Қуръони каримни қироат қилиш савоби катта амал. Аллоҳ таоло марҳамат қилган: “Аллоҳнинг Китобини тиловат қиладиган, намозни баркамол адо этадиган ва Биз уларга ризқ қилиб берган нарсалардан махфий ва ошкора эҳсон қиладиган зотлар сира касод бўлмайдиган тижоратдан (ажру савоб бўлишидан) умидвордирлар. Зеро, (Аллоҳ) уларнинг ажрларини комил қилиб берур ва Ўз фазлини уларга янада зиёда қилур. Албатта, У мағфиратли ва оз хайрли амалларни ҳам қабул қилувчидир” (Фотир, 29-30).

Бу оятда дастлаб Қуръон тиловат этиш зикр қилиниши Қуръони каримни ўқиш ва унга амал қилиш ҳар бир мўмин-мусулмоннинг  доимий одати бўлиши лозимлигига ишора. Ҳар бир мусулмон намоз ўқиш учун керак бўлган сураларни ёддан билиши фарзи айн, Қуръони каримни тўлиқ ёдлаш эса фарзи кифоядир. Яъни, бир жамоадан айрим кишилар уни тўла ёдласа, бошқаларнинг зиммасидан соқит бўлади.

Усмон розияллоҳу анҳу ривоят қилади: «Расуллуллоҳ соллаллоҳу алайҳи васаллам бундай деганлар: “Сизларнинг энг яхшиларингиз, Қуръонни ўрганиб, уни ўргатадиганларингиздир”» (Имом Бухорий ривояти).

Қуръонни ёдлаш бошқа илмларни ҳам ўзлаштиришга ёрдам беради. Қуръон – нурдир. Уни ёдлаган кишининг қалби мунаввар бўлади. Қалбнинг ободлиги имон-эътиқод ва Қуръон тиловати билан бўлади. Ибн Аббос розияллоҳу анҳу ривоят қилади: «Расули акром соллаллоҳу алайҳи васаллам: “Қалбида Қуръондан бир оят ҳам бўлмаган киши хароба уйга ўхшайди”, деганлар” (Имом Термизий ривояти).

Расулуллоҳ соллаллоҳу алайҳи васаллам: “Эй Абу Зарр! Эрталаб туриб Аллоҳнинг китобидан бир оят ўрганишинг сен учун юз ракат нафл намозидан афзалдир”, дея марҳамат қилганлар.

Мусулмон киши Аллоҳнинг китобини имкони қадар ёдлаши керак. Зеро, Қуръонни ёд олган кишининг мақоми икки дунёда юксак бўлади. Қуръони каримни тўлиқ ёд олишнинг бир қанча услублари бор. Қуйида улардан энг машҳурларини келтирамиз:

1-услуб. Қуръон ярим бет ёки бир, икки, уч, тўрт, беш бетдан бошидан охиригача уч юз мартадан ўқиб чиқилади, иккинчи қайтаришда икки юз мартадан ва учинчисида эса, юз мартадан такрор қилинади.

2-услуб. Олдин ҳар бир поранинг фақат бош бетлари ёдлаб чиқилади. Кейин иккинчи бетлари ёд олинади. Сўнгра учинчи, тўртинчи ва ҳоказо бетларини ёдлаш давом эттирилади. Бу услубда пораларнинг бўлиниш жойлари яхши ёдда қолади.

3-услуб. Ҳар бир бет юзтадан ўқиб чиқилади. Бир марта тўлиқ ёдлаб, хатм қилгач, иккинчи марта яна бошқатдан хатм қилишни бошлайди ва яна юз мартадан такрор қилади. Хатмни тугатгач, яна бошидан бошлайди. Шу тариқа саноғи мингтага етгунича такрор ёдлайверади.

4-услуб. Бир сура тўлиқ, пишиқ-пухта ёдланмагунича бошқа сурани ёдлашга ўтилмайди. Бу услуб Қуръонни охиридан бошига қараб ёд олишда қулай. Саҳобалар розияллоҳу анҳумларнинг Қуръон ёдлаш услублари шунга яқин бўлган.

Гулобод ҚУДРАТУЛЛОҲ қизи,

“Хадичаи Кубро” аёл-қизлар мадрасаси мударрисаси

ЎМИ  Матбуот хизмати

Аллоҳнинг зоти тўғрисида чуқур фикр юритмаймиз. Унинг дини ҳақида ҳам баҳсу жадал қилмаймиз. Қуръони карим тўғрисида ҳам худди шундай. Қуръон Аллоҳнинг каломи, уни Жаброил алайҳиссалом олиб келиб, Муҳаммад соллаллоҳу алайҳи васалламга таълим берганлар, деб имон келтирамиз. Қуръон сўзига тенг келадиган сўз йўқ. Уни яратилган демаймиз. Аллоҳнинг каломи махлуқ эмас, балки унинг лафзу ҳарфлари, қоғоз ва қироати махлуқ.

