Ҳурматли порталимиз мухлислари! Сиз азизларни кириб келаётган Рамазони шариф билан муборакбод этамиз.
Сайт ижодкорлари Сизга мамнуният билан шуни маълум қиламизки, анчадан бери амалга оширишни режалаштириб юрган “Muslim Radio” лойиҳамиз раҳмат ойи остонасида ўз якунига етди. Ҳозирда мухлисларга тақдим этиш учун тайёр бўлди.
Эртага муборак Рамазон ойининг биринчи кунида интернет радиомиз ўз фаолиятини бошлайди, иншоаллоҳ.
Онлайн радиода сизга манзур ва манфаатли бўладиган мавзуларда маърифий суҳбатлар, дунёга машҳур қорилар ва юртимиз ҳофизи Каломларининг гўзал тиловатлари ҳамда “Минг бир ҳадис”, “Қуръони карим маънолари таржимаси”, “Аёллар саҳифаси”, “Онлайн дарслар”, “Зиёратгоҳлар”, “Саволларга жавоблар”, “Кун янгиликлари” ва “Аудио китоб” каби кўплаб рукнларда эшиттиришларни тинглаб баҳраманд бўласиз.
Ушбу онлайн радио барчамизга муборак бўлсин!

Ўзбекистон мусулмонлари идораси
Матбуот хизмати

ЎМИ Матбуот хизмати

Ўзбекистон мусулмонлари идораси Фатво ҳайъати милодий 2018 йил (ҳижрий 1439 йил) учун ЗАКОТ нисоби 1 грамм тиллонинг бугунги кунда бозорларимиздаги ўртача нархи 188 235 (бир юз саксон саккиз минг икки юз ўттиз беш) сўм атрофида эканини эътиборга олиб, 85 грамм тилло ҳисобидан закот нисоби 16 000 000 (ўн олти миллион) сўм экани ва мазкур сумманинг қирқдан бир (1/40) ҳиссаси, яъни 400 000 (тўрт юз минг) сўм миқдорда закот чиқаришни маъқуллади.

Бу йилги ФИТР садақасининг миқдори вилоят, шаҳар ва туманларимизнинг бозорларидаги 2 килограмм буғдой нархидан келиб чиққан ҳолда белгиланди. Масалан, 2018 йилда Тошкент шаҳар бозорларида 1 килограмм буғдойнинг нархи ўртача 2500 (икки ярим минг) сўм бўлса, демак 2 килограмм буғдой нархи 5000 (беш минг) сўм бўлади.

Бу йилги ФИДЯ миқдори доимий узр билан рўза тутолмайдиган кишилар учун бир оч одамнинг бир кунлик озиқ-овқати баробарида бўлиб, ўртача 12 000 (ўн икки минг) сўм, деб белгиланди.

Ўзбекистон мусулмонлари идораси Матбуот хизмати

Ўзбекистон мусулмонлари идораси Наманган вилоят Наманган шаҳридаги масжидларда 2018 йил муборак Рамазон ойини муносиб кутиб олиш ва кўратинки кайфиятда ўтказиш ҳамда намозхонларга қулай шарт-шароитлар яратиш мақсадида масжидлар томонидан кўплаб ишлар амалга оширилди.

“Муборак Рамазон ойини муносиб тарзда ўтказиш тўғрисида” Ўзбекистон Республикаси Президентининг қарори ижросинини таъминлаш юзасидан кириб келаётган Рамазон ойида қилинадиган ибодатларда бериладиган савоблар даражаси баландлиги, бу ойда бошқа ойларга қараганда кўпроқ хайрли ишларни ўтказиш лозимлиги, ўзаро меҳр-оқибат кўрсатиш, беморлардан хабар олиш савобли амал эканлиги, кам таъминланган оилаларга моддий ва маънавий кўмак беришлар ҳақида тарғибот-ташвиқот ишларини ўтказмоқдалар.

Шунингдек, Ўзбекистон мусулмонлари идорасининг 2018 йил 10 май кунги 01 А /058-сонли буйруғини ижросини таъминлаш учун Наманган шаҳридаги барча масжидларда жорий йилининг 12 май куни “Озодалик куни” ўтказилди. Ҳар бир масжид ўзининг хонақоҳ, айвон ва шийпонларни махсус чанг ютгичлар билан тозалади ва ойналари артилди. Шунингдек овоз кучайтиргичлар соз ҳолга келтирилди.

Рамазон ойи муносабати билан барча масжидлардаги мавжуд ўт ўчириш асбоб-анжомлари кўздан кечирилди, барча зарур буюмлар шай ҳолга келтирилди. Жорий йилнинг 16 май куни Наманган шаҳридаги “Абу Юсуф” жоме масжидида шаҳардаги мавжуд масжид имом-хатиб ва мутаваллилар иштирокида Наманган шаҳар ИИБ ЁХБ билан ҳамкорликда Рамазон ойи кириб келиши ҳамда “Ёнғин профилактикаси куни” муносабати билан қўшма амалий семинари ўтказилди. Семинарда соҳа мутахассислар томонидан йиғилганларга фуқаролар эвакуацияси, ўт ўчириш анжомларини ишлатиш тартиб-қоидалари кўрсатилди ва мутахассислар иштирокчилар томонидан берилган саволларга жавоблар беришди.

