muslim.uz.umi
Бош имом-хатиб ўзи ўқиган мактабга кўчат ўтқазди
Ўзбекистон мусулмонлари идорасининг Қашқадарё вилоятидаги вакили, вилоят бош имом-хатиби Раҳматилло домла Усмонов Китоб туманидаги ўзи таълим олган 17-мактабга ташриф буюриб, унинг ҳовлисига 200 дона дарахт кўчати экилишига бош бўлди.
Раҳматуллоҳ домла юртимизда қизғин давом этаётган кузги "Яшил макон" умуммиллий лойиҳасига ҳамоҳанг равишда мазкур таълим муассасасининг ободлиги ва кўркамлигига ҳисса қўшди.
Ўзбекистон мусулмонлари идораси
Матбуот хизмати
Шайх Абдулфаттоҳ абу Ғудда ва Шайх Албоний ўртасидаги мунозара
Шайх Албоний ва ҳадис илмида усулий аллома бўлмиш шайх Абдулфаттоҳ Абу Ғудда ўртасида илмий мунозара бўлган эди. Бу хабарни менга вафотидан олдин шайх Муҳаммад Мунир раҳимаҳуллоҳ Мадина шаҳрига келганида айтиб берган эди.
Бу мунозара Риёз шаҳрида бўлди.
Шайх Абдулфаттоҳ:
– Сиз ҳадис илмининг олими ва муҳаддисмисиз?, – дея сўради.
Шайх Албоний:
– Шундай дейишади, – деб жавоб берди.
Шайх Абдулфаттоҳ:
– Унда бу илм санадларини қайси олимдан олгансиз, яъни қайси уламодан ўргангансиз?
Шайх Абдулфаттоҳ:
– Ҳадис илми ҳадис аҳлидан ўрганилмас экан, китобдан илм олган инсон муҳаддис ҳисобланмайди! – деди ва яна давом этди:
- Сиз наҳв ва сарф (араб тили грамматикаси) ва бошқа илмларда ҳам олиммисиз, деб сўради ва у ердагиларга "Саҳиҳул Бухорий"ни келтиришларини айтди. "Саҳиҳул Бухорий" китоби келтирилди.
Шайх Абу Ғудда китобнинг Ғазот бўлимини очиб, уни шайх Албонийга узатди ва:
– Бизга мана шу ҳадисни ўқиб беринг, – деди.
Шайх Албоний ҳадисни ўқий бошлади. Ҳадисдаги "ирбаъуу" калимасига етганида эса фатҳа билан "арбаъуу", дея ўқиди.
Ушбу калима фатҳа билан "арбаъуу" деб ўқилса "тўрт оёқлаб юринг", деган маънони ифодалайди. Агар касра билан "ирбаъуу", дейилса, унда "тўрт киши бўлиб юринглар", деган маънони англатади. (мазкур ҳадисда эса мулойим бўлинглар, деган маънода келтирилган).
Шунда шайх Абу Ғудда:
– Бўлди, сизнинг илмингиз даражасига "тўрт оёқлаб юриш"ингиз кифоя, илмда моҳир эмаслигингизга мана шу етади, – деди.
Сўнгра:
– Эй "тўрт оёқлаб юрувчи", бориб аввал луғат илмини ўрганинг, сўнгра эса ҳадис илми билан шуғулланасиз, – деди.
Аммо Саудлар оиласи ҳадис илмида илмсизликлари боис, шайх Албонийни Исломий университетда бир муддат ҳадис илми бўйича мударрис қилиб тайинлашди.
Ўша мударрислик муддатида Албоний шогирдларга бундай деган эди:
– Агар қўлимдан келганида эди, Мадина масжидидан Расулуллоҳнинг қабрини чиқариб ташлаб, масжиднинг яшил қуббасини бузиб ташлаган бўлар эдим.
Унинг шогирдларидан бири бўлмиш Жуҳаймон (Утайбий) эса 1400 ҳижрий йил бошида (1979 йил 20 ноябр) бомдод вақтида ҳарамга қурол-аслаҳали қўшин билан кириб Каъбатуллоҳни эгаллаб олди. Ҳарамнинг эшикларини ёпиб олиб, яқинларидан бирини “имом Маҳдий” дея эълон қилди. Каъбани тўплардан ўққа тутди. Ҳожи ва умрачилардан 1400 га яқин ҳалок бўлди ёки жароҳатланди.
