Саудия Арабистони Подшоҳлиги таълим ва тарбия тизимида ҳар йили ўрта мактаб ўқувчилари томонидан хорижий давлатлар тақдимоти мусобақасини ўтказиш анъанага айланган.

Яқинда ана шундай тадбирлардан бири Риёз шаҳрида жойлашган «Ал-Риссалаҳ» халқаро мактабида ташкил этилди. Мазкур таълим даргоҳининг 7 синфида таҳсил олаётган ватандошларимиз томонидан Ўзбекистон тақдимоти тайёрланди.

Мусобақа талабларига мувофиқ, Ўзбекистон стендида давлат атрибутлари, амалий санъат асарлари, тайёрланган ўзбек таомлари ва ширинликлари, миллий либослар ҳамда мусиқий асбоблар, маданий ва тарихий обидаларнинг суратлари намойиш этилди.

Унда ўзбекистонлик ўқувчилар юртимизнинг тарихи, замонавий давлат бошқаруви тизими, иқтисодиёти, маданияти, табиати, одамларнинг турмуш тарзи ва ўзбек заминида туғилиб, ижод қилган ҳамда дунё тамаддунига буюк ҳисса қўшган аллома ва мутафаккирлар ҳақида ўзбек, араб ва инглиз тилларида маълумот бердилар.

Ўзбекистон тақдимотини юксак баҳолашда, мактаб ўқувчилари ватанимиз маданиятини миллий либосларда ва ўзбек рақс санъати орқали ифодалаганлари, видео лавҳалар ёрдамида эса Тошкент, Самарқанд, Бухоро ва Хива шаҳарлари билан таништирганлари, республикамизнинг сайёҳлик салоҳияти ҳақида кенг маълумот берганлари асосий мезон бўлди.

Юртимизнинг Давлат мадҳияси янграган чоғда иштирокчилар қўлларини кўксига қўйиб диққат билан тинглаганлари тадбирнинг кулминацион нуқтасига айланди.

Маҳаллий таълим вазирлиги вакиллари, ишбилармонлар, устоз ва мураббийлардан ташкил топган мусобақа ҳакамлари гуруҳининг хулосасига кўра, 21 хорижий давлатнинг тақдимотлари орасида Ўзбекистон тақдимоти барча номинациялар бўйича ғолиб деб топилди.

Тадбир қатнашчиларининг айримлари Ўзбекистон тақдимоти бўйича ўз фикр-мулоҳазалари билан ўртоқлашдилар.

Хусусан, «Ал-Риссалаҳ» халқаро мактаби бош директори Хусейн Алининг сўзларига кўра, сўнгги пайтларда араб давлатлари, шу жумладан, Саудия Арабистони жамоатчилиги Ўзбекистонда амалга оширилаётган кенг кўламли ислоҳотларга катта қизиқиш билан қарамоқда.

- Мазкур тадбир биринчи навбатда шу даргоҳда таҳсил олаётган ўқувчиларнинг ва тақдимот қатнашчиларининг дунёқарашини янада кенгайтирди. Ўзбекистондек бой тарихга эга бўлган мамлакатнинг дунё тамаддунига қўшган хиссаси хақидаги маълумотлар билан ўз билимларини бойитдилар, - деди у.

Туркиянинг Саудия Арабистони Подшоҳлигидаги элчихонаси масъул ходими Метин Билге Ўзбекистоннинг хорижий давлатлар билан фаол ҳамкорлигини юқори баҳолаб, қардош ўзбек халқига хурмати юксаклигини таъкидлар экан, мамлакат тарихи ва маданияти жуда ҳам бойлигини, ўзига хос кўринишда ташкиллаштирилган кўргазма эса ушбу тадбирга ўзгача кўрк бағишлаганини қайд этди.

«Ал-Риссалаҳ» халқаро мактаби ўқитувчиси Кенан Авандаз ўзбекистонлик ўқувчиларнинг иқтидори жуда юқорилиги, уларнинг ижодкорлиги ва билим савияси бошқа тенгдошларидан алоҳида ажралиб туришини билдирди.

- Тадбирда Ўзбекистон тақдимотидан жуда ҳам таъсирландим. Бу давлатнинг табиати, тарихий ёдгорликлари ва миллий маданиятига қизиқишим ортди ҳамда у ерга оилам билан биргаликда албатта сафар уюштираман, - дея таъкидлади у.

«Дунё» АА

Риёз

Манба: https://islom.uz

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Абу Ҳурайра розияллоҳу анҳудан ривоят қилинади: 

«Набий соллаллоҳу алайҳи васаллам: 

«Рамазон олдидан бир-икки кун олдин рўза тутманглар. Магар бир киши бирор рўза тутиб юрган бўлса, ўшани тутсин», дедилар».

Бешовлари ривоят қилганлар.

«Сунан» эгаларининг ривоятида: 

«Шаъбон ярмига етганда, рўза тутманглар», дейилган.

Шарҳ: Аҳли китоб бўлмиш кофир қавмлар ўзларига фарз қилинган рўзанинг қайси кун бошланишига шубҳа қилиб, бир-икки кун олдин тутишар, оқибатда нафл ибодат билан фарз ибодатни аралаштириб юборишар эди.

Исломда эса иккиланишга, нафл ва фарзларни аралаштириб юборишга рухсат йўқ. Мусулмонлар ҳар бир ибодатни жазм билан, азму қарор билан нафлни нафл ўрнида, фарзни фарз ўрнида адо этишлари лозим.

