Рамазон ойининг илк кунида Наманган вилоятидаги Мингбулоқ нефть конида олиб борилаётган инвестицион лойиҳалар доирасидаги синаш ишлари мобайнида илк нефть қазиб олинган.
Бой захирага эга Мингбулоқ нефть конида ер ости бойликларини ўзлаштириш тадбирлари анча мураккаб бўлиб, бу ишга Хитой Халқ Республикаси CNPC миллий нефть-газ корпорациясининг бой тажрибага эга мутахассислари, илғор технология воситалари жалб қилинган.
Лойиҳа ижроси масъулияти чекланган жамият шаклидаги “Мингбулоқнефть” ўзбек-хитой қўшма корхонаси томонидан амалга оширилмоқда. Кейинги икки йил давомида бу ерда М 15-қудуғини бурғилаш ва бошқа бир қатор лойиҳавий ишлар олиб борилди.
Экспертларнинг фикрича, Мингбулоқ кони бир неча сабабларга кўра оддий эмас, деб саналади. Конни ишга туширишда асосий муаммолар қуйидагилардир: унинг ўта чуқурликда эканлиги (6000 м ва ундан ҳам ортиқ); юқори пласт босимлари (115 МПа’дан ортиқ), пласт ҳароратлари (168 даражадан ортиқ) ва бошқа омиллар.
Хитойнинг СNPC нефть компанияси Хитойнинг Торим ботиғида шундай конлар билан ишлаб кўриб орттирган тажрибасини Мингбулоқ конида ҳам қўллаган.
Аллоҳ таоло ушбу нефть конини баракотли қилсин, халқимиз фаровонлигига хизмат қилишини насиб айласин.

Ўзбекистон мусулмонлари идораси Матбуот хизмати

Саҳарлик – Расулуллоҳ соллаллоҳу алайҳи васалламнинг суннатлари. Абдуллоҳ ибн Ҳорис розияллоҳу анҳудан ривоят қилинади: “Расулуллоҳ соллаллоҳу алайҳи васалламнинг ҳузурларига кирганимда у зот соллаллоҳу алайҳи васаллам саҳарлик қилаётган эканлар. Шунда: “Албатта, саҳарлик баракадир”, дедилар (Имом Насоий ривояти).

Абу Саид Худрий розияллоҳу анҳу айтадилар: “Расулуллоҳ соллаллоҳу алайҳи васаллам: “Саҳарлик қилиш – баракадир, бир қултум сув билан бўлса ҳам саҳарлик қилинг”, дедилар (Имом Аҳмад ривояти).

Салмон Форсий розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Барака жамоат ва саҳарликдадир”, дедилар (Имом Табароний ривояти) 

Набий алайҳиссалом саҳобаларга саҳарлик қилиш ва унинг фазилатлари ҳақида сўзлаб берардилар, улар билан бирга саҳарлик қилардилар. Зайд ибн Собит розияллоҳу анҳу бундай дейди: “Набий соллаллоҳу алайҳи васаллам билан саҳарлик қилдим. Сўнгра у зот бомдод намозига турдилар” (Имом Бухорий ривояти).

Ирбоз ибн Сария розияллоҳу анҳу айтади: “Расулуллоҳ соллаллоҳу алайҳи васаллам Рамазон ойида мени саҳарликка чақириб, “Барака дастурхони сари шошилгин”, дедилар (Имом Абу Довуд, Имом Насоий ривояти). 

Саҳарлик Ислом умматини аҳли китобдан ажратиб турувчи амаллардан бири ҳамдир. Амр ибн Осс розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Бизнинг рўзамиз билан аҳли китобнинг рўзаси орасидаги фарқ саҳарлик қилишдадир”, дедилар (Имом Муслим ривояти). 

