www.muslimuz
Ҳеч бир ҳолатда канда қилманг
«Инсонга зарар етганда, ётган ҳолда, ё ўтириб ёки тик туриб ҳам Бизга илтижо қилади. Ундан зарарини кетказганимизда эса, гўё етган зараридан Бизга дуо қилмагандек кетаверади. Мана шу тарзда исрофчи (тажовузкор)ларга ўз қилмишлари зийнатли (чиройли) қилиб қўйилди» (Юнус, 12).
«Инсонга зарар етганда, ётган ҳолда, ё ўтириб ёки тик туриб ҳам Бизга илтижо қилади…»
Абу Лайс Самарқандий тафсирида: “Агар бандага касаллик, камбағаллик ва бало каби ёмон кўрадиган нарсалари тегса, банда ётган ҳолида ҳам Аллоҳга илтижо қилади. Касали енгилроқ бўлса ўтирган ҳолида дуо қилади, агар касаллигидан асорати қолган бўлса, юриб турганда ҳам дуо қилади”, деган.
Маҳмуд Замахшарий оят тафсирида: «Бу оятда дуо қилувчининг уч ҳолатини айтиб ўтишдан нима фойда дейилса, мен айтаманки, бунинг маъноси “Зарар кўрган инсон токи ўша зарари йўқолмагунча Яратганга дуою илтижо қилишдан тўхтамайди. У бизга ҳар қанақа ҳолатида ҳам, тура олмай ётиб қолганда, тик тура олмай ўтириб қолганда ёки тик тура олади-ю, аммо юришга тоқати йўқ бўлса ва баъзиси эса тўшакка “михланиб” қолиб ётганда ҳам дуо қилаверади. Бу билан банда ўзига енгиллик ва соғлиқ сўрайди ва мусибатни ўзидан даф қилишга ҳаракат қилади».
«Ундан зарарини кетказганимизда эса, гўё етган зараридан Бизга дуо қилмагандек кетаверади. Мана шу тарзда исрофчиларга ўз қилмишлари зийнатли қилиб қўйилди».
Фахриддин Розий тафсирида бундай дейилади: “Бу оятда бало, мусибат тушганда инсон сабрсиз бўлиши, роҳат-фароғатда бўлганда оз шукр қилиши баён қилинган. Агар инсон бошига бирор ташвиш тушса, уни ўзидан узоқлаштиришини, мусибатни неъматга алмаштиришини Аллоҳ таолодан сўраб жидду жаҳд билан туриб, ўтириб, ётиб зорланиб дуо қилади. Агар Аллоҳ ундан мусибатни даф этиб омонлик ва офият берса, шукрдан юз ўгиради. Бошига тушган у мусибатни эсламайди ва неъматлар қадрини билмайди. Худди бошига тушган мусибатни кетказиш учун дуо қилмаган инсондек бўлиб олади. Ақлли инсон бало-мусибатга сабр қилиши, ҳузур-ҳаловат ва неъматларга эришганда шукр қилиши вожиб бўлади. Киши қийинчилик вақтида дуоси қабул бўлиши учун роҳат-фароғатда бўлган вақтида кўп зорланиши ва дуо қилиши керак.
Абдуллоҳ ибн Аббос (розияллоҳу анҳу)дан ривоят қилинади: «Набий (соллаллоҳу алайҳи ва саллам) дедилар: “Хурсандчилик кунларида Аллоҳни танисанг, қийин кунларда Аллоҳ сени танийди”» (Ҳоким, Найсабурий).
Абу Дардо (розияллоҳу анҳу): “Аллоҳ таолога хурсандчилик кунларингда дуо қилгин, қийин кунларингда қилган
дуоингни қабул қилади”, дедилар.
Суҳайб (розияллоҳу анҳу)дан ривоят қилинади: «Расулуллоҳ (соллаллоҳу алайҳи ва саллам) бундай деганлар: “Мўмин кишининг ҳолига ажабланасан. Аллоҳ унга нимани қазо қилса, яхшилик бўлади. Агар унга ғам етса, сабр қилади, бу унга яхшилик бўлади. Агар унга хурсандчилик етса шукр қилади, бу ҳам унга яхшилик бўлади. Бу ҳолат мўминдан бошқага бўлмайди”» (Имом Муслим).
