muslim.uz
Иқтибослар...
Олим учун тўрт синов
Имом Шозилий раҳимаҳуллоҳ шундай деганлар: “Олим, то тўрт нарса билан синалмагунича, илм мақомида комилликка эришмайди:
1. Душманларнинг ҳақорати билан;
2. Дўстларнинг маломати билан;
3. Жоҳилларнинг таънаси билан;
4. Олимларнинг ҳасади билан.
Агар (шу нарсаларга) сабр қилса, Аллоҳ таоло уни эргашиладиган имом қилиб қўяди”.
*****
Қироат таъсирининг сири
Дунёга машҳур мисрлик Абдулбосит қоридан “Қироатингиз барчага бирдек таъсирли бўлишининг сири нимада?” деб сўрашганида, у киши: “Бу тиловат Аллоҳ розилиги учун қилинади. Агар инсон Қуръонни чин қалбдан, Аллоҳнинг розилигини кўзлаб, У зотга ихлос билан ўқийдиган бўлса, ўша қироат қалбга етиб боради, қалбни тўлдиради ва ёриштиради. Натижада, ўша қалб соҳиби, яъни тингловчи бу қироатдан таъсирланади” деб жавоб берган эканлар.
*****
Ҳар қандай одамнинг қалбида сахийга муҳаббат, бахилга нафрат бор.
Яҳё ибн Муоз раҳимаҳуллоҳ
*****
Мен Оиша онамиз розияллоҳу анҳонинг 70 минг дирҳам садақа қилганларини кўрдим. Кўйлакларининг ёни эса ямоқли эди.
Урва ибн Зубайр розияллоҳу анҳу
*****
Қуёшнинг ҳар ботишида бир парча камайишинг бор.
Ҳасан Басрий раҳимаҳуллоҳ
*****
«Эркаклик — сигарет чекиш, машина ҳайдаш ва аёллар билан айшу ишрат қилиш» деб асло ўйлама!
Эркаклик — муаззин «Ҳаййа алас солаҳ» деганда, қалбинг қўрқувдан титраб, намоз сари йўл олишингдир.
*****
Ўзинг билан шаҳватларинг ўртасига темир девор қурмас экансан, ибодатдан ҳаловат топа олмайсан.
Бишр Ҳофий раҳимаҳуллоҳ
*****
16 йилдан бери тўйиб овқатланмадим. Зеро, кўп ейиш баданни оғирлаштиради, қалбни қорайтиради, заковатни кетказади, уйқуни жалб этади ва кишини ибодатга заиф қилади.
Имом Шофеий раҳимаҳуллоҳ
*****
Таржимон Нозимжон Ҳошимжон
Афинада биринчи масжид барпо этилди
Жорий йилнинг 7 июнь куни Греция пойтахти Афинанинг Вотаникоc туманида 400 кишига мўлжалланган янги масжид очилди. Бу ҳақда dw.com сайти хабар беради. Масжидда аёллар учун 50 кишилик намозхона ажратилган.
Бу салкам 400 йиллик Усмонийлар ҳукмронлигидан XIX асрга келиб, озод бўлган Грецияда очилган мусулмонларнинг биринчи ибодатхонаси ҳисобланади. Албатта, масжиднинг очилиш жараёни осон кечмаган. Сўнгги маълумотларга кўра, ҳозирда мамлакат атрофида 200 минг мусулмонлар истиқомат қилади. Улар асосан Осиё, Африкадан келган муҳожирлардир. Греция Таълим ва дин ишлари вазири Костас Гавроглунинг маълум қилишича, масжиднинг очилиши тарихий воқеа ҳисобланади. Ушбу масжид мамлакатнинг мусулмон аҳолиси, сайёҳлар ва муҳожирлар учун ҳам зарур экани маълум қилинган. Масжидда биринчи ибодат қилиш жорий йилнинг 16 августига мўлжалланган. Шунингдек, мамлакат президентининг масжид имомини тайинлаш ҳақидаги Фармони ҳам эълон қилинган. Масжид янгича услубда барпо этилган бўлиб, унда миноралар акс этмаган. Афинада бугунги кунгача бирорта масжид бўлмаган Европа шаҳарларидан бири ҳисобланар эди. Греция 1832 йилда Усмонийлар ҳукмронлигидан озод бўлгач, мамлакатда масжид қуриш тақиқлаб қўйилган эди. 2013 йилда масжидни қуришга рухсат берилган ва давлат томонидан 946 минг евро ажратилган.
