Хуршид Маъруф тайёрлади

Марокаш терма жамоаси ҳимоячиси Aшраф Ҳакими томонидан намуна олишга арзийдиган ҳаракат амалга оширилди. Aр-Риёдда бўлиб ўтган “Joy Awards” мукофотларини топшириш маросимида унга 2022 йилнинг энг яхши араб спортчиси сифатида мукофот топширилди. Бу соврин Яқин Шарқдан келган спортчиларга берилади.

Мукофотни олиш учун Ҳакими онаси ҳамроҳлигида ўрнидан турди ва дарҳол олган мукофотини унга топширди.

Эслатиб ўтамиз, Ҳакими Марокаш терма жамоаси сафида 2022 йилда Қатарда бўлиб ўтган жаҳон чемпионатида тўртинчи ўринни эгаллаган эди. Ўтган йили Ҳакими "ПСЖ" билан биргаликда Франция чемпиони бўлди ва мамлакат Суперкубогини қўлга киритди.

Халқаро алоқалар бўлими ходими И.Аҳмедов
тайёрлади.

Сўнгги йилларда ҳалол маҳсулотлар ва хизматлар бозори жадал ривожланиб бормоқда.
Бу жараёнда ўсиш суръати йилига 5 фоиздан 15 фоизгача кўтарилиб, глобал ҳалол саноатининг йиллик айланмаси 2 триллион долларни ташкил этди. 2024 йилга келиб бозор ҳажми 3,5 триллион долларга етиши кутилмоқда. Бу ҳақда Татаристон Республикаси Мусулмон диний идорасининг ҳалол қўмитаси хабар берди.
Ҳалол маҳсулотларнинг асосий бозорлари Саудия Арабистони ва БАА ҳисобланиб, Саудия Арабистони йилига 1,2 миллиард долларлик гўшт импорт қилади. Гўшт маҳсулоти эса жаҳон экспортида ҳалол маҳсулотлар улушининг тахминан 35 фоизини ташкил этади.
Россия Федерациясининг Россельхознадзор ташкилоти 2022 йилда Россиядан ҳалол маҳсулотлар экспорти деярли 50 фоизга ошганини хабар қилди. 2030 йилга келиб, 2020 йилга нисбатан Россия Форс кўрфази мамлакатлари ва Мисрга ҳалол маҳсулотлар экспортини 6 баравар ошириши мумкин.

Манба: iqna.ir