Саҳарлик фазилатларидан яна бири унда дуо қабул бўлувчи вақт бор. Бу ҳақда Абу Ҳурайра розияллоҳу анҳудан ривоят қилинади. Расулуллоҳ соллаллоҳу алайҳи васаллам: «Аллоҳ таоло ҳар кечанинг охирги учдан бири қолганда: “Ким Менга дуо қиладики, Мен уни қабул қилсам, ким Мендан сўрайдики, Мен унга берсам, ким Менга истиғфор айтади, Мен уни мағфират қилсам”, дейди», дедилар (Имом Муслим ривояти). 

Саҳарлик қилиш Аллоҳ ва фаришталарнинг раҳматига ноил қилади. Абу Саид Худрий розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Саҳарлик қилувчига Аллоҳ ва фаришталарнинг раҳмати бўлади”, дедилар (Имом Аҳмад ривояти). 

Саҳарликда хурмо истеъмол қилиш Расулуллоҳ соллаллоҳу алайҳи васалламнинг суннатларидандир. Пайғамбаримиз соллаллоҳу алайҳи васаллам: “Хурмо мўмин учун қандоқ ҳам яхши саҳарлик”, деганлар (Имом Абу Довуд ривояти).

Аллоҳ таоло барчамизга Пайғамбаримиз соллаллоҳу алайҳи васалламнинг суннатларига амал қилишни насиб этсин.

Даврон НУРМУҲАММАД

тайёрлади.

Ушбу мақолада Набий соллаллоҳу алайҳи васалламнинг меҳрибонликларини кўрамиз.

Абу Ҳурайра розияллоҳу анҳудан ривоят қилинади: Набий саллоллоҳу алайҳи васаллам: “Ҳар бир Набийнинг қабулида шак йўқ дуоси бўлади. Барча Набийлар ўз дуоларини (бу дунёда) қилиб бўлдилар. Мен ўз дуойимни қиёмат куни умматимга шафоат бўлиши учун беркитиб қўйганман. У менинг умматимдан Аллоҳга ҳеч нарсани ширк қилмай ўлганларга, албатта, етгувчидир”,- дедилар. Икки шайх ва Термизий ривояти.

Бу ҳадисда ҳар бир Пайғамбарларга ижобат бўладиган дуо берилганини, улар ўша дуоларини қилиб бўлишганини, аммо Пайғамбаримиз соллаллоҳу алайҳи васалламга берилган ижобат бўладиган катта дуони у зот ўзлари учун ёки аҳли байтлари учун ишлатмай, охиратда биз умматлари учун ишлатишларини ўйлаб, беркитиб қўйганликлари айтиляпти. Бунчалик куюнчаклик, умматига қайғуриш яна қайси инсонда, қайси пайғамбарда бор?!

У зот алайҳиссалом катта дуоларини умматлари энг муҳтож бўладиган пайт – охират учун сақлаб қўйган эканлар. Бу ҳадисда у зотнинг умматларига бўлган меҳрлари, лутфлари, шафқатлари яққол кўриниб турибди. Умматларини ўзларидан ҳам, оилаларидан ҳам устун кўриб, уларни дуо қилишни кўзлаяптилар.  

Аллоҳ таоло у кишининг умматларига меҳрибонликларини васф этиб шундай деган:

لَقَدْ جَاءكُمْ رَسُولٌ مِّنْ أَنفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُم بِالْمُؤْمِنِينَ رَؤُوفٌ رَّحِيمٌ

“Батаҳқиқ, сизларга ўзингиздан бўлган, сизнинг машаққат чекишингиз унинг учун оғир бўлган, сизнинг (саодатга етишингизга) ташна, мўминларга марҳаматли, меҳрибон бўлган Пайғамбар келди”. (Ояти каримада Пайғамбаримиз соллаллоҳу алайҳи васалламнинг асосий сифатларидан бир нечаси зикр қилинмоқда. Дунё тарихида У зот соллаллоҳу алайҳи васалалмдек кишиларга марҳаматли, меҳрибон инсон бўлган эмас. Бу улкан ҳақиқатни Пайғамбаримиз соллаллоҳу алайҳи васалламнинг сийратлари ва ҳадисларидан билиб оламиз.) (Тавба сураси, 128-оят).