Абу Мансур Мотуридий, Абу Лайс Самарқандий,
Маҳмуд Замахшарий, Ибн Касир,
Олусий ва Қуртубий тафсирлари асосида
Бадриддин САДРИДДИН ўғли
тайёрлади.
Ўзбекистондаги “Сурдо-онлайн” маърузасини дунё эътироф этмоқда
Ўлкамизда эшитиш ва гапириш қобилияти чекланган фуқароларни моддий-маънавий қўллаб-қувватлаш, уларга ҳар томонлама кўмак бериш ва муаммоларини ҳал қилишда яқиндан ёрдам бериш ишлари олиб борилмоқда.
2017 йил 1 августдаги Президентимизнинг “Ногиронлиги бўлган шахсларни давлат томонидан қўллаб-қувватлаш тизимини тубдан такомиллаштириш чора-тадбирлари тўғрисида”ги Фармони ижросини таъминлаш мақсадида, Ўзбекистон мусулмонлари идораси томонидан эшитиш-сўзлаш ва кўриш қобилиятида нуқсони бўлган фуқаролар билан “Сиз бизга кераксиз!” шиори остида маърифий тадбирлар ҳар бир ҳудудда ўтказилиб келинмоқда.
Бу каби юксак эътибордан мамнун бўлган юртдошларимиз ташкил этилаётган тадбирлардан ўзлари учун илм-маърифат ва катта манфаат топаётганларини кўзда ёш ила изҳор қилмоқдалар.
Муҳтарам Президентимиз ташаббуси билан ташкил этилган “Вақф” хайрия жамоат фонди томонидан пойтахтимиздаги “Шайх Зайниддин”, Тошкент вилоятидаги “Марказий” ва Самарқанд вилоятидаги “Хўжа Исҳоқ Валий” жоме масжидларида илк маротаба сурдо таржимони ёрдамида диний маърузаларни етказиш бўйича инновацион лойиҳа йўлга қўйилди. Мазкур лойиҳани муваффақиятли амалга оширишда бир неча мутасадди ташкилотлар, хусусан, Ўзбекистон Республикаси Адлия вазирлиги ва Дин ишлари бўйича қўмита яқиндан кўмак бермоқда.
Ушбу хайрли ташаббус нафақат МДҲ мамлакатлари доирасида, балки бутун мусулмон оламида ҳам ўзига хос янгилик, деб баҳоланиб, катта акс-садо бермоқда. Ўзбекистонда биринчилардан бўлиб, жума маърузаларини сурдо тилига таржима қилиш амалиёти ҳақидаги хабар турли оммавий ахборот воситалари орқали кенг ёритилиб, хурсандчиликларга сабаб бўлди. Жумладан, маҳаллий ва хорижий оммавий ахборот воситалари ушбу лойиҳага ижобий муносабат билдириб, хайрли ишларнинг бардавом бўлишига умид билдирмоқдалар.
Айниқса, маҳаллий uza.uz, kun.uz, daryo.uz, podrobno.uz, upl.uz, azon.uz, islom.uz сингари сайтлар ҳамда хориждаги islam-today.ru, mail.ru, golosislama.com, sputniknews.ru, mynamaz.ru, ansar.ru, time-namaz.ru, ru.iqnanews.ru, centralasian.org, aloqada.com, news.tj, utro.news каби хорижий веб сайтларда кенг ёритилди. Ҳатто ozodlik.org сайтида ҳам ижобий баҳоланди.
Жами бўлиб 25 та нуфузли интернет нашри Ўзбекистондаги мазкур йўналишда олиб борилаётган ишларни юқори баҳолади. Масалан, islam-today.ru сайтида “Проповеди с сурдопереводом впервые прошли в мечетях Узбекистана” номли мақола эълон қилинган бўлиб, унда жоме масжидларда сурдо таржимони ёрдамида диний маърузаларни етказиш бўйича инновацион лойиҳа йўлга қўйилганини батафсил ёритилган.
Маълумки, дунё миқёсида 650 миллион ногирон бўлса, уларнинг 320 миллион нафари заиф этишувчилар ва сўзлаш имкониятидан маҳрум шахслардир. Республикамизда эса 30 мингга яқин мана шундай фуқаролар истиқомат қилади. Шундай кишилар билан муттасил ишлаш икки йилдирки, Давлатимиз раҳбари сиёсатида устувор йўналишлардан бири бўлиб қолмоқда.
