Аллоҳ таоло Қуръони каримда бундай марҳамат қилади: “…Йўлга қодир бўлган одамлар зиммасида Аллоҳ учун Байтни ҳаж қилиш (фарзи) бордир…” (Оли Имрон сураси, 97-оят).

Абу Ҳурайра розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Ким Аллоҳ учун ҳаж қилиб, фаҳш сўз айтмаса ва фисқу фасод қилмаса, худди онасидан янги туғилгандек бўлиб қайтади” (Имом Бухорий ривояти).

Ҳаж амали ўзининг эҳтиёжи ва қарамоғидагиларнинг нафақасидан ташқари ортиқча – Байтуллоҳга бориб келишга етарли маблағи бор ҳар бир ақли расо, болиғ (балоғатга етган), озод, соғлом мусулмонга (аёллар иддада бўлмаслиги ва уларга маҳрам-йўлдош ҳам бўлиши лозим) йўллар хатарсиз бўлса, ҳаж ибодатини кейинги йилга қолдирмай, адо этиш фарздир. Бундай шароитларда кечиктирса, гуноҳкор бўлади. Ҳаж ибодати умрда бир марта адо этиладиган фарз амалдир.

Ҳaж улуғ руҳий oзуқa бeрaдигaн ибoдaт бўлиб, ундa мусулмoн бaндaнинг вужуди Aллoҳ таологa тaқвo билaн, Унгa тoaт қилишгa aзму қaрор билaн, гунoҳлaригa нaдoмaт билaн тўлaди. Бу сaфaрдa мусулмон кишининг Aллoҳга, Унинг Рaсулигa вa мўмин-мусулмoнлaргa бўлган муҳaббaти зиёдa бўлади. Дунёнинг ҳaмма тaрaфлaридaги дин қaрдoшлaригa нисбaтaн дўстлик туйғулaри уйғoниб, мустaҳкaмлaнaди.

Ҳар бир зиёратчи ҳаж улуғ руҳий ва маънавий oзуқa бeрaдигaн ибoдaт эканлигини тушуниб етиши лозим. Ҳаж сафарига кетаётган кишилар Аллоҳ таолонинг меҳмонлари ҳисоблангани боис, улар ҳажнинг ҳар бир одобига қатъий риоя этишлари керак.

ҲАЖ САФАРИГА КЕТАЁТГАН АЁЛЛАР НИМАЛАРГА ЭЪТИБОР ҚАРАТИШЛАРИ ЗАРУР?

 Сафарга кетишдан олдин:

1. Ҳаж ибодатига кетаётган аёл аввало ниятини холис Аллоҳ учун қилиши керак.
2. Ҳажга доир адабиётлар билан танишиб чиқиши, соҳа мутахассисларидан айнан аёлларга хос масалалар бўйича маълумотлар олиши керак. Таҳорат, ғусл, таяммум, ҳайз ва нифосга доир масалаларни ўрганиб бориш зарур.
3. Доимо эсда сақлаш зарур: ҳайз кўрган ёки таҳоратсиз аёл масжидга кириши, Қуръон ўқиши, тавоф қилиши асло мумкин эмас!
4. Ҳаж сафарига кетаётган аёлларга нима нарсалар олиши кераклиги 1- иловада келтирилади.
5. Ҳанафий мазҳабига кўра, аёл зиёратчиларга маҳрам бўлиши шарт.
6. Зиёратчи қарзлари бўлса, қарзларини тўлаб, ота-онаси ёки кексалардан дуо олиб кетиши хайрли амаллардан ҳисобланади.
7. Сафарга кетишдан олдин ғусл қилиши ёки мукаммал таҳорат қилиб, 2 ракат намоз ўқиб, аэропортга йўлга чиқилади.

"Ҳажга кетаётган аёлларга тавсиялар" рисоласидан

Ўзбекистон мусулмонлари идораси 
Фатво маркази ва Хотин-қизлар масалалари бўйича бўлим

#MABRUR_HAJNING_MUKOFOTI_JANNAT!

