muslim.uz
Ҳожилик мақомига муносиб бўлиш ҳақида суҳбатлар ўтказилмоқда
Шу йил 14 июль куни Самарқанд вилояти бош имом-хатиби Зайниддин домла Эшонқулов Макка шаҳридаги “Аброж ал-Ҳидоя” меҳмонхонасида муборак ҳаж ибодатини адо этиб юртимизга қайтиш арафасидаги бир гуруҳ зиёратчилар билан ҳожилик мақоми ва унга муносиб бўлиш ҳақида мавъиза қилиб берди.
Суҳбат давомида Зайниддин домла ҳар бир зиёратчи улуғ ҳаж ибодатига етказгани учун Ҳақ таолога шукроналар келтириш, ҳожилик мақомига муносиб бўлиш йўлида юксак ихлос, гўзал одоб билан ҳаракат қилиши зарурлигини айтди.
Шунингдек, ҳар бир ҳаж ва умра зиератини адо қилган ҳожилар машаққат чекиб қилинган ибодатлари мукаммал булмоғи учун умр буии ҳаракатда булиши, жумладан, ўз юртларига қаитганда қуни-қушнисига, маҳалласи ва қавми-қариндошлари олдида доимо намунали ва тартиб-интизом билан урнак булмоғи лозимлиги, бардавом хаирли ишларда, бева-бечоралар, ногиронлар ва касалманд кишилардан хабардор булиб, атрофдагиларга насиҳат қилиб, қулидан келганча яхшиликка буюриш, инсонлар уртасида тотувликни таъминлашга уз ҳиссаларини қушишлари кераклигини уқтирди.
Бундай суҳбатлар муборак заминдан ватанимизга қайтиш арафасидаги барча ҳожиларимиз учун ташкил этилмоқда.
Ўзбекистон мусулмонлари идораси Матбуот хизмати
Ҳар бир улкан шахснинг ортида аёл бор
Аёл киши жамиятда юксак ўринга эга. Аёл – она, аёл – тарбиячи, аёл эрнинг суянчиғи. Аёл нафосат ва гўзаллик рамзи сифатида таърифланади. Исломда ҳам аёл кишига ва унинг ҳуқуқларига жиддий эътибор қаратилган. Аллоҳ таоло айтади: «У (Аллоҳ) сизларни бир жондан яратиб, унинг жуфтини унга уйланиб, сукунат топиши учун пайдо қилган Зотдир» («Аъроф» сураси, 189-оят). Яъни «жуфт» – аёл сукунат, осойишталик, ором, латофат, меҳр-мухаббат рамзи эканлиги баён қилинмоқда.
Аёлнинг бу мақтовга лойиқ бўлиши жамиятда ва эри олдида унинг обрўсини оширади. Эрига содиқ хизмат қилиш, солиҳ фарзандлар тарбиялаш аёл кишининг бурчи бўлиши билан бирга уни жаннатга олиб киради. Пайғамбаримиз соллаллоҳу алайҳи васаллам Аллоҳга ширк келтирмаган, намозини, рўзасини вақтида адо этган ва эрини рози қилган аёлга жаннат башоратини берганлар.
Аёл киши эрининг вазири бўлиб, уни гуноҳ ишлардан қайтаради, яхши амалларга тарғиб қилади ва Пайғамбаримиз соллаллоҳу алайҳи васаллам мақтаган аёллар тоифасига киришга интилади. Набий соллаллоҳу алайҳи васаллам айтадилар: "Мўмин банда Аллоҳга бўлган иймонидан сўнг эришган энг яхши нарса солиҳа хотин бўлиб, унга қараса ҳурсанд қилади ва Аллоҳнинг амрларини бажаришга ёрдам беради". Ўзбек халқида ҳам «эрни эр қиладиган ҳам, ер қиладиган ҳам хотин» деган мақол бор.
Араб халқида эса бундай мақол учрайди – «Ҳар бир улкан шахснинг ортида аёл бор». Юртимизда яшаб ўтган муҳаддис алломаларни ҳам, бутун дунё алломаларини ҳам солиҳа аёллар дунёга келтиришган. Бундай аёллардан Аллоҳ рози бўлсин.