Расулуллоҳ соллаллоҳу алайҳи васалламнинг умматларига бўлган меҳрлари ҳақида бошқа ҳадисларда ҳам аниқ мисоллар келган.

Имом Баззор раҳимаҳуллоҳ Оиша онамиз розияллоҳу анҳодан ривоят қиладилар: “Набий соллаллоҳу алайҳи васалламни мамнун ҳолда кўрганимда у зотга: “Эй Аллоҳнинг Расули, менинг ҳаққимга Аллоҳга дуо қилинг” дедим. У зот: “Эй Аллоҳ, Оишанинг аввалги ва кейинги, яширин ва ошкора гуноҳларини мағфират қилгин” деб дуо қилдилар”. Оиша онамиз розияллоҳу анҳо қаттиқ кулдилар, ҳатто кулгудан бошлари билан Расулуллоҳ соллаллоҳу алайҳи васалламнинг қўйниларига йиқилдилар. Шунда Расулуллоҳ соллаллоҳу алайҳи васаллам: “Дуоим сени хурсанд қилдими?” деб сўрадилар. Оиша онамиз розияллоҳу анҳо: “Сизнинг дуоингиз қандай қилиб мени хурсанд қилмасин?!” деб жавоб бердилар. Шу пайт Расулуллоҳ соллаллоҳу алайҳи васаллам: “Аллоҳга қасамки, бу ҳар намозда умматимнинг ҳаққига қиладиган дуоимдир!” дедилар.

Имом Аҳмад раҳимаҳуллоҳ “Муснад”да Жобир розияллоҳу анҳудан ривоят қиладилар: “Набий соллаллоҳу алайҳи васаллам урушдан, сафардан қайтишда орқадан қолиб, заифларни етаклаб (қўлтиқлаб) олар, баъзиларни мингаштириб олардилар ва барчаларининг ҳақларига дуо қилардилар”.

У зот алайҳиссалом сафардан қайтишда чарчаган, толиққан кишиларни карвондан ортда қолиб кетмасинлар деб уларни қўлтиқлаб олиш учун ортда борар, баъзиларини уловга миндириб олиб, барчаларининг ҳақларига дуо қилир эканлар.

Имом Аҳмад раҳимаҳуллоҳ Анас ибн Молик розияллоҳу анҳудан ривоят қилган ҳадисда у киши шундай деганлар: “Бир куни Расулуллоҳ соллаллоҳу алайҳи васаллам бомдод намозида Қуръондаги энг қисқа сураларни қироат қилиб, намозни тезроқ ўқиб бердилар. Намоздан сўнг биз: “Эй Расулуллоҳ, нега намозни тезлатиб ўқидингиз?” деб сўрадик. Шунда у зот: “Гўдакнинг йиғисини эшитдим. Унинг онаси биз билан намоз ўқияптимикин деб ўйладим. Боласининг олдига тезроқ борсин деб намозни тезлатиб ўқидим” дея жавоб бердилар”.

Гўдак йиғлаб қолди. Онаси ҳам боласининг йиғисидан “Боламнинг олдига тезроқ борсам эди” деб тургандир дея намозни тезроқ ўқиб, онага ҳам, болага ҳам меҳр кўрсатганлар.

Бурайда розияллоҳу анҳудан ривоят қилинади: “Бир куни Расулуллоҳ соллаллоҳу алайҳи васаллам бизга хутба қилаётган эдилар. Ҳасан ва Ҳусайн у зот тарафга қараб кела бошладилар. Уларнинг устларида қизил кўйлак бор эди. Келаётганларида йиқилиб-қоқилиб тушишарди. Шу пайт Расулуллоҳ соллаллоҳу алайҳи васаллам (минбарларидан) тушдилар-да уларни кўтариб олдилар ва олдиларига ўтқизиб, “Аллоҳ “Молларингиз ва фарзандларингиз фитнадан ўзга нарса эмас” деб рост айтган. Бу икки гўдакнинг йиқилиб тушаётганларини кўрдим. Сабр қилолмай сўзимни тўхтатиб, уларни кўтариб олдим” дедилар”.

