Муҳтарам устоз ва мураббийлар!

Аввало, сизларни, таълим-тарбия соҳасининг барча жонкуяр ходимлари ва фахрийларини умумхалқ байрами – Ўқитувчи ва мураббийлар куни билан чин қалбимдан муборакбод этаман.

Бугун биз мамлакатимизда миллати, тили, динидан қатъи назар, ҳар бир инсон ўз қобилияти ва истеъдодини, билим ва тажрибасини рўёбга чиқара оладиган ижтимоий давлат барпо этмоқдамиз. Шу мақсадда барча куч ва имкониятларимизни ёшларимизнинг интеллектуал ва жисмоний камолоти, уларнинг сифатли таълим олиб, ҳаётда муносиб ўрин эгаллашлари учун сафарбар этмоқдамиз.

Яқинда Бирлашган Миллатлар Ташкилоти Бош Ассамблеясининг 78-сессиясида таълим соҳасидаги ислоҳотларимиз ушбу нуфузли ташкилотнинг “Барқарор ривожланиш мақсадлари”га уйғун ва ҳамоҳанг экани эътироф этилгани барчамизни албатта хурсанд қилади.

Бу йил янги таҳрирдаги Конституциямизда илк бор ўқитувчи мақоми алоҳида белгиланиб, таълим тизимини ривожлантириш давлатнинг бош вазифалари қаторига киритилгани бежиз эмас. Чунки, жамият ҳаётида ўқитувчининг ўрни ва таъсири ошса – мактабнинг обрўйи ошади, илм-фан, таълим ва тарбия соҳасининг қадри кўтарилади. Муаллимнинг обрў-эътибори эса бу миллатнинг, бутун халқнинг обрў-эътиборидир.

Сўнгги йилларда биргаликдаги саъй-ҳаракатларимиз туфайли мамлакатимизда кўплаб янги боғчалар, мактаб ва олийгоҳлар барпо этилмоқда. Таълим-тарбия ва илм-фан муассасаларининг моддий-техник базаси, кадрлар салоҳияти мустаҳкамланмоқда. Дарслик ва ўқув қўлланмаларининг янги авлоди яратилмоқда.

Соҳа ходимларининг машаққатли меҳнатини муносиб қадрлаш ва рағбатлантириш доимий эътиборимиз марказида бўлиб келмоқда. Охирги етти йилда мактабгача таълим бўйича қамров даражасини 27 фоиздан 72 фоизга, олий таълимда эса 9 фоиздан 42 фоизга, олийгоҳларимиз сонини 77 тадан 212 тага етказишга эришганимиз, ҳеч шубҳасиз, энг муҳим ютуғимиздир.

Таълим-тарбия соҳасида қабул қилган дастурларимиз асосида кейинги вақтда 261 та янги ўрта таълим муассасасини қуриш, 2,5 мингта мактабни кенгайтириш ҳисобидан қўшимча 700 мингта ўқувчи ўрни яратилганини таъкидлаш лозим.

Бу йил хориждан таклиф этилган 500 нафар чет тили мутахассиси мактабларимизда иш бошлади. Келгуси йилларда уларнинг сонини 3 баробар оширамиз, 10-11-синфларда бир қатор фанларни ўқувчиларнинг танлови асосида чуқурлаштириб ўқитишни йўлга қўямиз.

Таълим соҳаси ходимларининг ўртача иш ҳақи 2 баробар кўпайтирилади. Минг нафар тарбиячи ва ўқитувчилар хорижий мамлакатларга малака ошириш ва стажировкага юборилади. Ўқитувчиларни ишга қабул қилиш, уларнинг малакасини ошириш ва тоифа бериш тизими ҳам такомиллаштирилади. Биз фарзандларимизни миллий ғурур, Ватанга муҳаббат, умуминсоний қадриятларга ҳурмат руҳида тарбиялашга бундан буён ҳам устувор аҳамият қаратамиз.

Қадрли дўстлар!