Ҳаётда энг гўзал ҳулқ ва фазилат қаноатдир. Аёл киши эрининг топганига қаноат қилиши, яхши кунда ҳам, ёмон кунда ҳам елкама-елка туриши лозим. Сўфи Оллоҳёр яхши, қаноатли хотинларни таърифлаб бундай дейди:
Агар бор олғонингни яхши ҳоли,
Дема хотун, дегил диннинг камоли.
Хуш ул зан билмаса беҳуда дерни,
Сучук лафзи ила шод этса эрни.
Агар ўн йил уйида бўлмаса ун,
Уни чиқмас уни айтурға бир кун.
Аёл кишининг сабр-тоқатли, қаноатли бўлмаслиги эрнинг ҳаромдан мол топишига ёки оиладаги жанжалларнинг келиб чиқишига сабаб бўлади. Аёлнинг қаноатли бўлиши унинг ожизлиги нишонаси эмас, бу мақталган сифатдир. Али розияллоҳу анҳу Фотима розияллоҳу анҳони ранглари оқарган, лоҳас ҳолда кўриб: «Сенга нима бўлди, Фотима?», - деди. Фотима розияллоҳу анҳо: «Уч кундан буён уйда егулик нарса топилмайди», - деди. Али розияллоҳу анҳу: «Шундоқ экан, айтсанг бўлмасмиди?» - десалар, шунда Фотима розияллоҳу анҳо: «Тўйимиз куни отам – Аллоҳнинг расули алайҳиссалом: «Ҳой, Фотима! Агар Али бирор нарса топиб келса егин, бўлмаса сўрамагин», деган эдилар», деб жавоб берди.
Оилада турли ҳолатлар бўлиши мумкин. Шундай пайтларда аёл киши ўзини оқила тутиши, ғазабини ичга ютиши лозим, ҳозирда бу ҳолатларни аксини кўрамиз. Кўпчилик аёллар сабрли, қаноатли бўлиш ўрнига эрларига зулм қилишмоқда, тўй-ҳашамларда тоғоралар сонини орттираётганлар ҳам аёллар, янги-янги маросимларни ўйлаб топиб эрларини мушкул ҳолатга солиб қўяётганлар ҳам аёллар. Бундай исрофгарчиликлар ёшлар бахтини таъминлай олармиди? Аксинча, қанчалик исрофгарчилик кўпайган сари қудаларга, тўғрироғи, аёл қудага камдек кўринаверади.
Пайғамбаримиз соллаллоҳу алайҳи васаллам қизларини қандай узатганлар. Фақат ҳозир замон бошқача деманг! Турли урф- одатларни тўқиб чиқараётган кимлар ўзи?! Унинг ўрнига қизларимизга юқорида айтиб ўтганимиз Пайғамбаримиз соллаллоҳу алайҳи васалламнинг Фотима розияллоҳу анҳога тўй куни айтган насиҳатларини бир эслатиб ўтсак яхши бўлар эди. Оиланинг мустаҳкамлиги фақат эрга эмас, аёлга ҳам боғлиқ. Зеро, эрни эр қиладиган ҳам, ер қиладиган ҳам хотин!
М.Саиджалолова,
Хадичаи Кубро аёл-қизлар ўрта
махсус ислом таълим муассасаси
ахборот-ресурс маркази раҳбари
Ўзбекистон халқаро ислом академиясида янги йўналишлар бўйича қабул ўтказилмоқда
2022/2023 ўқув йили учун Ўзбекистон халқаро ислом академиясига ўқишга қабул қилишнинг давлат буюртмаси параметрлари ва бакалавриатга қабул қилиш жараёнини янада соддалаштиришга қаратилган ўзгартиришлар тўғрисида
МАЪЛУМОТ
Хабарингиз бор, Ўзбекистон халқаро ислом академияси Ўзбекистон Республикаси Президентининг 2018 йил 16 апрелдаги “Диний-маърифий соҳа фаолиятини тубдан такомиллаштириш чора-тадбирлари тўғрисида”ги Фармони асосида ташкил қилинган. Мазкур Фармоннинг аҳамияти шундаки, 1999 йилдан буён Тошкент ислом университети ва кейинчалик бир муддат Ўзбекистон ислом академияси сифатида фаолият юритган мазкур олий таълим ҳамда илмий-тадқиқот марказига ХАЛҚАРО АКАДЕМИЯ мақоми берилиб, кенг кўламли қўшимча вазифалар юкланди.