Макка шаҳридаги Ҳаж амалини адо этиш учун борган зиёратчиларимиз ўзлари истиқомат қилаётган меҳмонхоналарда ҳозирланган шароитлардан мамнун бўлишмоқда.

Ушбу муборак шаҳарнинг жанубий Азизия минтақасида жойлашган турар жойлардан бири “Ar-Roshidiya” меҳмонхонаси Ҳарами шариф масжидидан 5,5 километр узоқликда бўлиб, Каъбатуллоҳга 24 соат давомида замонавий автобус қатнови йўлга қўйилган. Бу ҳожиларимизга исталган вақтда ибодатларини Масжидул ҳаромда адо этиш имконини беради.

Мазкур янги барпо этилган 16 қаватли меҳмонхонанинг фойелари кенг ва ёруғ бўлиб, ҳожиларимизга 40 та замонавий лифт хизмат кўрсатади. Меҳмонхонанинг 2300 дан зиёд тўрт кишилик хонаси 9 300 нафардан ортиқ ҳожини ўз бағрига олади.

Ҳар бир хонада кийим жавони, ёзув столи, совутгич ва музлатгич ҳам ҳозирланган. Шунингдек, қибла кўрсаткичи, жойнамоз, Қуръони карим ва телевизор ҳам мавжуд.
Бир вақтнинг ўзида 5 000 киши овқатланиши мумкин бўлган ошхонада зиёратчиларимиз ибодатга қувват бўладиган уч маҳал тансиқ таомлар, сархил мевалар, ширинликлару шарбатлар тортиқ қилинмоқда.

Меҳмонхонада тиббий марказ ва Ўзбекистон ишчи гуруҳи штаби ташкил этилган бўлиб, шифокор ва масъуллар 24 соат давомида узлуксиз зиёратчилар хизматида бўлмоқда.

Ўзбекистонлик зиёратчилар Мадина шаҳридан бирин-кетин Маккаи мукаррамага келиб жойлашаётган “Ar-Roshidiya”дан ташқари “Laba Darna”, “Abraj al-Dana”, “Ruba al-Hijaz” сингари меҳмонхоналар ҳақида ҳам келгусида маълумот берамиз.

Ўзбекистон мусулмонлари идораси
Матбуот хизмати

Мен фарзандларим тарбиясида ажойиб усулдан фойдаланаман. Рангли қоғозлардан бир нечта карточкалар тайёрлаб, уларнинг бир тарафига фарзандларимга ёқадиган мукофот турларини ёзиб чиқаман. Масалан: “15 дақиқа компютер ўйнаш”, “10000 жунайҳ (Миср пул бирлиги)”, “Музқаймоқ”, “Отам билан ҳайвонот боғига бориш”, “Дам олиш кунлари муз саройига бориш”, “Твикс”, “Скинкерс” ва шунга ўхшаш мукофотлар билан бир қанча карточкаларни тўлдириб чиқаман. Кейин буларга қўшимча тарзда фарзандларим ўзлари ёқтирган, кўнгиллари тусаган мукофотларни айтиб туришади. Уларни ҳам ёзиб мукофот карточкалари салмоғини кўпайтираман.

Кейин фарзандларимга ўз вазифаларини, мажбуриятларини вақтида бажаришса, ушбу карточкалардан бирини танлашлари мумкинлигини айтаман. Карточкаларни танлашдан олдин ёзилган мукофотлари кўринмайдиган қилиб ўгириб қўйилади. Шунда болалар “Менга бугун қандай мукофот чиқар экан-а!” деган қизиқиш билан ўз вазифаларини сусткашликка йўл қўймай бажаришади.

Масалан, беш вақт намозни ўз вақтида адо этсалар, улар олдимга келиб ўша карточкалардан бирини танлашади ва унда ёзилган мукофотга эга бўлишади. Беш маҳал намозни адо қилишга одатланиб бўлишгач, мукофот карточкаларидан Қуръон ёдлатишда ҳам фойдаланса бўлади.

