muslim.uz
Саудия Арабистони қадимий масжидларни таъмирлаш бўйича лойиҳани амалга оширади
Бугунги кунда Саудия Арабистони Подшоҳлигида кўплаб қадимий масжидлар янги масжидлар қурилгани сабабли қаровсиз аҳволга келиб қолган. Аҳоли замонавий масжидларга ташриф буюриши натижасида тарихий масжидларга ҳеч ким деярли келмайди.
Тарихий масжидларга одамларни қайтариш мақсадида "Муҳаммад бин Салмоннинг тарихий масжидларни ривожлантириш лойиҳаси" ишлаб чиқилди ва унга асосан бутун мамлакат ҳудудидаги 30 та қадимий масжидлар таъмирланади. Бу ҳақда arabnews.com нашри хабар берди.
Хабарда Саудия Арабистонининг Асир вилоятининг ўзида бешта ибодат масканларини қайта таъмирлаш мақсадида 50 миллион саудия риёли миқдоридаги маблағ ажратилиши ҳам қайд этилган.
Асирдаги қайта таъмирланувчи масжидлар қуйидагилар:
1. Ал муфдат ал Абҳа масжиди - қурилганига 400 йил бўлган масжид қайта таъмирланади. Ушбу масжид 40 йил аввал ўз фаолиятини якунлаган.
2. Садрайд масжиди - ушбу масжид ал Намас вилоятининг шимолида жойлашган бўлиб, Араб яриморолидаги қадимий масжидлардан ҳисобланади. Ушбу масжид тахминан 728 йилда қурилгани айтилади.
3. Ал Сару масжиди - ушбу масжиднинг қачон қурилгани ҳақида аниқ маълумотлар мавжуд эмас, бироқ уни жуд қадимий деб айтишади.
4. Ал Ақиса масжиди ҳам қадимий масжидлардан ҳисобланади. Уни қайта таъмирлаш дастури тез орада амалга оширилиши қайд этилган. Масжид 72 метр квадрат майдонни эгаллаган бўлиб, аҳоли яшаш жойига яқин жойлашган.
5. Ал Нусб тарихий масжиди Абҳа шаҳри марказида жойлашган бўлиб, у 1744 йилда шайх Муҳаммад ал Муфарраҳ томонидан қурилган. 1841 ва 1897 йилларда қайта таъмирланган.
ЎМИ Матбуот хизмати
Туркия дунё бўйлаб кўзи ожизлар учун Қуръон етказиб беради
Туркия Республикаси бутун дунё бўйлаб Мусҳафи шарифнинг Брайл алифбосида чоп этилган шаклини етказиб беришни йўлга қўйди. International Union for Braille Quran Services (Халқаро Брайлда Қуръон хизматлари иттифоқи) ташкилотининг раҳбари сўзларига кўра, бугунги кунда кўзи ожиз бўлган шахсларга Қуръони каримни ўқиш имкониятини тақдим этиш муҳим масалага айланмоқда.
dailysabah.com нашрининг хабарида айтилишича, бугунги кунда Миср, Малайзия ва Иордания сингари мамлакатлар Брайл алифбоси асосида ёзилган Мусҳафларни чоп этадилар. Брайл алифбосидан фойдаланилган китоблар кўзи ожизлар учун қўл келади ҳамда ушбу инсонлар 7-15 кун ичида Қуръон ўқишни ўрганиб оладилар.
Маълумот учун, Халқаро Брайлда Қуръон хизматлари иттифоқи 2014 йилда ташкил этилган бўлиб, 10 дан ортиқ мамлакатларга Қуръони каримни етказиб бериш билан шуғулланади. Иттифоқ бугунги кунга қадар Брайлдаги Қуръон бўйича уч марта йирик анжуманлар ўтказган.
Брайл алифбоси 1829 йилда Луис Брайл исмли олим томонидан яратилган бўлиб, ушбу ёзув тури кўзи ожиз инсонлар учун ёзиш ва ўқиш имкониятини беради.
ЎМИ Матбуот хизмати
Дубайдаги аёллар ўртасида ўтказилган Қуръон мусобақаси ғолиблари маълум қилинди
Жорий йилнинг ноябрь ойида Бирлашган Араб Амирликларининг Дубай шаҳрида учинчи бор ўтказилган Шайха Фотима бинт Муборак Халқаро Муқаддас Қуръон мусобақасининг натижалари эълон қилинди. Бу ҳақда khaleejtimes.com нашри хабар берди.