Таъкидлаш жоиз, бугунги кунда Ўзбекистон халқаро ислом академияси дунёдаги етакчи олий таълим ва илмий-тадқиқот марказлари орасида ўз нуфузига эга бўлиб бормоқда.
Сўнгги йилларда Ўзбекистон халқаро ислом академияси фаолиятига кўплаб янгиликлар татбиқ этилмоқда. Нуфузли хорижий олий таълим муассасалари, илмий-тадқиқот марказлари ва халқаро ташкилотлар билан ҳамкорлик алоқалари кенгайди. Академия профессор-ўқитувчилари, ёш илмий тадқиқотчиларнинг халқаро конференция, илмий семинарлар ҳамда халқаро грантлардаги иштироки фаоллашди. Хорижлик профессор-ўқитувчилар, талабалар, докторант ва илмий-тадқиқотчиларнинг академия ўқув жараёнига жалб этилиш кўрсаткичи йилдан-йилга ўсиб бормоқда.
Ўзбекистон халқаро ислом академияси Илмий салоҳияти 66 фоизни ташкил этади. Айни пайтда Академияда “Ислом иқтисодиёти ва халқаро муносабатлар”, “Мумтоз шарқ филологияси” ҳамда “Исломшунослик” факультетлари мавжуд бўлиб, уларнинг таркибида 10 та кафедра фаолият юритмоқда. Ўзбекистон халқаро ислом академиясида 1 минг 670 нафар талаба таҳсил олмоқда. Шундан 1 минг 430 нафар талаба бакалавриат, 240 нафари эса магистратура босқичида ўқийди.
Ўзбекистон Республикаси Президентининг 2022 йил 15 июндаги “Давлат олий таълим муассасаларига ўқишга қабул қилиш жараёнларини ташкил этиш тўғрисида” ПҚ-279-сон қарори қабул қилинди. Шунингдек, Ўзбекистон Республикаси Президентининг 2022 йил 15 июндаги “2022/2023 ўқув йили учун давлат олий таълим муассасаларига ўқишга қабул қилишнинг давлат буюртмаси параметрлари тўғрисида” Ф-60-сон Фармойиши қабул қилинди.
Унга мувофиқ, кундузги таълим шакли бўйича жами 14 та таълим йўналиши бўйича 300 та қабул квотаси ажратилди. Жумладан, “Диншунослик” 25 та, “Исломшунослик (қуръоншунослик, ҳадисшунослик, ислом ҳуқуқи, ақида ва тасаввуф, ислом тарихи ва манбашунослиги)” 50 та, “Филология ва тилларни ўқитиш (араб тили)” таълим йўналишлари бўйича 30 та қабул квоталари белгиланди.
Аҳамиятлиси, жорий йилдан илк маротаба “Матншунослик ва адабий манбашунослик (араб тили)”, “Журналистика (халқаро журналистика)”, “Юриспруденция (ислом ҳуқуқи)”, “Компьютер инжиниринги (“Компьютер инжиниринги”, “АТ сервис”, “Ахборот хавфсизлиги”, “Мультимедиа технологиялари)” таълим йўналишларига қабул ўтказилмоқда.
Бундан ташқари, илк маротаба 2022/2023 ўқув йилида Ўзбекистон халқаро ислом академияси бакалавриатининг сиртқи ҳамда кечки таълим шакллари бўйича давлат буюртмаси асосида ўқишга қабул қилиш параметрлари тасдиқнланди. Унга кўра, 9 та таълим йўналишига жами 250 та қабул квотаси ажратилди. “Ислом иқтисодиёти ва молияси”, “Тарих (ислом тарихи ва манбашунослиги)” йўналишлари шулар жумласидандир.