Ўзбекистон мусулмонлари идораси Матбуот хизмати
Теҳронда 547 та ресторан ислом қоидаларини бузганлик учун ёпилди
Эрон полицияси ноқонуний мусиқа қўйилганидан тортиб муштлашувгача бўлган ҳолатлар қайд этилган ресторан ва кафеларни ёпди, бу ҳақда The Guardian нашри хабар берди.
Шанба куни Теҳрон шаҳри полицияси раҳбари Хусайн Рахими Теҳронда ислом қоидаларига амал қилмаган 547 та ресторан ёпилганини маълум қилган. Қоидабузар ресторан ва кафе эгалари қаршилик кўрсатишган ва амалиёт давомида 11 киши ҳибсга олинган.
Fars newsнинг хабар беришича, амалиёт ўтган 10 кун давомида амалга оширилган. Теҳрон шаҳар суди раҳбари ҳам фуқаролардан жамоат жойларда “ахлоқсиз ҳаракатлар” кузатилса, бу ҳақда тегишли жойларга хабар беришни сўраган.
Ўзбекистон мусулмонлари идораси Матбуот хизмати
Қозоғистон Парламенти Мажлиси Раиси Имом Бухорий мажмуасини зиёрат қилди
Расмий ташриф билан мамлакатимизда меҳмон бўлиб турган Қозоғистон Республикаси Парламенти Мажлиси Раиси Нурлан Нигматулин бошчилигидаги делегация Самарқандга ташриф буюрди. Бу ҳақда ЎзА хабар берди.
Меҳмонларни Самарқанд халқаро аэропортида Самарқанд вилояти ҳокими Э. Турдимов кутиб олди. Вилоят ҳокими ва Ўзбекистон Республикаси Олий Мажлиси Қонунчилик палатаси Спикери Н. Исмоилов ҳамроҳлигида меҳмонлар дастлаб Ҳазрати Хизр мажмуасига ташриф буюриб, мамлакатимиз Биринчи Президенти Ислом Каримов қабрини зиёрат қилди. Шундан сўнг меҳмонлар Имом Бухорий мажмуасини зиёрат қилди. Буюк муҳаддис ҳаёти ва илмий мероси ҳақида меҳмонлар батафсил маълумот берилди. Президентимиз Ш. Мирзиёев ташаббуси билан бунёд этилган Имом Бухорий халқаро илмий-тадқиқот маркази меҳмонларда катта таассурот қолдирди. Марказда тадқиқотчилар учун яратилган шароитлар, айниқса, марказ фондидаги қадимий қўлёзмалар делегация аъзоларида катта қизиқиш уйғотди.
Делегация куннинг биринчи ярмида Амир Темур мақбарасида ҳам бўлиб, Амир Темур ва темурийлар даври тарихига оид манбалар ҳақида маълумотга эга бўлишди. Меҳмонлар куннинг иккинчи ярмида муаззам Регистон майдони, Мирзо Улуғбек расадхонаси ва бошқа бир қатор диққатга сазовор жойларни зиёрат қилиши белгилаган.
Қозоғистон Республикаси Парламенти Мажлиси Раиси Нурлан Нигматулин Имом Бухорий мажмуаси ва Амир Темур мақбараларида маҳаллий сайёҳлар билан суҳбатда бўлиб, ташрифнинг мақсади мамлакатларимиз ўртасида мустаҳкамланиб бораётган дўстлик ва ҳамкорлик алоқаларини янада ривожлантириш эканлигини таъкидлаб, ҳар иккала юртнинг оддий фуқаролари ҳам бу ҳақда билиши лозимлигини таъкидлаб, фуқаролардан ўз яқинлари, қўни-қшниларига ҳам буни етказишларини сўради.
