muslim.uz
Истихора намози
Жобир розияллоҳу анҳудан ривоят қилинади:
«Набий соллаллоҳу алайҳи васаллам бизга ҳамма ишларда истихора қилишни худди Қуръондан сурани таълим бергандек, таълим берар эдилар. У зот:
«Қачон бирингиз бир иш қилмоқчи бўлса, фарз намоздан бошқа икки ракат намоз ўқисин. Сўнг: «Эй бор Худоё! Албатта, мен Сендан илминг ила истихора қиламан. Сенинг қудратинг ила қудрат сўрайман. Сендан улуғ фазлингдан сўрайман. Албатта, Сен қодирсан, мен қодир эмасман. Сен билурсан, мен билмасман. Сен ғайбларни яхши билувчи Зотсан.
Эй бор Худоё! Агар ушбу иш менга динимда, маошимда ва ишим оқибатида яхши эканини билсанг (ёки ҳозирги ишимдаю келгусида) уни менга тақдир қилгин, менга осон қилгин, сўнгра уни мен учун баракали қилгин. Агар ушбу иш мен учун динимда, маошимда ва ишим оқибатида (ёки ҳозирги ишимдаю келгусида) ёмон эканини билсанг, уни мендан буриб юбор, мени ундан буриб юбор. Ва менга қаерда бўлса ҳам яхшиликни тақдир қил. Сўнгра мени унга рози қил, десин ва ҳожатини айтсин», дедилар».
Шарҳ: Жобир ибн Абдуллоҳ Ансорийдан ривоят қилинган ушбу ривоятда Расулуллоҳ соллаллоҳу алайҳи васаллам ишларни тўғриси зоҳир бўлмаган нарсаларда Аллоҳга қайтиш, ҳар қандай муҳим ишларда Ундан маслаҳат талаб қилишни ўргатмоқдалар. Бу истихорани таълим беришда худди Қуръон сураларини таълим бергандек ғоят аҳамият қилардилар. Агар бандага бирор иш мушкул бўлиб, тўғриси қайси нарсада экани ноаниқ бўлиб қолса, туриб икки ракат намоз ўқиб, Аллоҳга юзланиб, у ишни ҳақиқатини очиб беришини талаб қилиб, албатта сўраётганида Холиқга сано айтиб, дуо қилиб, ўша дуосида тазарруъ ва бўйин эгиб, махлуққа хос синиқ ҳолда туришини уқтирмоқдалар. Чунки инсон ўзига фойда ҳам зарар ҳам келтира олмайди. Демак, мусулмон киши Раббисига юзланаётганида ўша истихора қилиб сўраётган нарсаси дини ва дунёсида яхшилик бўлса ўша ишни осон бўлишини, бордию дини, дунёси, ҳаёти ва охиратида ёмон бўлса қалбидан у нарсани бошқа нарсага буриб юборишини сўрамоғини уқтирмоқдалар. Бу нарса фақат бандани Раббисига бўйсуниши ва убудийятга иқрор бўлишининг бир намунасидир. Аллоҳ фазлини ўз бандалари устида доим бўлишини яхши кўради. Бандаларнинг ўша фазлга етишиш учун фақат Унга юзланиб, фазлини талаб қилишса кифоя. Чунки Аллоҳ таоло бандаларини қўл чўзишганида ноумид қайтаришдан азизроқдир.
“Бандаларим Сиздан (эй Муҳаммад) Мен ҳақимда сўрасалар, Мен уларга яқинман. Менга дуо қилган пайтларида дуогўйларининг дуосини ижобат қиламан. Бас, ҳақ йўлга юришлари учун (улар ҳам) Менинг (даъватимга) жавоб қилсинлар ва Менга иймон келтирсинлар”. (Бақара сураси,186-оят).
Киши итихора намозини ўқигандан кейин мазкур иш ҳақида ўйламай, Аллоҳ ихтиёр қиладиган нарсани кутиб юради. Кейин кўнглига тушиб, ўзига маъқул бўлиб, қилгиси келиб қолса, қилади. Бу ҳақда туш кўриши ҳам мумкин. Агар иш бир тарафга бўлмай туриб қолса, истихора намозини яна қайтадан ўқийди. Қайта ўқиш етти мартагача бўлиши мумкин. Истихора намозининг биринчи ракатида Фотиҳа сурасидан кейин Кофирун сурасини, иккинчи ракатда Ихлос сурасини ўқийди.
