Бир танишим яқинда бошидан ўтган кўнгилсиз воқеалардан сўз очиб қолди: “Онам қазо қилдилар... Таъзия маросимларини ўтказиб ишга чиқдим. Касбдошларимдан бири мени кўрди-ю юзимга бир муддат тикилиб:

– Вой-бўй, мунча озиб кетибсиз, айрилиқ сизни анча чўктирибди. Ранг-рўйингиз ҳам бир аҳвол. Жигарингиз ҳам оғрирди-а? Дўхтирга бир кўрининг, бунақада йиқилиб қоласиз! – деди.

Бу гаплар юрагимга тиғдек ботди. Ерга қарадим, ўпкам тўлиб, кўзимга ёш келди. Жудолик ўтида ёнган юрагимга яна қалов ташланган эди. Хонамга жимгина йўл олдим. Қўшни хонадан кучли қаҳқаҳа эшитилди. Бу қадрдон дугонамнинг овози эди. Вужудим титраб кетди. Онам ҳаётлигида у бизникига кўп келган. Онамнинг пазандалиги, чеварлиги, қўли очиқлиги, меҳмондўстлигини мақтаб чакаги ёпилмас эди. Байрамларда онагинам дугонамга кичкина бўлса ҳам совға ҳозирлаб қўярди, унинг ҳақига дуолар қиларди. Вақти келиб онам тўшакка михланиб қолди, ўшанда негадир дугонамни сўради. Балки соғингандир, балки бир кўнгилдош излагандир. Ҳарҳолда уни сўраб-сўраб қўйди. Бу вақтда дугонам дунё ташвишлари билан елиб-югурарди. Таъзияга ҳам келолмади. Кейин билсам, Тошкентга тўйга кетган экан. Балки у  хабарсиздир…”

Суҳбатдошимга таскин бердим. Сўнг ҳаётимизда тез-тез кузатиладиган бу каби ҳолатлар ҳақида ўйга толдим. Ҳақиқатан, баъзида бировларнинг сўзи у ёқда турсин, хатти-ҳаракатлари, қилиқлари ҳам кўнгилга беихтиёр озор беради. Самимият эса кишига катта куч, ирода бахш этади. Яхши сўзда меҳр, анчайин бир қудрат бор. Айтайлик, маҳзун юзли, беморликни бошдан кечирган танишингизни кўрдингиз. Кун сайин ранги тиниқиб, саломатлиги яхшиланиб бораётганини чин дилдан айтдингиз – унинг кўнглига яхши тилаклар индирдингиз. Аслида, ўзи бу қадар соғлом, куч-ғайратга тўла эмасдир. Лекин сиз уни умидсизлик исканжасидан қутқариб оласиз. Арзимасдай кўринган меҳр-оқибатингиз хайрли бўлади, иншоаллоҳ.

Атрофга разм солиб, ҳаётни кузатинг. Дабдабаю асъасалар ичра юрган кимсаларга, турмуш ташвишлари билан андармон одамларга эътибор беринг. Оқибат ва оқибатсизликнинг турфа манзараларини, кўнгил сўралмаган фурсатларнинг изларини илғайсиз. Жуда кичкина бўлса-да, вақтида берилган кўмак, чин юракдан айтилган оддийгина лутфу карам, тамасиз хайрихоҳлик ҳам далдага муҳтож кўнгилларга мустаҳкам таянч бўлишини ҳис этасиз.

Маъмура АБДУРАҲИМОВА

* * *

Тил боис одамлар душман ёки дўст,

Ошкор этиб бўлмас неки кўрса кўз.

Баъзан ҳақиқат ҳам ёқмас барчага,

Баъзан қалқон бўлар айтилмаган сўз.

* * *

Аллоҳ кам этмасин ақлий қувватда,

Не савдо кечмайди бошдан ҳаётда.

Минг машаққат чекиб, эзилган чоқ ҳам

Руҳингни сақлай бил мувозанатда.

* * *

Эй ўғил, хулқингда нуқсон кам бўлсин,

Не ишга қўл урсанг, ақл жам бўлсин.

Ҳаёт ўтхонаси ичра тоблангин,

Ироданг темирдек мустаҳкам бўлсин.

* * *

Гоҳида енгилар ёлғонларга рост,

Ҳар ким тўн бичади ўз жисмига мос.

Тиконни босамиз гоҳида кўрмай,

Баъзан ақлимизни енгар эҳтирос.

* * *

Дунё ишларига боқсанг кўз солиб,

Ҳаёт муаллимдир, барчамиз толиб.

Майдонда кучини кўрсатган эмас,

Нафсин енга олган барчадан ғолиб.

* * *

Покликка чақириб ҳар саҳар, ҳар тун,

Виждонинг ҳайқирар балиқдай беун.

Ҳаётнинг энг олий дарсхонасида

Эътиқод синови ўтади ҳар кун.

* * *

Чарақлаган каби само юлдузи

Доим кулиб турар яхшининг кўзи.

Шаббода гул баргин титратганидек,

Одоб белгисидир қизарса юзи.

* * *

Кўкда қуёш бўлиб меҳр бер дилга,

Мард бўлиб оқизгин дарёни чўлга.

Барча орзуларинг бўлсин ижобат,

Манзилни белгила чиқмасдан йўлга.

* * *

Кимдир нур қадрини кўзга илмайди,

Нодон ўз ҳаёти қадрин билмайди.

Инсондан аяма ҳароратингни,

Жаҳонда эримас муз топилмайди.