Ҳозирда миллий имо-ишора тилини ривожлантириш жуда ҳам зарур. Эшитиш ва нутқ аъзоларида нуқсони бор кишиларнинг маънавий оламини бойитиш учун диний-маърифий адабиётларни чоп этиш чоралари ҳам кўрилмоқда. Жумладан, диний адабиётларни брайл ёзувида нашр қилиш, аудио-дисклар чиқариш, маърифий суҳбатлар сонини янада кўпайтириш, шунингдек, мулоқот тадбирларини ўтказиш учун алоҳида бино ажратиш, диний телекўрсатувларга сурдо таржимонларини бириктириш ва алоҳида сайт ташкил қилиш бўйича хайрли ишлар режалаштирилгани барчани мамнун этмоқда.
Ушбу сурдо-онлайн инновацияон лойиҳаси орқали юзлаб диний-маърифатдан четда қолаётган кишиларга шодлик улашилди. Расулуллоҳ соллаллоҳу алайҳи васаллам бир ҳадисларида: «Аллоҳ таолога фарзлардан кейинги энг севимли амал мусулмоннинг қалбига хурсандлик киргизишдир», деб марҳамат қилганлар.
Ҳазрат Алишер Навоий айтадилар:
Кимки бир кўнгли бузуқнинг хотирин шод айлагай,
Онча борким, Каъба вайрон ўлса, обод айлагай.
Ҳа, шундай эзгуликлар орқали қанчадан‑қанча кўнгиллар обод бўлиб, маърифат зиёси билан зийнатланди, десак асло муболаға бўлмайди.
Хулоса, бундай инсонларнинг синиқ кўнгилларини кўтариб, дилларига мамнунлик улашиш ҳар бир виждонли инсон учун ҳузурбахш амаллардан ҳисобланади.
Ўзбекистон мусулмонлари идораси Матбуот хизмати
Одилхон қори Юнусхон ўғли имом-хатиб этиб тайинланди
Бугун, 1 февраль куни Тошкент шаҳри Шайхонтаҳур тумани Камолон даҳасидаги “Хўжа Аламбардор” жоме масжидига Одилхон қори Юнусхон ўғли имом-хатиб этиб тайинланди.
Одилхон қори Юнусхон Имом Бухорий номидаги Тошкент ислом институтини тамомлаган. 1998–1999 йилларда Тошкент шаҳар Учтепа тумани “Ҳазрати Умар” жоме масжиди имом-хатиби, 1999-2000 йилларда Тошкент шаҳар Шайхонтоҳур тумани “Шайх Зайниддин” жоме масжиди имом ноиби, 2000–2011 йилларда Тошкент шаҳар Шайхонтоҳур тумани “Фирдавс” жоме масжиди имом-хатиби, 2010-2016 йилларда Тошкент шаҳар бош имом-хатиби ўринбосари, 2011-2018 йилларда Тошкент шаҳар Шайхонтоҳур тумани бош имом-хатиби ва “Шайх Зайниддин” жоме масжиди имом-хатиби вазифаларида меҳнат қилган.
Одилхон қори Юнусхон ўғли бир неча диний-маърифий мавзудаги китоблар, рисолалар ва мақолалар муаллифидир. Шунингдек, панду насиҳатларни ўзига мужассам этган аудио дисклари эълон қилинган.
Таниқли уламо, ўткир воиз Одилхон қори Юнусхон ўғли бугунга қадар Ўзбекистон мусулмонлари идораси ҳузуридаги “Вақф” хайрия жамоат фонди тарғибот бўлими раҳбари сифатида фаолият юритаётган эди.
Одилхон қори Юнусхон ўғли ушбу марказий жоме масжиддаги шарафли вазифада халқимизнинг диний-маърифий эҳтиёжини таъминлаш йўлида Аллоҳ таолодан куч-қувват сўраймиз.
Ўзбекистон мусулмонлари идораси Матбуот хизмати
Фатво ҳайъати: Дин ва ҳаётга оид саволингиз борми?