Кўриниб турибдики, истихора намози ҳам бошқа намозлар каби бандани Аллоҳ таолога боғловчи омилдир. Бир ишни қилмоқчи бўлганда Аллоҳ таолонинг ўзига ёлвориб, яхши йўл кўрсатишни сўрашдир. Бу маъно эса, мусулмон киши ҳаётида намознинг ўрни қанчалар муҳим эканини яна бир бор кўрсатади. Мусулмон киши ҳатто қиладиган дунёвий ишида ҳам дунёнинг холиқи ва бошқарувчиси Аллоҳ таолонинг ўзидан маслаҳат сўраш имконига эгадир.
Ҳадисдан олинадиган фойдалар:
1) Истихора намозини мустаҳаб эканлиги ва намоздан кейин ҳадисда келган дуони ўқишлик.
2) Расулуллоҳ соллаллоҳу алайҳи васаллам умматларига меҳрибон эканлиги ҳамда ҳар бир ишда умматларини тўғри йўлга бошлашлари.
3) Мўмин киши ҳар қандай ишини Аллоҳ таолога топширмоқлиги.
ЎМИ матбуот хизмати
Шаҳзода Файсал ибн Салмон ўзбекистонликларни энг тартибли ҳожилар деб эътироф этди
6 август куни кечки соат 21:00 да Мадина шаҳри амири Файсал ибн Салмон томонидан Саудия Арабистони Подшоҳлигига дунёнинг турли давлатларидан келган Ҳаж делегациялари раҳбарлари учун қабул маросими ўтказилди. Унда Ўзбекистондан Ҳаж-2018 йил мавсуми ишчи гуруҳи раҳбари, Дин ишлари бўйича қўмита раиси ўринбосари Н.Абулҳасан ҳам иштирок этди. Қабул маросими давомида Нуриймон Абулҳасан ва Файсал ибн Салмон ўртасида ўзаро мулоқот ташкил этилиб, Шаҳзода ўзбекистонликларни энг тартибли хожилар, деб эътироф этди.
Шахзода Файсал ибн Салмон ўз сўзида Ўзбекистон Республикасини қадим тарихга эга давлат сифатида кўришини таъкидлаб, бу юртда етишиб чиққан Абу Райҳон Беруний, Абу Али ибн Сино, Имом Бухорий, Ҳаким Термизий каби буюк алломаларнинг илмий мероси ҳозирги вақтда ҳам жаҳон илм дунёсида маёқ бўлиб нур таратаётганини алоҳида эътироф этди.
Тадбир давомида Н.Абулҳасан Мадина минтақаси амири Файсал ибн Салмонга кўрсатилган ҳурмат-эътибор учун миннатдорлик билдирди.
Бундан ташқари Ҳаж ва Умра ишлари вазири Солиҳ Бинтин билан ҳам ўтказилган учрашувда Ўзбекистоннинг Ҳаж ва Умра тадбирлари Саудия Арабистони Подшоҳлиги томонидан Ҳаж ва Умра ишлари вазирлиги билан ҳамкорликда намунали ташкил этилаётгани эътироф этилди ва миннатдорлик билдирилди. Келгуси йилларда Ҳаж ва Умра тадбирларида зиёратчиларимиз учун Мадина шаҳрида яратилаётган шароитларни такомиллаштириш, хизматлар даражасини янада юқори савияга кўтариш мақсадида Масжид ун-Набавийга янада яқин ва қулайроқ ҳарамдан 100 метр масофада жойлашган “Мадина миллениум”, “Zam-zam pullman” ва “Мисбаҳ таййиба” меҳмонхоналарига жойлаштириш масаласи ўрганилди ва уларнинг шароитлари билан танишиб чиқилди.
Ҳаж-2018 ишчи гуруҳи
Сиз буларни олдин кўрганмидингиз?
