Буюк Британиянинг Кембриж шаҳрида экологик жиҳатда тоза материаллардан қурилган масжид барпо этилди. Шу кунларда ушбу масжиднинг очилиш маросими ҳам ташкил этилган.

Islam-today нашрининг маълум қилишича, мусулмонлар учун қулайлик яратиш мақсадида қурилган йирик масжидни барпо этиш учун бутун дунё хайрия жамғармалари ва ташкилотларидан маблағлар келиб тушган.

Ушбу масжидда бир вақтнинг ўзида 1 минг нафар намозхон ибодатларини амалга ошириши мумкин. Масжиднинг эътиборли яна бир жиҳати унинг экологик тоза эканидир. Масжид қурилишида экологик жиҳатдан тоза бўлган мармар ва ёғоч материалларидан фойдаланилган.

Бинонинг углерод чиқиндиларини ҳавога чиқариш миқдори бутунлай нол даражага тенг. Ёмғир сувлари эса масжиднинг том қисмидаги махсус конструкция орқали резервуарга тўпланади ва у кўчатларни суғориш ва бошқа эҳтиёжларда қўлланилиши қайд этилган.

Бундан ташқари, масжиднинг том қисмида қуёш панеллари ўрнатилган, бу масжид биносининг электр энергиясига бўлган эҳтиёжини учдан бир қисмини қондиради.

Ўзбекистон мусулмонлари идораси Матбуот хизмати

Туркистон шаҳрида яқин кунларда яна бир диққатга сазовор бўлган, эски шаҳар қисмининг безаги бўлиши кутилаётган бино қад ростлаши айтилмоқда. Қозоғистон Республикаси Бош вазири ўринбосари Асқар Маминнинг Туркистон вилоятига амалга оширган ташрифи доирасида вилоят раҳбари Умирзоқ Шукеев ҳамда Ўзбекистон Республикаси вакиллари иштирокида янги масжиднинг қурилиш ишларини бошлашга бағишланган бинонинг рамзий биринчи ғиштини қўйиш маросими ташкил этилди.

zakon.kz порталининг маълум қилишича, ушбу лойиҳа Қозоғистон Республикасининг мустақиллик куни муносабати билан ташкил этилган. Қурилишда замонавий технологиялардан фойдаланилаётгани таъкидланган.

Масжид фундаментини қуйишда махсус технология жорий қилинган. 5 минг кишилик масжиднинг ташқи ва ички безак ишлари шарқона услубда бўлиши, масжиднинг умумий майдони 20 минг квадрат метрга тенг бўлиши айтилган.

Ушбу эзгу лойиҳа икки оға-ини мамлакат – Қозоғистон ва Ўзбекистон ҳамкорлигида амалга оширилмоқда. Бу жой мусулмонлар учун қулай масканлардан бирига айланишига ишонамиз дейилади хабарда.

Мажмуа ҳудудида ибодат учун масжид, анжуманлар саройи, 400 ўринли мадраса, кутубхона ва ошхона қурилади. Қурилиш ишлари 2020 йилда якунланиши қайд этилган.

Ўзбекистон мусулмонлари идораси Матбуот хизмати

Абдулҳамид II номи билан аталувчи янги қурилган масжид Жибутидаги энг йирик масжид сифатида қайд этилди. Ушбу масжиднинг қурилиш ишлари бир йил давом этиб, декабрь ойида якунланди.

Масжид қурилиши ишларида Туркиянинг Диёнат жамғармаси катта ҳисса қўшган. Масжидда бир вақтнинг ўзида 6 минг киши намоз ўқиши мумкинлиги маълум қилинган.

Туркия парламенти спикери Мустафо Чентоп ва Жибути бош вазири Абдулқодир Комил Муҳаммад масжиднинг очилиш маросимида иштирок этдилар.

Ўзбекистон мусулмонлари идораси Матбуот хизмати

Татаристонда 2020 йилда нишонланадиган мусулмонларнинг байрамлари кунлари маълум қилинди. 2020 йилда ҳижрий 1441 йилнинг охири ва 1442 йилнинг бошланиши ва ўртаси тўғри келади.

Дастлабки ҳисоб-китобларга кўра, 2020 йилда Рамазон ойи 24 апрелда бошланади ва 30 кун давом этиши кутилмоқда. 24 май куни эса Рамазон Ҳайити нишонланиши айтилган.

Қурбон ҳайитининг биринчи куни эса 31 июль санасига тўғри келиши мумкинлиги қайд этилган.

Татаристон мусулмонлари идораси Матбуот хизматининг маълум қилишича, ТМИ Уламолар Кенгаши ушбу саналарни белгилашда маҳаллий географик ўзига хослик ва астрономик маълумотларга таянган.

Ўзбекистон мусулмонлари идораси Матбуот хизмати

Ушбу ҳафтада Қирғизистон президенти Сооронбой Жээнбеков расмий ташриф билан Бирлашган Араб Амирликларида бўлган. Ушбу ташриф доирасида икки мамлакат ўртасида бир қатор йўналишларда келишувлар имзоланиши кўзда тутилган.

Жумладан, Бишкек шаҳрида Ислом академиясини қуриш бўйича ҳам шартномалар имзоланган. Қўшни Қирғизистон Республикасида Ислом академияси ташкил этилишига талаб қанчалик муҳим экани ҳақида Ummamag.kg нашри бир қатор сўровномалар ташкил этган.

Ислом олими, Қирғизистон уламолари кенгаши аъзоси Қодир ҳожи Маликов билан суҳбатда айтилишича, қирғизистонликлар ўз юртларида исломий таълим олишда фақатгина бакалавр даражасига эришишлари мумкинлиги қайд этилган. Бакалаврдан кейинги таълим даражасини олиш учун эса хорижга чиқишга тўғри келган. Ушбу масалада ечим топиш мақсадида Қирғизистон Ислом академиясини ташкил этиш режалаштирилгани олим томонидан қайд этилган.

Ўзбекистон мусулмонлари идораси Матбуот хизмати