Муҳтарам юртдошларимизнинг диний эҳтиёжларини қондириш ва уларни қизиқтирган шаръий саволларига ишончли жавобларни мўътабар уламолардан олишни ташкил этиш мақсадида, Ўзбекистон мусулмонлари идораси “Дин ва ҳаётга оид саволлар” номли онлайн телеграм каналини ишга туширганидан хабарингиз бор.
Ушбу телеграм канали фаолият бошлаганига 4-5 кун ўтар-ўтмас, обуначилар сони 1900 дан ошиб кетгани, бир кунда 250 дан зиёд саволга жавоб берилаётгани халқимизнинг, ҳақиқатан, шундай ишга катта эҳтиёжи борлигини намоён этди.
Одамларимиз бугунги кунда долзарб бўлиб турган ва жавобини тополмасдан қийналаётган масалаларга уламоларимиздан муносиб жавоблар ола бошладилар. Жумладан, дастлабки кунларда “қиблани аниқлаш”, “мазҳабга эргашиш зарурлиги”, “фолбинлик зарари”, “азондан будильник сифатида фойдаланиш” ва “телефон орқали Қуръон эшитиш” каби мавзуларда саволлар келиб тушди.
❓ “Телефон орқали Қуръони каримни тинглаш жоизми?” деган саволга шундай жавоб берилди:
– Қуръони каримни телефон ёки шунга ўхшаш бирор восита орқали тинглаш жоиз бўлиб, савобли амал саналади. Фақат унинг ўзига яраша одобларига риоя қилиниши шарт. Аллоҳ таоло Қуръони каримнинг Аъроф сурасида: "Қуръон ўқилганда унга қулоқ тутинг ва жим бўлинг. шунда раҳм қилинурсиз"(204-ояти), деган.
Уламолар ушбу ояти каримага асосланиб, Қуръони карим оятлари тиловат қилинганда жим ўтириб тинглаш вожиб эканига иттифоқ қилганлар. Шу жиҳатига кўра, бирор иш билан машғул бўлиб, Қуръон эшитиш жоиз эмас. Қуръони каримни тинглаш қалбга шифо бўлиб, тингловчини тоат-ибодатга, тақвога даъват этади. Натижада банда Аллоҳ таолонинг раҳмат ва мағфиратига эришади ...
❓ Шунингдек, “Фол кўрувчилар жинлар билан ишлайдими?”, деган саволга:
– Пайғамбаримиз (соллаллоҳу алайҳи ва саллам): «Фолбинларнинг баъзида ҳақ гапни айтиб қолишларининг сабаби шуки, жин гапларни ўғринча олиб, фолбиннинг қулоғига қуяди. Фол кўрувчи унга юзта ёлғон аралаштириб гапиради» деганлар (Имом Бухорий ривояти).
Фолбинларнинг гапларига ишониш – куфр. Аллоҳ асрасин! Ҳадиси шарифда: «Кимки башоратчи ёки фолбиннинг олдига борса ва у айтган нарсани тасдиқласа, шубҳасиз, у Муҳаммадга (алайҳиссалом) тушган нарсага куфр келтирибди» дейилган (Абу Довуд, Насоий ривоятлари).
❓ Шунга ўхшаш муҳим саволлар қўшни Қирғизистон, Қозоғистон, Тожикистон республикалари фуқароларидан, шунингдек, АҚШ, Россия, Туркия каби хорижий давлатлардан ва чет-элларда меҳнат қилаётган ўзбек ватандошларимиздан ҳам келиб тушмоқда.
Масалан, “Мен Россияда мусофирман, қазо намозларимни қандай адо қиламан?” ёки “Men AQSHda kirakashlik qilaman. Bitta mijoz adashib ko'p pul bervoribdi. Bunaqa holatlar ko'p bo'lib turadi. Shu pullarni ishlatsam halol bo'ladimi?” деган мазмундаги саволлар келиб тушган.