Бугунги кунда мамлакатимизда мактаб таълимини қўллаб-қувватлаш ва ривожлантириш умуммиллий ҳаракатга айланиб бормоқда. Хусусан, навоийлик Абдукарим Саксонов, самарқандлик Қуёш Ҳақбердиев, Илҳом Рустамов, бухоролик
Ойбек Намозов, қашқадарёлик Нурбек Эргашев каби ўнлаб тадбиркорларимиз ўз ҳудудларида янги мактаблар қургани, таълим даргоҳларини капитал реконструкция қилиб, замонавий асосда жиҳозлаб бергани, оҳангаронлик оқсоқол шоиримиз Барот ота Исроилов эса ҳовлисида кутубхона очиб, уни ўз ҳисобидан 10 мингта китоб билан таъминлаб, бу маърифат масканини қишлоқ ўқувчиларига совға қилгани ҳар қанча таҳсинга сазовор.

Сафлари тобора кўпайиб бораётган мана шундай инсонлар сиймосида биз жадид боболаримизнинг муносиб давомчиларини, уларнинг ушалаётган орзу ва интилишларини, Учинчи Ренессанснинг мустаҳкам пойдеворини кўрамиз.

Имкониятдан фойдаланиб, бундай фидойи, саховатли юртдошларимизга самимий миннатдорлик билдираман.

Муҳтарам юртдошлар!

Тараққиётимиз дастури бўлмиш “Ўзбекистон – 2030” стратегиясида сизлар билан бирга таълим тизимини янада ривожлантириш бўйича янги мақсад ва режаларни белгилаб олдик.

Ана шу устувор вазифаларни амалга ошириш, Ватанимизнинг тақдири ва келажаги учун масъулиятни зиммасига олишга қодир янги авлодни тарбиялаш барчамиздан катта куч-ғайрат, азму шижоат билан меҳнат қилишни талаб этади.

Мана шундай шарафли вазифани адо этишда мен сиз, муҳтарам устоз ва мураббийларга ҳар томонлама ёрдам ва кўмак беришга тайёр эканимни яна бир бор изҳор этиб, барчангизга сиҳат-саломатлик, бахту саодат, олижаноб фаолиятингизда улкан муваффақиятлар, хонадонларингизга файзу барака тилайман.

Ҳамиша соғ-омон бўлинг, муҳтарам устозлар!

Шавкат Мирзиёев,

Ўзбекистон Республикаси Президенти

Ўзбекистон мусулмонлари идораси тасарруфидаги олий ва ўрта махсус диний таълим муассасаларида “1 октябрь – Ўқитувчи ва мураббийлар куни” муносабати билан байрам тадбирлари бўлиб ўтди.

Маросимлар аввалида Ўзбекистон мусулмонлари идораси раиси, муфтий Шайх Нуриддин Холиқназар ҳазратларининг диний таълим муассасаларининг фидоий ва жонкуяр ўқитувчи ва мураббийларига йўллаган табриклари ўқиб эшиттирилди.

Тадбирлар давомида Ўзбекистон мусулмонлари идораси томонидан олий ва ўрта махсус ислом таълим муассасаларининг жами 41 нафар педагог-ўқитувчи ва ходимлари намунали фаолияти ва ижтимоий ҳаётдаги фаоллиги учун мақтов ёрлиғи ва пул мукофоти билан тақдирланди.

Ана шундай эътибор ва эҳтиромдан соҳа вакиллари ниҳоятда хурсанд бўлдилар.

Байрам тадбирлари давом этмоқда.

Абдуносир БОБАМИРЗАЕВ,
Таълим ва илмий-тадқиқот бўлими методисти

Айни кунларда Мадинаи мунавварада ибодат ва зиёратларни адо этиб, умра ниятида оппоқ эҳромда замонавий автобусларда Маккаи мукаррамага етиб келган зиёратчиларимизни эҳтиром билан кутиб олиш жараёни қизғин давом этмоқда.

Дастлаб зиёратчиларимиз замонавий меҳмонхонадаги ҳар томонлама шинам хоналарга жойлашгач, гуруҳ раҳбарлари ҳамроҳлигида тилдан талбияни қўймаганча Байтуллоҳга ошиқмоқда. Каъбатуллоҳда тавоф, намоз, саъй ва дуо каби амалларни шавқ ва завқ ила адо этишмоқда. Шу билан суннати муаккада бўлган умра ибодатини ниҳоялаган ҳолда, Маккаи мукаррамада ибодатлар билан машғул бўлмоқда. Сафар давомида Раҳмат тоғи – Арафотни, Нур тоғидаги Ҳиро ғорини ва Савр тоғидаги ғорларни ҳам зиёрат қилишмоқда.