Ёшларни олий таълим билан янада кенгроқ қамраб олиш, олий таълим ташкилотлари ўртасида соғлом рақобатни кучайтириш мақсадида 2022/2023 ўқув йилида Ўзбекистон халқаро ислом академияси бакалавриатининг масофавий таълим шакли бўйича давлат буюртмаси асосида ўқишга қабул қилиш параметрлари тасдиқланди. “Исломшунослик (қуръоншунослик, ҳадисшунослик, ислом ҳуқуқи, ақида ва тасаввуф, ислом тарихи ва манбашунослиги)”, “Ислом иқтисодиёти ва молияси”, “Компьютер инжиниринги (“Компьютер инжиниринги”, “АТ сервис”, “Ахборот хавфсизлиги”, “Мультимедиа технологиялари”)” каби 3 та таълим йўналишига жами 250 та қабул квотаси белгиланди.
Шу билан бирга 2021/2022 ўқув йилида Ўзбекистон халқаро ислом академияси магистратурасининг кундузги таълим шаклининг 12 та мутахассислиги бўйича 140 та қабул квотаси ажратилди. “Журналистика (интернет журналистика)”, “Ташқи иқтисодий фаолият (тармоқлар ва фаолият йўналишлари)”, “Ислом ҳуқуқи” мутахассисликлари мазкур ўқув йилидан эътиборан илк бор Академияда ташкил этилди.
Ўзбекистон Республикаси давлат олий таълим муассасаларига ўқишга қабул қилиш жараёнларини мувофиқлаштириш бўйича Давлат комиссиясининг 2022 йил 4 июлдаги 1 сон мажлис баёнига асосан, камида беш йил иш стажига эга бўлган хотин-қизлар учун 3 та, ногиронлиги бўлган шахслар учун қўшимча икки фоизли давлат гранти асосида турли таълим шакллари бўйича 17 та, “Меҳрибонлик” уйи ва Болалар шаҳарчасининг битирувчилари бўлган чин етимлар, SOS – болалар маҳаллалари ва оилавий болалар уйлари битирувчилари, шунингдек, васийликка, ҳомийликка ёки оилага тарбияга олинган (патронат) етим болалар (йигирма беш ёшга тўлмаган) учун қўшимча бир фоизли давлат гранти асосида 7 та, ҳуқуқбузарлик профилактикаси ва жиноятчиликка қарши курашда муносиб ҳисса қўшган, хизмат ёки илмий фаолиятида юқори натижаларга эришган ички ишлар органларининг амалдаги ходимлари фарзандлари учун қўшимча беш фоизли давлат гранти асосида 5 та, Ўзбекистон Республикаси Қуролли кучлар сафида муддатли ҳарбий хизматни ўтаб, ҳарбий қисм қўмондонлигининг тавсияномаларига эга бўлганлар учун барча таълим шакллари бўйича 39 та ҳамда божхона хизматига салмоқли ҳисса қўшган, иш жараёнида маълум бир натижаларга эришган, божхона органларида хизмат қилаётган ходимларнинг фарзандлари учун 2 та қабул квотаси ажратилган.
Ўзбекистон халқаро ислом академиясининг бошқа олий таълим ташкилотлари билан интеграциясини ривожлантириш, абитуриентлар учун эркин ва адолатли танлов муҳитини яратиш ҳамда қабул жараёнларини соддалаштириш мақсадида Ўзбекистон Республикаси Вазирлар Маҳкамасининг 2022 йил 14 июлдаги “Ўзбекистон Республикаси Ҳукуматининг айрим қарорларига Ўзбекистон халқаро ислом академиясининг бакалавриатига ўқишга қабул қилиш жараёнини янада соддалаштиришга қаратилган ўзгартиришлар киритиш тўғрисида”ги 386-сонли қарори қабул қилинди. Қарорга асосан, 2022/2023 ўқув йилидан бошлаб Академияда дастлабки имтиҳонни таълим шаклидан қатъий назар фақат диншунослик ва исломшунослик бакавриат таълим йўналишлари учун татбиқ этилади. Шунингдек, бошқа таълим йўналишлари абитуриентлари учун олий таълим муассасаларига ўқишга кириш имтиҳони бўйича турдош таълим йўналишлари танлови кенгайтирилди.