Мусулмон жамоасига мухолиф бўлмаймиз. Қибла аҳлини гуноҳ иш қилсалар ҳам кофир санамаймиз, башарти унинг гуноҳ иш эканини инкор этмаса.

Имонли кишига қилган гуноҳи мутлақо зарар бермайди ҳам демаймиз. Солиҳ мўминларнинг тавбаларини қабул этиб, гуноҳларидан ўтиб, жаннатга дохил қилади, деб Аллоҳдан умид қиламиз. Аммо улардан қатъий хотиржам бўлиб, жаннатий деб гувоҳлик бермаймиз.

Мўминларнинг гуноҳкорлари ҳаққига истиғфор айтамиз. Уларга Аллоҳнинг азоби бўлишидан хавфсираймиз. Аммо уларни Аллоҳнинг раҳматидан ноумид қилмаймиз. Аллоҳнинг азобидан хотиржам ва раҳматидан ноумид бўлиш исломдан бегона қилиб қўяди. Ҳақиқат умид ва қўрқув ўртасидадир. Мўмин киши имондан чиқиши учун имонга киришига сабаб бўлган нарсаларни инкор этган бўлиши керак.

Имон Расули акрам соллаллоҳу алайҳи васаллам Аллоҳ томонидан келтирган барча маълумотни тил билан иқрор қилиб, дил билан тасдиқлашдир.

Расулуллоҳ соллаллоҳу алайҳи васаллам орқали бизга етказилган барча шариат аҳкомлари ва изоҳларини ҳақ деб биламиз.

«Ақоид матнлари»дан

ЎМИ Матбуот хизмати

Ўзбекистон Республикаси Конституцияси қабул қилинганининг 25 йиллиги арафасида мамлакатимиз Президенти Шавкат Мирзиёев 2 минг 700 нафар судланганларни афв этиш тўғрисидаги фармонни имзолаган эди.
Афв этиш тўғрисидаги ҳужжатга мувофиқ судланганлар тез орада оиласи бағрига қайтарилди ва мамлакатимизда амалга оширилаётган ислоҳотларнинг фаол иштирокчисига айланиши учун жамиятга қайтиш имкони берилди.
Авф этилган фуқаролар ва ички ишлар идораларининг махсус рўйхатида турган шахслар билан ишлаш тизими яратилиб, улар турли жамоат тадбирларига жалб этилмоқда.
Шундай тадбирлардан бири 2018 йил 21 январь куни Тошкент шаҳрининг Миробод тумани ҳокимлиги ва бош имом-хатиби ташаббуси билан ташкил этилди.
Адашиб турли оқимларга кириб қолган, бугунги кунда рўйхатдан ўчирилган 23 нафар мирободлик фуқаролар учун туман бош имоми О.Холмуродов таклифига кўра ва туман ҳокимининг буйруғига асосан Самарқанд шаҳрига зиёрат саёҳати уюштирилди.
Туман ҳокимияти томонидан зиёратчилар учун махсус автобус ташкиллаштирилиб, тушлик, бориш-келиш харажатлари ҳокимият томонидан қопланди.
Зиёратчилар Имом Ал-Бухорий мажмуаси, Шоҳи Зинда, Гўри Амир ва Дониёр пайғамбар зиёратгоҳларида бўлишди. Сафарда туман ички ишлар бўлими ходимлари ва имом-хатиб ноиблари ҳам иштирок этишди.

ЎМИ Матбуот хизмати

ЎМИ Матбуот хизмати

АҚШда дунёда биринчи бўлиб ишга тушган “Смарт” дўкон ўз фаолиятини юритмоқда. Харидор харидни амалга оширгач, чиқиш жойидаги турникетга  смартфонни тўғрилаб,  QR – кодни сканер қилса бас, сотиб олинган нарсалар учун ўлов пластик картадан автомат тарзда Amazon аккаунти орқали ечиб олинади. Харидорларни камера ва датчиклар кузатиб боради. Кузатув нафақат товарни  олганда, балки уни қайтариб жойига қўйишини ҳам кузатиб боради, деб хабар беради “Islam today” интернет-нашри.

ЎМИ Матбуот хизмати