Мазкур жараёнлар сифатли, тартибли ва уюшқоқлик боришида Саудия Арабистонининг Жидда шаҳридаги Бош консулхонаси Ҳаж ва умра масалалари бўйича атташеси Шуҳрат Амоний ва Бош консул Нодир Турғуновларнинг бевосита кўмаги ва иштироки катта аҳамиятга эга бўлмоқда.

Зиёратчиларимизга сифатли хизмат кўрсатиш борасида мутасаддиларимиз ҳамкор ширкат вакиллари билан бирга барча имкониятларни сафарбар қилмоқда.
Хусусан, Макка шаҳридаги ҳар томонлама қулай ҳудудда жойлашган “Олаян Алмааси” меҳмонхонасида зиёратчиларимиз учун Ҳарами шарифга 24 соат давомида замонавий автобуслар қатнови йўлга қўйилган.

Шунингдек, меҳмонхонада малакали ходимлардан иборат ишчи гуруҳ штаби, барча шароитларга эга тиббиёт хонаси, ҳар куни 3 маҳал тансиқ таом, ширинлик ва сархил меваларни тақдим этаётган замонавий ошхона юқори даражада хизмат кўрсатмоқда. Сафар давомида ҳожиларимизга ҳадялар улашилмоқда.

Ўзбекистон мусулмонлари идораси
Матбуот хизмати

Бугун, 28 сентябрь куни Мир Араб олий мадрасасида “Бухоронинг Ислом илмлари ривожидаги ўрни” мавзусида халқаро илмий-амалий анжуман бўлиб ўтди. Тадбирда Дин ишлари бўйича қўмита ва Ўзбекистон мусулмонлари идорасининг масъул ходимлари, ЎМИ Бухоро вилояти вакили, юртимизда фаолияти юритаётган бир қатор халқаро илмий-тадқиқот марказларининг уламолари, диний таълим муассасаларининг устоз ва талабалари иштирок этди.

Тадбирни Олий мадраса ректори Жобир домла Элов кириш сўзи билан очиб, тадбир қатнашчиларининг анжумандаги иштироки учун миннатдорлик билдириб, Бухоронинг Ислом дини ривожидаги аҳамияти ҳақида сўз юритди.

Сўнг Имом Бухорий халқаро илмий-тадқиқот маркази директори, тарих фанлари доктори Шовосил Зиёдов йиғилганларга “Бухоро Ислом илмлари ривожида Муҳаммад Порсо кутубхонасининг ўрни” мавзусида ноёб маълумотлар асосида маъруза қилди.

Халқаро анжуман давомида Имом Мотуридий халқаро илмий-тадқиқот маркази бош илмий ходими, фалсафа фанлари доктори Шайх Аҳмад Саъд Даманҳурийнинг “Бухоронинг Ислом уламоларини етиштириб чиқаришдаги ҳиссаси” мавзусидаги чиқишлари барчани қизиқишига сабаб бўлди.

Тадбирда Ҳадис илми мактабида таълим бераётган Миср Араб Республикаси “Ал-Азҳар” университети катта ўқитувчиси Шайх Жамолиддин Ҳошим Маҳмуднинг “Бухоро фақиҳларининг фиқҳ ривожидаги ўрни” ҳақидаги маърузаси кўпчиликнинг эътиборига тушди.

Шунингдек, Бухоро давлат университетида таълим бераётган Миср Араб Республикаси “Ал-Азҳар” университетининг профессори, манбашунос, тилшунос олим, профессор Айман Усмон “Исломда бағрикенглик маданияти” мавзусидаги чиқиши ҳам ниҳоятда манфаатли бўлди.