Бундан ташқари мактабдаги ҳар кунлик вазифаларни бажаришга дангасалик қилган пайтларида ҳам бу карточкаларни қўллаш айни муддаодир. Таътил пайтларида эса болажонларни Қуръони Карим ёдлатишга, бадиий китоблардан бир қанчасини ўқиб чиқишга қизиқтириш керак. Бунда ҳар куни маълум миқдордаги бетни ёд олиш ёки мутолаа қилиш вазифа қилиб қўйилади. Кунлик вазифа бажарилиши эвазига эса карточкалардан бирини танлаш имконияти тақдим қилинади.   

Мен бу усулдан анчадан бери фойдаланаман. Бунинг самарасини ўз ҳаётимда кўрдим. Шу йўсинда болаларимни яхши ишларга одатлантиришга муваффақ бўлдим.

Доктор Абдуллоҳ Муҳаммад Абдулмуътининг

“Фарзанд тарбиясидан 700 та сабоқ” китобидан

Ғиёсиддин Ҳабибуллоҳ, Камронбек Ислом таржимаси.

#Диний_таълим_муассасаларига_оид_энг_муҳим_савол_жавоблар

– Ўзбекистон мусулмонлари идораси тасарруфида 3 та олий ва 10 та ўрта махсус ислом таълим муассасаси мавжуд.

Олий таълим муассасалари:
1. Имом Бухорий номидаги Тошкент ислом институти (Тошкент шаҳри);
2. Мир Араб олий мадрасаси (Бухоро шаҳри);
3. Ҳадис илми мактаби (Самарқанд вилояти).

Ўрта махсус ислом таълим муассасалари:
1. “Кўкалдош” (Тошкент шаҳри);
2. “Мир Араб” (Бухоро шаҳри);
3. “Саййид Муҳйиддин махдум” (Андижон вилояти);
4. “Ҳидоя” (Наманган шаҳри);
5. “Хожа Бухорий” (Қашқадарё вилояти);
6. “Фахриддин ар-Розий” (Хоразм вилояти);
7. “Муҳаммад ал-Беруний” (Нукус шаҳри);
8. “Имом Термизий” (Термиз шаҳри) ўрта махсус ислом таълим муассасалари фаолият юритади.

Шунингдек, 2 та аёл-қизлар ўрта махсус ислом таълим муассасаси бор бўлиб, улар қуйидагилар:
9. “Хадичаи Кубро” (Тошкент шаҳри) ва
10. “Жўйбори Калон” аёл-қизлар ўрта махсус ислом таълим муассасалари (Бухоро шаҳри).

2023 йилги ўрта махсус диний таълим муассасаларига қабул жараёни қай тартибда бўлади?

– Жорий йилда ҳам диний таълим муассасаларига абитуриентлардан ҳужжатларни қабул қилиш 20 июндан 20 июлга қадар давом этади.

Абитуриентлар ўрта махсус ислом таълим муассасаларининг қабул ҳайъатига қуйидаги ҳужжатларни тақдим этади:
– таълим муассасаси раҳбари номига ариза;
– паспорт ёки ID карта нусхаси (асли кўрсатилади);
– маълумоти тўғрисида аттестат ёки диплом (асл нусхаси);
– 3,5 х 4,5 ҳажмдаги 6 дона рангли фотосурат (сўнгги уч ойда олинган ва орқа фони оқ рангда бўлиши талаб этилади);
– чет тили билиши тўғрисидаги сертификат (маълумоти тўғрисидаги ҳужжатда кўрсатилган чет тилидан бошқа чет тили бўйича имтиҳон топширувчилар учун) асл нусхаси.

Ўрта махсус ислом таълим муассасаларига юртимиздаги ўрта, ўрта махсус, профессионал таълим муассасаларини тамомлагани тўғрисидаги ҳужжат (диплом)га эга бўлган фуқаролар қабул (тест синови) имтиҳонлари натижаларига кўра ўқишга қабул қилинади.

Мазкур диний таълим муассасаларига кириш учун имтиҳонлар қайси фанлардан бўлади?