Аллоҳ таоло севикли Пайғамбаримиз соллаллоҳу алайҳи васалламга чексиз саловот ва салом юборсин!

Шайх Саъийд ибн Муҳаммад Камалийнинг мавъизаларидан

Нозимжон Иминжонов таржимаси

Моҳи Рамазон Фарғона вилоятида ўзгача файз ва тароват билан ўтмоқда. Қутлуғ ойнинг фазли ва баракасидан барча бирдек баҳраманд бўлишга ошиқмоқда. Буни одамларнинг хайрли ишларга ҳарислиги, ибодатга ошуфталиги ва фарзу суннат амалларини бажаришга эътибори ошганидан яққол сезиш мумкин. Бу йилги Рамазон ойининг илк кунларида Фарғона вилоятига давлатимиз Раҳбарининг ташрифи ва муборак ой билан табрик қилишлари фарғоналикларни чексиз қувонтирди. Барча соҳаларда амалга оширилаётган изчил ислоҳотлар Фарғона вилояти аҳолиси ҳаётида ҳам ўз аксини топаётгани, бундан аввало одамлар рози бўлаётганини алоҳида таъкидлаш керак.
Юртимизга ўзининг файзу баракаси билан кириб келган Рамазон ойнинг ҳикматлари жуда кўп, айниқса, ҳуфтон намозидан кейин таровеҳ намозининг ўқилиши энг ҳузурбахш онлар, десак тўғри бўлади. Зеро, Расулуллоҳ соллаллоҳу алайҳи ва салламнинг Рамазонда доим адо қилган таровеҳ намози таъкидланган суннат амал ҳисобланади. Абу Ҳурайра розияллоҳу анҳу айтади: “Расулуллоҳ соллаллоҳу алайҳи ва салламнинг Рамазон ҳақида “Ким унда иймон билан, савоб умидида қоим бўлса, ўтган гуноҳлари мағфират қилинади” деганларини эшитдим” (Имом Бухорий).
Куни кеча мана шундай шариф ойнинг файзли оқшомида Ўзбекистон мусулмонлари идораси раиси, муфтий Усмонхон Алимов ҳазратлари Фарғона вилояти Данғара туманидаги “Саййидаҳмадхон” жоме масжидига таровиҳ намозини мўмин-мусулмонлар билан бирга-бирга адо этиш учун ташриф буюрдилар. Ҳазратнинг ташрифларини эшитиб, кўзлари Рамазон шукуҳи ила чақнаган, юзлари нурли, ёшлари улуғ отахонлар ҳамда таровеҳ намозида Ҳақ каломига соме бўлишни интиқлик билан кутган намозхонлар жомега тўп-тўп бўлиб кела бошлашди. Яна бир қувонарлиси, ушбу жоме масжиднинг янги биноси фойдаланишга топширилиши мўмин-мусулмонларга Рамазон ойига катта туҳфа бўлди.
Масжидни файзга тўлдириб турган намозхонларни муфтий ҳазратлари муборак Рамазон ойи билан қутлаб, ушбу ойнинг фазилатлари ҳақида сўзлаб бердилар. Муфтий ҳазрат сўзларида давом этиб, бу кунларни қадрлаш, муҳтарам Президентимиз томонларидан берилаётган шарт-шароитлар учун Парвардигоримизга шукроналар айтиш, бу неъматларнинг давомли бўлиши учун дуолар қилишни сўзладилар.

Ўзбекистон мусулмонлари идораси Матбуот хизмати