22 июль куни Ўзбекистон мусулмонлари идорасида “Ҳаж-2017” мавсумида зиёратчиларга хизмат кўрсатувчи ишчи гуруҳи йиғилиш бўлиб ўтди.

Унда Дин ишлари бўйича қўмита раиси ўринбосари Ў.Ҳасанбоев, ЎМИ раиси ўринбосари Шайх Абдулазиз Мансур, ЎМИ раиси ўринбосари И. Иномов, ЎМИ Халқаро алоқалар бўлими мудири М-А.Шакиров ва “Ҳаж-2017” мавсумида зиёратчиларга хизмат қилувчи ишчи гуруҳи, тиббиёт гуруҳи ҳамда ошпазлар гуруҳи иштирок этишди.

Тадбирда ишчи гуруҳи  томонидан риоя этиладиган қонун-қоидалар, уларнинг бурч ва масъулиятлари, ҳаж ибодати рукнлари, сафарга жўнаб кетиш ҳамда Саудия Арабистонидаги ташкилий ишларнинг ишчи гуруҳига тааллуқли бўлган жиҳатлари атрофлича ёритилди.

Шунингдек, сафарга доир ҳужжат ишларида нималарга эътибор қаратиш лозимлиги ва гуруҳдаги зиёратчилар билан ишлаш давомида уларнинг паспорт ва бошқа ҳужжатларини юритиш қоидалари борасида ҳам маълумот берилди.   

Тадбир якунида мутасаддилар гуруҳ раҳбарлари томонидан берилган барча саволларга батафсил жавоб бердилар.

Куни кеча Тошкентдаги “Шайх Зайниддин” жоме масжидида “Ҳаж-2017” мавсумида зиёратчиларга хизмат кўрсатувчи гуруҳ раҳбарлари учун йиғилиш бўлиб ўтди.

Унда Дин ишлари бўйича қўмита масъул ходимлари М.Йўлдошев, ЎМИ Матбуот котиби Ж.Нуриддинов, ЎМИ Халқаро алоқалар бўлими мудири М-А.Шакиров ва гуруҳ раҳбарлари иштирок этишди.

Тадбирда гуруҳ раҳбарлари томонидан риоя этиладиган қонун-қоидалар, уларнинг бурч ва масъулиятлари, ҳаж ибодати рукнлари, сафарга жўнаб кетиш ҳамда Саудия Арабистонидаги ташкилий ишларнинг гуруҳ раҳбарларига тааллуқли бўлган жиҳатлари атрофлича ёритилди.

Шунингдек, сафарга доир ҳужжат ишларида нималарга эътибор қаратиш лозимлиги ва гуруҳдаги зиёратчилар билан ишлаш давомида уларнинг паспорт ва бошқа ҳужжатларини юритиш қоидалари борасида ҳам гуруҳ раҳбарларига маълумот берилди.   

Тадбир якунида мутасаддилар гуруҳ раҳбарлари томонидан берилган барча саволларга батафсил жавоб бердилар.

Гуруҳ раҳбарлари учун йиғилишлар Республика ҳудудларида давом этмоқда 

 Халқаро алоқалар бўлими

Кўплаб жарроҳлик анжомлари: скальпел, тиббиёт арраси, қисқич, ингичка қайчиларни мусулмон жарроҳи ал-Заҳровий  (al-Zahrawi) ўйлаб топган. Майда жониворларнинг ичакларидан жарроҳлик амалиётидан кейин инсоннинг ички органларни тикишда қўлланадиган, бора-бора инсоннинг танасига сингиб кетадиган ипни (кетгут) ҳам айнан у ўйлаб топган эди. XIII асрда, Вильям Гарвий (William Harvey) туғилишидан 300 йил бурун мусулмон врачи Ибн Нафис (Ibn Nafis) қоннинг инсон танасида қандай айланишини тасвирлаб берган эди. Шунингдек, мусулмон олимлари мураккаб жарроҳлик амалиётидан олдин қўлланадиган анестизия ва катараткани қазиб оладиган ичи бўш игнани ҳам ихтиро қилган.