♦ Обуначилар саволларига олган жавобларидан қониқиш ҳосил қилгандан кейин ўзларининг ташаккурларини билдирмоқдалар. Жумладан:
• Iymon yulduzi_ bot миннатдорчилигини қуйидагича изҳор қилган:
Assalamu alaykum va rohmatullohi va barokatuh. Bizga mana shunday shart-sharoitlar yaratib bergan, hukumatimizga va bizning savollarimizga aniq javob berib, bizga yaxshilik va toʻgʻri yoʻlni koʻrsatish uchun “Din va hayotga oid savollar” deb nomlangan telegram kanalini joriy qilgan OʻZBEKISTON MUSULMONLARI IDORASI FATVO HAYATIga oʻz minnatdorchiligimni bildiraman!..”
• “Shoh...” номли канал эгаси ўзининг фикрларини бундай ёзган:
Assalomu alaykum hurmatli ustozlar. Savollarimga aniq va asosli javob berayotganliklaringizdan juda minnatdorman. Alloh taolo boshlagan ishlaringizni bundan-da barakali qilsin.
• Анбар:
Assalomu alaykum. Sizlarga dinimiz rivoji yurtimiz musulmonlari diniy salohiyati rivoji uchun hormay tolmay xizmat qilayotganligingiz uchun tashakkur.
• Asqarov Anvarxon Karimxon o'g'li:
Assalomu alaykum! Ming bor tashakkur! Alloh din yo`lidagi faoliyatinglarda kuch-quvvat, fazli barakot bersin! Rahmat!
Қайд этилганидек, ечими топилмаётган саволлар ва дил изҳорлари келишда давом этмоқда.
Фатво ҳайъати мўмин-мусулмонларимизни “Дин ва ҳаётга оид саволлар” номли расмий @diniysavollar телеграмм канали орқали саволларига қулай услубда, исталган вақтда жавоб олишларини тавсия этади.
Бунинг учун savollar.muslim.uz сайти ёки телеграмм мессенжеридаги “@SavollarMuslimUzBot”ига савол йўллаш кифоя.
Аллоҳ таоло ҳаммамизни тўғри йўлда собитқадам айласин.
Ўзбекистон мусулмонлари идораси Матбуот хизмати
“Дин ва ҳаётга оид саволлар” онлайн расмий канал ишга тушди
Ислом – илм-маърифат дини. Ҳазрати Пайғамбаримиз соллаллоҳу алайҳи ва салламга нозил қилинган Қуръони карим оятларида 811 маротаба илмга ундаш бор. Ҳадиси шарифда: “Илмни талаб қилиш ҳар бир муслим ва муслимига фарздир”, - деб таъкидланган (Ибн Можжа ривояти).
Инсон ўзи билмаган нарсасини уламолардан сўраб ўрганиши керак. Зеро, Аллоҳ таоло Қуръони каримда: “Агар билмайдиган бўлсангиз, зикр аҳлларидан сўрангиз!”, деб буюрган (Наҳл, 43). Расулуллоҳ соллаллоҳу алайҳи ва саллам: “Билимсизликнинг давоси саволдир”, – дея баён қилганлар (Имом Абу Довуд ривояти).
Ўзбекистон мусулмонлари идораси бир неча ойдан бери мўмин-мусулмонларнинг шаръий масалаларига илмий ва асосли жавобларни туну кун “@SavollarMuslimUzBot” ва savollar.muslim.uz сайти орқали тақдим этиб келмоқда. Ҳар куни 110-120 дан, ҳафтасига 700-750 та, ойига эса 3500 тага яқин турли мавзудаги саволлар келиб тушмоқда. Саволларга кучли уламолардан иборат бўлган Фатво ҳайъати аъзолари томонидан жавоблар бериб келинмоқда.
Ҳаттоки, саволлар қўшни Қирғизистон, Қозоғистон, Тожикистон фуқароларидан, шунингдек, АҚШ, Россия каби хорижий давлатларда меҳнат қилаётган ўзбек ватандошлар томонидан ҳам келиб тушмоқда.
Мухлисларнинг талаб ва истакларини инобатга олиб, Фатво ҳайъати тамонидан “Дин ва ҳаётга оид саволлар” номли расмий @diniysavollar телеграмм канали ишга тушди ва саволларга қулай услубда жавоб олиш имконияти йўлга қўйилди. Бунинг учун savollar.muslim.uz сайти ёки телеграмдаги “@SavollarMuslimUzBot”ига савол йўллаш кифоя қилади.
Ўзбекистон мусулмонлари идораси Матбуот хизмати
Мақолалар