Наманган шаҳар бош имом-хатиби

Аббаситдинов Мусохон

Жорий йилнинг 16 май куни “Кўкалдош” ўрта махсус ислом билим юртида Ўзбекистон мусулмонлари идораси тасарруфидаги диний таълим муассасалари Ҳадис фани ўқитувчилари ўртасида “Йилнинг энг яхши ўқитувчиси” кўрик-танлови ўтказилди.

“Йилнинг энг яхши ўқитувчиси” кўрик-танлови Ўзбекистон мусулмонлари идорасининг 2018 йил 30 мартдаги “Йилнинг энг яхши ўқитувчиси” кўрик-танловининг республика босқичини ўтказиш тўғрисида”ги 01А/041-сонли буйруғига кўра ташкил этилди.

Кўрик-танловда Тошкент ислом институти, Мир Араб олий мадрасаси ва ўрта махсус ислом билим юртларининг Ҳадис фани ўқитувчилари иштирок этдилар.

Кўрик-танловга Ўзбекистон мусулмонлари идораси раиси ўринбосари Шайх Абдулазиз Мансур ҳазратлари, Ўзбекистон мусулмонлари идораси Таълим ва кадрлар тайёрлаш бўлими бошлиғи Жалолиддин Нуриддинов, бўлим мутахассислари Салоҳиддин Шерхонов ва Акбар Дўсматов, “Ҳилол нашр” нашриёти раҳбари Исмоилжон Муҳаммад Содиқ, Тошкент ислом институти ректори Уйғун Ғофуров, институт ўқитувчиси Абдуллатиф Аллоқулов, Тошкент ислом университети ўқитувчиси Жасур Нажмиддиновлар ташриф буюрдилар.

Иштирокчилар танловда қуйидаги 4 та йўналиш бўйича билим ва маҳоратларини намойиш этдилар:

а) оғзаки савол-жавоб (дарсни ташкил қилиш, дарс ўтиш асносида фойдаланадиган услублар, жамиятни маънавий савиясини ошириш учун амалга оширилиши керак бўлган чоралар ва шу каби педагогнинг маҳоратини намойиш қиладиган саволлар берилади).

б) билет асосида берилган масалани ҳадисларни шарҳлаш орқали ечиш. (Ҳар бир  билет 1 та саволдан иборат бўлиб, ҳадис илми, мазҳаб ва мазҳаббошилар ҳақидаги турли ихтилофли қарашларга қарши ҳадисларни шарҳлаш орқали раддия берилади).

в) билет асосида берилган ҳадисни шарҳлаб бериш (ҳадис таржима қилиниб, унга доир ҳукмларни баён қилинади).

г) оғзаки савол-жавоб (билет саволлари асосида жавоб берилади. Ҳар бир  билет 3 та саволдан иборат бўлиб, муҳаддислар ҳаёти, ҳадис асарлари, уларнинг турлари ва мусталаҳул ҳадис қоидаларига оид саволлар қўйилади).

Ҳакамлар ҳайъати иштирокчиларнинг чиқишларини баҳолаб бордилар.

Танлов низом талаблари асосида холис, шаффоф ва адолатли ўтиши Ўзбекистон мусулмонлари идораси кузатувчилари томонидан назорат қилинди.
“Йил ўқитувчиси-2018” мусобақаси якунида Ўзбекистон мусулмонлари идораси Таълим ва кадрлар тайёрлаш бўлими мутахассиси А.Дўстматов сўз олиб, мусобақа натижалари юзасидан ўз фикр-мулоҳазалари билан ўртоқлашди. Сўнг “Кўкалдош” ўрта махсус ислом билим юрти маънавий-маърифий масалалар бўйича мудир ўринбосари А.Ғаниев имтиҳон натижалари билан таништирди.
Ҳакамлар ҳайъати ҳисоб-китобларига кўра, биринчи ўринни Тошкент ислом институти ўқитувчиси Абдулҳодий Ғиёсов 1-ўринни эгаллаб, 1-даражали диплом, энг кам иш ҳақининг 10 баробари миқдорида пул мукофоти ва телевизор совғасига эга бўлди.
2-ўринни “Мир Араб” ўрта махсус ислом билим юрти ўқитувчиси Эркин Қудратов қўлга киритди, у 2-даражали диплом ҳамда микротўлқинли печ билан мукофотланди.
3-ўрин “Мир Араб” олий мадрасаси ўқитувчиси Иброҳим Саидовга насиб этди, унга 3-даражали диплом ҳамда чангютгич совға қилинди.
Қолган иштирокчилар фахрий ёрлиқ ва 300.000 (уч юз минг) сўм миқдоридаги китоблар тўплами билан тақдирландилар. Шунингдек, мусобақа иштирокчилари учун «Ҳилол нашр» нашриёти томонидан ҳам китоблар тўплами совға қилинди. Совға, диплом ва фахрий ёрлиқларни Ўзбекистон мусулмонлари идораси Таълим ва кадрлар тайёрлаш бўлими мутахассислари А.Дўсматов ва С.Шерхонов топширдилар.

Шунингдек, шу куннинг ўзида Ўзбекистон мусулмонлари идорасининг “Мовароуннаҳр” нашриёти томонидан чоп этилган китоблар кўргазмаси ҳам бўлиб ўтди. Кўргазмага диний-маърифий мазмунда 30 турдаги араб, инглиз, рус ва ўзбек тилларидаги китоб, газета ва журналлар олиб келинди. Кўргазмага ташриф буюрганлар учун шу ернинг ўзидан ўзларига маъқул адабиётларни ҳарид қилиш имкониятлари яратилди.

«Кўкалдош» ахборот хизмати