Жуҳаймон бу ишларида Албонийдан олган дарсларига асосланган эди.
Ушбу фитнали ишларидан сўнг Албонийни Саудиядан чиқариб юборишди. Баъзи одамлар эса бу инсонга алданиб қолишган ва ҳануз алданишмоқда. Кўплаб олимлар, хусусан шайх Абдулфаттоҳ Абу Ғудда, шайх Абдуллоҳ Сирожиддин Ҳалабий бу ҳақда сўзлашган.
Бу инсон ҳақида шайх, муҳаддис Муҳаммад Аввома:
– Албоний Ислом умматини парчалаб ташлади, – деган эди.
Наманган шаҳрига янги бош имом-хатиб тайинланди
Бугун, 9 ноябрь куни Ўзбекистон мусулмонлари идорасининг Наманган вилоят вакиллигида вилоятда фаолият кўрсатаётган масжидлар имом-хатиблари иштирокида йиғилиш бўлиб ўтди.
Йиғилишда Наманган шаҳридаги “Боқи Полвон” жоме масжиди имом-хатиби вазифасида меҳнат қилиб келаётган Абдуллохон домла Саматов Ўзбекистон мусулмонлари идораси раиси, муфтий Шайх Нуриддин Холиқназар ҳазратларининг буйруқлари билан Наманган шаҳар бош имом-хатиби ва “Боқи Полвон” жоме масжиди имом-хатиби вазифасига тайинлангани эълон қилинди.
Абдуллохон домла Саматовга Наманган шаҳар бош имом-хатиби вазифасида фидокорона меҳнат қилиб, Наманган шаҳри имом-хатиблари билан ҳамжиҳатликда динимиз равнақи йўлида хизмат қилишларида Аллоҳ таолодан улкан муваффақиятлар тиланди.
Ўзбекистон мусулмонлари идораси
Наманган вилоят вакиллиги
Матбуот хизмати
Biz bir bo‘lsak – yagona xalqmiz, birlashsak – Vatanmiz!
Bugun, 10-noyabr kuni O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari talabalari o‘rtasida “Biz bir bo‘lsak – yagona xalqimiz, birlashsak – Vatanmiz” shiori ostida ma’naviyat marafonlari bo‘lib o‘tdi.
Mazkur marafon doirasida “Salomni unutish – o‘zlikni unutish” mavzusida talaba-yoshlar o‘rtasida ma’rifiy suhbatlar tashkil etildi. Shuningdek, ta’lim muassasalarida salom bilan bog‘liq milliy-axloqiy qadriyatlarimizni asrab-avaylash, ularni yoshlar qalbiga singdirishga qaratilgan ta’sirchan tadbir, talabalar o‘rtasida “Zakovat” intellektual bellashuvi, “Ma’naviy ekskursiya” loyihasi doirasida talabalarni teatr va muzeylarga sayohat, “Salomlashish – eng ulug‘ qadriyat”, “Fazilatli qiz”, “Fazilatli yigit”, “Hayo – qiz bolaning ziynati”, “Or-nomus – yigit ko‘rki” mavzularida talaba-yoshlar o‘rtasida davra suhbati, “Ajdodlar mardona, ruhi senga yor!” shiori ostida buyuk ajdodlarimiz merosi va jasorati haqida talabalar o‘rtasida she’rlar, devoriy gazeta tanlovi va viktorinalar o‘tkazildi.
Ko‘rik-tanlovlar yuqori saviyada va sifatli tashkil etilib, natijalarga ko‘ra g‘oliblikni qo‘lga kiritganlar munosib taqdirlandi.
A.Bobomirzayev,
O'zbekiston musulmonlari idorasi
Ta’lim va ilmiy-tadqiqot bo‘limi
metodisti
Ҳар инсон ва ҳар уйнинг тинчи бўлсин!