– Ўрта махсус ислом таълим муассасаларига ҳужжат топширган абитуриентлар қуйидаги фанлар бўйича имтиҳон топширади:
1. Хорижий тил (тест синови) 30 Х 3,1 – 93 балл;
2. Тарих (тест синови) 30 Х 2,1 – 63 балл;
3. Маънавият ва маърифат (тест синови) 30 Х 1,1 – 33 балл.

Таъкидлаш жоиз, қабул имтиҳонлари саволлари умумий ўрта таълим мактабларининг ўқув дастурлари асосида тайёрланади.

Маълумот учун, ўрта махсус ислом таълим муассасалари қабул имтиҳонлари Ўзбекистон Республикаси Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги (эски номи Давлат тест маркази) томонидан тест синови шаклида ўтказилади.

Ўрта махсус ислом таълим муассасаларига хорижлик фуқаролар ҳам ҳужжат топширса бўладими? Уларнинг қабул ва имтиҳон жараёнлари қандай кечади?

– Хорижлик фуқароларни олий ва ўрта махсус ислом таълим муассасаларига қабул қилиш алоҳида низом асосида амалга оширилади. Айни пайтда хорижлик фуқароларни ўқишга қабул қилиш Имом Бухорий номидаги Тошкент ислом институти ва “Кўкалдош” ўрта махсус ислом таълим муассасасида жорий этилган.

Хорижлик фуқаролар диний таълим муассасаларига ўқишга кириш учун қуйидаги ҳужжатларни тақдим этади:
– Қабул ҳайъати раиси номига ариза;
– маълумоти ҳақидаги ҳужжатларнинг асл нусхаси;
– соғлиғи тўғрисидаги тиббий хулоса;
– миллий паспорт (амалдаги визаси билан);
– 6 дона рангли фотосурат (3,5 х 4,5 ҳажмдаги);
– фуқаролиги бўлган мамлакатнинг муфтийси (Агар ўша юртда бундай лавозим бўлмаган тақдирда дин ишлари бўйича тегишли давлат бошқаруви органи) томонидан берилган тавсиянома (ёки йўлланма).

Хорижлик фуқаролар диний таълим муассасаларига Ўзбекистон мусулмонлари идораси томонидан ўтказиладиган ижодий суҳбат (имтиҳон) натижаларига кўра ўқишга қабул қилинади.

Мазкур имтиҳон хорижлик фуқароларни ўқишга қабул қилиш бўйича Ўзбекистон мусулмонлари идораси тузилган Махсус комиссия томонидан амалга оширилади.

Ўзбекистон мусулмонлари идораси Матбуот хизмати
Muslim.uz | https://taplink.cc/muslimuz

Бугун, 7 июнь куни Ўзбекистон мусулмонлари идораси раисининг биринчи ўринбосари Ҳомиджон домла Ишматбеков фуқароларни қабул қилиб, уларнинг мурожаати ва таклиф-мулоҳазаларини тинглади.

Қабул жараёнида Фарғона, Жиззах, Сурхондарё, Андижон, Тошкент вилоятлари, Тошкент шаҳри ҳамда Қорақалпоғистон Республикасидан келган фуқароларнинг ҳаж ва умрага бориш, диний таълим муассасаларига ўқишга кириш, масжидлар ҳолати, оилавий масалалар, жарроҳлик амалиёти учун моддий ёрдам бўйича мурожаатлар кўриб чиқилди ҳамда ижроси бўйича тегишли вазифалар белгилаб олинди.

Маълумки, Муфтий Нуриддин домла ҳазратлари томонларидан мамлакатимиздаги масжидларда ҳафтанинг чоршанба куни фуқароларни қабул қилиш куни сифатида белгиланган. Шу боис ҳар чоршанба куни Ўзбекистон мусулмонлари идораси ва барча масжидларда фуқароларни қабул қилиш ишлари амалга оширилади.

Ўзбекистон мусулмонлари идораси
Матбуот хизмати