Мусобақа якунларига кўра:
Биринчи ўринни баҳрайнлик қория Сора Муҳаммад Абдуллоҳ ҲАсан Ҳусайни эгаллаган. Унга 250 минг дирҳам миқдоридаги пул мукофоти берилган.
Иккинчи ўринни эса сенегаллик Маимуна Ло қўлга киритган. Мукофот сифатида 200 минг дирҳам берилган.
Учинчи ўринни жазоирлик қория Ҳаула Азуз эгаллаб, 150 минг дирҳам мукофот билан тақдирланган.
Мусобақа доирасида 4-10 ўринни эгаллаган иштирокчиларга ҳам пул мукофотлари тақдим этилган. Мос равишда тўртинчи ўрин ғолибига 65 минг дирҳам берилган бўлса, ўнинчи ўриндаги қорияга 35 минг дирҳам ҳадя қилинган.
Маълумот учун, Шайха Фотима бинт Муборак Халқаро Муқаддас Қуръон мусобақаси Дубай халқаро Қуръон мукофотининг бир тармоғи бўлиб, 25 ёшгача бўлган аёл-қизлар ўртасида ўтказилади. Тақдирлаш маросими Дубайдаги Ал Мамзар туманида ўтказилган.
ЎМИ Матбуот хизмати
Шавкат Мирзиёев Ливан Президентини табриклади
Ўзбекистон Республикаси Президенти Шавкат Мирзиёев бугун, 22 ноябрь куни Ливан Республикаси Мустақиллиги куни билан мамлакат Президенти Мишел Аунни табриклади. Бу ҳақда Президент матбуот хизмати хабар берди.
ЎМИ Матбуот хизмати
Ҳадис илми мактабига қабул имтиҳонлари бошланди.
Бугун, 22 ноябрь куни Ўзбекистон мусулмонлари идораси тасарруфидаги Ҳадис илми мактабига ҳужжат топширган абитуриентлар учун “Ҳадис ва мусталаҳул ҳадис”ва “Араб тили” фанлари бўйича ижодий имтиҳонлар бошланди.
Қабул имтиҳони жараёнлари Имом Бухорий номидаги Тошкент ислом институти биносида ўтказилмоқда.
Имтиҳонлар бошланишидан олдин Қуръон тиловати ва дуо-и хайрлар қилинди. Сўнгра Ҳадис илми мактаби ректори Олимхон Юсупов кириш сўзи билан бошлаб, мактабнинг Президентимиз ташаббуслари билан ташкил этилгани, Ҳадис мактабининг мақсад ва вазифалари, талабаларга қўйилаётган юқори даражадаги талаблар ҳақида тушунтириб берди.
Ўзбекистон мусулмонлари идораси Таълим ва кадрлар тайёрлаш бўлими мудири Салоҳиддин Шерҳонов Муфтий ҳазратларининг табрикларини абитуриентларга етказиб, қабул имтиҳонларининг тартиб-қоидаларини тушунтириб берди.
Шундан сўнг, Ўзбекистон мусулмонлари идораси қабул ҳайъати томонидан тайёрланган, махсус қопларлардаги имтиҳон материаллари абитуриентлар ва ота-оналар гувоҳлигида очилди.
Ижодий имтиҳонларга Ўзбекистон ҳалқаро ислом академияси ва Тошкент ислом институтининг тажрибали педагог-ўқитувчилари жалб қилинди.
Абитуриентларни саралаб олишда араб тилини пухта ўзлаштирган, ҳадисларни ёд олишга қобилияти бўлган, Қуръони каримни ёд олганлик каби мезонларга алоҳида эътибор қаратилмоқда.
Қабул жараёнлари учун Тошкент ислом институтида абитуриентлар ва уларнинг ота-оналари учун барча шарт-шароитлар яратилган.
Эслатиб ўтамиз, Ҳадис илми мактабига абитуриентларни қабул қилиш бўйича тест синовлари жорий йилнинг 23 ноябрь куни Тошкент ислом институти биносида ўтказилади.
ЎМИ Матбуот хизмати
Мақолалар