Ўзбекистон мусулмонлар идораси Матбуот хизмати
Идеалингиз ким?
Эътиқод ва идеал. Дунёда ҳеч бир инсон бу икки нарсадан айро эмас. Одамлар кимга ёки нимагадир албатта эътиқод қилади ва шу асосида идеалликка интилади, хоҳ у ҳақ бўлсин, хоҳ ботил.
“Эътиқод” сўзи арабча “иътақада” феълидан олинган бўлиб, “ишонч”, “комил ишонч”, “иймон”, “иймонли бўлиш” маъноларини англатади. Кенг маънода эътиқод бу инсоннинг олдида турган мақсад ёки ғоя ҳақ эканига тўла ишонч билан боғлиқ бўлган ўзига хос психологик ҳолатдир. Айни вақтда эътиқод учун турли шарт-шароитлар мавжуд бўлмоғи лозим. Умуман олганда, эътиқод бу – шахс, гуруҳ ва оммани жипслаштирувчи, одамларни ижтимоий ҳаётнинг фаол аъзосига айлантирувчи омилдир. Диний эътиқод бу объектив (яъни инсон иродасидан юқори турган) Зотга иймон келтириш, У билан бевосита мулоқотда бўлиш, Ундан мадад олиш, ғаройиб воқеа-ҳодисаларнинг такрор содир бўлиши ва унга дахлдорлик ҳамда муайян тасаввур, ақида, муқаддас китоб ва пайғамбар, авлиёларга ишонч, демакдир. Идеалликка интилиш эса йўлбошчи ёки асосчининг фитратидан ўрнак олиб унга ўхшашга ҳаракат қилиш демакдир.
Бугун, турли ижтимоий тармоқларда эътиқод ва идеалликка интилишни қораловчи секуляризм яъни эътиқоддан ҳоли бўлишни тарғиб этувчи турли хил фикрлар кўпаймоқда. Уларнинг аксарияти илмий асосланмаган мантиқсиз фактлар орқали инсонларнинг онггига салбий таъсир ўтказишга уринмоқда.
Мазкур мақола орқали сизларга эътиқод ва идеалликка интилишга доир жаҳон файласуфлари ва олимларининг фикрларини тақдим этамиз.
Аъмолсиз яшаган киши ғарибдир!
И. С. ТУРГЕНЕВ
Идеални инкор этган одам пасткашликни осонлик билан гўзаллик деб қабул қилиши мумкин.
И. ГЁТЕ
Идеалсиз яшаш ярамайди. Соғлом идеалга, халқимизнинг қалбидан, вужудидан отилиб чиққан идеалга эга бўлмоқ керак.
Г. ДИМИТРОВ
Идеал йўлчи юлдуздир. Усиз аниқ йўлни топиш қийин, аниқ йўл бўлмаса — ҳаёт ҳам йўқ.
Л. Н. ТОЛСТОЙ
Идеалсиз, яъни маълум даражада қандайдир эзгуликка интилишсиз ҳеч қачон ҳеч қандай яхши жамият бўлиши мумкин эмас.
Ф.М. ДОСТОЕВСКИЙ
Идеалга муҳаббат, фаол ва ўта фидойиликка мойил туйғудир.
М. ГОРКИЙ
Тирик жон кучли эътиқодга эга бўлмаслиги мумкин эмас… Эътиқодсиз кишиларгина эътиқодни амалга ошира олмайдилар; калтафаҳм одамлар ёки виждонсиз одамларгина эътиқодсиз бўладилар.
Я. Г. ЧЕРНИШЕВСКИЙ
Ҳақгўй ва фойдали бўлиш учун ҳалолликнинг ўзи камлик қилади, шу билан бирга идеал ғоявий изчиллик ва эътиқод ҳам керак.
Н. Г. ЧЕРНИШЕВСКИЙ
Ўз эътиқодингни айтмоғинг учун журъатли бўлишинг керак.
Я. М. СЕЧЕНЕВ
Ҳар бир киши ўз эътиқодини ҳимоя қилиши учун мард бўлиши керак.
А. ГУМБОЛДТ
Эътиқод ўзимизники бўлгани учун эмас, балки ҳаққонийлиги учунгина қимматлидир.