Аллоҳ таоло Қуръони Каримда шундай деб марҳамат қилган:
وَمَا يَعْزُبُ عَن رَّبِّكَ مِن مِّثْقَالِ ذَرَّةٍ فِي الأَرْضِ وَلاَ فِي السَّمَاء وَلاَ أَصْغَرَ مِن ذَلِكَ وَلا أَكْبَرَ إِلاَّ فِي كِتَابٍ مُّبِينٍ
“На ер юзида ва на осмонларда зарра миқдоридаги, ундан кичикроқ ёки каттароқ нарса Роббингдан махфий бўла олмас, балки очиқ-ойдин китобдадир” (Юнус сураси, 61-оят).
Ҳа, Ер юзидаги ва осмонлардаги барча каттаю кичик нарсалар, чивин каби майда ҳашаротлар, ҳатто атомлар, уларнинг ичидаги протон, электрон, нейтрон, позитрон ва бошқа микрооламлар Роббимиздан махфий бўла олмайди. Аллоҳ таоло буларнинг барчасини Ўзи яратган, Ўзи кўриб-билиб, ризқ бериб, ҳисоб-китобини, тадбирини қилиб туради.
Атрофимиздаги баъзи нарсаларга микроскоп орқали назар солсак, қандай манзара намоён бўларди? Кўзимизга силлиқ, текис кўринган нарсаларни микроскопда кўрганимизда уларнинг у қадар силлиқ, текис эмаслиги, юзасида, сиртида кўз билан кўриб бўлмайдиган кўплаб бўртмалар, чизиқлар ва бошқа нарсалар борлигининг гувоҳи бўламиз. Қуйидаги расмларни кўрганингизда бунга амин бўласиз. Суратга тегишли ёзувлар ҳар бир расмнинг устида берилган.
1. Инсон киприклари. 50 марта катталаштирилган сурат.
2. Қумнинг микроскоп остида кўриниши.
3. Чумоли боши.
4. Қор парчаларининг микроскоп орқали кўриниши.
5. А4 қоғоз сиртининг микроскопда кўриниши.
6. Туз ва мурч доначаларининг микроскопда кўриниши.
7. Электробритва тиғлари ва кесилган тук қолдиқлари. Микроскопда олинган тасвир.
8. Пашша.
9. Инсон миясидаги асаб ҳужайраларининг микроскопдакўриниши.
10. Биз ипни бир бутун ҳолда кўрамиз. Микроскопда эса шундай кўринар экан.
11. Бу инсон тили юзасининг микроскопда кўриниши.
12. Микроскопда 1500 марта катталаштириб тасвирга олинган - инсоннинг соч толаси.
13. Ушбу суратнинг ўнг тарафида бармоқ изининг микроскопдаолинган тасвири. Чап тарафда эса Арабистон ярим оролидаги Рубъул Холий номли саҳронинг қуми тасвири. Ушбу суратларда бармоқ изи билан қум чизиқларининг бир-бирига ўхшаш экани яққол кўриниб турибди. Олимлар ҳозиргача бу ҳолатни шарҳлаб бера олишмаган.
14. Бармоқ излари.Микроскопда олинган.
15. Инсон танасидаги тукнинг қирқилган учи. Микроскоп орқали олинган расм.
16. Аниқ тартиб, мукаммал яратиш, керакли нарсалар билан жиҳозлаш. Бу бизнинг кўзимизга кўриниб-кўринмайдиган, кўпинча, кечқурунлари чақиб, безовта қилиб, уйқу қочишига сабаб бўладиган ҳашарот - бурганинг микроскоп орқали кўриниши.
17. Бу картон ёки двпнинг синиқ бўлаклари эмас. Бу томирларда тиқилиб, ивиб қолган қон (тромб)нинг микроскоп орқали кўриниши.
18. Шакар донасининг микроскоп орқали кўриниши.
19. Туз донасининг микроскопда кўриниши.
20. Уйдаги чангнинг микроскоп орқали кўриниши.
Интернет материаллари асосида
Нозимжон Иминжонов тайёрлади
Ёруғликка талпиниш...
Ўз уйингни ўзинг асра...