Шунинг учун ҳам Пайғамбаримиз соллаллоҳу алайҳи васаллам Рамазон киришидан олдин бир-икки кун қолганда рўза тутишдан қайтарганлар.

Аммо бир одам маълум кунларда, мисол учун, душанба ва пайшанба кунларда нафл рўза тутиб юришга одатланган бўлса-ю, ўша кун Рамазондан олдинги кунларга тўғри келиб қолса, тутса бўлаверади.

Шунингдек, баъзи бир кишилар назр рўза ният қилиб қўйган бўлсалар-у, ўша назр рўзани тутишлари Рамазондан бир-икки кун олдинги кунларга тўғри келиб қолса, улар ҳам тутсалар бўлаверади.

Юқорида зикр этилган сабабларга ҳамда Пайғамбаримиз соллаллоҳу алайҳи васалламнинг «Шаъбон ярмига етганда, рўза тутманглар», деган ҳадисларига биноан, Шаъбон ойининг ўн олтинчи кунидан бошлаб, то Рамазони шариф киргунча нафл рўза тутиш макруҳ бўлади.

Ушбу тафсилотларни яхши тушунмаслик оқибатида Одамлар ичида Шаъбон ойида рўза тутиб бўлмас экан, деган тушунча юзага келган. Аслида эса гап Шаъбон ойининг иккинчи ярмида эканлигини билиб олдик. Шаъбон ойининг аввалида рўза тутиш масаласини эса келгуси ҳадисларни ўрганиш жараёнида билиб оламиз, иншааллоҳ.

«Ҳадис ва ҳаёт» китобидан

Манба: https://islom.uz

Яқинда Марғилон шаҳар «Ширмонпазлик» жоме масжиди имом ноиби вазифасида фаолият юритувчи  Азизхон Юнусовнинг олдига саҳоватпеша кишилардан бири келиб, масжидга эҳсон қилиш нияти борлиги, бу борада қандай ёрдами тегиши мумкинлиги ҳақида сўради. Азизхон Юнусов у кишига миннатдорчилик изҳор қилиб, ҳозирча масжидда ҳамма нарса етарли эканлиги, агар эҳсон қилиш ниятида бўлса етимлар учун қилинадиган эҳсоннинг ажри улуғ бўлишлиги ҳақида сўзлаб берди. Таклифдан рози бўлган суҳбатдоши Меҳрибонлик уйи болалари холидан хабар олишни дилига тугди. Муборак Рамазон ойи арафасида, 22 апрел куни имом ноиби билан биргаликда шаҳардаги “1-сонли Меҳрибонлик уйи” тарбияланувчиларига хайрия дастурхони ёзиб бердилар.

Дунёда бола чеҳрасидек нурафшон чеҳра, бола туйғусидек беғубор туйғу бўлмайди. Гуноҳдан маъсум, соф қалб эгалари шубҳасиз Аллоҳ таолонинг энг ширин неъматларидандир. Уларда улғайиб, тарбия топишлари учун шароитлар бор, бироқ, ширин калом меҳр, эътиборга мушфиқдирлар.

Абу Умома розияллоҳу анҳудан ривоят қилинган ҳадиси шарифда: Расулуллоҳ соллаллоҳу алайҳи васаллам: “Ким Аллоҳ азза ва жалла учун бир етимнинг бошини силаса, қўли нечта сочнинг устидан ўтса, шунча ҳасанот ёзилади. Ким ўз ҳузуридаги етим қизга ёки болага яхшилик қилса, мен ўша одам билан жаннатда мана бундай бўламан” деб икки бармоқларини яқинлаштирдилар (Имом Абу Дардо ривояти).

Ўзбекистон мусулмонлари идораси Масжидлар бўлими

Яратганга беҳисоб шукроналар бўлсинки, ҳар йили Рамазони шариф кириб келиши билан юртимиз масжидлари хатми Қуръон садоларига бурканади. Йилдан-йилга хатми Қуръонлар масжидларимизда тартиб ва ўзгача тароватда ўтиб келмоқда. Қориларимиз сафи ортиб, қироатлари ҳам кўнгилларни мунаввар қилмоқда.

Муборак Рамазон ойи ташрифи яқинлашмоқда. Шу муносабат билан 23 апрель куни Фарғона вилоятида Рамазон ойида масжидларда хатми Қуръон ўтказиб берувчи қорилар ҳамда масжид ходимлари билан учрашув ўтказилди.

Фарғона вилоятида бу йили 189 та масжидда хатми Қуръон ўтказилиши режалаштирилган. Уларда 377 нафар ҳофизи Қуръон қорилар иштирок этадилар. Бу эса қорилар сони бўйича Андижон вилояти (415 та) дан сўнг энг яхши кўрсаткичдир.

Вилоят бош имом-хатиби жойларда таровиҳ намозларига тайёргарлик ҳамда қориларга тааллуқли ташкилий масалалар ҳақида сўзлади.  Учрашувда йилдан-йилга қорилар сонининг ортиб бориши халқимизга берилган улуғ неъмат эканлиги эътроф этилиб, юртимиздаги ободлик бардавом бўлишини тилаб дуо қилинди.

Ўзбекистон мусулмонлари идораси Масжидлар бўлими