Инсоният учун энг муҳими - тинчлик. Бунга сўнгги пайтларда айрим давлатларда юз бераётган уруш, таҳликали вазиятлар, бундан азият чекаётган ўша давлатлар аҳолисининг аҳволини кўриб, қайта ва қайта ишонч ҳосил қилмоқдамиз.
Тинчлик бўлса, ҳар қандай муаммоларга ечим топиш мумкин. Дард чексанг ҳам тинчлик бўлса, даво топа оласан. Орзу-умидлар ҳам тинчлик бўлса кўнгилга сиғади ва амалга ошади.
Қолаверса, оилада тинчлик ва осойишталик ҳукм сурса, оила бардавом ва мустаҳкамдир. Эл-юртда тинчлик ва осойишталик давом этса, мамлакат тараққиёти, фаровонлиги, юрт аҳлининг турмуши обод бўлади. Айни шу боисдан нуронийларимиз дуолар аввалида албатта, юртга, хонадонларга тинчлик-хотиржамлик сўрашади.
Пайғамбаримиз саллаллоҳу алайҳи васаллам ҳадисларининг бирида тинчлик-хотиржамлик энг катта неъмат эканлиги таъкидланади: «Икки неъмат борки, кўпчилик инсонлар унинг қадрига етмайдилар. У - хотиржамлик ва сиҳат-саломатлик».
Дарҳақиқат, тинчлик қарор топган юртда хотиржамлик ҳукм суради, оқибатда, жамиятда ҳар томонлама юксалиш ва ривожланиш рўй беради. Одамларнинг ўзаро бир-бирларига бўлган ишонч ва садоқатлари, меҳр ва мурувватларининг самимий бўлиши ҳам асосан хотиржамликка боғлиқдир. Яратганга шукр, Ватанимизда тинчлик-осойишталик барқарор. Бу борада давлатимиз томонидан чуқур ўйланган сиёсат юритилмоқда. Давлатимиз чегаралари ҳам мустаҳкам. Кўп миллатли халқимиз аҳил ва ҳамжиҳат ҳаёт кечирмоқда. Барчмиз шундай тинч, осойишта ва фаровон ҳаётнинг қадрига етишимиз керак. Фаровонликка, осуда турмушимизнинг барқарорлигини таъминлашликга ўз ҳиссамизни қўшмоғимиз лозим. Негаки, бундай осуда ҳаёт, фаровон турмуш кўплар учун армон.
Пайғамбаримиз Муҳаммад (Соллоллоҳу алайҳи васаллам) билан саҳобалар бир куни суҳбатлашиб ўтирганларида, саҳобалардан бирлари: «Ё Расулуллоҳ (Соллоллоҳу алайҳи васаллам), биз Аллоҳ таолодан дуо қилиб сўраганимизда, кўпроқ нимани сўрайлик», деб савол беришганида, Пайғамбаримиз (Соллоллоҳу алайҳи васаллам): «Аллоҳ таолодан офият (тинчлик, хотиржамлик)ни сўранглар», деб айтганлар. Демак, инсоният учун тинчлик неъматлар ичра энг муҳими. Тинч юртга яна тинчлик сўраб дуо қилиш эса, тинчликнинг давомий бўлиши учун ҳам керакдир.
Биз юртимиз тинчлигини асраш, ёш авлодни маънавиятли, одобли, билимли қилиб тарбиялашимиз, ислом маданиятининг тинчлик, хотиржамлик, бағрикенглик, ўзаро тотувлик, меҳр-оқибатлилик каби эзгу ғояларини кенг тарғиб этишимиз лозим.
Ёшлар ўртасида соғлом турмуш тарзини қарор топтириш, уларни биз учун ёт бўлган ғоялар таъсирларидан ҳимоя қилиш, ёшларни ўз қатъий қарашлари ва эътиқодига эга инсонлар этиб тарбиялаш ҳар биримизнинг инсоний бурчимиздир. Бу - тинчликни асраш учун қўшилган улкан ҳиссамиз бўлади.
Нуруллоҳ Жамалов,
Наманган шаҳридаги «Яҳёхон Тўра» жомеъ масжиди имом хатиби
Мақолалар