Робия ЖЎРАҚУЛОВА тайёрлади.

2017-йилнинг охирига келиб, Жазоирда катталиги бўйича Макка шаҳридаги Масжидул Харам ва Мадина шаҳридаги Масжидун Набавийдан кейинги ўринда турувчи масжид очилади. Масжиднинг қурилиши ва дизайни хитойлик қурувчиларга ишониб топширилган бўлиб, ушбу янги меъморй иншоот “Жазоир ва Хитой дўстлигининг рамзи” сифатида кўрилмоқда. 

Масжид қурилишини ўз бўйнига олган Хитой компанияси директори Чжоу Шеннинг сўзларига кўра, масжид биноси лойиҳаси узоқ йиллик вақт синовидан ўтган тажриба асосида лойиҳалаштирилган. 

Масжиднинг компютердаги лойиҳаси

“Ушбу масжид нафақат мусулмонларнинг намози ўқиши учун балки ислом ва маданиятлар ўртасида боғлиқликни мустаҳкамлашга ҳам хизмат қилади. Бундан ташқари, бинода энг замонавий кутубхона, 300 та талабаларга мўлжалланган мадраса ва хайрия фонди ҳам жойлашади” - дея маълумот бериб ўтди Жазоир Уй-жой ва коммунал хизматлар вазири ўринбосари ва масжид қурилишига масъул бўлган Аҳмад Маданий.

Кеча Ўзбекистон мусулмонлари идораси тасарруфидаги ўрта махсус билим юртларида кириш имтиҳонлари бўлиб ўтди.

Абитурентлар “ўзбек тили ва адабиёти” фанидан диктант ёзишди, маънавият ва маърифат, чет тили ва тарих фанидан тест саволларини ечишди.

Имтиҳоннинг қанчалик адолатли ўтгани борасида шубҳа-гумонлар туғилмаслиги учун елимланган махсус қопларда келган имтиҳон мавзуларини ота-оналар ва бошқа кузатувчилар гувоҳлигида абитурентларнинг ўзлари очиб, мавзуни ҳам уларнинг ўзлари танлади.

Диктантларни абитурентларга таниқли тилшунос ва адабиётшунос олимлар ўқиб берди ва натижаларини ҳам уларнинг ўзлари текширишди.

Текширишнинг холислиги қуйидаги тартибда таъминланди. Ўқитувчилар ўзларига тайин этилган аудиторияда диктант ўқиб келишади. Кейин эса имтиҳон варағидаги абитурентнинг исми-шарифи, гуруҳи ёзилган қисми олиб қолинади ва  диктантларнинг ҳаммаси  бир жойга тўпланади. Бу ҳолда ўқитувчининг қўлида фақат диктант бўлади – абитурент исми-шарифи, гуруҳи ёки бошқаси, хуллас, абитурент шахсига дахлдор ҳеч нарса бўлмайди. Ўқитувчилар гуруҳи ҳамма диктантни текшириб бўлганларидан сўнг имтиҳон варағининг қобиғи, яъни абитурент исми-шарифи ёзилган қисми тарқатилади. Диктантлар унинг ичига жойлаб чиқилганидан сўнг қайси ўқитувчи қайси гуруҳдан диктант олган бўлса, ўзи диктант ёздирган абитурентларга тўғри баҳо қўйилганми, йўқми, яна бир бор устидан қараб чиқади. Бу ишни ниҳоясига етказганидан кейин эса қўйилган балларни баҳога айлантириб қабул ҳайъатига топширади.

Тест саволларининг жавоблари ҳам ана шунга монанд адолатли тарзда текшириб чиқилди.

Абитурентларни кўрган киши уларнинг ҳар бирининг имтиҳонларни аъло даражада топшириб олишини истайди. Чунки ёшларнинг қалбидаги эзгуликка интилиш, илмга ташналик юзига нур бўлиб балқиб турибди. Парвардигоримиз шундай ажойиб  ёшларимизнинг ҳаммасининг йўлини очиб, уларни ўзлари истаган таълим даргоҳининг талабаларидан қилсин деб дуога қўл очиб қолдик.

Дамин ЖУМАҚУЛ