Анжуманда давомида Мир Араб олий мадрасасида таълим бераётган Миср Араб Республикаси “Ал-Азҳар” университетининг усулид дин фанлари доктори Шайх Аҳмад Ражаб Аҳмад Адави “Имом Бухорий – Бухоро фахри” ҳамда “Ал-Азҳар” университетининг усулид дин фанлари доктори Шайх Аҳмад Муҳаммад Али “Бухоро уламоларининг мусулмонларга фазлу марҳамати” мавзусида маъруза қилди.

Анжуман якунида конференция барча учун манфаатли бўлгани эътироф этилиб, барча иштирокчиларга ташкилотчилар томонидан миннатдорлик билдирилди.

Ўзбекистон мусулмонлари идораси
Матбуот хизмати

Бугун, 28 сентябрь куни Ўзбекистон Республикаси Президенти маслаҳатчиси, Халқаро ислом академияси ректори Музаффар Комилов ва Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Индонезия Уламолар Кенгаши Бош котиби Амиршох Тамбунан бошчилигидаги делегацияни қабул қилдилар.
Музаффар Комилов сўзининг аввалида меҳмонларни ташриф билан қутлаб, Ўзбекистон замини Имом Бухорий, Имом Термизий, ал-Хоразмий, Беруний, Ибн Сино ва Мирзо Улуғбек сингари улуғ аллома ва мутафаккирлар ватани эканини алоҳида таъкидлади. Шу йилнинг август ойида Ўзбекистон делегациясининг Индонезияга ташрифи самарали ва мазмунли ўтгани, ушбу мамлакатнинг мусулмон дунёсидаги нуфузи ошиб бораётгани, ўзаро илмий-тадқиқот борасидаги ҳамкорликни ривожлантириш, зиёрат туризми йўналишидаги алоқаларни такомиллаштиришга урғу қаратди.
Муфтий ҳазратлари икки давлат халқлари ўртасидаги дўстона алоқалар узоқ йиллар давомида мустаҳкамланиб келгани, Индонезиянинг биринчи Президенти жаноб Сукарно Имом Бухорий мақбарасини зиёрат қилгани ҳақида сўз юритдилар. Индонезия ва Ўзбекистон ўртасида зиёрат туризмини ривожлантиришдан икки давлат учун ҳам бирдай манфаат бўлиши, Имом Бухорий, Имом Термизий, Нақшбандий сингари мўътабар зотларнинг қадамжолари индонезияликлар орасида маълуму машҳур эканини Муфтий ҳазратлари алоҳида қайд этдилар.
Мулоқотда келажакда индонезиялик уламолар билан илмий-тадқиқот, фатво ишлаб чиқиш, диний таълим, кадрлар тайёрлаш, имом-хатиблар тажриба алмашинуви ва жаҳолатга қарши кураш йўналишларида ҳамкорлик қилиш каби масалалар атрофлича муҳокама қилинди.
Бош котиб Амиршох Тамбунан жаноблари Имом Бухорий, Имом Термизий каби алломалар авлодлари билан ҳамкорликни ривожлантириш ҳар жиҳатдан фойдали экани, айниқса, динга боғлиқ бўлган илм-фан, инновацион лойиҳалар ва IT йўналишларида ҳамкорлик қилиш яхши самара беришига ишонч билдирди. Шунингдек, икки мамлакат дин пешволарининг ҳамкорликлари мусулмон уммати учун жуда яхши натижа беришини қўшимча қилди.
Музаффар Комилов меҳмонларга сўнгги йилларда Янги Ўзбекистонда олиб борилаётган диний-маърифий соҳадаги ислоҳотлар, исломий таълим, халқимиз саводхонлигини ошириш ва турли конфессиялар билан ишлаш борасида амалга оширилаётган фаолият тўғрисида алоҳида тўхталди.
Маълумот ўрнида, Индонезия Уламолар Кенгаши 1975 йилда ташкил этилган. Унинг асосий вазифалари Индонезиянинг кенг ҳудудларида истиқомат қиладиган мўмин-мусулмонларни ягона мақсад сари бирлаштириш, ҳамжиҳатликда ҳаёт кечиришларини таъминлаш ва замонавий масалаларда фатволар ишлаб чиқиш кабилардан иборатдир.

Ўзбекистон мусулмонлари идораси Матбуот хизмати