Айни пайтда Ўзбекистон халқаро ислом академиясида 2022-2023 ўқув йили учун қабул жараёнлари давом этмоқда.
Нонни исроф қилманг, унинг ҳам уволи бор
Коронавирус офати жаҳон иқтисодиётига катта зарба бериб, миллиардлаб зарар келтирган бўлса, айни кунда бўлаётган воқеалар ҳам кишини жиддий ташвишга солади. Бу фожиалар ортидан дунёда озиқ-овқат хавфсизлиги масаласи кун тартибига чиқмоқда.
Халқаро экспертлар фикрига кўра, пандемия оқибатида очарчиликдан қийналаётган аҳоли сони икки баробар ошиб, 1 миллиард миллионга етди. Бир қатор мамлакатларда, хусусан, Сурия, Афғонистон, Ироқ, Ливия, Яман, Судан, Эфиопия, Нигерия каби давлатларда озиқ-овқат, нон етишмовчилиги кузатиляпти. Оқибатда аҳоли егулик излаб аянчли ишларга ҳам қўл урмоқда.
Шукрки, юртимизда давлатимизнинг ғамхўрлиги, озиқ-овқат хавфсизлигини таъминлашга қаратилган кенг кўламли чора-тадбирлар туфайли қорнимиз тўқ, устимиз бут. Тинч-хотиржам, ўзимиз ҳам, фарзандларимиз ҳам истаган егуликни тановул қиляпмиз. Аммо бундай шароитларнинг қадрига етиб, шукрона айтиш ўрнига исрофгарчиликка ҳам йўл қўяётганимиз ачинарлидир.
Яқинда пойтахтимиз бўйича мингта чиқинди шохобчасининг ҳар биридан кунига ўртача 3 килограммдан, умумий ҳисобда 2 тоннага яқин нон чиқиндига чиқариб ташланаётгани ҳақидаги маълумотга кўзим тушди. Агар биргина шаҳримизда вазият шундай бўлса, мамлакатимиз бўйича бу рақамнинг салмоғи янада ошиши тайин.
Аслида, қорнимиз бир бурда нонга тўяди. Лекин дастурхонда нон бўлаклари бўлса-да, бирор киши келиб ўтирса, яна янгисини синдириш одат тусига кирган. Хуллас, есак-емасак, синдираверамиз. Овқатлангач эса, баъзан ортган нонлар ташлаб юборилади. Ресторан, ошхона, тўйхоналардан ортган қоп-қоп нон бўлакларини кўриб, юрагингиз увишади. Чиқинди шохобчаларида ҳам ахлат ва пўчоққа аралаш ташланаётган нон қолдиқларини кўриб таажжубланасиз, “Бунинг уволи тегмасмикин?” дея ўйга толасиз.
Атрофимизга назар ташласак, нафақат ёшлар, балки катталар орасида ҳам нон қадрини унутаётганлар, уни исроф қилаётганларни учратамиз. Афсус, бундай кишилар бугун кимлардир бир бурда нонга, ҳатто ушоққа зор эканини англамайди. Улар нонни қадрламаётганининг сабаби дастурхони тўкинлиги, “Доим шундай ҳаёт кечираман” деган ишонч ҳаддан зиёдалигидир. Бу эса тўқликка шўхликдан бошқа нарса эмас.
Бугунги тўйлар ва турли маросимларда исрофгарчиликка йўл қўйилаётгани, нон қадрини ҳис қилмай қўйганимиз, ачинарлиси, фарзандларимиз ҳам айнан шу йўлдан кетаётгани оғриқлидир. Бу қанчалик фаровон, дастурхонимиз тўкин бўлгани сари маънавий қашшоқлашиб бораётганимиздан далолат эмасми?