У билмай катта хатога йўл қўйди. Аммо бироз кеч бўлсада нон-туз берган беминнат едириб ичирган Ватанига, ота-онасига хиёнат қилиш энг катта гуноҳ эканлигини англаб етди. Энг асосийси дунёқараши ўзгарди, энди ҳалол меҳнати билан Ватанимиз равнақига ҳисса қўшмоқчи. “Бир иш қилишдан олдин етти ўлчаб бир кесиш керак экан. Президентимизга ўз миннатдорчилигимни билдираман, маҳалла фаолларига раҳмат, ҳар томонлама қўллаб-қувватлашди. Бори-йўғимдан хабар олишди. Ҳокимият деҳқончилик қилишим учун ер ажратиб бермоқчи. Адашганимдан минг пушаймонман. Мени кечирган, афв этган Юртбошимга ҳалол меҳнат ва садоқат ила хизмат қилиб, ўз айбимни ювмоқчиман”, дейди адашиб диний экстрмистик оқимга кириб қолган бир опахон.
Эзгу ишга бел боғлаган бу аёлни маҳалла куй ёлғизлатиб қўймади. Билмай хато қилган инсонни кечириш, хатосини тўғрилаш учун имкон бериш, бағрикенг халқимизга хос бўлган одат, бундай муносабатга муносиб кўрилган инсон эса эл-юрт олдида, вояга етказган она-Ватани олдида бир умр қарздорлик ҳисси билан яшашга, тинмай меҳнат қилишга ундайди.
Яна бир адашган ватандошимиз Қибрай туманининг Чинобод қишлоғи, Истиқлол МФЙ, Ойбек кўчасида истиқомат қилувчи юртдошимиз ҳам қилган хатоларидан афсусда. Бугун эл корига ярай, ота-онам, оила аъзоларим дуосини олай, икки нафар фарзандимга тўғри тарбия берай деган эзгу мақсад йўлида яшамоқда. Энг муҳими ҳалол меҳнати ортидан рўзғор тебратмоқда.
“Қилган ишларимдан афсусдаман, нотўғрилигини билдим, кўп қатори менга ҳам давлатимиз раҳбари ғамхўрлик қилиб махсус рўйхатдан (ДЭО) чиқардилар, уларга ўз миннатдорчилигимни билдираман. Ҳозир бир корхонада ишчи бўлиб ишлаяпман. Юртимизда инсон манфаатлари ҳар нарсадан устун эканлигига қайта-қайта амин бўляпман” дейди у ўз суҳбатида.
Ёт ғоялар таъсирига тушиб, йўқ жойдан ўзига ғам-ташвиш сотиб олган бу каби фуқароларни тўғри йўлга бошлаш, афв этилганларнинг кўнглига қўл солиш аввало диний уламолардан алоҳида эътибор ва фаоллик кўрсатишни талаб қилади. Бундай муносабат замирида “бир жаҳолатга ўн маърифат билан жавоб қайтариш лозим” деган ҳақиқат ётади.
Бугун бағрикенглик, кечиримлилик қанчалик улуғ фазилат эканлигини шу пайтгача виждон азоби билан яшаган, эндиликда рўйхатдан чиқарилган фуқаролар яққол ҳис қилишмоқда. Яна бир адашган ватандошимиз сўзларига қулоқ тутсак:
“Қалбим тоза демайман, лекин ҳақиқий хизмат қилгим келяпти. Бу қалбимнинг тўридан чиқиб келаётган гап. Ватан учун юрт учун Президентимиз қанчалик куйиб-ёнмоқда. Халқининг яхши яшаши учун у ёққа боряптилар, бу ёққа боряптилар. Барча имкониятларни халқи учун яратиб бермоқдалар. Мен ҳам худди шундай хизмат қилгим келяпти” деди-ю кўз ёшларини тиёлмади.
Бугун жамоатчилик, ўзини ўзи бошқариш орган вакиллари, диний ташкилот ходимлари ва туман отинойилари турли сохта ваъдаларга учиб, ҳавойи гаплар ортидан эргашган фуқаролар билан суҳбат ўтказиб, уларнинг муаммолари билан яқиндан танишиб, амалий кўмак бермоқдалар. Шунингдек, уларнинг фарзандларини жамоат ишларига яъни касб-ҳунар тўгараклари, спорт мусобоқаларига жалб қилишга кўмаклашилмоқда. Мақсад, юрагида имон-эътиқоди бор ҳар бир инсонни юртига содиқ бўлиб хизмат қиладиган, ҳақиқий ватанпарвар қилиб тарбиялашдир.
ХУМОРБЕГИМ
Мақолалар