* * *

Катта йўлнинг боши сўқмоқдан,

Бошланади дарёлар тоғдан.

Оғир ишдан бурма юзингни,

Қўрққин ҳатто кичик гуноҳдан.

* * *

Отингга қамчи бос, ғафлатда қолма,

Жабҳалар аро кир, курашдан толма.

Ярим йўлда қолмоқ ярашмас мардга,

Зафарга етмасдан ноғора чалма.

* * *

Елга соврилади номарднинг суқи,

Нишонга тегади ботирнинг ўқи.

Пастда қолаверар ҳасад қилганлар,

Забт этганни қучиб олқишлар чўққи!

* * *

Кузги дарахтлардек бўлмагин сўлғин,

Доим ҳаракатда қувватга тўлгин.

Қариликни йўлдан чалғитмоқ бўлсанг,

Завқли меҳнат билан ошино бўлгин.

                        Рашидхон ШУКУРОВ

                                                                                                                                             Қўқон

Динлараро бағрикенгликни ривожлантириш мақсадида Сиднейда 99 қуббадан иборат масжид қурилди. Австралия пойтахтида қад ростлаган ажойиб меъморий ечимли иншоотнинг архитектори Анжело Кандалепас мақтовга сазовор бўлишдан кўра, масжид динлараро бағрикенгликни тарғиб этишига умид боғлаган.

Си-эн-эн ахборот порталининг хабарига кўра, 2018 йилнинг Рамазон ойида очилиши кўзда тутилган масжид лойиҳасида бу ерга ташриф буюрадиган  ҳар бир меҳмонга қулай шароит бўлиши ҳисобга олинган.  

2017 йилнинг сентябрь ойида ўтказилган Сидней архитектура фестивалида масжид қурилиши тугалланмаган бўлса-да, архитекторлар иншоотни кўздан кечириб, ўз фикрларини билдиришди. Бу антиқа масжиднинг қурилишига 9 млн. АҚШ доллари маблағ ажратилган бўлиб, ташқи қиёфаси замонавий-ноанъанавий услубда барпо этилмоқда. 

“Замонавий-ноанъанавий услубдаги масжиднинг қурилиши  бу – янги масжидлар қурилиши учун лицензия олиш муаммоларининг ҳал этилишидир. Сўнги йилларда масжид қурилиши учун лицензия олиш жуда қийин эди, аммо бахтимизга ушбу масжид қурилиши шаҳар кенгаши томонидан тез фурсатда ҳал этилди”, деди Закария Мэтьюз.

Алишер САТТОРОВ

 тайёрлади

Республика қорилар мусобақаси ҳақида

ҲАСАН ИБН АЛИ

Навоий вилоятининг Нурота туманидаги Деҳибаланд қишлоғининг шимоли-шарқий қисмида ҳазрат Ҳасан ибн Али розияллоҳу анҳуга нисбат берилган мақбара бор. Таъмирлаш вақтида топилган тош лавҳда унинг XIX асрда қурилгани ёзилган. Аслида, Имом Ҳасаннинг қабри Мадинада, Бақиъ қабристонида, оналари Фотимаи Заҳро ёнида.

Бу зот ҳалимлиги, сахийлиги, тинчликпарварлиги ва кенгфеъллиги билан машҳур бўлган.

Отаси ҳазрат Али каррамаллоҳу важҳаҳудан кейин давлатни олти ойча бошқарган.

ҲУСАЙН ИБН АЛИ

Ҳусайн ибн Али бизнинг диёрларда “ҳазрат Ҳусан” номи билан машҳур. Ҳазрат Ҳасан ва ҳазрат Ҳусан шарафига эгиз чақалоқларга шундай исм қўйилади.

Навоий вилоятининг Нурота тумани Деҳибаланд қишлоғидаги бир зиёратгоҳ ҳам “Ҳасан-Ҳусан” деб номланган.

Мақбара ва ён-атрофдаги иморатлар вақт ўтиши билан ўзгариб турган. XIX асрнинг охири ва XX аср бошларида қурилиш-тиклаш ишлари олиб борилган.

Имом Ҳусайн розияллоҳу анҳу ҳазрат Ҳасандан бир йилу бир ой кейин туғилган. У кишига Пайғамбар алайҳиссаломнинг ўзлари исм қўйиб, гўдаклигидан тарбиялари билан шуғулланганлар. Бу хусусда кўплаб ҳадислар бор.

МУҲАММАД ИБН ҲАНАФИЯ

Навоий – Нурота катта йўли ўтадиган Деҳибаланд қишлоғининг кунботар томонида Муҳаммад ибн Ҳанафияга нисбат берилган қадамжо бор. Бу зиёратгоҳ Туркманистон ва Кавказбўйи халқлари орасида ҳам машҳур.

Қабрлар устига мақбара тикланган. Бинолар турли даврларда таъмирланган.

Манбаларда қайд этилишича, Али ибн Абу Толиб каррамаллоҳу важҳаҳу Шом сафарига тайёргарлик кўриш ҳақида волийларга буйруқ юборади. Сафар байроғини ўғли Муҳаммад ибн Ҳанафияга беради.

«Қандия»да ҳазрат Аҳмад Яссавий Муҳаммад ибн Ҳанафия раҳматуллоҳи алайҳ наслидан деган маълумот бор. “Ислом” энциклопедиясида Муҳаммад ибн Ҳанафиянинг “Бани Ҳанифа” қабиласига мансуб аёлдан туғилгани қайд этилган.

Суюндик МУСТАФОЕВ тайёрлади