Шу йил 20 июль куни Ўзбекистон мусулмонлари идораси раиси биринчи ўринбосари Ҳомиджон домла Ишматбеков “Экстремизм ва терроризмнинг олдини олишда диний таълимнинг ўрни: Мустақил давлатлар ҳамдўстлиги тажрибаси” номли халқаро анжуманда онлайн тарзда қатнашди. Унда Россия, МДҲ давлатлари диний соҳа раҳбарлари, муфтийлар, профессорлар, илмий тадқиқодчилар иштирок этди.
Халқаро анжуманда нотиқлар мавзу доирасида маъруза билан қатнашди, ушбу йўналишда қўлланилаётган илғор тажрибалар билан ўртоқлашди, муаммоли вазиятлар муҳокама қилинди.
Хусусан, Ҳомиджон домла Ишматбеков ҳам халқаро анжуманда мавзуси доирасида маъруза билан қатнашиб, бугунги мураккаб даврда бутун дунёга катта ташвиш бўлиб турган экстремизм ва терроризмнинг туб илдизи жаҳолат экани, шу боис Ислом дини бу иллатларни диний таълим ва маърифат билан муолажа қилишга бутун инсониятни даъват этиши, ҳозирги кунда долзарб бўлиб турган масалаларни йирик уламолар, таниқли муфтийлар, дин ва давлат арбоблари муҳокама қилаётганлари тадбирнинг фойдалилиги ва нуфузини бир неча баравар оширишини таъкидлади ҳамда бу бўйича Ўзбекистон тажрибаси ҳақида маълумот бериб ўтди.
Халқаро анжуман иштирокчиларининг якдил фикрига кўра, мутаассиблик, экстремизм ва терроризмнинг олдини олиш, уларга қарши курашда тенгсиз омил бу соф диний таълимни рағбатлантириш ва жамиятда кенгроқ ёйиш экани таъкидланди ва бу борада ўзаро ҳамкорлик масалалари келишиб олинди.
Ўзбекистон мусулмонлари идораси Матбуот хизмати