В. Г. БЕЛИНСКИЙ
Фақат тентаклар ва мурдаларгина ҳеч қачон ўз фикрларини ўзгартирмайдилар.
Ж. ЛОУЭЛЛФ
Агар сен одамлардаги самимий, чуқур, беғараз эътиқодларни рад этгудек бўлсанг, унда мен сенинг ўзингда ҳеч қандай эътиқод йўқлигини ҳар жиҳатдан асослаб бера оламан.
Я А. ДОБРОЛЮБОВ
Эътиқодни деворга осиб кўз-кўз қилиб бўлмайди, у фаол бўлиши керак.
О.БАЛЗАК
Ҳаётини ўз эътиқодига бағишлаган одам янги металлни ихтиро этган ёки янги газни топган тадқиқотчига қараганда ҳам инсониятга кўпроқ хизмат қилган бўлади.
Ж. ЛОУЭЛЛ
Эътиқодсиз одам нотавон, ҳар бир аъмоли йўқ одам ғариб кимсадир.
Я. Е. РЕПИН
Жиддий одамнинг ғоялари кўп бўлмайди. Ғояси кўп одам ҳеч қачон жиддий бўлолмайди.
П. ВАЛЕРИ
Салгина эпкинга ҳам айланаверадиган онгсиз пирпиракка ўхшамаслик керак. Инсонда эътиқод мустаҳкамлиги бўлиши лозим.
Ж. ЛОНДОН
Менинг эътиқодларим юрагимнинг урушига қараб ўзгараверса, унда ҳолимга вой.
Ф. ШИЛЛЕР
Инсон сифатида ўз фикрининг, эътиқодининг қадрига етмайдиган одам виждонсиздир.
В. Г. БЕЛИНСКИЙ
Аллоҳ таолонинг бирлиги ва борлигини Мусо алайҳиссалом ўз миллатига, Исо алайҳиссалом ўз умматига, Муҳаммад алайҳиссалом эса бутун инсониятга билдирди.
Наполеон БОНАПАРТ, Франция императори
Агар Муҳаммад соллаллоҳу алайҳи ва салламга бугунги дунёни шахсан бошқариш тақдир этилганида эди, ул зот барча муаммоларни бартараф этишнинг уддасидан чиқарди. Бу эса ўз навбатида, бугунги дунёмиз ниҳоятда муҳтож бўлган тинчлик-хотиржамлик ҳамда бахт-саодатни шубҳасиз, келтирган бўларди.
Жорж БЕРНАРД ШОУ, инглиз драматурги
Мен дунё тарихини ўқиб шундай хулосага келдим: дунё подшоҳлари тўплаган жами салтанату бойлик, қасрлару саройлар Муҳаммад алайҳиссаломнинг ямоқ яктакларига ҳам арзимас экан... Биз Оврупа миллатлари маданий имконимиз юқори бўлишига қарамай, Ҳазрати Муҳаммад сўнгги поғонасига қадар чиқа олган зинанинг биринчи пиллапоясидамиз, холос. Ҳеч шубҳа йўқки, бирон кимса у зотдан юқорироққа ўта олмайди.
Инсоният ҳар жиҳатдан ҳазрати Муҳаммад соллаллоҳу алайҳи ва саллам олдида қарздор!
Вольфганг ГЁТЕ, немис мутафаккири
Барча замонлар ва халқлар учун ЭНГ БУЮК ЙЎЛБОШЧИ – Муҳаммад соллаллоҳу алайҳи ва салламдир.
Америкалик олим Майкл Харт
Юқоридаги фикрлардан хулоса қилсак инсон эътиқодсиз ва идеал инсонга интилимасдан яшай олмайди. Биз мусулмонлар учун эътиқод бу ИСЛОМ, идеалимиздаги, биз ўхшашга ҳаракат қиладиган ва интиладиган инсон бу МУҲАММАД СОЛЛОЛЛОҲУ АЛАЙҲИ ВАСАЛЛАМ ҲАЗРАТЛАРИДИР! Бошқа ҳеч ким ва ҳеч нарса.
Саидаброр Умаров