Узоққа бормайлик, мустақилликнинг илк йилларида нон қадри қанчалар баланд бўлгани, одамлар соатлаб, кунлаб нонга, унга навбатда тургани, қишлоқларда аҳоли бошоқ тергани чиққанлари ҳали кўз ўнгимизда турибди. Иккинчи жаҳон уруши даврида ҳам ота-боболаримиз бир бурда нонга қанчалар зор бўлишган. Оталаримиз, оналаримиз бизни ҳозирги фараҳли кунларга етказиш учун оч-наҳор тер тўкиб, меҳнат қилганлар. Бугунги омон-омон тўкинлик замони аждодларимизнинг орзуси эмасмиди?! Уларнинг дуолари, ниятлари амалга ошиб, фаровон ҳаёт кечиряпмиз. Бунга шукр қилиш ўрнига исрофгарчиликка йўл қўйишимиз қанчалар тўғри?!
Зеро, муқаддас динимизда исроф қаттиқ қораланади. Аллоҳ таоло Ўз каломида: “Енглар, ичинглар, аммо исроф қилманглар. Зеро, У исроф қилгувчиларни севмас”, деган (Аъроф сураси, 31-оят). Бундан келиб чиқадики, Аллоҳ берган неъматларни исроф қилиш, уларнинг қадрига етмаслик катта гуноҳдир. Шу боис жонимиз соғ, ейишга бир бурда нонимиз борми, шукрона айтайлик. Чунки бугунги таҳликали замонда дунёда миллионлаб кишилар тинчликнинг, ноннинг нақадар қадрли неъмат эканини ўз кўзлари билан, жонлари билан ҳис этишмоқда.
Ҳадиси қудсийда бундай дейилади: “Эй Одам фарзанди! Ҳамиша овқатланишга ўтирганингда қорни оч бечоралар ҳам эсингда бўлсин. Шунда Аллоҳнинг неъматларига шукр қилишинг осонроқ бўлади”.
Дарҳақиқат, ҳозир дунёда миллион-миллион одамлар бир бурда нонга зор бўлиб яшаяпти. Худо дастурхонимизни тўкин қилди, неъматларни истеъмол қилишимиз учун саломатлик берди. Бунга шукр қилиш ўрнига нима учун бу неъматларни исроф қилишимиз керак?!
Ёшлигимизда, “Нон ушоғини боссанг, кўр бўласан”, дея таъкидлашарди. Бу гапларни ота-онамиздан ташқари маҳалладагилар ҳам айтишарди. Кўчада ушоқни кўрсак, олиб, чангини пуфлаб, кўзга суртиб, четга қўярдик. Ҳозир кўплаб хонадонларда дастурхондан бир бўлак нон пастга тушиб кетса, олиб ейилмайди, аксинча, пўчоққа ёки ахлат челакка ташланмоқда. Нонга шу зайлда муносабатда бўлсак, Худо кўрсатмасин, эртага афсусланиб қолмайлик. Ахир, “Нимани хор қилсанг, шунга зор бўласан”, деган ҳикмат бежиз айтилмаган-ку!
Шундай экан, қаттиқ меҳнат эвазига етиштирилаётган ноннинг ва бошқа нозу неъматларнинг қадрига етиш, исрофгарчиликка йўл қўймаслик сизу бизнинг асосий вазифамиз бўлиши зарур.
Иброҳимжон ИНОМОВ,
Ўзбекистон мусулмонлари идораси
раиси ўринбосари
"Ҳидоят" журнали 2022 йил 4-сонидан олинди
Малайзиядан Тошкентга илк чартер рейс парвоз қилди
Шу йил 9 июль куни Тошкент ва Куала-Лумпур ўртасида илк тўғридан-тўғри чартер рейси йўлга қўйилди, деб хабар бермоқда “Дунё”.
Мазкур парвоз Ўзбекистоннинг Малайзиядаги элчихонасида «Malaysia Airlines» авиакомпанияси ва Ўзбекистоннинг «Osmon Aero» сайёҳлик оператори ўртасида имзоланган келишув доирасида ташкил этилди. Ушбу ҳужжатга 26 май куни «Malaysia Airlines» авиакомпаниясининг глобал сотувлар бўйича директори Рослан Исмоил ва «Osmon Aero» компанияси бош директори Анастасия Арушанова томонидан имзо қўйилган эди.
Элчихона маълумотига кўра, рейслар 287 ўринга мўлжалланган А330-200 самолётларида амалга оширилади. Жадвалга кўра, чартер рейси ҳар 10 кунда бир марта режалаштирилган.
Биринчи чартер рейсда Малайзиянинг 10 та сайёҳлик компанияси вакиллари ва саёҳат блогерлари учун Самарқанд, Бухоро, Хива, Тошкент ва Наманган шаҳарларининг тарихий ва замонавий диққатга сазовор жойлари билан танишишга йўналтирилган ўн кунлик инфотур ҳам уюштирилган. Саёҳат давомида Ўзбекистондаги етакчи туроператорлар билан янги турпакетларни ишлаб чиқиш учун B2B-учрашувлари ташкил этилади.
Терри Вонг,
«AITravel Sdn. Bhd.» сайёҳлик компанияси директори:
– Ушбу чартер рейси орқали Ўзбекистонга илк бор саёҳат қилиш, унинг бой тарихий-маданий мероси билан яқиндан танишиш имконига эга бўлганимиздан хурсандмиз. Биз турпакетларни диверсификация қилиш, Ўзбекистон ва Марказий Осиёга кириш ва чиқиш туризми бўйича янги қўшма турпакетларни ишлаб чиқиш мақсадида Ўзбекистондаги ҳамкорларимиз билан учрашувлар ўтказишни режалаштирганмиз. Буюк ипак йўли чорраҳасида жойлашган, ўзининг бетакрор маданияти, ранг-баранг бой қадриятлари ва ажойиб табиатига эга Ўзбекистоннинг сайёҳлик салоҳиятини малайзияликлар орасида янги саёҳат йўналиши сифатида тарғиб этишга аҳд қилганмиз.
Аҳмад Камол, сайёҳ:
– Куала-Лумпур ва Тошкент узоқ давом этган локдаун ва карантин чекловларидан сўнг ниҳоят тўғридан-тўғри ҳаво қатнови орқали боғланганидан хурсандмиз.
20 йил олдинги саёҳатимдан кейин юртингизга яна бир бор йўл олаётганим мени илҳомлантирмоқда. Ўзбекистонда сўнгги йилларда амалга оширилаётган барча ижобий ўзгаришлар, жумладан, туризм инфратузилмаси, аэропортлар ва меҳмондўстлик индустриясини ривожлантириш бўйича кўрилаётган амалий чора-тадбирлардан яхши хабаримиз бор. Янги Ўзбекистонни, мамлакатда хорижлик сайёҳлар учун яратилган янги имкониятлар ва қулайликларни кўриш ниятидамиз.
Мамлакатларимизни тарихий ришталар, маданий ва диний муштараклик, анъаналар ва маънавий қадриятларнинг яқинлиги боғлаб туради. Малайзияликлар Имом Бухорий Ватанининг бой маънавий ва маданий меросига алоҳида ҳурмат билан муносабат билдиришади, сизнинг бетакрор меъморчилигингиз, ўзбек таомлари, меҳмондўстлигингиз ва бағрикенглигингиз бизни ўзига жалб қилади. Фурсатдан фойдаланиб, барча малайзияликларни Ўзбекистонга саёҳат қилишга чақираман!
Равиндаран Кунжу Раман, тадбиркор:
– Ўзбекистонда кўп маротаба бўлганман ва мамлакатингизда Президент Шавкат Мирзиёев раҳнамолигида турли соҳаларда амалга оширилаётган улкан ўзгаришларни катта қизиқиш билан кузатаман. Хусусан, туризм ва меҳмондўстлик саноатидаги кенг кўламли ўзгаришлар, яхшиланган сармоявий муҳит алоҳида эътиборга лойиқдир. Бу, албатта, республиканинг улкан сайёҳлик салоҳиятини очиб беришга, ишбилармон доиралар вакиллари учун янги имкониятлар ва марраларни яратишга хизмат қилмоқда. Мен барча дўстларимга Ўзбекистонга саёҳат қилиш, мамлакатнинг бой маданий мероси билан танишиш, республиканинг гастрономик ва рекреацион туризмидан баҳраманд бўлишни тавсия қиламан.
Ўзбекистон мусулмонлари идораси Матбуот хизмати
Видеолавҳалар
